Read Fɨso Fi Taitùs 3 Bible Online

Taitùs 3 - Fɨso Fi bible

Taitùs 3

¹Nɔɔrɨ ətu bə̂d Kristo mbe rɨ ə Kret ni mbɨ zuunɨ bə̂d mbe nɨə tùmbɨ̀ mɨ̀mə̌d bə̀ zuunɨ mbe nɨ berɨ ɨka ɨgwɨ mɨ̀mə̌d. Tɨ mbɨ ghɨ ə rɨ̀zuə̀ əmbɨ mɨ̀mə̌d. Mbɨ tekɨ ɨnyod nɨ kɨə ghɨ̀ ɨ̀chɔ̀m.

²Tɨ mbɨ gha ə ənû rɨbɔ̀ŋ ɨgwɨ ə wə̀d. Mbɨ chub ənɨ əbɔrəbɔd, ghɨ̀ ɨ̀chɔ̀m bə̀ chwi ɨbɔtɨ fîŋ ənɨ wə̀d jìm.

³Mba bə, tɨ̀ nyaʼa kweʼ ghɨ̀ ɨnû ɨneŋ bə̀ kweʼ ghɨ̀ rɨ̀zuə̀. Mbɨ nyaʼa kweʼ tambɨ əwa tɨ̀ febə. Mbɨ nyaʼa kweʼ ghɨ tɨ̀ ben ɨ̀bòʼò əmbɨ tɨkwɨrɨ ɨnû jìm mbe nɨ nyamnyod ə feenɨə bə̀ ghaʼə. Tɨ̀ wɨə nyaʼə ghɨ̀ ɨzɨg ənɨ ə bə̂d. Tɨ̀ wɨə nyaʼə bə̀ ghɨ̀ ə̀dìì. Bə̂d mbɨə nyaʼə bàn əwa. Tɨ̀ wɨə nyaʼə bə̀ bàn à ɨnyod mbǎ mbǎ.

⁴Àyɨə ənɨ Ŋwìə̀ we nɨə chɨ̀ əwa rəŋgəʼ nyaʼa chwi ɨ̀chɔ̀m məd ɨ na bə̀ chwi ɨchî nɨ wɨ̀ ghaʼ əwa,

⁵wɨ̀ nyaʼa chɨ̀ əwa rəŋgəʼ. Chəi wɨ̀ nyaʼa ghɨ əne ɨmbə̀ʼ ɨnû chɔ̀m mɔʼɔ mbe nɨ tɨ̀ nyaʼa ghɨ̌. Wɨ̀ nyaʼa chɨ̀ əwa yeʼ ɨmbə̀ʼ ɨghəm nɨ wɨ̀ diirɨ əwa əne che ənjìm Əzwî ə Zeŋɨ sò əwa tɨ̀ zeŋ, bèŋ əwa tɨ̀ sɨ ɨghabɨ ə bɔn bɔd bə̀ nàʼ ɨ̀tènɨ̀ fi ɨ na.

⁶Ŋwìə̀ nyaʼa che ənjìm ə Yeso Kristo nɨə chɨ̀ əwa rəŋgəʼ əne naʼ Əzwî ə Zeŋɨ ze ɨ na ə̀bù-ə̀bù.

⁷Wɨ̀ nyaʼa nàʼ əne ɨmbə̀ʼ tɨ̀ we tɨ̀ rɨ chè ənjìm ɨ̀chɔ̀m we təm kùʼnɨ̀ ɨfě məd bə̀ jɨg ɨ̀tènɨ̀ rɨ mì we nɨ tɨ̀ nuŋ ɨkɔndɨ ɨ wòm.

⁸Ɨnû mbɔ̂ jìm nɨ mə̀ fə gha ɨ nən yɨ ɨnû rəsìʼ. Mə kə̀b ni à gha ɨnû mbɔ̂ kòmbɨ̀, ɨmbə̀ʼ bə̂d mbe nɨ ben ə Ŋwìə̀ we əwən bə̀ ghɨ̀ ɨnû chɔ̀m. Ɨnû mbɔ̂ yɨ ɨnû chɔ̀m. Mbɨ bɨrɨ bɨ wèèrɨ̀ wə̀d jìm.

⁹Tɨrə̀ berɨ e ənû ə mɔʼɔ nɨ ghɨ mbɨ ɨnû ɨneŋ mbe nɨ bə̂d ə taŋ ɨmbə̀ʼ mbɨwən: Mbɨ yɨ ɨnû nɨ ghàm ɨmbə̀ʼ tɨwaŋ bə̂d nɨ chəi ɨnwǐ, ɨnû nɨ ghabrɨ bə̂d mbɨ ɨnû nɨ taŋ ɨmbə̀ʼ ɨnû mbe nɨ tɨkə ə ghàə̀. Chəi njìm ənɨ ɨnû mbɔ̂. Chəi mbɨ bɨrɨ bɨ weerɨ wə̀d mɔʼɔ.

¹⁰Ənɨ à fə patɨ wə̀d mɔʼɔ we nɨə saanɨə bə̂d ɨghəm mɔʼ kɨ ɨghəm be, tɨrə̀ wɨrɨ berɨ e ənû ə mɔʼɔ nɨ ghɨ̀ mbɨ məd.

¹¹À fə bè kyerɨ e ni ɨkwɨ wə̀d wɔ̂ fə ton rəsìʼ mbɨ ni ɨ wɨə bə̀ kɨrɨ ghɨ̀ ɨnû rɨbɔ̀ŋ. Wɨ̀ fə sob i ɨsaʼi ziə.

¹²Ənɨ mə̀ tom ə Atemàs kɨ̀ ə Taikikùs əsɨ ne, kywɨ ənywɨ zə ni à zambɨ yeʼe kumnɨ əmɨ ə Nikopolìs, ɨmbə̀ʼ ɨghəm nɨ mə fə kàʼ ni mə bɨrɨ chub əŋgu ənɨ ə nyùmə̀ we nɨ ɨfə ə kɔ əku.

¹³Kywɨ ənywɨ zàmbɨ̀ chà ə Àpolòs mbɨ Zenàs we nɨ kyerɨ tɨkə ɨnə̂njɨ̀ we nɨ mbɨə wòə̀. Zə ni mbɨ berɨ ɨghɨjìm mbe nɨ mbɨ kəbɨ.

¹⁴Bə zə ni mba bə̂d kwembɨ ənû nɨ ghɨ ɨ̀chɔ̀m, ɨmbə̀ʼ mbɨ weerɨ mbe nɨ kwaŋ ɨghɨ. Tɨ mbɨ yeʼ ə bə̂d nɨ chəi mbɨə ghɨ̀ ɨ̀chɔ̀m.

¹⁵Bə̂d mɨjìm mbe nɨ yeʼ əgha mbɨ num chàʼrɨ̀ əwe. Bə chàʼrɨ̀ bə̂d Kristo mɨ̀jìm mbe nɨ ghaʼ əwa. Ŋwìə̀ ghɨ ɨ̀chɔ̀m ənɨ mbə̀n mɨjìm.