Read Fɨso Fi Filemòn 1 Bible Online

Filemòn 1 - Fɨso Fi bible

Filemòn 1

¹À yɨə mɔ̌ Pɔ̂l, nɨ mə̀ yeʼ wə̀d ndəŋ ɨmbə̀ʼ ə Kristo Yeso mbɨ Timotì nɨ yeʼ wa aŋgɔb, ŋwaʼnɨ ə̀ŋwàʼnɨ̀ zɔ̂. Tɨ̀ wɨə ŋwàʼnɨ̀ ɨ ne, àwɔ̀ Filemòn, nɨ yeʼ aŋgɔb nɨə fàʼə̀ mbɨ na. Tɨ̀ ghaʼ əwe kwàʼ rɨŋgəʼ.

²Tɨ̀ wɨə bə̀ ŋwàʼnɨ̀ ɨ ne, àwɔ̀ Afìà, nɨ yeʼ a njàbɨ. Tɨ̀ wɨə bə̀ ŋwàʼnɨ̀ ɨ ne, àwɔ̀ Akipùs, nɨ yeʼ ə sɔgyɨ̀ Kristo ɨghabɨ ə mbǎ. Tɨ̀ wɨə bə̀ ŋwàʼnɨ̀ əmbɨ ə bə̂d mɨ̀jìm mbe nɨ yeʼ ɨŋga ɨfetɨ bə̂d Kristo we nɨə nyɨ ɨŋga e nəb.

³Ŋwìə̀ a Mbǎʼ mbɨ Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən.

⁴Mə wɨə nàʼə̀ məben-əwe əmbɨ ə Ŋwiə̀ ɨghəm jìm ənɨ mɨə kɔ̀ŋgɨ̀ əməd kɔndɨ əwe.

⁵Mə wɨə ghɨ̀ əne ɨmbə̀ʼ ɨghəm nɨ mə zu ɨchî nɨ à ghaʼ bə̂d Ŋwiə̀ mɨ̀jìm, bə̀ zu ɨchî nɨ à ben Ə̀nùŋɨ̀sɨg Yeso.

⁶Mə wɨə kɔ̀ŋgɨ̀ ə Ŋwiə̀ ni ɨchî nɨ àwɔ̀ ə ghà ɨnû ɨmbə̀ʼ e benɨ, ə ze tɨ̀ zɨə ghɨ̀ ni bə̂d jeŋgɨ kyerɨ ɨ̀chɔ̀m jìm mbe nɨ yeʼ wa ɨchî nɨ tɨ̀ yeʼ ənɨ fɔtɨ mbɨ Kristo.

⁷Aŋgɔb, ɨchî nɨ à ghaʼ bə̂d ə fə ghɨ̀ ni ɨghaʼi kaŋ swi ɨŋga mɨ fîŋ. Ɨchî nɨ àwɔ̀ ə zùtə̀ fîŋ rɨ bə̂d Ŋwiə̀ fə bə̀ nəərɨ əmɨ.

⁸Mə we tɨ̀ mə berɨ fîŋ nɨ ka ɨchî nɨ mə̀ yeʼ ənɨ ɨfɔtɨ mbɨ Kristo nɨ gha ɨ ne ni à ghɨ ənû ze nɨ kuʼnɨ,

⁹àyɨə ɨchî nɨ mə ghaʼ əwe, mə kə̀b yeʼ nɨ buʼ ɨbɔ ɨ ne. À yɨə mɔ̌ Pɔ̂l, nɨ mbɨ zɨ əmɨ ə ndəŋ ɨmbə̀ʼ ɨghəm nɨ mə təm ənɨ ɨkum Kristo Yeso,

¹⁰ə buʼ ɨbɔ ɨ ne ɨmbə̀ʼ mɨ wan, Ònèsimùs, nɨ mə̀ yeʼ mbǎʼ məd ɨchî nɨ mə̀ yeʼ ə nəb ndəŋ.

¹¹À nyaʼa rɨmbì, chəi wɨ̀ nyaʼa berɨ ə̀fàʼì ɨ ne, àyɨə tɨ̀nîn wɨ̀ fə berɨ ə̀fàʼì ɨ ne bə̀ berɨ ɨ num.

¹²Mə wɨə wɨrɨə chà əməd ɨ ne, məd we nɨ kaŋ yeʼ mɨ fîŋ.

¹³Mə kàŋ kə̀ʼ ghaʼ nɨ nuŋ əməd əgha mbɨ num, ɨmbə̀ʼ ɨ we tɨ̀ wɨ̀ fàʼ ɨ num ənɨ əze rɨmbin ɨchî nɨ mə yeʼ ə nəb ndəŋ ɨmbə̀ʼ ɨkə̂n chɔ̀m we nɨ mɨə ghàə̀.

¹⁴Àyɨə chəi mə̀ ghaʼ nɨ ghɨ ənû ə mɔʼɔ ze nɨ chəi à benɨ, ɨmbə̀ʼ ɨ̀chɔ̀m we nɨ à bɨrɨ ghɨ̀ yeʼ ni à ghɨ̀ ənɨ e ɨghaʼi, kaʼi ni à yɨ mbɨ nyeŋ əwe nyeŋɨ.

¹⁵Ɨghə̀m, à yɨ əton nɨ wɨ̀ nyaʼa saŋ əwe ənɨ ɨkə nyumə̀, ɨmbə̀ʼ à we tɨ̀ à wɨrɨ nɨŋ əməd rəbɔʼ koŋ.

¹⁶Chəi à bɨrɨ wɨrɨ nɨŋ əməd ɨghabɨ ə̀bòʼò. À bɨrɨ nɨŋ əməd ɨghabɨ wə̀d nɨ chè ə̀bòʼò. Məd yɨ aŋgɔb nɨ tɨ̀ ghaʼi kwàʼ rɨŋgəʼ. Mə ghaʼ əməd, àyɨə mə kyerɨ ni à ghaʼ əməd chè əmɨ. Ghaʼ əməd ɨghabɨ ə̀bòʼò fɔrɨ ɨghabɨ aŋgɔb ɨchî nɨ tɨ̀ yeʼ ənɨ ɨfɔtɨ mbɨ Ə̀nùŋɨ̀sɨg.

¹⁷Əne à mɨ kɔndɨ ni mɔ̌ yɨə wə̀d nɨə fàʼə̀ mbɨ ne, nɨŋ əməd ɨchî nɨ tɨ̀ à nɨŋ əmɨ.

¹⁸À mɨ yeʼ ni wɨ̀ gu ənû ɨ ne, kɨ̀ ni wɨ̀ ə yim e əghɨ ə mɔʼɔ, ŋwaʼnɨ ənɨ mɨ ɨkum.

¹⁹Àyɨə mɔ̌ Pɔ̂l ŋwaʼnɨ ə̀ŋwàʼnɨ̀ zɔ̂ ənɨ mɨ əbɔ, mə bɨrɨ wi ɨ ne. Kyerɨ ni à yim njɔ ɨ num ɨmbə̀ʼ ɨchî nɨ mə nyaʼa ghɨ ni à ben ə Kristo.

²⁰Ee, kyɨə aŋgɔb, mə kəb ni à ghɨ ɨ̀chɔ̀m wɔ̂ ɨ num ənɨ ɨkum Ə̀nùŋɨ̀sɨg. Kaŋ zùtɨ̀ mɨ fîŋ ɨchî nɨ tɨ̀ yeʼ ənɨ ɨfɔtɨ mbɨ Kristo.

²¹Mə kàŋ kyerɨ ənɨ rəsìʼ ni à bɨrɨ ghɨ ɨnû mbe nɨ mə gha ɨ ne. Mə wɨə ŋwaʼnɨ ɨ ne ni à kyerɨ ni à bɨrɨ ghɨ ɨnû mbe chè ɨchî nɨ mə̀ nyaʼa ghɨ ɨ ne.

²²Ənû ə cherə yɨ ni, tekɨ ətu ə nəb ə bə̂d rɨ̀sɔ̀ʼɔ̀ ɨ num, ɨmbə̀ʼ ɨghəm nɨ mə wɨə wòmə̀ ni ənjìm ə̀kɔ̀ŋgɨ̀ ze nɨ mbə̀ə kɔ̀ŋgɨ̀ə̀, Ŋwiə̀ we tɨ wɨ̀ wɨrɨ nàʼ əmɨ ɨ nən.

²³Epafràs, nɨ tɨ̀ yeʼ ə nəb ndəŋ ɨnɔ̂n ɨmbə̀ʼ ɨkum Kristo Yeso, wɨə chàʼrɨ̀ əwe.

²⁴Mbɨ bɔŋgɔb mbe nɨ mɨə fàʼə̀ mbɨ mɨ̀mə̌d əne yɨə Mak, Àristakùs, Demàs mbɨ Luk bə̀ chàʼrɨ̀ əwe.

²⁵Ə̀nùŋɨ̀sɨg Yeso Kristo ghɨ ɨ̀chɔ̀m ənɨ mbə̀n mɨjìm.