Read Fɨso Fi Mɨ̀hibrù 11 Bible Online

Mɨ̀hibrù 11 - Fɨso Fi bible

Mɨ̀hibrù 11

¹Ɨbenɨ yɨ nɨ kyerɨ ni tɨ̀ bɨrɨ berɨ ɨghɨ mbe nɨ tɨə wòmə̀. À yɨ bə̀ nɨ kyerɨ ni tɨ̀ bɨrɨ berɨ ɨghɨ mbe nɨ chəi tɨə zəə.

²À yɨ ənjìm ɨbenɨ bə̂d mbe rəŋwe nɨ Ŋwìə̀ nyaʼa chwiə ni tə ghaʼ mɨ̀mə̌d.

³À yɨ ənjìm ɨbenɨ nɨ tɨ̀ kyerɨ ni Ŋwìə̀ nyaʼa tekɨ ɨsɨg àmei ənɨ i ɨŋgam. Əne yɨ ni wɨ̀ nyaʼa tekɨ ɨghɨ mbe nɨ tɨə zəə tɨ ənɨ mbe nɨ chəi tɨə zəə.

⁴À yɨ ɨbenɨ nyaʼa ghɨ ni Abèl nàʼ əghɨ ə̀fà əmbɨ ə Ŋwiə̀ nɨ nyaʼa bɔŋ chè əzɨ ə Kaìn. À yɨ ənjìm ɨbenɨ məd nɨ Ŋwìə̀ nyaʼa gha ni məd wɨə ghɨ̀ ɨnû nɨ kuʼnɨ. Ŋwìə̀ nyaʼa ghà əne ɨmbə̀ʼ ɨghəm nɨ wɨ̀ nyaʼa ben ɨghɨ mbe nɨ wɨ̀ nyaʼa naʼa. Abèl nyaʼa kwɨ, àyɨə ənjìm ɨbenɨ məd, ɨ wɨə kɨrɨ ghàmə̀.

⁵À yɨ ɨbenɨ nyaʼa ghɨ ni Ŋwìə̀ nɨŋ ə Enɔ̀k ɨkaŋ nɨ chəi wɨ̀ nyaʼa kɨrɨ kwɨ. Chəi ənɨ tɨ̀ mbɨ nyaʼa wɨrɨ zə əməd, ɨmbə̀ʼ ɨghəm nɨ Ŋwìə̀ nyaʼa fə nɨŋ əməd. Bɔŋ Ŋwìə̀ nyaʼa sɨə nɨŋ əməd, bə̂d nyaʼa ben ni məd wɨə nyaʼə ghɨ̀ə̀ ni fîŋ Ŋwìə̀ bɔ̀ŋ ə.

⁶Ɨbenɨ mɨ bù i, chəi ənɨ tɨ̀ bə̂d ghɨ̀ fîŋ Ŋwìə̀ bɔ̀ŋ, ɨmbə̀ʼ ɨghəm nɨ wə̀d we nɨə kəb tindɨ ɨban ə Ŋwiə̀ berɨ ben ni Ŋwìə̀ wɨ əŋgu bə̀ ben ni wɨ̀ bɨrɨ chɔʼ ə̀fàʼì bə̂d mbe nɨə kə̀b əməd ənɨ tə fîŋ rɨ̀jìm.

⁷À yɨ ɨbenɨ nyaʼa ghɨ̌ ni Noà [3] zuunɨ ə Ŋwiə̀, əne tekɨ əbaŋ ɨgyɨ̀ ze nɨ nyaʼa chɨ ɨnəbɨ məd rəŋgəʼ. Wɨ̀ nyaʼa ghɨ̀ əne ənɨ Ŋwìə̀ nyaʼa fə patɨ əməd dè ɨnû mbe nɨ chəi wɨ̀ nyaʼa kɨrɨ zə. À yɨ ɨbenɨ məd nyaʼa ghɨ ni Ŋwìə̀ zɨ ɨsaʼi ɨgwɨ ɨsɨg. Əne Ŋwìə̀ nyaʼa nɨŋ ni məd wɨə ghɨ̀ ɨnû nɨ kuʼnɨ ənjìm ɨbenɨ.

⁸À yɨ ɨbenɨ nyaʼa ghɨ ni Abràham zuunɨ ə Ŋwiə̀ ənɨ wɨ̀ nyaʼa tɔŋ əməd ni wɨ̀ jwɨ ə wò əsɨ ze nɨ wɨ̀ nyaʼa wo naʼ ɨ bɔ. Wɨ̀ nyaʼa jwɨ̀ wò, ka à bè yeʼi ni chəi wɨ̀ nyaʼa kyerɨ əsɨ ze nɨ wɨ̀ nyaʼə wò əŋgu.

⁹À yɨ ɨbenɨ nyaʼa ghɨ ni wɨ̀ wo chub ɨŋga əbeŋ ze nɨ Ŋwìə̀ nyaʼa kaʼ ni tə bɨrɨ naʼ ɨ bɔ. Wɨ̀ nyaʼa wò chub əŋgu ɨchî nɨ wə̀d rɨ̀sɔ̀ʼ ə chub ɨŋga əbeŋ ə cherə. Wɨ̀ nyaʼa chub ɨŋga mɨ̀ŋwènɨ̀ ɨchî nɨ Aizìk mbɨ Jakɔ̂b nyaʼa bə chubɨ. Mbɨ nyaʼa berɨ bɨ jɨg ɨghɨ mbe nɨ Ŋwìə̀ nyaʼa kaʼ əmbɨ Abràham.

¹⁰Abràham nyaʼa ghɨ̀ əne ɨmbə̀ʼ ɨghəm nɨ ɨ wɨə nyaʼə nèŋ ɨmbì ɨmbə̀ʼ chub ɨŋga əsɨ nɨ əchɨ ə nəb ə nyaʼa sɨ əŋgu, nɨ wə̀d we nɨ nyaʼa ŋwaʼ əsɨ ze bə̀ bɔm yɨə Ŋwiə̀.

¹¹À yɨ ɨbenɨ nyaʼa ghɨ ni Abràham nɨ nyaʼa fə nun i, mbɨ Sèra [4] nɨ nyaʼa kòm əyi, we tɨ̀ wɨ̀ nyaʼa berɨ wan, ɨmbə̀ʼ ɨghəm nɨ wɨ̀ nyaʼa ben ni wə̀d we nɨ kaʼ əməd bɨrɨ ghɨ ənû ze nɨ wɨ̀ kaʼi.

¹²Əne tɨ ənɨ ə wə̀d wɔ̂ mɔʼ, nɨ nyaʼa fə sɨ i ɨghabɨ əvɨ ə wə̀d, mbɨ nyaʼa berɨ bɔn tɨ ənɨ əghaŋ əməd nɨ nyaʼa nɔʼ ɨghabɨ rɨtəmɨ te rɨ əton ɨkaŋ, bə̀ nɔʼ ɨghabɨ rɨsi ze nɨ yeʼ əŋgo rɨ̀bàà nɨ chəi ənɨ tɨ̀ wə̀d taŋ.

¹³Mɨ̀mə̌d mbɔ̂ mɨjìm nyaʼa nùŋ ɨbenɨ ɨgun ə Ŋwiə̀ pè ənɨ mbɨ nyaʼa kwɨ. Mbɨ nyaʼa kwɨ nɨ chəi mbɨ nyaʼa kɨrɨ berɨ ɨghɨ mbe nɨ Ŋwìə̀ nyaʼa kaʼ əmbɨ mɨ̀mə̌d. Mbɨ nyaʼa zə ɨghɨ mbe nɨ Ŋwìə̀ nyaʼa kaʼi rɨ əsa əgha, əne mbɨ nyaʼa ghaʼ kwàʼ rɨŋgəʼ. Mbɨ nyaʼa zə əne, kyerɨ ni mbə yɨə bə̂d rɨ̀sɔ̀ʼɔ̀ nɨə che ə che ɨŋga ɨsɨg wɔ̂.

¹⁴Bə̂d mbe nɨə ghà tɨkwɨrɨ ɨnû tɔ̂ fə ghɨ̀ zɨə zeŋ ni ɨ mbɨə kə̀b əbeŋ ze nɨ yeʼ əzɨ mɨ̀mə̌d.

¹⁵À kɨ nɨ mbɨ nyaʼə kɔndɨə yeʼ əbeŋ ze nɨ mbɨ nyaʼa jwɨ rəŋgu, njɨ mbɨ nyaʼa berɨ əpan nɨ wɨrɨ bə̀ndɨ̀ wò əŋgu.

¹⁶Mbɨ nyaʼa kə̀b yeʼ əbeŋ ze nɨ bɔŋɨ chè əze, əne yɨ əbeŋ ze nɨ yeʼ ɨkaŋ. Chəi ətu ə nìd əmbɨ ə Ŋwiə̀ ənɨ mbɨ tɔŋ əməd ni wɨ̀ yɨə Ŋwìə̀ mɨ̀mə̌d. Chəi zɨə nìd ɨmbə̀ʼ ɨghəm nɨ wɨ̀ fə tekɨ əsɨ əmbɨ mɨ̀mə̌d.

¹⁷À yɨ ɨbenɨ nyaʼa ghɨ̌ ni Abràham naʼ ə Aizìk ənɨ əghɨ ə̀fà ənɨ ə nyùmə̀ we nɨ Ŋwìə̀ nyaʼa kwaʼnɨ əməd. Məd we nɨ Ŋwìə̀ nyaʼa kaʼ ɨnû mbe ɨ bɔ nyaʼa fə tekɨ ɨnyod nɨ naʼ i wan we mɔʼ ənɨ əghɨ ə̀fà.

¹⁸Ŋwìə̀ nyaʼa fə ghà ɨ bɔ ni, “À yɨ ənjìm ə Aizìk nɨ à bɨrɨ berɨ bɔn mbe nɨ mə̀ kaʼi.”

¹⁹Abràham nyaʼa ben ni Ŋwìə̀ we tɨ̀ wɨ̀ zwemnɨ bə̂d, əne yɨ ɨnə̂njɨ̀ mɔʼɔ nɨ ghà ni wɨ̀ nyaʼa wɨrɨ nɨŋ ə Aizìk nɨ nyaʼa fə kwɨ.

²⁰À yɨ ɨbenɨ nyaʼa ghɨ ni Aizìk zɨ əbɔrəbɔd ɨgun ə Jakɔ̂b bə̀ zɨ̀ ɨgun ə Esaò ɨmbə̀ʼ ɨnû mbe nɨ nyaʼa wo ghɨ ənɨ mɨ̀mə̌d.

²¹À yɨ ɨbenɨ nyaʼa ghɨ ni ənɨ Jakɔ̂b nyaʼə sɨə wo kwɨ, wɨ̀ nyaʼa zɨ əbɔrəbɔd ɨgun ə bɔn mbaŋə̀ Jòsêf ɨ mɔʼ mɔʼ. Wɨ̀ nyaʼa gundɨ zəʼrɨ ɨgun i mbàŋ, wumnɨ ə Ŋwiə̀.

²²À yɨ ɨbenɨ nyaʼa ghɨ ni ənɨ ə Jòsêf nyaʼə sɨə wò kwɨ, wɨ̀ ghà ɨmbə̀ʼ ɨchî nɨ mɨ̀Izre bɨrɨ jwɨ̀ rɨ ə Ijìpt bə̀ ghà ɨmbə̀ʼ ɨchî nɨ mbɨ bɨrɨ tweŋ əməd.

²³À yɨ ɨbenɨ nyaʼa ghɨ ni, ənɨ mbɨ nyaʼa gywɨ ə Mose, mbǎʼ məd mbɨ ɨŋgɔb məd nyaʼa nə̀m əməd əmɨg ə tad. Mbɨ nyaʼa ghɨ̀ əne ɨmbə̀ʼ ɨghəm nɨ mbɨ nyaʼa zə ni wan we nyaʼa təm. Chəi mbɨ nyaʼa bɔ ənû ze nɨ ɨfɔ̂n we rɨ ə Ijìpt nyaʼa sobɨ.

²⁴À yɨ ɨbenɨ nyaʼa ghɨ ni ənɨ Mose nyaʼa fə kwi i, wɨ̀ nyaʼa ton ni tɨ mbɨ tɔŋ əwi ənɨ ə wan wan əyi Ferò.

²⁵Wɨ̀ nyaʼa də̀b yeʼ nɨ zə ŋgəʼ mbɨ ə bə̂d Ŋwiə̀, chè ɨchî nɨ nɨŋ ɨkə nyumə̀ ghɨ̀ ɨnû rɨbɔ̀ŋ mbe nɨ nyamnyod ə feenɨə.

²⁶Wɨ̀ nyaʼa zə ni ənû nɨ zə ŋgəʼ ɨmbə̀ʼ Wə̀d we nɨ Ŋwìə̀ zɔʼɔ ə bɔ̀ŋ chè mbɔ̂n ze rɨ ə Ijìpt, ɨmbə̀ʼ ɨghəm nɨ ɨ wɨə nyaʼə nèŋ ɨmbì ɨmbə̀ʼ ɨchɔʼ ə̀fàʼì we nɨ wɨ̀ bɨrɨ berɨ.

²⁷À yɨ ɨbenɨ nyaʼa ghɨ ni wɨ̀ nɔʼ rɨ ə Ijìpt, nɨ chəi wɨ̀ nyaʼa bɔ ni ɨfɔ̂n we rɨ ə Ijìpt bɨrɨ sə ɨtəm. Wɨ̀ nyaʼa ton nɨ beŋ rəbɔʼɔ, ɨmbə̀ʼ ɨghəm nɨ wɨ̀ nyaʼa zə əməd we nɨ chəi bə̂d ə zəə.

²⁸À yɨ ɨbenɨ nyaʼa ghɨ ni wɨ̀ nuŋ ni mɨ̀Jû kɔ jɨg Əchwɨ̂ ə Che-ɨgun bə̀ ghɨ̀ ni mbɨ ŋwiirɨ ənəm ətu əkɔŋ, ɨmbə̀ʼ tɨ aŋgɨrə̀ we nɨə zwiirɨ ə bə̂d zwiirɨ i bɔn mbaŋə̀ fə̀d mɨ̀mə̌d.

²⁹À yɨ ɨbenɨ nyaʼa ghɨ ni mɨ̀Izre baanɨ ɨŋga Rɨ̀bàà Bàgɨ ɨghabɨ ni à yɨ ɨgun ə si zobɨ. Àyɨə ənɨ mɨ̀Ijìpt nyaʼa nɨrə ghɨ̀ əne, mbɨ nyaʼa koŋ.

³⁰À yɨ ɨbenɨ nyaʼa ghɨ ni ɨ̀gùʼ ɨkam mbe rɨ ə Jerikò buʼ ə si ənɨ mɨ̀Izre nyaʼa nɨŋ ɨni sambe yènɨ̀ kad.

³¹À yɨ ɨbenɨ nyaʼa ghɨ ni tɨ ə̀kùnɨ̀ ze nɨ mbɨ nyaʼə tɔŋ ənɨ ə Rahàb kwɨ i mbɨ ə bə̂d mbe nɨ nyaʼa ghɨ rɨ̀zuə̀. Chəi wɨ̀ nyaʼa kwɨ ɨmbə̀ʼ ɨghəm nɨ wɨ̀ nyaʼa nɨŋ mɨ̀-ànàŋgɔŋ mbe nɨ nyaʼa yeʼe jɨrɨ neŋ ə Jerikò. Wɨ̀ nyaʼa nɨŋ mɨ̀mə̌d kwàʼ ənɨ əbɔrəbɔd.

³²Mə̀ gha wò pè ə yi? Chəi mə̀ berɨ nyùmə̀ nɨ ghà ɨmbə̀ʼ ə Gidiòn, ɨmbə̀ʼ ə Baràk, ɨmbə̀ʼ ə Samsɨ̀n, ɨmbə̀ʼ ə Jeftà, ɨmbə̀ʼ ə Dèvîd, ɨmbə̀ʼ ə Samwèl fɔrɨ ɨmbə̀ʼ bə̂d ɨ̀kə̀n Ŋwiə̀

³³mbe nɨ ɨbenɨ mɨ̀mə̌d nyaʼa ghɨ mbɨ mɔʼɔ màʼ bid mbɨ ɨbeŋ mɨfɔ̀n cherə chè, mbɨ mɔʼɔ saʼ bə̂d ɨchɨ nɨ kuʼnɨ, mbɨ mɔʼɔ berɨ ɨnû mbe nɨ Ŋwìə̀ nyaʼa kaʼ əmbɨ mɨ̀mə̌d, mbɨ mɔʼɔ kubrɨ mɨchû mɨ̀ŋgwàbaʼ,

³⁴mbɨ mɔʼɔ nimnɨ ɨwid ka ka, mbɨ mɔʼɔ nòd ɨvɨ rɨ ɨchû ɨbi, mbɨ mɔʼɔ nyaʼa bɔd àyɨə Ŋwìə̀ nyaʼa nàʼ ɨka əmbɨ mɨ̀mə̌d, mbɨ mɔʼɔ nyaʼa berɨ ɨka nɨ maʼ bid əne ghɨ̀ mɨnɔ̂n mɨ̀sɔgyɨ̀ rɨŋga ɨbeŋ cherə nòrə̀.

³⁵À yɨ ɨbenɨ nyaʼa ghɨ ni məyi nɨŋ mbə ɨfurɨ mbe nɨ nyaʼa kwɨ wɨrɨ zwemə. Mbɨ nyaʼa chə mbɨ mɔʼɔ ə nəb ndəŋ, àyɨə mbe nyaʼa ton ni tɨ mbɨ chɨ əwən sàŋɨ̀, ɨmbə̀ʼ mbə mɨ kwɨ, mbə bɨrɨ wɨrɨ zwemə əne jɨg ɨ̀tènɨ̀ we nɨ bɔŋɨ chè.

³⁶Mbɨ nyaʼa baʼrɨ mbɨ mɔʼɔ, wid mbɨ mɔʼɔ ənɨ ə ŋgwad, kod mbɨ mɔʼɔ ənɨ mɨ̀kàrə̀ zɨ ə ndəŋ.

³⁷Mbɨ nyaʼa tumbɨ mbɨ mɔʼɔ ənɨ əti, sandɨ mbɨ mɔʼɔ ɨba be ənɨ əsɔ̌, zwiirɨ mbɨ mɔʼɔ ənɨ ɨbi bid. Mbɨ mɔʼɔ mbɨə nyaʼə tìŋə̀ gôb rɨ njɨ̀g bə̀ tìŋə̀ gôb rɨ gywɨ ghanə yènə̀. Mbɨ mɔʼɔ mbɨə nyaʼa chub ənɨ ɨkwaŋ, mbɨ nwèndɨ̀ tɨkyerɨ-ɨwu mbɨ mɔʼɔ bə̀ chə mbɨ mɔʼɔ kwàʼ ɨchî rɨbɔ̀ŋ.

³⁸Chəi ɨsɨg wɔ̂ nyaʼa kuʼ əmbɨ mɨ̀mə̌d. Ɨ mbɨə nyaʼə yèn ɨŋga rɨbad rɨkwàʼi bə̀ yen ɨkaŋ rɨwum. Ɨ mbɨə nyaʼə chub àmei ɨŋga mɨ̀sùm fɔrɨ ɨŋga rɨbɨgɨ te rɨŋga si.

³⁹Ŋwìə̀ nyaʼa ben bə̂d mbɔ̂ mɨ̀jìm ɨmbə̀ʼ ɨbenɨ mɨ̀mə̌d, àyɨə chəi mbɨ nyaʼa nɨŋ ɨghɨ mbe nɨ Ŋwìə̀ nyaʼa kaʼ əmbɨ mɨ̀mə̌d.

⁴⁰Ŋwìə̀ nyaʼa fə taŋ ənû nɨ bɔŋɨ chè nùŋ ɨ na. Əne yɨ ni àmei ənɨ ɨfɔtɨ mbɨ na nɨ tɨ̀ mbɨ bɔ̀ŋ màànɨ̀.