Read Fɨso Fi Mɨ̀hibrù 12 Bible Online

Mɨ̀hibrù 12 - Fɨso Fi bible

Mɨ̀hibrù 12

¹Ɨchî nɨ mɨ̀zərɨmbin mbɔ̂ ɨnɔ̂n kyeŋ kaŋ kad əwa, əne tɨ̀ waʼ ɨnû jìm mbe nɨə kən ɨnə̂njɨ̀ ɨ na bə̀ waʼ ɨnû rɨbɔ̀ŋ mbe nɨ kod əwa. Tɨ̀ notɨ ə̀nòtɨ̀ ze nɨ yeʼ ɨmbì ɨ na mbɨ ɨnyiʼ fîŋ.

²Tɨ̀ neŋ àmei Yeso we nɨ a ɨbenɨ kɔ bə̀ nwìə̀ àmei ɨgwɨ məd. Wɨ̀ nyaʼa nyìʼ əzed ə baʼnɨ ɨmbə̀ʼ ɨghəm nɨ wɨ̀ nyaʼa kyerɨ ɨghaʼi we nɨ nyaʼa ɨmbì ɨ bɔ. Wɨ̀ nyaʼa bə̀ tə̀ə̀nɨ̀ ɨchî nɨ wɨ̀ nyaʼa wo berɨ tɨ̀nìd ətu ənɨ mbɨ nyaʼa kombɨ əməd əzed ə baʼnɨ. Ɨ wɨə sɨ əbɔ ə jɨgɨ ətən ɨfɔ̀n ə Ŋwiə̀.

³Mbə̀ kɔndɨ ɨchî nɨ wɨ̀ nyaʼa nyiʼi mbɨ ə bə̂d ɨnû rɨbɔ̀ŋ mbe nɨ nyaʼə bàn əməd. Mbə̀ bə nyiʼ, ɨmbə̀ʼ tɨ mbə̀ bɔd əwən əne sùŋgɨ̀ rə̀bɔ̀ʼɔ̀.

⁴Mbə mbɨə màʼə̀ bid mbɨ ɨnû rɨbɔ̀ŋ, àyɨə chəi mbə̀ kɨrɨ maʼ wò pè əsɨ ze nɨ tɨ̀ mbɨ zwiirɨ əwən.

⁵Mbə wa fə neb ɨŋgam Ŋwìə̀ we nɨə tìmbɨ̀ əwən ni mbə yɨə bɔn məd ə? Ɨŋgam we ə ghà ni, “Mɨ wan, Ŋwìə̀ mɨ chə e, tɨrə̀ nɨŋ e ni à yɨ əfed. Tɨ e fîŋ bɔd i əwù ze nɨ Ŋwìə̀ gham əbɔʼ ne,

⁶ɨmbə̀ʼ ɨghəm nɨ Ŋwìə̀ wɨə chəə wə̀d jìm we nɨ wɨ̀ ghaʼi. Ɨ wɨə bə̀ chəə wə̀d jìm we nɨ wɨ̀ ben ni à yɨ i wan.”

⁷Mbə̀ kàŋ nyìʼ ənɨ mbɨə chə əwən. À yɨ ɨchî nɨ Ŋwìə̀ ə ghɨ̀ə̀ mbɨ mbi bɔn. Wan mɔʼɔ wɨə wa əŋgu nɨ chəi mbǎʼ məd ə chə əməd əwù ze nɨ wɨ̀ gù ənû ə?

⁸Ŋwìə̀ mɨ ton chə i əwən ɨchî nɨ wɨə chəə mbi bɔn cherə, njɨ ka mbə yɨə kàŋ ə bɔn məd. Mbə yɨə bɔn nɨ chəi mbǎʼ.

⁹Ənû ə cherə yɨ ni, tɨ̀ nyaʼa kweʼ berɨ mɨ̀mbǎʼ ɨgwɨ ə si nɨ nyaʼə chə əwa. Tɨ̀ wɨə nyaʼə wumnɨə mɨ̀mə̌d ɨchî nɨ mbɨ nyaʼə ghɨ̀ əne. À mɨ yeʼ ɨchî nɨ tɨ̀ nyaʼə ghɨ̀ə̀ we, njɨ ka tɨ̀ wa bɨrɨ swi a ɨnyod əmbɨ a Mbǎʼ we nɨ naʼ əzwî ɨ na chè ɨchî nɨ tɨ̀ nyaʼə swi əmbɨ mɨ̀mə̌d ə? Tɨ̀ berɨ swi ɨnyod ɨmbə̀ʼ chub ɨkǎ.

¹⁰Mba mɨ̀mbǎʼ rɨ ɨgwɨ ə si mbɨə nyaʼə chə əwa ɨchî nɨ zɨə nyaʼa kuʼ əmbɨ mɨ̀mə̌d. Ɨ mbɨə nyaʼə ghɨ̀ əne àmei ənɨ ɨkə nyùmə̀. Àyɨə Ŋwìə̀ wɨə chə əwa ɨmbə̀ʼ weerɨ əwa. Ɨ wɨə ghɨ̀ əne ɨmbə̀ʼ tɨ̀ chub ɨzeŋɨ zeŋɨ ɨghabɨ əməd.

¹¹Chəi ənû ze nɨ mbɨə chə əwa ə nyaʼa bɔŋ ənɨ ə nyùmə̀ we. Ə zɨə nyaʼə tɔə kwàʼ rɨŋgəʼ. Àyɨə əmad ə nɨə zombɨ, ɨchə we ghɨ ni bə̂d mbe nɨ mbɨ chə mɨ̀mə̌d ghɨ ɨnû nɨ kuʼnɨ bə̀ ghɨ̀ ni mbɨ chub ənɨ əbɔrəbɔd.

¹²Əne mbə̀ zə ni mbə ɨbɔ nɨə sɨə bɔrə wɨrɨ kàànɨ̀ bə̀ zə ni mbə̀ sèmbɨ̀ mbə ɨtu ɨnywɨ nɨə bindɨə.

¹³Mbə̀ tekɨ mɨnə̂njɨ̀ nɨ yen ɨgun mbɨ təm, ɨmbə̀ʼ tɨ bə̂d mbe nɨə tèʼ ɨwu buʼrɨ ə mbə ɨwu. Mɨnə̂njɨ̀ mbe ghɨ yeʼ ni ɨwu mbe kaanə.

¹⁴Mbə̀ kywɨ ənywɨ zə ni mbə̀ chub ənɨ əbɔrəbɔd mbɨ ə bə̂d mɨ̀jìm, bə̀ kywɨ ənywɨ zə ni mbə̀ chub ɨzeŋɨ zeŋɨ, ɨmbə̀ʼ ɨghəm nɨ chəi wə̀d we nɨ rɨka zeŋ i bɨrɨ nɔ zə Ə̀nùŋɨ̀sɨg.

¹⁵Mbə̀ zə ni tɨ wə̀d mɔʼɔ sam i ɨ̀chɔ̀m we nɨ Ŋwiə̀ ə ghɨ̀ə̀, bə̀ zə ni tɨ wə̀d mɔʼɔ yeʼi ɨghabɨ ɨghaŋ nɨə nywɨ̀ə̀ nɨə kwiə ghɨ̀ə̀ ni bə̂d mɨ̀nɔnɔʼ zə ŋgəʼ mbɨ ɨniʼ we nɨə jwɨ̀ rəŋgu.

¹⁶Mbə̀ zə ni tɨ wə̀d mɔʼɔ ni i məyi kɨ̀ mbaŋə̀ əbəŋ əbəŋ, bə̀ zə ni tɨ wə̀d mɔʼɔ chub i nɨ chəi wɨə bɔ ə Ŋwìə̀ ɨchî nɨ Esaò nyaʼa ghɨ̌. Wɨ̀ nyaʼa fen i ɨkyěŋ ɨghabɨ ə wan-fə̀d ənɨ əkaŋ əghɨjɨg.

¹⁷Mbə kyerɨ ni əwu rənjìm, ənɨ wɨ̀ nyaʼə kə̀b nɨŋ əbɔrəbɔd rɨ əmbɨ i mbǎʼ, mbǎʼ məd nyaʼa ton i ɨmbə̀ʼ ɨghəm nɨ chəi ənɨ tɨ wɨ̀ nyaʼa kwepɨ ənû ze nɨ wɨ̀ nyaʼa fə ghɨ̌, ka à bè yeʼi ni ɨ wɨ̀ nyaʼə kə̀b əbɔrəbɔd ze mbɨ mɨsɨ əghə.

¹⁸Chəi mbə̀ kɨrɨ pe, ɨchî nɨ mɨ̀Izre nyaʼa pe, ənɨ ɨwum nɨ tɨ bə̂d bètɨ̀, nɨ yeʼ ɨwum we nɨ ɨwid ə berə ɨgun. Chəi mbə̀ kɨrɨ pe ɨŋga ɨsɨ firɨ. Chəi mbə̀ kɨrɨ pe ɨŋga ɨsɨ mbe nɨə finə kììm. Chəi əfim ə ka ka ə kɨrɨ kumnɨ əwən.

¹⁹Chəi mbə̀ kɨrɨ zu gɨ̂ taŋ kɨ̀ bè zu ɨŋgam we nɨ nyaʼa ghamɨ. Ənɨ Ŋwìə̀ nyaʼa ghamɨ, bə̂d mbe nɨ nyaʼa zu nyaʼa buʼ ɨbɔ ni tɨ wɨ̀ wɨrɨ gham i,

²⁰ɨmbə̀ʼ ɨghəm nɨ chəi ənɨ tɨ mbɨ nyaʼa nyìʼ ɨŋgam we nɨ nyaʼa gha ni, “Ka àbei nyam, zɨ mɨ bètɨ̀ ɨwum wɔ̂, mbɨ tumbɨ ənɨ əti zwiirɨ.”

²¹Ɨghɨ mbe nɨ mbɨ nyaʼa zə̌ nyaʼa ghɨ̀ ni ɨfeŋ yim mɨ̀mə̌d. Mbɨ nyaʼa ghɨ̀ Mose ghà ni, “Mə wɨə bindɨə bə̀ bɔə.”

²²Mbə fə yeʼe ɨkaŋ Ɨwum Zayɔ̀n. Mbə fə yeʼe ə Jèrusalèm we nɨ yeʼ ɨkaŋ, nɨ yeʼ əsɨ ə Ŋwìə̀ we nɨ yeʼ ɨkǎ. Mbə fə yeʼe əsɨ mbɨ̀aŋgɨrə̀ chuʼ mbɨ ə chuʼ nɨ fɔtɨ chub ənɨ ɨghaʼi.

²³Mbə fə yeʼe əsɨ ɨfetɨ bɔn fə̀d Ŋwiə̀ mbe nɨ mbɨ fə ŋwaʼnɨ tɨkum tɨ mɨ̀mə̌d ɨkaŋ. Mbə fə yeʼe əsɨ Ŋwìə̀ we nɨə saʼə bə̂d mɨ̀jìm. Mbə fə yeʼe əsɨ ɨzwî bə̂d mbe nɨə ghɨ̀ ɨnû nɨ kuʼnɨ, nɨ Ŋwìə̀ fə ghɨ̌ mbɨ bɔ̀ŋ màànɨ̀.

²⁴Mbə fə yeʼe əsɨ ə Yeso we nɨ nyaʼa yeʼe mbɨ fɨso fi. Mbə fə bə̀ yeʼe əsɨ ənəm ze nɨ mbɨ nyaʼa ŋwiirɨ. Ənəm ze ə zɨə ghà ənû nɨ bɔŋ chè əze nɨ ənəm ə Abèl [5] ə nyaʼa ghǎ.

²⁵Mbə̀ zə ni tɨ mbə̀ ton ə məd we nɨə ghàm ɨ nən. À mɨ yeʼ nɨ chəi bə̂d mbe nɨ nyaʼa ton wə̀d we nɨ nyaʼa patɨ mɨ̀mə̌d ɨgwɨ ə si nyaʼa jwɨ rəŋgəʼ, njɨ tɨ̀ kɨə wo chè rɨ ye bɔŋ norɨ məd we nɨə patɨ əwa rɨkaŋ ə?

²⁶Gɨ̂ məd nyaʼa ghɨ̀ si wùd, àyɨə rɨ̀nîn wɨ̀ fə kàʼ ni, “Chəi mə bɨrɨ wɨrɨ ghɨ ni àmei si wud ɨghəm cherə. Mə bɨrɨ bɨ ghɨ ni ɨkaŋ bə wùd.”

²⁷Ɨŋgam we ni, “Ɨghəm cherə,” ə chwi ni ɨghɨ mbe nɨ mbɨ tekɨ ənɨ ɨbɔ bɨrɨ wùd, ɨmbə̀ʼ mbe nɨ chəi ənɨ tɨ mbɨ ghɨ̀ mbɨ wùd mbɨ tenə.

²⁸Əne tɨ̀ naʼ məben-əwe əmbɨ ə Ŋwiə̀ ɨchî nɨ tɨ̀ berɨ ənû ɨfɔ̀n nɨ chəi ənɨ tɨ̀ mbɨ ghɨ̀ zɨə wùd. Tɨ̀ wumnɨ ə Ŋwiə̀ ɨchî nɨ bɔŋ ɨ bɔ. Tɨ̀ wumnɨ əməd bə̀ bɔ əməd,

²⁹ɨmbə̀ʼ ɨghəm nɨ a Ŋwiə̀ yɨ ɨwid nɨə tɔn ɨghɨ.