Read Fɨso Fi Mɨ̀hibrù 13 Bible Online

Mɨ̀hibrù 13 - Fɨso Fi bible

Mɨ̀hibrù 13

¹Mbə̀ che ɨmbì ghaʼ əwən mbənə mbənə ɨchî nɨ bɔŋgɔb ə ghaʼ ə ɨnyod.

²Tɨ mbə̀ waʼ ə ənû nɨ nɨŋ bə̂d rɨ̀sɔ̀ʼɔ̀ əkwɨ nən, ɨmbə̀ʼ ɨghəm nɨ bə̂d mɔʼɔ nyaʼa ghɨ̀ əne nɨŋ mbɨ̀aŋgɨrə̀ əkwɨ nən zɨ rɨ kyerɨ.

³Mbə̀ kɔndɨ bə̂d mbe nɨ yeʼ ə nəb ndəŋ, ɨghabɨ ni mbə mbɨ ə nəb ndəŋ mbɨ mɨ̀mə̌d. Mbə̀ kɔndɨ mbe nɨ mbɨə chəə mɨ̀mə̌d, ɨghabɨ ni mbə mbɨə zəə ŋgəʼ mbɨ mɨ̀mə̌d. Mbə̀ ghɨ̀ əne ɨmbə̀ʼ ɨghəm nɨ mbə̀ yɨə sɨə nyamnyod mɔʼ mbɨ mɨ̀mə̌d.

⁴Wə̀d jìm yim ɨnamɨ mbɨ ɨwumnɨ. Tɨ mbə̀ ghɨ̀ ə ɨfabrɨ-ɨnû, ɨmbə̀ʼ ɨghəm nɨ Ŋwìə̀ bɨrɨ saʼ bə̂d mbe nɨə ghɨ̀ ɨfabrɨ-ɨnû, bə̀ saʼ mbe nɨə ni məyi kɨ̀ mbaŋə̀ əbəŋ əbəŋ.

⁵Tɨ mbə̀ zɨ ə ədɔʼ ənɨ ɨkab. Mbə̀ ben ni ɨghɨ mbe nɨ mbə̀ berɨ ə kùʼ, ɨmbə̀ʼ ɨghəm nɨ Ŋwìə̀ fə ghà ni, “Chəi mə̀ bɨrɨ nɔ saŋ əwən kɨ̀ bè waʼ əwən.”

⁶Əne tɨ̀ we tɨ̀ rɨ̀ ghà ənɨ ta fîŋ rɨ̀jìm ni, “Ə̀nùŋɨ̀sɨg wɨə wèèrɨ̀ əmɨ, əne chəi mə̀ bɨrɨ bɔ. À kɨə ye nɨ tɨ wə̀d mɨ̀sɔŋɨchù ghɨ̀ ənɨ ə num ə?”

⁷Mbə̀ kɔndɨ bə̂d mbe nɨ nyaʼə chà əwən. À yɨ mɨ̀mə̌d nyaʼa be gha ɨŋgam Ŋwiə̀ ɨ nən. Mbə̀ kɔndɨ ɨchî nɨ mbɨ nyaʼə chubə, əne beenɨ əbɔʼ ɨchî nɨ mbɨ nyaʼa nuŋ fîŋ ɨgun ə Ŋwiə̀.

⁸Yeso Kristo wɨ əndəŋ əndəŋ ɨchî nɨ wɨ̀ kɨə kəʼ rɨwɔ̀, ɨchî nɨ wɨ̀ yeʼ rəchɔ̀ŋ mbɨ ɨchî nɨ wɨ̀ bɨrɨ ten əne koŋ.

⁹Tɨ mbə̀ ben əwən ni tɨkwɨrɨ ɨnû rɨ̀sɔ̀ʼ jìm mbe nɨ bə̂d ə chwiə beŋ tə fîŋ tɨ ənɨ ɨnə̂njɨ̀ rəsìʼ. À yɨ ɨ̀chɔ̀m Ŋwiə̀ bɨrɨ ghɨ ni tə fîŋ kaanə, kaʼi ənû nɨ zuunɨ rɨkə ɨmbə̀ʼ tɨjɨg. Chəi tɨkə te ə wèèrɨ̀ bə̂d mbe nɨə beenɨ əbɔʼ rɨwən.

¹⁰Tɨ̀ berɨ ɨkwi ɨjə̀ŋ ə̀fààrɨ̀ mɔʼɔ nɨ chəi bə̂d mbe nɨə fàʼ ɨŋga ɨŋwenɨ Ŋwìə̀ berɨ ɨka nɨ jɨg əghɨ ə mɔʼɔ ze nɨ mbɨ tɔn ɨgun ɨkwi ɨjə̀ŋ we.

¹¹Ətu ɨgwɨ ə bə̂d mbàn Ŋwìə̀ wɨə nyaʼə nɨŋ ənəm ə nyam te nɨ mbɨ nyaʼa warɨ wò nyɨ ɨŋga Əsɨ nɨ Zeŋɨ Màànɨ̀. Ɨ wɨə nyaʼə nàʼ ənɨ əghɨ ə̀fà nɨ chɨ ɨnû rɨbɔ̀ŋ. Ɨ mbɨə nyaʼə tɔ̀nə̀ nyam te ənjìm əsɨ ze nɨ mbɨ nyaʼə chubə.

¹²À yɨ ɨchî nɨ Yeso nyaʼa bə zə ŋgəʼ ənjìm ɨkam ɨmbə̀ʼ bə̂d zeŋ ənjìm ənəm əməd.

¹³Əne tɨ̀ wo əsɨ məd ənjìm əsɨ ze nɨ mbɨ chubɨ, bə̀ nɨŋ tɨ̀nìd ətu we nɨ mbɨ nyaʼa zɨ ɨgwɨ məd.

¹⁴Chəi tɨ̀ berɨ əsɨ ze nɨ ten ɨghəm mɔʼ. Tɨ̀ wɨə wòmə̀ yeʼ əsɨ ze nɨ bɨrɨ yeʼe.

¹⁵Əne tɨ̀ che ənjìm məd wò ɨmbì nàʼ əghɨ ə̀fà nɨ yiirɨ ə Ŋwìə̀, əne yɨ ni, tɨ̀ nɨŋ mba mɨchû mbe nɨ ben ni məd yɨ Ə̀nùŋɨ̀sɨg wumnɨ əməd əŋgu.

¹⁶Tɨ̀ mbə̀ waʼ ə ənû nɨ ghɨ ɨ̀chɔ̀m. Tɨ mbə̀ bɨ waʼ ə ənû nɨ ghapɨ ɨghɨ mbe nɨ mbə̀ berɨ, ɨmbə̀ʼ ɨghəm nɨ tɨkwɨrɨ ɨghɨ ə̀fà tɔ̂ ə bɔ̀ŋ əmbɨ ə Ŋwiə̀.

¹⁷Mbə̀ zuunɨ bə̂d mbe nɨə chà əwən, bə̀ ghɨ̀ ɨnû mbe nɨ mbɨ gha ɨ nən. Ɨ mbɨə nəŋgɨ əwən nɨ chəi mbɨ ə zwììrɨ̀ə̀. Mbɨ berɨ gha ɨnû mbe nɨ mbɨ fə ghɨ əmbɨ ə Ŋwiə̀. Mbə mɨ zuunɨ mɨ̀mə̌d, mbɨ bɨrɨ fàʼ mbɨ ɨghaʼi kaʼi mbɨ ə̀kə̀nɨ̀, ɨmbə̀ʼ ɨghəm nɨ chəi ə̀kə̀nɨ̀ ə bɨrɨ weerɨ əwən.

¹⁸Mbə̀ kɔŋgɨ ə Ŋwìə̀ ɨgwɨ na. Tɨ kàŋ kyerɨ ni ta fîŋ ə zeŋ. Tɨ wɨə bə̀ kəb ghɨ̀ ɨnû jìm ɨchî nɨ kuʼnɨ.

¹⁹Mə jeŋgɨ yì buʼ ɨbɔ ɨ nən ni mbə̀ kɔŋgɨ ə Ŋwìə̀ ni mə wɨrɨ zambɨ yeʼe əsɨ nən.

²⁰Ŋwìə̀ we nɨə nàʼ əbɔrəbɔd, nɨ nyaʼa che ənjìm ənəm ze nɨ wɨ̀ nyaʼa nɨŋ san fɨso fe nɨ ten i koŋ əne zwemnɨ ə Yeso a Ə̀nùŋɨ̀sɨg nɨ yeʼ ənə̂ŋgɨ̀-njɨ̀g nɨ dabə,

²¹naʼ ɨghɨ chɔ̀m jìm ɨ nən ɨmbə̀ʼ mbə ghɨ ɨnû mbe nɨ wɨ̀ kəbɨ. Wɨ̀ che ənjìm ə Yeso Kristo ghɨ̀ ɨnû mbe nɨ bɔŋ ɨ bɔ ɨŋga na. Tɨ̀ wumnɨ ə Yeso Kristo koŋ koŋ. À yɨ əne.

²²Mbɨ bɔŋgɔb, mə wɨə buʼ ɨbɔ ɨ nən ni mbə̀ nɨŋ ɨŋgam wɔ̂ nɨ mɨə tìmbɨ̀ əwən əŋgu ənɨ ə fîŋ chɔ̀m, ɨmbə̀ʼ ɨghəm nɨ chəi ə̀ŋwàʼnɨ̀ zɔ̂ nɨ mə ŋwaʼnɨ ɨ nən ə jeŋgɨ sà.

²³Mbə̀ kyerɨ ni mbɨ fə chɨ̀ wa aŋgɔb Timotì rɨ ə ndəŋ. Wɨ̀ mɨ zàmbɨ̀ pè əgha, mə bɨrɨ yeʼe zə əwən mbɨ məd.

²⁴Mbə̀ chaʼrɨ bə̂d mɨ̀jìm mbe nɨə chà əwən bə̀ chàʼrɨ̀ bə̂d Ŋwiə̀ mɨ̀jìm. Mba bɔŋgɔb mbe rɨ ə Italì bə̀ chàʼrɨ̀ əwən.

²⁵Ŋwìə̀ ghɨ ɨ̀chɔ̀m ənɨ mbə̀n mɨjìm. À yɨ əne.