Read Fɨso Fi Mɨ̀hibrù 2 Bible Online

Mɨ̀hibrù 2 - Fɨso Fi bible

Mɨ̀hibrù 2

¹Tɨ̀ jeŋgɨ zɨ̀ ətu ənɨ ɨnû mbe nɨ tɨ̀ fə zu, ɨmbə̀ʼ tɨ rɨ̀ saŋ a ɨnû mbe sɨə beenɨ yeʼ əbɔʼ ɨnû cherə.

²Ɨkə̂n we nɨ mbɨ̀aŋgɨrə̀ nyaʼa gha əmbɨ mba mɨ̀mbǎʼ rəŋwe yɨə nyaʼa ɨkə̂n rəsìʼ. Əne bə̂d mɨ̀jìm mbe nɨ chəi mbɨ nyaʼa ghɨ̀ ɨnû mbe nɨ mbɨ nyaʼa gha ɨŋga ɨkə̂n we, kɨ̀ mbe nɨ chəi mbɨ nyaʼa ghɨ ɨnû mbe, nyaʼa berɨ ɨchə nɨ kuʼnɨ.

³Tɨ̀ kɨə wò nod ɨchə we rɨ ye ənɨ chəi tɨ̀ zɨ ətu ənɨ ənû ə kyeŋ ze ni Ŋwìə̀ bɨrɨ chɨ̀ əwa rəŋgəʼ ə? À yɨ Ə̀nùŋɨ̀sɨg ziə nyaʼa bè ghà ɨmbə̀ʼ əzɨ əwən. Bə̂d mbe nɨ nyaʼa zu nyaʼa bə̀ ghɨ̀ tɨ̀ kyerɨ ni à yɨ rəsìʼ ni Ŋwìə̀ bɨrɨ chɨ̀ əwa rəŋgəʼ.

⁴Ŋwìə̀ nyaʼa bə̀ chwiə ni ɨkə̂n we nɨ mbɨ̀aŋgɨrə̀ nyaʼa gha yɨ wɨ rəsìʼ, ɨchî nɨ wɨ̀ nyaʼa ghɨ̀ ɨnweenɨ-ɨnû, ghɨ̀ ɨnû nɨ chè bə̂d bə̀ ghɨ̀ ɨnû yiirɨ tɨkwɨrɨkwɨ. Wɨ̀ nyaʼa bə̀ ghàpɨ̀ mɨneʼe mbe nɨ Əzwî ə Zeŋɨ ə nàʼə̀. Wɨ̀ nyaʼa ghɨ̀ əne ɨchî nɨ wɨ̀ nyaʼa kəbɨ.

⁵Chəi Ŋwìə̀ nyaʼa nuŋ ni ɨsɨg we nɨ tɨə ghàm ɨmbə̀ʼ wɨwən yeʼ əton mbɨ̀aŋgɨrə̀.

⁶Ə zɨ əsɨ ə mɔʼɔ ɨŋga Ə̀ŋwàʼnɨ̀ ə Ŋwiə̀ ni, “Wə̀d mɨ̀sɔŋɨchù kɨə we nɨ àwɔ̀ ə kɔndɨ əməd ə, kɨ̀ wə̀d mɨ̀sɔŋɨchù kɨə we nɨ àwɔ̀ ə nəŋgɨ əməd ə?”

⁷À fə ghɨ̀ ni wɨ̀ tɔ swiʼ əton mbɨ̀aŋgɨrə̀ àmei ənɨ ɨkə nyumə̀. À fə ghɨ̀ ni wɨ̀ berɨ ɨzeŋɨ zeŋɨ bə̀ berɨ ɨwumnɨ.

⁸À fə bə̀ nuŋ ɨghɨjìm əton məd. Ənɨ Ŋwìə̀ nyaʼa nuŋ ɨghɨjìm əton məd, chəi wɨ̀ nyaʼa saŋ əghɨ ə mɔʼɔ. Àyɨə tɨ̀nîn chəi tɨ̀ kɨrɨ zə ɨghɨjìm əton məd.

⁹Àyɨə tɨ̀ wɨə zə ə Yeso nɨ Ŋwìə̀ nyaʼa ghɨ ni wɨ̀ tɔ swiʼ əton mbɨ̀aŋgɨrə̀ ənɨ ɨkə nyumə̀. Wɨ̀ fə ghɨ̀ ni wɨ̀ berɨ ɨzeŋɨ zeŋɨ bə̀ berɨ ɨwumnɨ. Wɨ̀ nyaʼa zə ŋgəʼ kwɨ, ɨmbə̀ʼ ənjìm ɨ̀chɔ̀m Ŋwìə̀, ɨ we tɨ̀ wɨ̀ kwɨ ɨgwɨ ətu ə bə̂d mɨ̀jìm.

¹⁰Ɨ ghɨ ni mbɨ wumnɨ bə̂d mɨ̀sɔŋɨchù ɨchî nɨ mbɨə wumnɨ əməd, zɨ̀ ə nyaʼa kùʼ ni Ŋwìə̀ ghɨ ni wə̀d we nɨə chɨ̀ə̀ bə̂d rəŋgəʼ bɔŋ ə màànɨ̀ ɨchî nɨ wɨ̀ nyaʼa zə ŋgəʼ. À yɨə Ŋwìə̀ nyaʼa tekɨ ɨghɨjìm, ɨghɨjìm mbɨə bə̀ əŋgu ənjìm məd.

¹¹Məd we nɨə zeŋnɨ ə bə̂d mbɨ ə bə̂d mbe nɨ mbɨ zeŋnɨ mɨ̀mə̌d, berɨ àmei mbǎʼ mɔʼ. À yɨ əton nɨ chəi ətu əməd ə nìd nɨ tɔŋ mɨ̀mə̌d ni mbɨ yɨ mbi bɔŋgɔb.

¹²Wɨ̀ nyaʼa ghà ni, “Mə bɨrɨ saʼ ɨnû ɨmbə̀ʼ əwe əmbɨ mbɨ bɔŋgɔb. Mə bɨrɨ yiirɨ əwe ɨŋga ɨfetɨ mɨ̀mə̌d.”

¹³Wɨ̀ nyaʼa yì ghà ni, “Mə bɨrɨ nuŋ mɨ fîŋ ɨgun ə Ŋwiə̀.” Wɨ̀ nyaʼa bə̀ yì ghà ni, “À yɨə mɔ̌ wɔ̂ mbɨ ə bɔn mbe nɨ Ŋwìə̀ fə naʼ ɨ num.”

¹⁴Əne ɨchî nɨ bɔn mbe berɨ nyamnyod mbɨ ənəm, məd ziə nyaʼa bə̀ yeʼ wə̀d mɨ̀sɔŋɨchù, ɨmbə̀ʼ ənjìm ɨvɨ məd, wɨ̀ bɨrɨ nimnɨ əməd we nɨ berɨ ɨka ɨgwɨ ɨvɨ, əne yɨə Debɨ̀rə̀.

¹⁵Wɨ̀ bɨrɨ nimnɨ əne chɨ̀ bə̂d mbe nɨ ənû nɨ bɔ ɨvɨ ə nyaʼa ghɨ̌ mbɨ chub ənɨ ɨ̀bòʼò ənɨ mbɨ nyaʼa kɨrɨ ɨkǎ.

¹⁶Zɨə zeŋ ni kaʼi mbɨ̀aŋgɨrə̀ nɨ wɨə wèèrɨ̀ə̀. Ɨ wɨə wèèrɨ̀ə̀ yeʼ bɔn tɨ ənɨ əghaŋ ə Abràham.

¹⁷À yɨ əton nɨ wɨ̀ nyaʼa berɨ yeʼ ɨghabɨ mbi bɔŋgɔb ənɨ ɨnû jìm, ɨmbə̀ʼ wɨ̀ yeʼ ətu ɨgwɨ ə bə̂d mbàn Ŋwìə̀. Ɨ wɨə dììrɨ̀ə̀ bə̂d bə̀ fàʼ əmbɨ ə Ŋwiə̀ ənɨ i fîŋ jìm. Ɨ wɨə ghɨ̀ əne ɨmbə̀ʼ Ŋwìə̀ waʼ ɨnû rɨbɔ̀ŋ bə̂d.

¹⁸Ɨchî nɨ wɨ̀ nyaʼa zə ŋgəʼ ənɨ Satàn nyaʼa numbɨ əməd, ɨ we tɨ̀ wɨ̀ bə̀ wèèrɨ̀ bə̂d mbe nɨ Satàn ə numbɨ mɨ̀mə̌d.