Read Fɨso Fi Mɨ̀hibrù 3 Bible Online

Mɨ̀hibrù 3 - Fɨso Fi bible

Mɨ̀hibrù 3

¹Mbɨ bɔŋgɔb zeŋɨ nɨ Ŋwìə̀ nyaʼa bə tɔŋə, mbə̀ jeŋgɨ kɔndɨ ə Yeso nɨ tɨ̀ ben ni məd yɨə wə̀d tom fɔrɨ ətu ɨgwɨ ə bə̂d mbàn Ŋwìə̀.

²Wɨ̀ nyaʼa fàʼ ənɨ i fîŋ jìm əmbɨ Ŋwìə̀ we nɨ nyaʼa chɔʼ əməd. Wɨ̀ nyaʼa fàʼ ɨchî nɨ Mose nyaʼa bə fàʼ ənɨ i fîŋ jìm ɨŋga nəb Ŋwìə̀.

³Ɨ mbɨə nàʼ ɨwumnɨ əmbɨ Yeso chè ɨchî nɨ mbɨə nàʼ əmbɨ Mose, àmei ɨchî nɨ mbɨə bə nàʼ ɨwumnɨ əmbɨ wə̀d we nɨ bɔm nəb chè ɨchî nɨ mbɨə nàʼ əmbɨ ə nəb ze nɨ wɨ̀ bɔmɨ.

⁴Zɨə zeŋ ni nəb jìm ə berɨ wə̀d nɨ bɔmɨ, àyɨə wə̀d nɨ tekɨ ɨghɨjìm yɨə Ŋwìə̀.

⁵Mose nyaʼa fàʼ ɨŋga nəb Ŋwìə̀ ənɨ i fîŋ jìm. Wɨ̀ nyaʼa ghɨ̀ əne àmei ɨghabɨ wə̀d ə̀fàʼì. Ɨ wɨə nyaʼə ghà ɨmbə̀ʼ ɨnû mbe nɨ Ŋwìə̀ bɨrɨ nɨ ghà.

⁶Kristo wɨə fàʼ ənɨ i fîŋ jìm ɨgwɨ ə nəb Ŋwìə̀ ɨghabɨ ə wan. Tɨ̀ yɨə nəb məd əwù ze nɨ tɨ̀ yim a ɨbenɨ wɨ kàànɨ̀ bə̀ nùŋ ta rɨkɔndɨ àmei ɨgwɨ ɨghɨ mbe nɨ tɨə goŋ ɨgɔ̂ wòmə̀.

⁷Əzwî ə Ŋwìə̀ ə zɨə ghàə̀ ni, “Tə̀chɔ̀ŋ, mbə̀ mɨ nɨə zu gɨ̂ Ŋwìə̀,

⁸tɨ mbə̀ tuurɨ ə tə fîŋ, ɨchî nɨ mbə mɨ̀mbǎʼ rəŋwe nyaʼa ka ətu ghɨ̀ əne ənɨ mbɨ nyaʼa kwaʼnɨ mɨ̀mə̌d ɨŋga ɨbad rɨkwàʼi.

⁹Mbə mɨ̀mbǎʼ rəŋwe nyaʼa kwàʼnɨ̀ əmɨ ɨŋga ɨbad rɨkwàʼi ka à bè yeʼi ni mbɨ nyaʼa zə ɨnû mbe nɨ mə̀ nyaʼa ghɨ̌ ənɨ ɨghəm ɨwu ɨwum kwè.

¹⁰Mə nyaʼa sə ɨtəm əbɔʼ ɨghəm bə̂d we, əne ghà ni, 'Fîŋ tɨ mɨ̀mə̌d tɨə kɨə febə, chəi mbɨ kɨrɨ kyerɨ mbɨ mɨ̀chì.'

¹¹Mə nyaʼa sə ɨtəm kàn ghà ni, 'Chəi mbɨ bɨrɨ nɔ nyɨ ɨŋga əsɨ ə̀zwììrɨ̀ ze nɨ mə bɨrɨ naʼ əmbɨ mɨ̀mə̌d.'”

¹²Mbə̀ we əwən, kyɨə bɔŋgɔb, ɨmbə̀ʼ tɨ wə̀d mɔʼɔ rəbɔʼ nən berɨ i fîŋ rɨbɔ̀ŋ nɨ chəi zɨ ben ə Ŋwiə̀, əne ghɨ̀ mbə̀ sàŋ Ŋwìə̀ we nɨ yeʼ ɨkǎ.

¹³Àyɨə mbə̀ kəərɨ əwən mbənə mbənə ɨni jìm, ɨchî nɨ mbɨə kɨrɨ tɔŋə əni ze ni, “Tə̀chɔ̀ŋ.” Mbə ghɨ əne ɨmbə̀ʼ tɨ ənû rɨbɔ̀ŋ ə mɔʼɔ ə tambɨ i əwən, əne ghɨ̀ tə fîŋ tu.

¹⁴Tɨ̀ bɨrɨ yeʼ ənɨ ənû ə mɔʼ mbɨ Kristo ənɨ tɨ̀ yim ənû ze nɨ tɨ̀ nyaʼa be benɨ wò pè ənɨ ɨnwǐ.

¹⁵Ə zɨ ɨŋga Ə̀ŋwàʼnɨ̀ ə Ŋwìə̀ ni, “Tə̀chɔ̀ŋ, mbə mɨ nɨə zu gɨ̂ Ŋwìə̀, tɨ mbə̀ tuurɨ ə tə fîŋ, ɨchî nɨ mbə mɨ̀mbǎʼ rəŋwe nyaʼa ka ətu ghɨ̀ əne.”

¹⁶À kɨ mɨwe nɨ nyaʼa zu gɨ̂ Ŋwiə̀ kɨrɨ ka ətu ə? Kaʼ à wa kɨ i bə̂d mɨ̀jìm mbe nɨ Mose nyaʼa nɨŋ mbɨ jwɨ̀ rɨ ə Ijìpt ə?

¹⁷À kɨ əbɔʼ mɨwe nɨ Ŋwìə̀ nyaʼa sə ɨtəm ɨghəm ɨwu ɨwum kwè ə? Kaʼ à wa kɨ i əbɔʼ bə̂d mbe nɨ nyaʼa ghɨ ɨnû rɨbɔ̀ŋ, əne gù kwɨrɨ ɨŋga ɨbad rɨkwàʼi ə?

¹⁸À kɨ əmbɨ mɨwe nɨ Ŋwìə̀ nyaʼa kan ni chəi mbɨ bɨrɨ nɔ nyɨ ɨŋga əsɨ ə̀zwììrɨ̀ ze nɨ wɨ̀ bɨrɨ nàʼ əmbɨ mɨ̀mə̌d ə? Kaʼ à wa kɨ i əmbɨ ə bə̂d mbe nɨ chəi mbɨ nyaʼə zuunɨ əməd ə?

¹⁹Əne tɨ̀ fə zə ni chəi ənɨ tɨ mbɨ nyaʼa nyɨ ɨŋga əsɨ ə̀zwììrɨ̀ ze ɨmbə̀ʼ ɨghəm nɨ chəi mbɨ nyaʼa benɨ.