Read Fɨso Fi Mɨ̀hibrù 4 Bible Online

Mɨ̀hibrù 4 - Fɨso Fi bible

Mɨ̀hibrù 4

¹Ənû ze nɨ Ŋwìə̀ nyaʼa kaʼi ə kɨrɨ təm. Wɨ̀ nyaʼa kàʼ ni bə̂d bɨrɨ nyɨ ɨŋga əsɨ ə̀zwììrɨ̀ ze nɨ wɨ̀ bɨrɨ naʼ əmbɨ mɨ̀mə̌d. Əne tɨ̀ we əwa ɨmbə̀ʼ tɨ wə̀d mɔʼɔ rəbɔʼ nən nim i əpan nɨ nyɨ ɨŋga əsɨ ə̀zwììrɨ̀ ze.

²Ɨkə̂n chɔ̀m nyaʼa yeʼe ɨ na ɨchî nɨ wɨ nyaʼa bə̀ yeʼe əmbɨ ə bə̂d mbe nɨ nyaʼa ghɨ ɨnû rɨbɔ̀ŋ ɨŋga ɨbad rɨkwàʼi. Mbɨ nyaʼa zu ɨkə̂n we àyɨə chəi wɨ nyaʼa weerɨ mɨ̀mə̌d, ɨmbə̀ʼ ɨghəm nɨ mbɨ nyaʼa zu àyɨə chəi mbɨ nyaʼa benɨ.

³Àmei mba mbe nɨ fə benɨ bɨrɨ nyɨ ɨŋga əsɨ ə̀zwììrɨ̀ ze. Ŋwìə̀ nyaʼa ghà ɨmbə̀ʼ bə̂d mbe nɨ chəi mbɨ nyaʼa ben ni, “Mə nyaʼa sə ɨtəm əne kàn ni, 'Chəi mbɨ bɨrɨ nɔ nyɨ ɨŋga əsɨ ə̀zwììrɨ̀ ze nɨ mə bɨrɨ naʼ əmbɨ mɨ̀mə̌d.'” Wɨ̀ nyaʼa ghà əne, ka à be yeʼi ni ə̀fàʼ əməd ə nyaʼa fə mì i ənɨ wɨ̀ nyaʼa tekɨ ɨsɨg.

⁴Wɨ̀ nyaʼa ghà əsɨ ə mɔʼɔ ɨŋga Ə̀ŋwàʼnɨ̀ ə Ŋwiə̀ ɨmbə̀ʼ əni ze nɨ pe ənɨ mbɨ sambe ni, “Ŋwìə̀ nyaʼa màànɨ̀ mbi ɨ̀fàʼì jìm, əne zwììrɨ̀ əni ze nɨ pe ənɨ mbɨ sambe.”

⁵Wɨ̀ nyaʼa bə̀ yì ghà ɨŋga əsɨ ə̀ŋwàʼnɨ̀ ze ni, “Chəi mbɨ bɨrɨ nɔ nyɨ ɨŋga əsɨ ə̀zwììrɨ̀ ze nɨ mə bɨrɨ naʼ əmbɨ mɨ̀mə̌d.”

⁶Bə̂d mɔʼɔ bɨrɨ nyɨ ɨŋga əsɨ ə̀zwììrɨ̀ ze. Chəi mbe nɨ nyaʼa be zu ɨkə̂n chɔ̀m nyaʼa nyɨ ɨŋga əsɨ ə̀zwììrɨ̀ ze ɨmbə̀ʼ rɨ̀zuə̀.

⁷Ŋwìə̀ nyaʼa yì nùŋ əni ə mɔʼɔ nɨ mbɨə tɔŋ ənɨ “Tə̀chɔ̀ŋ”. Ɨghəm ɨwu nɔnɔʼ nɨə fə che rɨ ənɨ bə̂d mbe nyaʼa ghɨ rɨ̀zuə̀, wɨ̀ nyaʼa che ənjìm ə wə̀d ɨ̀kə̀n Dèvîd ghà ɨŋgam we nɨ wɨ̀ nyaʼa be ghà. Ɨŋgam we yɨ ni, “Tə̀chɔ̀ŋ, mbə mɨ nɨə zu gɨ̂ Ŋwìə̀, tɨ mbə̀ tuurɨ ə tə fîŋ.”

⁸À kɨ nɨ Jòsuà nyaʼa cha mɨ̀mə̌d ɨŋga əsɨ ə̀zwììrɨ̀ ze, njɨ chəi Ŋwìə̀ nyaʼa wɨrɨ yì ghà ɨmbə̀ʼ əni ə cherə.

⁹Əne əni ə̀zwììrɨ̀ ə zɨə kɨrɨ i əmbɨ ə bə̂d Ŋwiə̀.

¹⁰Wə̀d mɔʼɔ mɨ fə nɨ nyɨ ɨŋga əsɨ ə̀zwììrɨ̀ ze nɨ Ŋwiə̀ kaʼi, njɨ wɨ̀ bɨrɨ bɨ zwiirɨ tɨ ənɨ mbi ɨ̀fàʼì àmei ɨchî nɨ Ŋwìə̀ nyaʼa bə zwììrɨ̀ tɨ ənɨ mbi.

¹¹Əne tɨ̀ kywɨ ənywɨ nyɨ ɨŋga əsɨ ə̀zwììrɨ̀ ze. Tɨ wə̀d mɔʼɔ sam i, ɨchî nɨ mɨ̀Jû nyaʼa ghɨ rɨ̀zuə̀ sam.

¹²Ɨŋgam Ŋwiə̀ wɨ ɨkǎ. Ɨ wɨə bə̀ ghɨ̀ ənû ze nɨ Ŋwìə̀ kəbɨ. Wɨ tɔ chè ɨbi ɨba jìm. Ɨ wɨə zum ə wə̀d wò pè əsɨ ze nɨ ɨ̀tènɨ̀ mbɨ əzwî ghabrə. Ɨ wɨə bə̀ wò pè əsɨ ze nɨ tɨnaanɨ ɨnyod mbɨ rɨfɔm ghabrə. Ɨ wɨə saʼə tɨkɔndɨ bə̂d bə̀ saʼ ɨnû mbe nɨ fîŋ tɨ mɨ̀mə̌d ə kə̀bə̀.

¹³Chəi əghɨ ə mɔʼɔ rəbɔʼ mbe nɨ Ŋwiə̀ tekɨ nɨ tɨ̀ zɨə nəmbɨ rɨ ənɨ əghə əməd. Ɨghɨjìm mbɨ əsaŋ ɨfě məd we nɨ tɨ̀ bɨrɨ gha ɨnû jìm mbe nɨ tɨ̀ fə ghɨ ɨ bɔ.

¹⁴Tɨ̀ berɨ ətu ɨgwɨ ə bə̂d mbàn Ŋwìə̀ nɨ dabə. Məd yɨə Yeso Wan Ŋwìə̀ we nɨ nyaʼa wò ɨkaŋ. Əne tɨ̀ yim ənû ze nɨ tɨ̀ benɨ zɨə kaanə.

¹⁵Chəi tɨ̀ berɨ ətu ɨgwɨ ə bə̂d mbàn Ŋwìə̀ nɨ chəi ənɨ tɨ̀ wɨ̀ kən ɨmbə̀ʼ ɨchî nɨ tɨ̀ bɔrɨ. Tɨ̀ berɨ yeʼ we nɨ mbɨ nyaʼa numbɨ əməd ənɨ mɨ̀nə̂njɨ̀ jìm ɨchî nɨ mbɨə bə̀ numbɨ əwa, àyɨə chəi wɨ̀ nyaʼa ghɨ̌ ənû rɨbɔ̀ŋ.

¹⁶Əne tɨ̀ nɨŋ fîŋ nɨ kǎ tindɨ ɨban ətən ɨfɔ̀n ə Ŋwiə̀ we nɨə ghɨ̀ ɨ̀chɔ̀m, ɨmbə̀ʼ məd we tɨ̀ wɨ̀ dììrɨ̀ əwa bə̀ ghɨ̀ ɨ̀chɔ̀m ənɨ ə na ənɨ ə nyùmə̀ we nɨ tɨ̀ kəb ə̀wèèrɨ̀.