Read Fɨso Fi Mɨ̀hibrù 5 Bible Online

Mɨ̀hibrù 5 - Fɨso Fi bible

Mɨ̀hibrù 5

¹Ɨ mbɨə chɔʼ ɨtu jìm ɨgwɨ ə bə̂d mbàn Ŋwìə̀ rəkaʼ bə̂d məd. Ɨ mbɨə chɔʼə mɨ̀mə̌d ni mbɨ faʼ əmbɨ ə Ŋwiə̀ dè ətu bə̂d mbe. Ɨ wɨə nàʼ ɨchəmnɨ bə̀ nàʼ ɨghɨ ə̀fà əmbɨ ə Ŋwiə̀ ɨgwɨ ɨnû rɨbɔ̀ŋ mɨ̀mə̌d.

²Ɨ wɨə nyeʼə ghɨ̀ ɨnû ənɨ əbɔrəbɔd ənɨ ə bə̂d mbe nɨə fàn ɨnû. Ɨ wɨə ghɨ̀ əne ɨmbə̀ʼ ɨghəm nɨ chəi mbɨ kyerɨ ɨnû mbe nɨ mbɨə ghɨ̀ə̀. Ɨchî nɨ mbɨ bɔd yɨə bə̀ ɨchî nɨ məd ziə bə bɔd ənɨ mɨnə̂njɨ̀ nɔnɔʼ.

³Ɨchî nɨ zɨə yeʼ əne, wɨ̀ berɨ naʼ ɨghɨ ə̀fà ɨmbə̀ʼ mbi ɨnû rɨbɔ̀ŋ bə̀ nàʼ ɨmbə̀ʼ mbɨ bə̂d cherə.

⁴Chəi wə̀d mɔʼɔ nɨ tɨ̀ wɨ̀ yeʼ ətu ɨgwɨ ə bə̂d mbàn Ŋwìə̀ ɨmbə̀ʼ ɨchî nɨ wɨ̀ ghaʼ ɨwumnɨ we. Àmei Ŋwìə̀ berɨ chɔʼ əməd ɨchî nɨ wɨ̀ nyaʼa chɔʼ ə Eròn.

⁵Əndəŋ əndəŋ, kaʼi Kristo ziə nyaʼa kəb ɨwumnɨ we nɨ yeʼ ətu ɨgwɨ ə bə̂d mbàn Ŋwìə̀, àyɨə Ŋwìə̀ nyaʼa ghà ɨ bɔ ni, “Àwɔ̀ yɨ mɨ Wan, tə̀chɔ̀ŋ mə fə sɨ e Mbǎʼ.”

⁶Wɨ̀ nyaʼa bə̀ yì ghà ɨŋga əsɨ ə̀ŋwàʼnɨ̀ ə cherə ni, “Àwɔ̀ yɨə wə̀d mbàn Ŋwìə̀ koŋ, ənɨ ɨwaŋ Mèlkizedèk.” [1]

⁷Ənɨ Yeso nyaʼa ɨgwɨ ə si, ɨ wɨə nyaʼə kɔ̀ŋgɨ̀ ə Ŋwìə̀ bə̀ nɔn ɨnû rɨ əmbɨ ə Ŋwìə̀ we nɨ tɨ̀ wɨ̀ nyaʼa fe əməd tɨ əmbɨ ɨvɨ. Ɨ wɨə nyaʼə kɔŋgɨ əne mbɨ əwob ə ka ka fɔrɨ mbɨ mɨsɨ əghə. Ŋwiə̀ nyaʼa zu ə̀kɔ̀ŋgɨ̀ əməd ɨmbə̀ʼ ɨghəm nɨ wɨ̀ nyaʼa swi i ɨnyod wumnɨ ə Ŋwiə̀.

⁸Kaʼ wɨ̀ bè yeʼi Wan Ŋwìə̀, wɨ̀ nyaʼa kwembɨ ənû nɨ zuunɨ ə Ŋwìə̀ ɨchî nɨ wɨ̀ nyaʼa zə ŋgəʼ.

⁹Ənɨ Ŋwiə̀ nyaʼa fə ghɨ̌ wɨ̀ bɔ̀ŋ màànɨ̀, wɨ̀ nyaʼa bèŋ sɨə ghɨ̀ə̀ ni bə̂d mɨjìm mbe nɨə zuunɨ əməd jwɨ̀ rəŋgəʼ koŋ.

¹⁰Əne Ŋwìə̀ nyaʼa chɔʼ əməd ni wɨ̀ yeʼ ətu ɨgwɨ ə bə̂d mbàn ənɨ ɨwaŋ Mèlkizedèk.

¹¹Tɨ̀ berɨ ɨnû nɔnɔʼ nɨ ghà ɨmbə̀ʼ ənû zɔ̂, àyɨə zɨə kàŋ se nɨ toʼrɨ ɨ nən, ɨmbə̀ʼ ɨghəm nɨ chəi mbə̀ə kɨə zàmbɨ̀ə̀ kyerɨ ɨnû mbe nɨ mbɨ chwi ɨ nən.

¹²Tɨ̀nîn njɨ mbə mbɨə sɨə chwi ɨnû, àyɨə mbə mbɨə wɨrɨə kə̀bə̀ ni wə̀d mɔʼɔ yi chwi ɨnû rɨtu mbe nɨ mbə̀ nyaʼa be kwembɨ ɨmbə̀ʼ ɨŋgam Ŋwiə̀. Mbə kɨrɨ kə̀b yeʼ ɨbən, kaʼi ɨghɨjɨg nɨ kaanɨ.

¹³Wə̀d we nɨə nyɔŋ àmei ɨbən yɨə wan bɔd. Chəi wɨ̀ kɨrɨ kyerɨ ɨnû mbe nɨ yeʼ ɨŋga ɨŋgam Ŋwiə̀ ɨmbə̀ʼ ɨnû nɨ kuʼnɨ.

¹⁴Ɨghɨjɨg nɨ kaanɨ yɨ əmbɨ ə bə̂d kyeŋ mbe nɨ fə kwembɨ ɨnû mə̀d əne kyerɨ ɨkwepɨ rəbɔʼ ɨnû chɔ̀m mbɨ ɨnû rɨbɔ̀ŋ.