Read Fɨso Fi Mɨ̀hibrù 6 Bible Online

Mɨ̀hibrù 6 - Fɨso Fi bible

Mɨ̀hibrù 6

¹Tɨ̀ saŋ ɨnû mbe nɨ tɨ̀ nyaʼa be kwembɨ ɨmbə̀ʼ ə Kristo, əne wò ɨmbì kwembɨ mbe nɨ fə kaanɨ. Tɨ rɨ wɨrɨ gha a ɨnû rɨtu mbe ni bə̂d beŋ tə fîŋ tɨ ənɨ ɨnû mbe nɨə zwiirɨə bə̂d mbɨ ni bə̂d nuŋ fîŋ ɨgun ə Ŋwiə̀.

²Tɨ rɨ wɨrɨ gha a ɨmbə̀ʼ ənû nɨ nɨŋ mɨnib, ɨmbə̀ʼ ənû nɨ zab ɨbɔ ɨgwɨ ə bə̂d, ɨmbə̀ʼ ənû nɨ bə̂d bɨrɨ zwemə fɔrɨ ɨmbə̀ʼ ənû nɨ Ŋwìə̀ bɨrɨ sob mɨsaʼi koŋ.

³Ŋwìə̀ mɨ benɨ, tɨ̀ bɨrɨ saŋ ɨnû mbɔ̂ wo ɨmbì.

⁴Zɨə kàŋ seə nɨ wɨrɨ ghɨ ni bə̂d bèŋ tə fîŋ bə̀ndɨ̀ wò əmbɨ ə Ŋwiə̀ əwù ze nɨ mbɨ kweʼ zə ɨzeŋɨ zeŋɨ Ŋwiə̀, kweʼ zweʼrɨ ɨghɨ rɨkaŋ mbe nɨ wɨ̀ neʼ əwa əŋgu, Əzwî ə Zeŋɨ ə nyɨ ɨŋga mɨ̀mə̌d,

⁵mbɨ bə̀ kweʼ zweʼrɨ ɨchî nɨ ɨŋgam Ŋwiə̀ bɔŋɨ bə̀ zə ɨnû yiirɨ mbe nɨ bɨrɨ jwɨ̀ ənɨ nyùmə̀ we nɨə wo yeʼe.

⁶Mbɨ mɨ fə ton ə Ŋwiə̀, njɨ zɨə kàŋ seə nɨ wɨrɨ ghɨ ni mbɨ beŋ tə fîŋ, ɨmbə̀ʼ ɨghəm nɨ ɨ mbɨə wɨrɨə kòmbɨ̀ ə Wan Ŋwìə̀ əzed ə baʼnɨ bə̀ nàʼə̀ tɨ̀nìd ətu ɨ bɔ əsaŋ əsaŋ.

⁷Ŋwìə̀ bɨrɨ zɨ əbɔrəbɔd ɨgun ə si ze nɨ mbə̀ŋ chubɨ, zɨ ghɨ̌ ɨghɨ kwi, bə̂d mbe nɨ mbɨ kon ɨghɨ mbe ɨmbə̀ʼ mɨ̀mə̌d bə̀ jɨg.

⁸Chəi si ze nɨ ɨ̀jə̀ŋɨ̀ mbɨ ɨfu kwi ɨgun weerɨ ənû ə mɔʼɔ. Ŋwìə̀ we tɨ wɨ̀ fə̌ si ze. Mbɨ bɨrɨ sɨ nwìə̀ tɔ̀n ənɨ ɨwid.

⁹Bɔŋgɔb nɨ tɨ̀ ghaʼi kwàʼ rɨŋgəʼ, ka tɨ̀ yeʼə ghà a əne, tɨ̀ kàŋ kyerɨ ənɨ rəsìʼ ɨmbə̀ʼ əwən ni mbə berɨ ɨghɨ nɨ bɔŋɨ chè, nɨ yeʼ ɨghɨ mbe nɨ bɨrɨ ghɨ mbə̀ jwɨ rəŋgəʼ.

¹⁰Ŋwìə̀ wɨə ghɨ̀ àmei ɨnû nɨ kuʼnɨ. Kaʼ məd bɨrɨ neb i ɨnû mbe nɨ mbə̀ fə ghɨ. Kaʼ məd bɨrɨ bɨ neb i ɨghaʼi we nɨ mbɨə chwi ɨ bɔ ənɨ mbə̀ nyaʼə weerɨ bə̂d məd bə̀ kɨrɨ wò ɨmbì wèèrɨ̀ə̀.

¹¹Tɨ̀ wɨə kə̀bə̀ ni wə̀d mɔʼ mɔʼ rəbɔʼ nən wo ɨmbì àmei əne, fàʼ ənɨ i fîŋ jìm wò pè ənɨ ɨnwǐ, ɨmbə̀ʼ mbə̀ berɨ ɨghɨ mbe nɨ mbə̀ nuŋ tə rɨkɔndɨ ɨ wòm.

¹²Chəi tɨ̀ kəb ni mbə̀ ghɨ ɨgwed. Mbə̀ ghɨ yeʼ ɨnû mbe nɨ bə̂d mbe nɨ ənjìm ɨbenɨ fɔrɨ ənjìm ɨyim fîŋ nyaʼə ghɨ̀ə̀. Mbɨ nyaʼə ghɨ̀ əne ɨmbə̀ʼ jɨg ɨghɨ mbe nɨ Ŋwìə̀ nyaʼa kaʼi.

¹³Ənɨ Ŋwìə̀ nyaʼa kaʼ ə Abràham, wɨ̀ nyaʼa kàn ziə ziə ni tə bɨrɨ ghɨ ənû ze nɨ tə kaʼi. Wɨ̀ nyaʼa ghɨ̀ əne ɨmbə̀ʼ ɨghəm nɨ chəi wɨ̀ nyaʼa berɨ wə̀d mɔʼɔ nɨ chè əməd.

¹⁴Wɨ̀ nyaʼa kàʼ əne ghà ni, “Mə bɨrɨ kaŋ zɨ əbɔrəbɔd ɨgwɨ ne bə̀ ghɨ̀ ni bɔn tɨ ənɨ e əghaŋ san.”

¹⁵Abràham nyaʼa yim fîŋ bə̀ wòm, əne wɨ̀ nyaʼa berɨ əghɨ ze nɨ Ŋwìə̀ nyaʼa kaʼ ɨ bɔ.

¹⁶Ənɨ bə̂d ə kànə̀, ɨ mbɨə kàn ənɨ ɨkum wə̀d we nɨ che mɨ̀mə̌d. Ənɨ mbɨ kàn əne, ənû ə tàŋ ə mɔʼɔ ze nɨ mbɨ berɨ ə bɨrɨ mi i.

¹⁷Ənɨ Ŋwìə̀ nyaʼa kəb ghɨ zɨə zeŋ əmbɨ ə bə̂d mbe nɨ wɨ̀ nyaʼa kaʼ mɨ̀mə̌d ni chəi tə bɨrɨ nɔ kwepɨ ənû ze nɨ tə nyaʼa fə nuŋɨ, wɨ̀ nyaʼa nɨŋ i ɨkum kàn əŋgu.

¹⁸Ɨnû nɨ chəi ənɨ tɨ mbɨ kwepɨ mbɨ ɨbe nɨ chəi Ŋwìə̀ bɨrɨ nɔ gha mɨghab ɨmbə̀ʼ mbɨwən. Əne mbà mbe nɨ fə norɨ wo nə̀mbɨ̀ əton məd mbe tɨ rɨ̀ yim fîŋ ɨmbə̀ʼ berɨ ənû ze nɨ tɨə nùŋ rɨkɔndɨ wòmə̀.

¹⁹Ənû zɔ̂ nɨ tɨə wòmə̀ yɨ əghɨ ze nɨ a ɨ̀tènɨ̀ təm ɨgun kàànɨ̀ nɨ chəi ənɨ tɨ əghɨ ə mɔʼɔ chìʼ. Zɨə bɨrɨ ghɨ̀ ni tɨ̀ wo əsɨ ɨwumnɨ ze nɨ yeʼ ənjìm ngywɨ̌ ze nɨ mbɨ tam ɨŋga mbàn Ŋwìə̀,

²⁰nɨ yeʼ əsɨ ze nɨ Yeso nyaʼa nyɨ ɨŋga ɨmbə̀ʼ əwa. Məd fə sɨ ətu ɨgwɨ ə bə̂d mbàn Ŋwìə̀ koŋ ənɨ ɨwaŋ Mèlkizedèk.