Read Fɨso Fi Mɨ̀hibrù 7 Bible Online

Mɨ̀hibrù 7 - Fɨso Fi bible

Mɨ̀hibrù 7

¹Mèlkizedèk wɔ̂ yɨə nyaʼa ɨfɔ̂n ə Salèm. Wɨ̀ yɨə nyaʼa bə̀ ə wə̀d mbàn Ə̀chè-ɨsɨg Ŋwìə̀. Wɨ̀ nyaʼa bòmnɨ̀ mbɨ Abràham ənɨ Abràham nyaʼə bə̀ndɨ̀ rɨ ənɨ ɨbid we nɨ wɨ̀ nyaʼa baŋ mɨfɔ̂n mɨ̀kwè. Ənɨ mbɨ nyaʼa bomnɨ əne, Mèlkizedèk nyaʼa zɨ̀ əbɔrəbɔd ɨgun ə Abràham.

²Abràham nyaʼa ghàpɨ̀ ɨghɨ mbe nɨ wɨ̀ nyaʼa yeʼe rɨ ə bid mbɨ mbɨwən ɨsɨ wum, nàʼ əsɨ ə fibɨ̀ ɨ bɔ. Əton rɨtu ənɨ ə Mèlkizedèk yɨ ni, “Ɨfɔ̂n nɨ ɨnû məd kuʼnɨ.” Wɨ̀ yɨə nyaʼə bə̀ ɨfɔ̂n ə Salèm, əne əton ə cherə ənɨ ɨkum we yɨ ni, “Ɨfɔ̂n nɨə ghɨ̀ ni bə̂d chub ənɨ əbɔrəbɔd.”

³Chəi mbɨ ŋwaʼnɨ ɨmbə̀ʼ mbǎʼ məd, ɨmbə̀ʼ ɨŋgɔb məd kɨ̀ ɨmbə̀ʼ ɨnəbɨ məd. Chəi mbɨ ŋwaʼnɨ ɨmbə̀ʼ ɨchî nɨ mbɨ nyaʼa gywɨ əməd kɨ̀ ɨmbə̀ʼ ɨchî nɨ wɨ̀ nyaʼa kwɨ, àyɨə ɨchî nɨ wɨ̀ nyaʼa ɨghabɨ ə Wan Ŋwìə̀, wɨ̀ yɨə wə̀d mbàn Ŋwìə̀ koŋ.

⁴Mbə̀ zə ɨchî nɨ Mèlkizedèk nyaʼa dabə! Abràham a mbǎʼ ɨnəbɨ mɨ̀Izre nyaʼa nàʼ əsɨ ə fibɨ̀ rəbɔʼ ɨsɨ wum tɨ ənɨ ɨghɨ mbe nɨ wɨ̀ nyaʼa nɨŋ rɨ ə bid ɨ bɔ.

⁵Bə̂d tɨ ənɨ əghaŋ ə Levì nɨ yeʼ bə̂d mbàn Ŋwìə̀ berɨ ɨkə mɔʼ ɨŋga tɨkə rɨ Mose nɨ gha ni mbɨ nɨŋ əsɨ ə fibɨ̀ ɨŋga mbɨ wum tɨ əmbɨ ə bə̂d, əne yɨ rɨ əmbɨ ə bɔŋgɔb mɨ̀mə̌d, ka à be yeʼi ni mbɨ yɨə bə̀ ə bɔn tɨ ənɨ əghaŋ ə Abràham.

⁶Kaʼ Mèlkizedèk yɨə nyaʼa i rɨŋga ɨnəbɨ Levì, àyɨə wɨ̀ nyaʼa nɨŋ əsɨ ə fibɨ̀ ɨŋga mbɨ wum rɨ əmbɨ Abràham. Wɨ̀ nyaʼa nɨŋ əne zɨ̀ əbɔrəbɔd ɨgwɨ məd we nɨ Ŋwìə̀ nyaʼa kaʼ ənû ze ɨ bɔ.

⁷Zɨə zeŋ ni wə̀d we nɨə nàʼ əbɔrəbɔd ə chè we nɨə nɨŋə.

⁸Ɨ wo ənɨ ə bə̂d mbàn Ŋwìə̀, à yɨə bə̂d nɨə kwɨə ə nɨŋ əsɨ ə fibɨ̀ ɨŋga mbɨ wum. Ɨ wo ənɨ ə Mèlkizedèk, mbɨ ŋwàʼnɨ̀ ni à yɨə wə̀d nɨ kɨrɨ ɨkǎ nyaʼa nɨŋɨ.

⁹Wə̀d we tɨ̀ wɨ̀ be ghà ni Levì ziə, nɨ nyaʼə nɨŋ əsɨ ə fibɨ̀ ɨŋga mbɨ wum, nyaʼa bə̀ nàʼ əsɨ ə fibɨ̀ ɨŋga mbɨ wum ənjìm ə Abràham,

¹⁰ɨmbə̀ʼ ɨghəm nɨ ənɨ Mèlkizedèk nyaʼa bomnɨ mbɨ Abràham, Levì wɨə nyaʼa kɨrɨ i ɨŋga mɨcheŋ Abràham nɨ nyaʼə mbǎʼ məd rəŋwe.

¹¹À yɨ ənjìm bə̂d mbàn nɨ rɨkə nyaʼa yeʼe. Əne à mɨ yeʼ nɨ ɨ̀fàʼì bə̂d mbàn mbe nɨ nyaʼa rɨŋga ɨnəbɨ Levì nyaʼa bɔŋɨ màànɨ̀, njɨ əton nɨ mbɨ bɨrɨ wɨrɨ kəb wə̀d mbàn cherə tɨ ənɨ ɨwaŋ Mèlkizedèk, nɨ kaʼi tɨ ənɨ ɨwaŋ Eròn, kɨ ni ye ə?

¹²À yɨ ɨmbə̀ʼ ɨghəm nɨ mbɨ mɨ kwepɨ ɨwaŋ bə̂d mbàn Ŋwìə̀, tɨkə rɨ bə̀ kwepə.

¹³Wə̀d wɔ̂ nɨ mbɨə ghà ɨnû mbɔ̂ ɨmbə̀ʼ əməd yɨ rɨŋga ɨnəbɨ cherə. Chəi wə̀d mɔʼɔ ɨŋga ɨnəbɨ we kweʼ fàʼ ɨghabɨ wə̀d mbàn Ŋwìə̀.

¹⁴Zɨə zeŋ ni a Ə̀nùŋɨ̀sɨg yɨə nyaʼa rɨŋga ɨnəbɨ Judà. Chəi Mose nyaʼa gha ənû ə mɔʼɔ ɨmbə̀ʼ bə̂d mbàn Ŋwìə̀ dè ɨnəbɨ we.

¹⁵Ənû ze nɨ tɨ̀ gha ə jwɨ̀ zeŋ ni wə̀d mbàn Ŋwìə̀ cherə fə jwɨ̀, nɨ yeʼ ɨghabɨ ə Mèlkizedèk.

¹⁶Məd yɨə wə̀d mbàn Ŋwìə̀, kaʼ i ɨmbə̀ʼ ɨchî nɨ tɨkə ɨnəbɨ chwi əne. Məd yɨə wə̀d mbàn Ŋwìə̀ ənjìm ɨka we nɨ yeʼ ənɨ ɨ̀tènɨ̀ we nɨ chəi ənɨ tɨ̀ əghɨ ə mɔʼɔ nimnɨ.

¹⁷Mbɨ nyaʼa ŋwàʼnɨ̀ ɨmbə̀ʼ əməd ni, “Àwɔ̀ yɨə wə̀d mbàn Ŋwìə̀ koŋ, ənɨ ɨwaŋ Mèlkizedèk.”

¹⁸Mbɨ nyaʼa tindɨ ɨkə rɨtu we ɨban ɨmbə̀ʼ ɨghəm nɨ wɨ nyaʼa bɔrɨ fɔrɨ ɨmbə̀ʼ ɨghəm nɨ chəi wɨ̀ nyaʼə weerɨə bə̂d.

¹⁹Chəi ɨkə nyaʼa ghɨ ni ənû ə mɔʼɔ ə bɔŋ màànɨ̀. Əne ɨnû mbe nɨ tɨ̀ nuŋ fîŋ ɨgun tɨ̀nîn ə bɔ̀ŋ chè mbe nɨ tɨ̀ nyaʼa be nùŋ fîŋ ɨgun. Tɨ̀ wɨə che ənjìm ɨnû mbe tindɨ ɨban ə Ŋwiə̀.

²⁰Ŋwìə̀ nyaʼa kàn ənɨ wɨ̀ nyaʼə nùŋ əməd ənɨ i wə̀d mbàn. Chəi wɨ̀ nyaʼa kan ənɨ wɨ̀ nyaʼə nùŋə̀ bə̂d mbàn cherə.

²¹Ŋwìə̀ nyaʼa kàn, nùŋ wə̀d mbàn wɔ̂ ghà ɨ bɔ ni, “Ə̀nùŋɨ̀sɨg ə fə kàn, chəi wɨ̀ bɨrɨ wɨrɨ kwepɨ i fîŋ, 'Àwɔ̀ yɨə wə̀d mbàn Ŋwìə̀ koŋ.'”

²²Ɨchî nɨ Ŋwìə̀ nyaʼa kan əne, Yeso fə ghɨ̀ ni tɨ̀ berɨ fɨso fe nɨ bɔŋɨ chè.

²³Bə̂d mbàn Ŋwìə̀ rɨtu nyaʼa nɔʼ ɨmbə̀ʼ ɨghəm nɨ chəi ɨvɨ nyaʼa saŋ ni mbɨ wò ɨmbì mbɨ ə̀fàʼì,

²⁴àyɨə məd ə yim e ə̀fàʼì wə̀d mbàn Ŋwìə̀ koŋ, ɨmbə̀ʼ ɨghəm nɨ məd ziə ə bə̀ ten i koŋ.

²⁵Əne məd ə berɨ ɨka ənɨ mɨ̀nyùmə̀ jìm nɨ chɨ bə̂d mbe nɨ che ənjìm məd tindɨ ɨban ə Ŋwiə̀ rəŋgəʼ, ɨmbə̀ʼ ɨghəm nɨ məd wɨ i ɨkǎ koŋ ɨmbə̀ʼ kɔŋgɨ ə Ŋwiə̀ ɨgwɨ mɨ̀mə̌d.

²⁶Ɨkwɨ ətu ɨgwɨ ə bə̂d mbàn Ŋwìə̀ wɔ̂ fə kàŋ kùʼ ɨ na. Məd ə zeŋ. Chəi ɨgu ənû ɨgwɨ məd. Chəi ɨbə ɨgwɨ məd. Chəi məd əbɔʼ bə̂d mbe nɨə ghɨ̀ ɨnû rɨbɔ̀ŋ. Mbɨ nyaʼa fə bə̀ nɔ̀ əməd ɨkaŋ.

²⁷Chəi wɨ̀ berɨ əton, ɨghabɨ ɨtu cherə ɨgwɨ ə bə̂d mbàn Ŋwìə̀, nɨ naʼ ɨghɨ ə̀fà ɨni jìm, rɨtu ɨgwɨ mbi ɨnû rɨbɔ̀ŋ, beenɨ mbɨ bə̂d cherə. Wɨ̀ nyaʼa fə ghɨ̀ əne fən ɨghəm mɔʼ. Əne yɨ ənɨ wɨ̀ nyaʼa naʼ i ɨnyod ənɨ əghɨ ə̀fà.

²⁸Tɨkə rɨ Mose nyaʼa chwiə ni mbɨ chɔʼ bə̂d nɨ tɨ̀ mbɨ nyaʼa gù ənû ənɨ ɨtu ɨgwɨ ə bə̂d mbàn Ŋwìə̀, àyɨə ɨŋgam we nɨ Ŋwìə̀ nyaʼa kaʼa kàn, nɨ nyaʼa sɨ beenɨ rənjìm tɨkə te, nyaʼa chɔʼ Wan nɨ Ŋwìə̀ fə ghɨ wɨ̀ zeŋ màànɨ̀ koŋ.