Read Fɨso Fi Mɨ̀hibrù 8 Bible Online

Mɨ̀hibrù 8 - Fɨso Fi bible

Mɨ̀hibrù 8

¹Ənû ə kyeŋ nɨ yeʼ ɨŋga ənû zɔ̂ yɨ ni, tɨ̀ berɨ ətu ɨgwɨ ə bə̂d mbàn Ŋwìə̀ nɨ yeʼ ɨghabɨ wɔ̂ nɨ tɨ̀ gha ɨmbə̀ʼ əməd. Ɨ wɨ ɨkaŋ əbà əbɔ ə jɨg ətən ɨfɔ̀n ə Ŋwiə̀ Ə̀chè-ɨsɨg.

²Ɨ wɨə fàʼ ɨŋga əsɨ ɨwumnɨ nɨ yeʼ ɨŋwenɨ rəsìʼ we nɨ Ə̀nùŋɨ̀sɨg ziə korɨ, nɨ kaʼi bə̂d mɨ̀sɔŋɨchù korɨ.

³Ɨ mbɨə chɔʼ ətu ɨgwɨ ə bə̂d mbàn Ŋwìə̀ jìm ni mbɨ naʼ ɨchəmnɨ bə̀ nàʼ ɨghɨ ə̀fà əmbɨ ə Ŋwiə̀. Əne zɨə kuʼ ni wə̀d mbàn wɔ̂ bə berɨ əghɨ nɨ nàʼ.

⁴À kɨ nɨ məd ə kəʼ ɨgwɨ ə si, njɨ ka məd yɨ i wə̀d mbàn Ŋwìə̀, ɨmbə̀ʼ ɨghəm nɨ bə̂d mbàn Ŋwìə̀ mbɨ əŋgu nɨə nàʼ ɨchəmnɨ ɨchî nɨ tɨkə rɨ Mose chwiə.

⁵Ɨnû mbe nɨ mɨ̀mə̌d ə ghɨ̀ ɨŋga əsɨ ɨwumnɨ yɨ əmɨg bə̀ fɔrɨ əziŋ tɨ ənɨ mbe nɨ yeʼ ɨkaŋ. Ənɨ Mose nyaʼa kəb kod ɨŋwenɨ we, Ŋwìə̀ nyaʼa patɨ əməd ni, “Zə ni à tekɨ ɨghɨjìm ɨchî nɨ mə̀ nyaʼa chwi ɨ ne ɨkaŋ ɨwum.”

⁶Àyɨə tɨ̀nîn ə̀fàʼì ze nɨ Ŋwìə̀ naʼ əmbɨ Yeso ə chè əzɨ mɨ̀mə̌d, àmei ɨchî nɨ fɨso fe nɨ məd yeʼe mbɨ fɨwən bə chè fɨso ə nun, ɨmbə̀ʼ ɨghəm nɨ fɨso fe ə berɨ ɨnû nɨ bɔŋ chè mbe nɨ yeʼ ɨŋga fɨso ənun.

⁷À kɨ nɨ chəi ənû ə mɔʼɔ ə nyaʼa bə ɨŋga fɨso rɨtu fe, njɨ chəi əton ənɨ fɨso fe nɨ beenɨ.

⁸Àyɨə Ŋwìə̀ nyaʼa zə ɨbə əkaʼ mbi bə̂d, əne wɨ̀ nyaʼa gha ni, “Ə̀nùŋɨ̀sɨg ə ghà ni, ɨni bɨrɨ yeʼe, nɨ mə bɨrɨ san fɨso fi mbɨ ə bə̂d mɨ̀Izre fɔrɨ mbɨ mɨ̀Judà.

⁹Kaʼ fɨso fɔ̂ yɨ i ɨghabɨ fe nɨ mə nyaʼa san mbɨ mɨ̀mbǎʼ mɨ̀mə̌d rəŋwe əni ze nɨ mə nyaʼa nɨŋ mɨ̀mə̌d ənɨ mɨ əbɔ, chɨ̀ rɨ ə Ijìpt. Chəi mbɨ nyaʼə wɨrɨə nùŋ fɨso fe nɨ mə nyaʼa sanɨ mbɨ mɨ̀mə̌d, əne chəi mə̀ nyaʼa wɨrɨ zɨ̀ ətu ənɨ ɨnû mbe nɨ mbɨ nyaʼə ghɨ̀ə̀.

¹⁰Ə̀nùŋɨ̀sɨg ə ghà ni, fɨso fe nɨ mə̀ bɨrɨ san mbɨ mɨ̀Izre yɨ ni: ənɨ ɨni mbe fə che i, mə bɨrɨ zɨ tum rɨkə ɨŋga ɨtu mɨ̀mə̌d, bə̀ ŋwàʼnɨ̀ ɨŋga fîŋ tɨ mɨ̀mə̌d. Mə bɨrɨ yeʼ Ŋwìə̀ mɨ̀mə̌d, mɨ̀mə̌d bə̀ yeʼ mbɨ bə̂d.

¹¹Chəi wə̀d nɨ bɨrɨ chwi ənû əmbɨ wi aŋgɔb, kɨ̀ bè ghà əmbɨ wi aŋgɔb ni, 'Kyerɨ Ə̀nùŋɨ̀sɨg,' ɨmbə̀ʼ ɨghəm nɨ mɨ̀mə̌d mɨjìm bɨrɨ kyerɨ əmɨ, kɔ rɨ ənɨ wɨ kwa wò pè ənɨ wɨ kyeŋ.

¹²Mə bɨrɨ waʼ ɨnû rɨbɔ̀ŋ mɨ̀mə̌d. Chəi mə bɨrɨ wɨrɨ kɔndɨ tɨ̀gurɨ-ɨnû mɨ̀mə̌d.”

¹³Ɨchî nɨ wɨ̀ nyaʼə ghà ɨmbə̀ʼ fɨso fi ə chwiə ni nyùmə̀ fɨso ənun fə chè i. Əghɨ ze nɨə sɨə nùnə̀, nɨ nyùmə̀ məd fə che i, ə bɨrɨ zambɨ nim.