Read Fɨso Fi Mɨ̀hibrù 9 Bible Online

Mɨ̀hibrù 9 - Fɨso Fi bible

Mɨ̀hibrù 9

¹Fɨso rɨtu nyaʼa berɨ tɨkə nɨ nyaʼa chwi ɨchî nɨ mbɨə wumnɨ ə Ŋwiə̀. Fɨ nyaʼa bə̀ chwi əsɨ nɨ mbɨə wumnɨ əməd ɨgwɨ ə si.

²Mbɨ nyaʼa kod ɨŋwenɨ sobrɨ ənɨ ə ngywɨ̌, əne ghɨ̀ ɨtu be. Ɨ mbɨə nyaʼə tɔŋ ətu ze nɨə nèŋ ɨsɨg ənɨ Əsɨ ə Zeŋɨ. Ɨ mbɨə nyaʼə nùŋ ɨghɨ mbe nɨ mbɨə te ənam ɨgun bə̀ nùŋ ə tebrə̀ fɔrɨ ŋgə̀ŋ ze nɨ mbɨ nuŋ əmbɨ ə Ŋwiə̀ ɨŋga ətu ze.

³Ɨ mbɨə nyaʼə tɔŋ ətu ə nəb ze rɨŋga ənɨ Əsɨ nɨ Zeŋɨ Màànɨ̀.

⁴Ɨkwi ɨjə̀ŋ ə̀fààrɨ̀ nɨ mbɨ nyaʼə tɔn ə ɨneŋ ɨgun wɨə nyaʼa ɨŋga ətu ə nəb ze. Mbɨ nyaʼa tekɨ ɨkwi ɨjə̀ŋ we ənɨ gôl. Tɨkub ə fɨso nɨ mbɨ nyaʼa zɔʼ ɨba jìm ənɨ ə gôl zɨə nyaʼa bə ɨŋga ətu ə nəb ze. Fɨkyiŋ nɨ mbɨ nyaʼa tekɨ ənɨ ə gôl zɨ ə manà ɨŋga mbɨ mbàŋ Eròn nɨ nyaʼə chə̀ʼə̀ fə nyaʼa bə ɨŋga ətu ə nəb ze. Ɨbapɨ əti mbe ɨbe nɨ mbɨ nyaʼa ŋwaʼnɨ tɨkə ɨgun nyaʼa bə ɨŋga ətu ə nəb ze.

⁵Mɨ̀cherùb nɨ nyaʼə chwiə ni Ŋwìə̀ wɨ əsɨ ze, mbɨə nyaʼa ɨgun əkubrɨ ə tɨkub ə fɨso ze. Ɨ mbɨə nyaʼə tɔŋ əsɨ ze nɨ tɨkub ə fɨso ze ə nyaʼa əŋgu ni à yɨ əsɨ nɨ Ŋwìə̀ ə waʼ ɨnû rɨbɔ̀ŋ bə̂d. Kaʼ tɨ̀ bɨrɨ ghà a ɨmbə̀ʼ ɨnû mbɔ̂ jìm tɨ̀nîn ɨzweŋɨ zweŋɨ.

⁶Ənɨ mbɨ fə tekɨ ɨghɨjìm ɨchî wɔ̂, bə̂d mbàn Ŋwìə̀ mbɨə nyaʼə wò nyɨ ɨŋga ətu ə nəb ze nɨə nèŋ ɨsɨg ɨghəm jìm ɨmbə̀ʼ fàʼ mbə ɨ̀fàʼì.

⁷Àmei ətu ɨgwɨ ə bə̂d mbàn Ŋwìə̀ ə nyɨ ɨŋga ətu ə nəb ze rɨŋga. Ɨ wɨə ghɨ̀ əne àmei ɨghəm mɔʼ ɨŋga əghəm əwu. Wɨ̀ mɨ kəb nyɨ, wɨ̀ bɨrɨ nɨŋ ənəm nɨ wɨ̀ bɨrɨ chəmnɨ ɨmbə̀ʼ e ətu fɔrɨ ɨmbə̀ʼ ɨnû rɨbɔ̀ŋ mbe nɨ bə̂d ə ghɨ̀ə̀ nɨ chəi mbɨ kyerɨ.

⁸Ɨchî nɨ zɨə yeʼ ɨchî wɔ̂, Əzwî ə Zeŋɨ ə zɨə chwiə ni chəi mbɨ kɨrɨ fiʼ ɨnə̂njɨ̀ nɨ wo ɨŋga əsɨ ɨwumnɨ nɨ ətu ə nəb ze nɨə nèŋ ɨsɨg ə kɨrɨ əŋgu.

⁹Əzɔ̂ yɨ ənweenɨ nɨə chwi ɨnû ɨmbə̀ʼ nyùmə̀ wɔ̂. Əne yɨ ni chəi ɨchəmnɨ mbɨ ɨghɨ ə̀fà mbe tɨ̀ mbɨ zeŋnɨ fîŋ wə̀d we nɨə wumnɨ ə Ŋwìə̀.

¹⁰Ɨghɨ mbɔ̂ ə berɨ ɨnû nɨ ghɨ àmei mbɨ ɨghɨjɨg, mbɨ mɨnoʼ fɔrɨ mbɨ tɨkwɨrɨ ɨnə̂njɨ̀ nɨ bə̂d ə zeŋnɨ ɨnyod. Tɔ̂ yɨ rɨkə te nɨə ghɨ̀ə̀ ni bə̂d zeŋ rɨ əsaŋ. Tɨ bɨrɨ yeʼ əŋgu pè ənɨ Ŋwìə̀ kwepɨ ɨghɨjìm.

¹¹Kristo nyaʼa yeʼe ɨghabɨ ətu ɨgwɨ ə bə̂d mbàn Ŋwìə̀ ənɨ ɨghɨ chɔ̀m mbe nɨ fə sɨ əgha. [2] Ɨŋwenɨ we nɨ məd ə fàʼ ɨŋga ə bɔ̀ŋ màànɨ̀. À yɨə bə̀ ɨŋwenɨ nɨ chè mɨŋwenɨ jìm. Kaʼi bə̂d nyaʼa kod ɨŋwenɨ we, əne yɨ ni, kaʼ ɨŋwenɨ we yɨ i əba rɨ ənɨ ɨsɨg wɔ̂.

¹²Ənɨ Kristo nyaʼa nyɨ ɨŋga Əsɨ ze nɨ Zeŋɨ Màànɨ̀ fən ɨghəm mɔʼ, chəi wɨ̀ nyaʼa nɨŋ ənəm ə gywɨ mbɨ ənəm ə bɔn mbɨ̀rɨkun ɨmbə̀ʼ naʼ ənɨ ɨghɨ ə̀fà. Wɨ̀ nyaʼa nɨŋ yeʼ e ənəm choʼ ɨtu ə bə̂d əŋgu koŋ.

¹³À mɨ yeʼ nɨ mbɨ sab ənəm ə gywɨ mbɨ ənəm ə mbɨ̀rɨkun bə̀ fùʼ əburɨ tɨ ənɨ ə wan rɨkun ɨgun ə bə̂d mbe nɨ chəi mbɨ zeŋɨ, əne əze ə ghɨ̀ ni ɨnyod mɨ̀mə̌d zeŋ,

¹⁴njɨ ənəm ə Kristo ə bɨrɨ zeŋnɨ əwa chè. Əzwî ze nɨ ten i koŋ ə nyaʼa ghɨ̀ ni Kristo naʼ i ɨnyod əmbɨ ə Ŋwiə̀ ənɨ əghɨ ə̀fà nɨ chəi ənɔʼɔ ɨmbə̀ʼ zeŋnɨ ta fîŋ tɨ ənɨ ɨnû rɨbɔ̀ŋ mbe nɨə ghɨ̀ ni bə̂d kwɨ. Əne yɨ ɨmbə̀ʼ tɨ̀ faʼ əmbɨ ə Ŋwìə̀ we nɨ yeʼ ɨkǎ.

¹⁵Məd wɨ ɨŋga mɨgharə̀ Ŋwìə̀ mbɨ ə bə̂d ənɨ fɨso fi fe nɨ mbɨ sanɨ, ɨmbə̀ʼ bə̂d mbe nɨ Ŋwìə̀ nyaʼa tɔŋ ənɨ mbi jɨg ɨghɨ mbe nɨ wɨ̀ nyaʼa kaʼ əmbɨ mɨ̀mə̌d koŋ. Kristo nyaʼa kwɨ ɨmbə̀ʼ choʼ ɨtu mɨ̀mə̌d tɨ ənɨ ɨnû rɨbɔ̀ŋ mbe nɨ mbɨ nyaʼə ghɨ̀ əton fɨso rɨtu.

¹⁶Bɔŋ mbɨ sɨə ghɨ̀ ənû ze nɨ yeʼ ɨŋga ɨtə wə̀d, mbɨ berɨ be chwiə ni wə̀d we nɨ tə i fə kwɨ.

¹⁷Ɨ mbɨə ghɨ̀ ənû ze nɨ yeʼ ɨŋga ɨtə wə̀d àmei ənɨ wə̀d we nɨ tə i fə kwɨ. Chəi mbɨə ghɨ̀ ənû ze nɨ yeʼ ɨŋga ɨtə wə̀d ənɨ rəŋgàŋ kɨrɨ i ɨkǎ.

¹⁸À yɨ əton nɨ chəi ənɨ tɨ̀ mbɨ nyaʼa ghɨ̀ ni fɨso rɨtu fe təm nɨ chəi ənəm.

¹⁹Ənɨ Mose nyaʼa fə ghà rɨkə jìm əmbɨ ə bə̂d mbe mɨjìm, wɨ̀ nyaʼa nɨŋ ɨnaŋ bə̀ nɨŋ ndàb nɨə bàŋə̀ buù nɨ mbɨ nyaʼa tekɨ ənɨ nyôŋ rɨ njɨ̀g. Wɨ̀ nyaʼa nɨŋ əne chùb ɨŋga ənəm ə bɔn mbɨ̀rɨkun mbɨ əzɨ ə gywɨ nɨ mbɨ fɔtɨ tɔpɨ ɨŋga mɨnib, əne ŋwììrɨ̀ ɨgun ə̀ŋwàʼnɨ̀ ze nɨ rɨkə yeʼ ɨŋga bə̀ ŋwììrɨ̀ ɨgun ə bə̂d mbe mɨjìm.

²⁰Ɨ wɨə nyaʼə ŋwììrɨ̀ə̀ ghàə̀ ni, “Əzɔ̂ yɨ ənəm nɨ chwi ni Ŋwìə̀ fə san fɨso mbɨ nən.”

²¹À yɨ əndəŋ əndəŋ nɨ wɨ̀ nyaʼa bə̀ ŋwììrɨ̀ ənəm ze ɨgun ɨŋwenɨ we bə̀ ŋwììrɨ̀ ɨgun ɨghɨjìm mbe nɨ mbɨ nyaʼə wumnɨ ə Ŋwiə̀ əŋgu.

²²À yɨ rəsìʼ ni ə zɨ ɨŋga rɨkə ni à bùʼ àmei rɨpiî ənəm ə zeŋnɨ ɨghɨjìm. Ənəm ə mɨ ton chəmbɨ i, chəi mbɨ bɨrɨ waʼ ɨnû rɨbɔ̀ŋ bə̂d.

²³Zɨə nyaʼa kùʼ ni mbɨ zeŋnɨ ɨmɨg rɨ ənɨ ɨghɨ mbe nɨ yeʼ ɨkaŋ ənɨ ɨghɨ ə̀fà mbɔ̂, àyɨə ɨghɨ mbe nɨ yeʼ ɨkaŋ mbɨə kə̀b yeʼ ɨghɨ ə̀fà mbe nɨ bɔŋ chè mbɔ̂.

²⁴Chəi Kristo nyaʼa nyɨ ɨŋga əsɨ ɨwumnɨ ze nɨ mbɨ tekɨ ənɨ ɨbɔ, nɨ yeʼ əmɨg ənɨ əzɨ rəsìʼ. Wɨ̀ nyaʼa nyɨ ɨkaŋ, ɨmbə̀ʼ chub ɨfě Ŋwiə̀ ɨmbə̀ʼ əwa.

²⁵Chəi wɨ̀ nyaʼa naʼ i ɨnyod ənɨ əghɨ ə̀fà ɨghəm nɔnɔʼ, ɨchî nɨ ətu ɨgwɨ ə bə̂d mbàn Ŋwìə̀ ə nyɨ ɨŋga Əsɨ nɨ Zeŋɨ Màànɨ̀ ɨghəm ɨwu jìm mbɨ ənəm nɨ kaʼi əzɨ əməd.

²⁶À kɨ nɨ wɨ̀ nyaʼa ghɨ̀ əne, njɨ wɨ̀ nyaʼa berɨ zə ŋgəʼ ɨghəm nɔnɔʼ tɨ ənɨ Ŋwìə̀ nyaʼa tekɨ ɨsɨg. Àyɨə ɨchî nɨ zɨə yeʼ əne, wɨ̀ nyaʼa fə jwɨ̀ fən ɨghəm mɔʼ ənɨ ɨsɨg ə sɨə wo nwìə̀, ɨmbə̀ʼ waʼ ɨnû rɨbɔ̀ŋ ɨchî nɨ wɨ̀ nyaʼa naʼ i ɨnyod ənɨ əghɨ ə̀fà.

²⁷Ɨchî nɨ Ŋwìə̀ nyaʼa fə nuŋ ni wə̀d ə berɨ kwɨ ɨghəm we mɔʼ, à sɨ əwu rənjìm wɨ̀ saʼ əməd,

²⁸yɨə bə̀ ɨchî nɨ wɨ̀ nyaʼa naʼ ə Kristo ənɨ əghɨ ə̀fà fən ɨghəm we mɔʼ, ɨmbə̀ʼ wɨ̀ beʼ ɨnû rɨbɔ̀ŋ bə̂d mɨ̀nɔnɔʼ. Kaʼ wɨ̀ bɨrɨ yeʼe ənɨ ɨghəm nɨ pe be ɨ ghɨ ni Ŋwìə̀ waʼ ɨnû rɨbɔ̀ŋ bə̂d. Wɨ̀ bɨrɨ yeʼe ɨmbə̀ʼ chɨ bə̂d rəŋgəʼ, əne yɨ mbe nɨə wòm əməd ənɨ tə fîŋ rɨ̀jìm.