Read Fɨso Fi Jems 2 Bible Online

Jems 2 - Fɨso Fi bible

Jems 2

¹Mbɨ bɔŋgɔb, ɨchî nɨ mbə̀ ben Ə̀nùŋɨ̀sɨg Yeso Kristo we nɨ bə̂d ə wumnɨə, tɨ mbə̀ ghɨ̀ ə əghə.

²Tɨ̀ nɨŋ ni mbaŋə̀ mɔʼɔ nɨ zɨ mɨ̀kàrə̀ gôl bə̀ zɨ̀ ngywɨ̌ əka ɨnun yeʼe nyɨ ɨŋga ə ɨfetɨ, wə̀d ɨkwaŋ mɔʼɔ nɨ zɨ ɨbeʼ ngywɨ̌ bə̀ yeʼe nyɨ.

³Mbə mɨ nàʼ ɨwumnɨ əmbɨ ə mbaŋə̀ ze nɨ zɨ ngywɨ̌ əka ɨnun əne ghà ɨ bɔ ni, “Chub ɨgun ətən ə chɔ̀m zɔ̂,” àyɨə mbə ghà əmbɨ ə wə̀d ɨkwaŋ we ni, “Təm ə yɨə” kɨ̀ ni, “Chub ɨban mbɨ ɨwu,”

⁴njɨ chəi mbə̀ kɨrɨ ghabrɨ bə̂d əkaʼ nən, bə̀ saʼ bə̂d mbɨ rɨkɔndɨ rɨbɔ̀ŋ ə?

⁵Mbɨ bɔŋgɔb nɨ mə̀ ghaʼi kwàʼ rɨŋgəʼ, mbə̀ zwetɨ! Ŋwìə̀ nyaʼa chɔʼ bə̂d mbe nɨ yeʼ bə̂d kwaŋ ɨŋga ɨsɨg ɨmbə̀ʼ mbɨ yeʼ bə̂d mbɔ̂n ɨchî nɨ mbɨ ben ə Yeso Kristo. Əne mbɨ bɨrɨ jɨg ənû ɨfɔ̀n ze nɨ Ŋwìə̀ nyaʼa kaʼ əmbɨ ə bə̂d mbe nɨ ghaʼ əməd.

⁶Àyɨə mbə fə tìbrɨ̀ wə̀d ɨkwaŋ. Kaʼ à wa kɨ i bə̂d mbɔ̂n mbe ə nyèm əwən ə? Kaʼ à wa kɨ i mɨ̀mə̌d ə sùŋ əwən nɨŋə wò ɨŋga nəb ɨsaʼi ə?

⁷Kaʼ à wa kɨ i mɨ̀mə̌d ə chə̀kɨ̀ ɨkum ɨwumnɨ we nɨ Ŋwìə̀ naʼ ɨ nən ə?

⁸Mbə mɨ kàŋ nuŋ ɨkə we nɨ ɨfɔ̀n we nɨə nùŋ ɨsɨg nyaʼa gha mbɨ ŋwaʼnɨ ɨŋga Ə̀ŋwàʼnɨ̀ ə Ŋwiə̀ ni, “À berɨ ghaʼ wə̀d nɨ tindɨ ɨban ne ɨchî nɨ à ghaʼ e nyamnyod,” əne mbə̀ fə ghɨ̀ ənû nɨ kuʼnɨ.

⁹Mbə mɨ yeʼə ghɨ̀ əghə, njɨ mbə fə ghɨ̀ ənû rɨbɔ̀ŋ. Əne ɨkə fə yim əwən ɨchî nɨ wɨ̀ yim bə̂d nɨ fə gù ɨkə.

¹⁰Wə̀d mɔʼɔ mɨ nuŋ tɨkə rɨjìm əne gù àmei ɨkə mɔʼ, əne wɨ̀ fə gù tɨkə te rɨjìm.

¹¹Wə̀d we nɨ nyaʼa gha ni, “Tɨrə̀ ni e ɨwi kɨ̀ ɨnom wə̀d cherə,” nyaʼa bə̀ ghà ni, “Tɨrə̀ zwiirɨ e wə̀d.” À mɨ yeʼ nɨ chəi à ni ɨwi kɨ̀ ɨnom wə̀d cherə, àyɨə à zwiirɨ wə̀d, à fə gù ɨkə.

¹²Mbə ghàmə̀ bə̀ ghɨ̀ ɨnû ɨghabɨ ə bə̂d mbe nɨ Ŋwìə̀ bɨrɨ saʼ mɨ̀mə̌d əton ɨkə we nɨə ghɨ̀ ni bə̂d chub ənɨ ə ɨghəm,

¹³ɨmbə̀ʼ ɨghəm nɨ ənɨ Ŋwìə̀ ə saʼə bə̂d, chəi wɨ̀ bɨrɨ diirɨ mbe nɨ chəi mbɨə bə̀ dììrɨ mbɨ cherə. Wə̀d mɨ yeʼə dììrɨ̀ə̀ bə̂d, Ŋwìə̀ bɨrɨ bɨ diirɨ əməd ənɨ ə nyùmə̀ we nɨ wɨə sob mɨsaʼi.

¹⁴Mbɨ bɔŋgɔb, njìm nɨ wə̀d bɨrɨ jɨg kɨə yè, əwù ze nɨ wɨ̀ gha ni tə ben ə? Tɨ̀ ɨbenɨ we chɨ̀ əməd rəŋgəʼ ə?

¹⁵Aŋgɔb mɔʼɔ kɨ̀ njàbɨ mɔʼɔ mɨ yeʼ əŋgu nɨ kwaŋ ngywɨ̌ bə̀ kwaŋ ɨghɨjɨg,

¹⁶əne wə̀d mɔʼɔ rəbɔʼ nən gha əmbɨ aŋgɔb we kɨ̀ əmbɨ ə njàbɨ ze ni, “Wo e ənɨ əbɔrəbɔd. Ghɨ e ɨnyod nom ə, à bə̀ jɨg kod,” nɨ chəi wɨ̀ naʼ ɨghɨ mbe nɨ bɨrɨ ghɨ ni ɨnyod məd chub ɨchî chɔ̀m, njɨ njìm nɨ wɨ̀ bɨrɨ jɨg kɨə ye?

¹⁷Əne ɨbenɨ tə̀zìʼ wi nɨ chəi ɨnû chɔ̀m mbe nɨ wə̀d ə ghɨ̀ə̀ əbɔʼ yɨ ətu ə̀kǒ.

¹⁸Wə̀d mɔʼɔ bɨrɨ gha ni, “À benɨ, àyɨə mə wɨə ghɨ̀ə̀ ɨnû chɔ̀m.” Wɨ̀ mɨ ghà əne, mə bɨrɨ gha ɨ bɔ ni, “Chwi e ɨbenɨ ɨ num nɨ chəi ɨnû chɔ̀m mbe nɨ àwɔ̀ ə ghɨ̀ə̀, əne mə bɨrɨ chwi mɨ ɨbenɨ ɨ ne ənɨ ɨnû chɔ̀m mbe nɨ mɨə ghɨ̀ə̀.”

¹⁹À ben ni Ŋwiə̀ mei we mɔʼ. Zɨə bɔŋ! Ka àbei ɨzwî rɨbɔ̀ŋ, mbɨ bə̀ ben əne, àyɨə ɨ mbɨə benə bə̀ bindɨə.

²⁰Ənêŋ! À wa kəb ni mbɨ chwi ɨ ne ni ɨbenɨ nɨ chəi ɨnû chɔ̀m mbe nɨ wə̀d ə ghɨ̀ə̀ yɨ ətu ə̀kǒ ə?

²¹Ənɨ chəi Abràham nyaʼa ton nɨ naʼ i wan we nɨ mbɨ nyaʼə tɔŋ ənɨ ə Aizìk ənɨ əghɨ ə̀fà əmbɨ ə Ŋwìə̀, ɨmbə̀ʼ Ŋwìə̀ nyaʼa nɨŋ ni wɨ̀ fə ghɨ̀ ənû nɨ kuʼnɨ ə?

²²À fə zə ni ɨbenɨ məd nyaʼa yèn mbɨ ɨnû chɔ̀m mbe nɨ wɨ̀ nyaʼə ghɨ̀ə̀. À fə bə̀ zə ni ɨbenɨ məd nyaʼa bɔ̀ŋ màànɨ̀ ənjìm ɨnû chɔ̀m mbe nɨ wɨ̀ nyaʼə ghɨ̀ə̀.

²³Ə̀ŋwàʼnɨ̀ ə Ŋwiə̀ ə nyaʼa jwɨ̀ ənɨ rəsìʼ ɨchî nɨ zɨə nyaʼa gha ni, “Abràham nyaʼa ben ə Ŋwiə̀ əne Ŋwìə̀ nyaʼa ben ni məd ə təm kùʼnɨ̀.” Əze ə nyaʼa ghɨ̀ ni Ŋwìə̀ tɔŋ əməd ənɨ i sə̀ʼ.

²⁴Əne à fə zə ni Ŋwiə̀ wɨə benə ni wə̀d ə təm kùʼnɨ̀ ɨmbə̀ʼ ɨnû chɔ̀m mbe nɨ wɨə ghɨ̀ə̀, kaʼ àmei ɨmbə̀ʼ ɨbenɨ tə̀zìʼ wi.

²⁵À yɨ bə̀ əndəŋ əndəŋ nɨ Ŋwìə̀ nyaʼa ben ni ə̀kùnɨ̀ ze nɨ mbɨ nyaʼə tɔŋ ənɨ ə Rahàb nyaʼa təm kùʼnɨ̀ ənjìm ənû ə chɔ̀m ze nɨ wɨ̀ nyaʼa ghɨ̌ ənɨ mɨ̀-ànàŋgɔŋ mɨ̀Izre mbe nɨ nyaʼa wo jɨrɨ neŋ ə Jerikò. Wɨ̀ nyaʼa nɨŋ mɨ̀mə̌d ɨchî chɔ̀m əne cha mɨ̀mə̌d ni mbɨ wò əwən ɨnə̂njɨ̀ cherə.

²⁶Ɨchî nɨ nyamnyod nɨ chəi əzwî yɨ ətu ə̀kǒ, əne bə̂, ɨbenɨ nɨ chəi ɨnû chɔ̀m mbe nɨ wə̀d ə ghɨ̀ə̀ yɨ ətu ə̀kǒ.