Read Fɨso Fi 1 Pità 1 Bible Online

1 Pità 1 - Fɨso Fi bible

1 Pità 1

¹À yɨə mɔ̌ Pità, nɨ mə̀ yeʼ wə̀d tom Yeso Kristo, ŋwaʼnɨ ə̀ŋwàʼnɨ̀ zɔ̂. Mə wɨə ŋwàʼnɨ̀ əmbɨ ə bə̂d mbe nɨ Ŋwiə̀ chɔʼɔ, nɨ yeʼ ɨ̀nɔ̀ʼɔ̀ mbe nɨ jaŋ ɨŋga Pontùs, ɨŋga Gàlesià, ɨŋga Kàpàdosià, ɨŋga Esià bə̀ fɔrɨ ɨŋga Betinià.

²Ŋwìə̀ Mbǎʼ nyaʼa chɔʼ əwən ni mbə̀ yeʼ mbi bə̂d ɨchî nɨ wɨ̀ nyaʼa fə nuŋɨ. Əzwî əməd ə fə ghɨ̀ mbə zeŋ, ɨmbə̀ʼ mbə̀ zuunɨ ə Yeso Kristo bə̀ ghɨ̀ ni ənəm əməd ze nɨ wɨ̀ nyaʼa chəmnɨ ə zeŋnɨ əwən. Ɨ̀chɔ̀m Ŋwiə̀ mbɨ əbɔrəbɔd əməd yeʼe ɨgwɨ nən ɨ ə̀bù ə̀bù.

³Tɨ̀ yiirɨ ə Ŋwiə̀ we nɨ yeʼ Mbǎʼ a Ə̀nùŋɨ̀sɨg Yeso Kristo! Məd wɨə dììrɨ̀ əwa kwàʼ ɨchî chɔ̀m. Wɨ̀ fə ghɨ̀ tɨ̀ jɨg ɨ̀tènɨ̀ fi ɨchî nɨ wɨ̀ zwemnɨ ə Yeso Kristo. Əzɔ̂ ə fə ghɨ̀ ni tɨ̀ nuŋ rɨkɔndɨ wom ɨnû mbe nɨ Ŋwìə̀ kaʼ ɨ na.

⁴Zɨə fə bə̀ ghɨ̀ ni mbə̀ jɨg ɨghɨ mbe nɨ wɨ̀ nuŋ ɨkaŋ əmbɨ mbi bə̂d. Wɨ̀ fə nùŋ ɨghɨ mbe ɨkaŋ əsɨ nɨ chəi mbɨ bɨrɨ nɔ bɔb, chəi mbɨ bɨrɨ nɔ bə, chəi mbɨ bɨrɨ nɔ chɔʼrɨ.

⁵Ŋwìə̀ fə chè ənjìm i ɨka kən əwən ɨchî nɨ mbə̀ nuŋ fîŋ ɨgun ə Kristo, ɨmbə̀ʼ mbə̀ jwɨ rəŋgəʼ əwu rənjìm.

⁶Əne mbə ghaʼrɨ əwən ɨmbə̀ʼ ənû zɔ̂ nɨ Ŋwìə̀ fə ghɨ̌, ka à be yeʼi ni tɨ̀nîn bə̂d mbɨə kɨrɨ kwaʼnɨ əwən ənɨ ɨnû nɔnɔʼ, mbə̀ mbɨə bə̀ kɨrɨ wo zə ŋgəʼ ənɨ ɨkə nyumə̀.

⁷Ɨnû mbɔ̂ yɨ nɨ zweʼrɨ əwən ɨ zə ni ə ɨbenɨ ə bə̀ kàŋ kàànɨ̀ ə. Ka àbei ə gôl nɨ tɨ mbɨ chə̀kɨ̀, ɨ mbɨə zweʼrɨ ənɨ mbɨ tɔn ɨŋga ɨsweŋ ɨwid ənam. Əne mbɨ berɨ bɨ zweʼrɨ ə ɨbenɨ we nɨ yeʼ əghɨ əka ɨnun chè ə gôl. Ɨbenɨ we mɨ kàànɨ̀, Ŋwìə̀ ziə bɨrɨ yiirɨ əwən, mbə bə̀ berɨ ɨzeŋɨ zeŋɨ mbɨ ɨwumnɨ ənɨ ə nyùmə̀ we nɨ Yeso Kristo bɨrɨ wɨrɨ yeʼe.

⁸Mbə ghaʼ əməd, ka à be yeʼi ni chəi mbə kɨrɨ zə əməd. Mbə nuŋ fîŋ ɨgwɨ məd, ka à be yeʼi ni chəi mbə̀ə zə əməd. Mbə̀ kàŋ ghaʼrɨ mbɨ ɨkwɨ ɨghaʼi we nɨ chəi ənɨ tɨ wə̀d ghà ənɨ ɨchù.

⁹Ɨchî nɨ mbə̀ fə benɨ, mbə̀ bɨrɨ jwɨ rəŋgəʼ.

¹⁰Bə̂d ɨkə̂n nyaʼa kàŋ kə̀b nɨ kyerɨ ɨmbə̀ʼ ənû zɔ̂ nɨ jwɨ rəŋgəʼ. Mbɨ nyaʼa jeŋgɨ kə̀b bə̀ nwèndɨ̀ ənû ɨmbə̀ʼ ɨ̀chɔ̀m we nɨ Ŋwiə̀ nyaʼa wo ghɨ ənɨ ə nən.

¹¹Mbɨ nyaʼa bə̀ jeŋgɨ nwèndɨ̀ ɨnû ze nɨ Əzwî ə Kristo ze nɨ yeʼ ɨŋga mɨ̀mə̌d ə nyaʼa be ghà əmbɨ mɨ̀mə̌d ɨmbə̀ʼ ɨchî nɨ Kristo nyaʼa wo zə ŋgəʼ. Mbɨ nyaʼa bə̀ jeŋgɨ nwèndɨ̀ ɨwumnɨ kyeŋ we nɨ wɨ̀ nyaʼa wo berɨ. Mbɨ nyaʼa bə̀ jeŋgɨ nwèndɨ̀ ɨmbə̀ʼ wə̀d we məd yeʼ wɨwən bə̀ nwèndɨ̀ ə nyùmə̀ we nɨ ɨnû mbe bɨrɨ ghɨ̀.

¹²Ŋwìə̀ nyaʼa chwi əmbɨ mɨ̀mə̌d ni chəi mbɨ nyaʼə faʼə yeʼ ɨmbə̀ʼ ə ɨghəm. Ɨ mbɨə nyaʼə faʼə yeʼ ɨmbə̀ʼ weerɨ əwən. Ɨ mbɨə nyaʼə ghà ɨnû mbe nɨ mbə̀ nyaʼa fə zu rɨ əmbɨ ə bə̂d mbe nɨ nyaʼa chè ənjìm Əzwî ə Zeŋɨ ze nɨ Ŋwìə̀ cha rɨkaŋ gha ɨkə̂n chɔ̀m. Mbɨ̀aŋgɨrə̀ mbɨə nyaʼə bə̀ kə̀b kyerɨ ənû rəŋgu.

¹³Mbə̀ tekɨ tə fîŋ ɨmbə̀ʼ ghɨ ɨnû mbe nɨ Ŋwiə̀ kəbɨ. Mbə̀ yimbɨ ə ɨnyod kwàʼ ɨchî chɔ̀m. Mbə̀ jeŋgɨ nuŋ tə rɨkɔndɨ àmei ɨgun ɨ̀chɔ̀m we nɨ Ŋwìə̀ bɨrɨ ghɨ ənɨ ə nən ənɨ Yeso Kristo wɨrɨ yeʼe.

¹⁴Ɨchî nɨ mbə yeʼ bɔn nɨə zuunɨə, tɨ mbə wɨrɨ beenɨ ə əbɔʼ ɨnû rɨbɔ̀ŋ mbe nɨ tə nyamnyod nyaʼə feenɨə ənɨ ə nyùmə̀ we nɨ chəi mbə̀ nyaʼa kɨrɨ kyerɨ ə Ŋwiə̀.

¹⁵Àyɨə mbə ghɨ ɨnû jìm ɨzeŋɨ zeŋɨ, àmei ɨchî nɨ məd we nɨ tɔŋ əwən bə zeŋ.

¹⁶Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mbə chub ɨzeŋɨ zeŋɨ ɨmbə̀ʼ ɨghəm nɨ mə zeŋ.”

¹⁷Ɨchî nɨ mbə̀ə tɔŋ ə Ŋwiə̀ ənɨ ə Mbǎʼ ənɨ mbə̀ə kɔ̀ŋgɨ̀ əməd, əne mbə̀ kyerɨ ni chəi məd ə ghɨ̀ ɨghə ənɨ wɨə saʼə bə̂d. Əne mbə̀ bɔ əməd ɨchî nɨ mbə̀ yeʼ ɨghabɨ ɨ̀nɔ̀ʼɔ̀ ɨgwɨ ə si əgha.

¹⁸Mbə̀ kyerɨ ni Ŋwìə̀ nyaʼa fə choʼ mbə ɨtu tɨ ənɨ mɨchî rɨbɔ̀ŋ mbe nɨ mbə nyaʼa nɨŋ rɨ əmbɨ mbə mɨ̀mbǎʼ rəŋwe. Chəi wɨ̀ nyaʼa ghɨ əne ənɨ ə sɨrɨvà kɨ ənɨ ə gôl nɨ tɨ̀ mbɨ bə.

¹⁹Wɨ̀ nyaʼa choʼ yeʼ ənɨ ənəm əka ɨnun ze nɨ Kristo nyaʼa chəmnɨ. Kristo yɨ ɨghabɨ ə wan njɨ̀g nɨ chəi ənɔʼɔ kɨ̀ ədurɨ ɨgun.

²⁰Ŋwiə̀ nyaʼa fə chɔʼ əməd bɔŋ wɨ̀ nyaʼə sɨə tekɨ ɨsɨg. Wɨ̀ fə ghɨ̀ ni bə̂d kyerɨ əməd ɨŋga ɨni mbɔ̂ nɨ sɨ nwìə̀. Wɨ̀ nyaʼa ghɨ̀ əne ɨmbə̀ʼ weerɨ əwən.

²¹Mbə̀ fə chè ənjìm məd ben ə Ŋwiə̀ nɨ nyaʼa zwemnɨ əməd bə̀ naʼ ɨwumnɨ ɨ bɔ. À yɨ əton nɨ mbə berɨ nuŋ tə fîŋ bə̀ nùŋ tə rɨkɔndɨ àmei ɨgun ə Ŋwiə̀.

²²Mbə fə ghɨ tə fîŋ zeŋ ɨchî nɨ mbə̀ə ghɨ̀ ɨnû mbe nɨ yeʼ mbɨ rəsìʼ. Mbə mbɨə kàŋə̀ ghaʼə mbə bɔŋgɔb kwàʼ ɨchî chɔ̀m. Əne mbə̀ ghaʼ mɨ̀mə̌d kwàʼ rɨŋga fîŋ.

²³Mbɨ fə gywɨ əwən ɨghəm cherə ɨmbə̀ʼ mbə̀ jɨg ɨ̀tènɨ̀ fi ənjìm ɨŋgam Ŋwiə̀ we nɨ yeʼ ɨkǎ. Ka ɨ̀tènɨ̀ we yɨ i rɨ əmbɨ ə mbǎʼ nɨə kwɨə. Wɨ yɨ rɨ əmbɨ ə Mbǎʼ nɨ chəi wɨ̀ bɨrɨ nɔ kwɨ.

²⁴Ə zɨ ɨŋga Ə̀ŋwàʼnɨ̀ ə Ŋwiə̀ ni, “Bə̂d mɨjìm yɨ ɨghabɨ ɨfu, ɨwumnɨ mɨ̀mə̌d yɨ ɨghabɨ wɨ rɨ̀kwě. Ɨfu wɨə kwɨə, rɨ̀kwě nə̀ŋə̀ feŋgɨə,

²⁵àyɨə ɨŋgam Ə̀nùŋɨ̀sɨg ə ten i koŋ.” Ɨŋgam we yɨ ɨkə̂n chɔ̀m we nɨ mbɨ gha ɨ nən.