Read Fɨso Fi 2 Pità 1 Bible Online

2 Pità 1 - Fɨso Fi bible

2 Pità 1

¹À yɨə mɔ̌ Saimon Pità, nɨ mə yeʼ wə̀d ə̀fàʼì fɔrɨ wə̀d tom Yeso Kristo, ŋwaʼnɨ ə̀ŋwàʼnɨ̀ zɔ̂. Mə wɨə ŋwàʼnɨ̀ əmbɨ mbə̀n mbe nɨ ə ɨbenɨ yeʼ əndəŋ əndəŋ mbɨ wa ənjìm a Ŋwìə̀ Yeso Kristo nɨə chɨ̀ə̀ bə̂d rəŋgəʼ. Məd wɨə ghɨ̀ ɨnû nɨ kùʼnɨ̀.

²Ŋwìə̀ ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən ɨ swi. Wɨ̀ ghɨ əne ənjìm ɨchî nɨ mbə̀ kyerɨ əməd bə̀ kyerɨ ə Yeso a Ə̀nùŋɨ̀sɨg.

³Ŋwiə̀ fə chè ənjìm i ɨka nàʼ ɨghɨjìm mbe nɨ tɨ̀ kəbɨ, ɨmbə̀ʼ tɨ̀ chub ɨkǎ wumnɨ əməd. Wɨ̀ fə nàʼ əne ənjìm ɨchî nɨ tɨ̀ kyerɨ əməd. Wɨ̀ nyaʼa tɔŋ əwa ni tɨ̀ berɨ əbà ɨŋga ɨwumnɨ məd bə̀ fɔrɨ ɨŋga ɨ̀chɔ̀m məd.

⁴Wɨ̀ nyaʼa chè ənjìm ɨka we naʼ mɨneʼe mbe nɨ wɨ̀ nyaʼa kaʼ ni tə bɨrɨ naʼ ɨ na, nɨ chəi ənɨ tɨ̀ wə̀d taŋ ɨnun. Wɨ̀ nyaʼa ghɨ̀ əne ɨmbə̀ʼ ənjìm mɨneʼe mbɔ̂, mbə mbe tɨ̀ mbə nòd ɨnû rɨbɔ̀ŋ mbe nɨ bə̂d rɨŋga ɨsɨg ə feenɨə, sɨ bèŋ yeʼ ɨghabɨ ə Ŋwiə̀.

⁵Ɨchî nɨ Ŋwìə̀ fə ghɨ̌ ɨnû mbɔ̂ ɨ na, mbə̀ berɨ kaŋ kywɨ ənywɨ zə ni ɨchî nɨ mbə̀ nuŋ fîŋ ɨgun ə Ŋwiə̀ ə ghɨ ni mbə̀ ghɨ ɨ̀chɔ̀m. Ɨchî nɨ mbə̀ə ghɨ ɨ̀chɔ̀m ə ghɨ ni mbə̀ kyerɨ ə Ŋwiə̀.

⁶Ɨchî nɨ mbə̀ kyerɨ ə Ŋwiə̀ ə ghɨ ni mbə̀ yimbɨ ɨnyod. Ɨchî nɨ mbə̀ə yimbɨ ɨnyod ə ghɨ ni mbə̀ chi ɨnû. Ɨchî nɨ mbə̀ə chì ɨnû ə ghɨ ni mbə̀ wumnɨ ə Ŋwìə̀.

⁷Ɨchî nɨ mbə̀ə wumnɨ ə Ŋwìə̀ ə ghɨ ni mbə̀ ghaʼ mbə bɔŋgɔb. Ɨchî nɨ mbə̀ə ghaʼ mbə bɔŋgɔb ə ghɨ ni mbə̀ ghaʼ bə̂d cherə.

⁸Mbɔ̂ yɨ ɨnû mbe nɨ mbə̀ berɨ ghɨ̀. Mbə mɨ ghɨ̀ əne wò ɨmbì, mbə bɨrɨ fə fàʼ ɨchî chɔ̀m bə̀ ghɨ̀ ɨnû chɔ̀m nɔnɔʼ. Əze ə chwi ni kaʼi ətu ə̀kǒ nɨ mbə̀ kyerɨ a Ə̀nùŋɨ̀sɨg Yeso Kristo.

⁹Wə̀d mɔʼɔ we nɨ chəi wɨə ghɨ̀ ɨnû mbɔ̂ yɨ ɨghabɨ ə wə̀d we nɨ chəi wɨə zə ɨsɨ ɨchî chɔ̀m. Wɨ̀ yɨə bə̀ ɨghabɨ ɨfɨgɨ. Wɨ̀ fə neb ni Ŋwìə̀ nyaʼa fə zeŋnɨ əwi tɨ ənɨ ɨnû rɨbɔ̀ŋ ə nun.

¹⁰Əne kyɨə bɔŋgɔb, mbə̀ jeŋgɨ kywɨ ənywɨ zə ni mbə̀ chub àmei ɨchî nɨ Ŋwìə̀ nyaʼa chɔʼ əwən bə̀ tɔŋə ni mbə̀ yeʼ mbi bə̂d. Mbə mɨ chub əne, njɨ chəi mbə bɨrɨ nɔ ghɨ ɨnû rɨbɔ̀ŋ.

¹¹Əne Ŋwìə̀ bɨrɨ naʼ ɨka jìm ɨ nən nɨ nyɨ ɨŋga ənû ɨfɔ̀n rɨ mì a Ə̀nùŋɨ̀sɨg Yeso Kristo we nɨə chɨ̀ əwa rəŋgəʼ.

¹²Mə wɨə nɔ̀ɔ̀rɨ̀ mbə ɨtu ɨghəm jìm ɨmbə̀ʼ ɨnû mbɔ̂, ka à bè yeʼi ni mbə fə bè kyerɨ ɨnû rəŋgu bə̀ kyerɨ ni mbə fə təm kàànɨ̀ ɨŋga rəsìʼ we nɨ mbɨ nyaʼa chwi ɨ nən.

¹³Mə kàŋ kɔndɨ ni zɨə kùʼ ni mə nɔɔrɨ mbə ɨtu ɨmbə̀ʼ ɨnû mbɔ̂ ənɨ mə kɨrɨ ɨkǎ.

¹⁴Mə kyerɨ ni mə bɨrɨ zambɨ saŋ ɨsɨg ɨchî nɨ a Ə̀nùŋɨ̀sɨg Yeso Kristo fə ghɨ̌ zɨə zeŋ ɨ num.

¹⁵Mə bɨrɨ kywɨ ənywɨ zə ni ənɨ mə̀ fə saŋ ɨsɨg, mbə mbe tɨ̀ mbə sɨə kɔndɨ ɨnû mbɔ̂ jìm.

¹⁶Chəi tɨ̀ nyaʼa beenɨ əbɔʼ tɨpoʼ əko te nɨ bə̂d nyaʼa nɨŋ ɨwe tekɨ ənɨ tɨ̀ nyaʼə ghà ɨ nən ɨmbə̀ʼ ɨka a Ə̀nùŋɨ̀sɨg Yeso Kristo fɔrɨ ɨmbə̀ʼ nyùmə̀ we nɨ wɨ̀ bɨrɨ wɨrɨ yeʼe. Tɨ̀ yɨə nyaʼə mɨ̀zərɨmbin ənɨ wɨ̀ nyaʼa jɨg ənû ɨfɔ̀n.

¹⁷Ŋwìə̀ Mbǎʼ nyaʼa nàʼ ɨwumnɨ bə̀ nàʼ ɨzeŋɨ zeŋɨ ɨ bɔ ənɨ ə nyùmə̀ we nɨ gɨ̂ Ŋwìə̀ we nɨ mbɨə nàʼ ɨwumnɨ kyeŋ ɨ bɔ nyaʼa gham ɨ bɔ ni, “Wɔ̂ yɨ mɨ Wan nɨ mə̀ ghaʼi kwàʼ rɨŋgəʼ, mɨ fîŋ ə bɔ̀ŋ əku ɨmbə̀ʼ əməd!”

¹⁸Tɨ̀ nyaʼa zu gɨ̂ zɔ̂ nɨ nyaʼa gham rɨkaŋ ənɨ tɨ̀ nyaʼa mbɨ məd ɨkaŋ ɨwum Ŋwiə̀.

¹⁹Əne tɨ̀ fə kyerɨ ni ɨŋgam we nɨ bə̂d ɨ̀kə̀n nyaʼa ghǎ ɨmbə̀ʼ əməd yɨə kàŋ ɨŋgam rəsìʼ. Mbə̀ jeŋgɨ zɨ̀ ətu ənɨ ɨŋgam wɔ̂, ɨmbə̀ʼ ɨghəm nɨ ɨ wɨ ɨghabɨ ənam nɨə te ɨŋga ɨsɨ firɨ. Mbə̀ ghɨ ɨnû mbe nɨ ɨŋgam wɔ̂ gha ɨ nən ɨmbə̀ʼ ɨtuʼ mɨ chɨg i chɨgɨ, Kristo te ɨŋga tə fîŋ ɨchî nɨ təbid ə te ənjɨtuʼ.

²⁰Ənû rɨtu nɨ mbə̀ berɨ nɨ kyerɨ yɨ ni chəi wə̀d mɔʼɔ nɨ tɨ̀ wɨ̀ tòʼrɨ̀ ənû ze nɨ bə̂d ɨ̀kə̀n Ŋwiə̀ nyaʼa ŋwaʼnɨ ɨŋga Ə̀ŋwàʼnɨ̀ ə Ŋwiə̀ ənɨ i ɨghəm,

²¹ɨmbə̀ʼ ɨghəm nɨ chəi ɨkə̂n Ŋwiə̀ nyaʼa yeʼe ɨchî nɨ bə̂d mɨ̀sɔŋɨchù nyaʼa kəbɨ. À yɨ Əzwî ə Zeŋɨ ə nyaʼa ghɨ ni bə̂d gha ɨkə̂n Ŋwiə̀.