Read Fɨso Fi 2 Pità 3 Bible Online

2 Pità 3 - Fɨso Fi bible

2 Pità 3

¹Mbɨ bɔŋgɔb nɨ mə̀ ghaʼi kwàʼ rɨŋgəʼ, ə̀ŋwàʼnɨ̀ zɔ̂ nɨ mə ŋwaʼnɨ ɨ nən tɨ̀nîn yɨ ə̀ŋwàʼnɨ̀ ze nɨ pe ənɨ mbɨ be. Ɨŋga ɨ̀ŋwàʼnɨ̀ mbɔ̂ be, mə fə kywɨ ənywɨ nɨ nɔ̀ɔ̀rɨ̀ mbə ɨtu ɨmbə̀ʼ ɨnû mbe nɨ mbə̀ nyaʼa fə be kyerɨ, ɨmbə̀ʼ mbə̀ wɨrɨ kɔndɨ ɨnû rəŋgu mbɨ ə fîŋ nɨ zeŋɨ.

²Mə kə̀b ni mbə̀ kɔndɨ ɨŋgam we nɨ bə̂d ɨ̀kə̀n Ŋwiə̀ zeŋɨ nyaʼa ghàm rəŋwe bə̀ kɔndɨ rɨkə te nɨ Ə̀nùŋɨ̀sɨg nɨ chɨ̀ə̀ bə̂d rəŋgəʼ nyaʼa che ənjìm mbə bə̂d tom nàʼ ɨ nən.

³Ənû rɨtu nɨ mbə̀ berɨ nɨ kyerɨ yɨ ni ɨŋga ɨni mbe nɨ sɨ nwìə̀, məbaʼrɨ-bə̂d bɨrɨ yeʼe pè baʼrɨ əwən. Mbɨ bɨrɨ beenɨ əbɔʼ ɨnû mbe nɨ nyamnyod tɨ mɨ̀mə̌d ə feenɨə.

⁴Mbɨ bɨrɨ biirɨ ni, “Ɨmbə̀ʼ Yeso nyaʼa kàʼ ni tə bɨrɨ wɨrɨ yeʼe ə? Məd wi ə? Tɨ ənɨ mba mɨ̀mbǎʼ rəŋwe nyaʼa fə saŋ ɨsɨg, ɨnû jìm mbɨə kɨrɨ i àmei ɨchî nɨ mbɨ nyaʼa i tɨ ənɨ Ŋwìə̀ nyaʼa tekɨ ɨsɨg!”

⁵Mbɨ kàŋ kyerɨ ə bɔŋ sɨə təənɨ ənû ze ni, à nyaʼa rəŋwe, Ŋwìə̀ nyaʼa tekɨ ɨkaŋ bə̀ tekɨ si àmei ənɨ i ɨŋgam. Wɨ̀ nyaʼa ghàbrɨ̀ si tɨ ənɨ mɨnib, əne si nyaʼa jwɨ̀ rɨŋga mɨnib.

⁶À yɨə bə̀ ənjìm ɨchî nɨ mɨnib nyaʼa kubrɨ ɨsɨ nɨ Ŋwìə̀ nyaʼa nimnɨ ɨsɨg we rəŋwe.

⁷À yɨə bə̀ àmei ənɨ ɨŋgam nɨ Ŋwìə̀ fə nuŋ ni tə bɨrɨ nimnɨ ɨkaŋ wɔ̂ nɨ yeʼ rɨ̀nîn bə̀ nimnɨ si zɔ̂ nɨ yeʼ rɨ̀nîn ɨŋga ɨwid. Ŋwìə̀ fə nùŋ ni ɨkaŋ mbɨ ə si chubɨ pè əni ze nɨ wɨ̀ bɨrɨ saʼ mɨ̀mə̌d bə̀ nimnɨ bə̂d mbe nɨ chəi mbɨə wumnɨ əməd.

⁸Mbɨ bɔŋgɔb nɨ mə̀ ghaʼi kwàʼ rɨŋgəʼ, tɨ mbə̀ təənɨ ə ənû zɔ̂ ə mɔʼ. Ənû rəŋgu yɨ ni əmbɨ Ə̀nùŋɨ̀sɨg əni ə mɔʼ yɨ ɨghabɨ ɨghəm ɨwu chuʼ fibɨ̀, mbɨ ni ɨghəm ɨwu chuʼ fibɨ̀ yɨ ɨghabɨ əni ə mɔʼ.

⁹Chəi Ə̀nùŋɨ̀sɨg ə kɨə chəkɨə nyumə̀ bɔŋ ghɨ ɨnû mbe nɨ wɨ̀ kaʼi, ɨchî nɨ bə̂d mɔʼɔ ə kɔndɨə ni ɨ wɨə chə̀kɨ̀ə̀. Àyɨə məd wɨə yimə fîŋ mbɨ nən ɨmbə̀ʼ ɨghəm nɨ chəi wɨ̀ kəb ni wə̀d mɔʼɔ nim. Wɨ̀ kə̀b yeʼ ni wə̀d jìm beŋ i fîŋ, waʼ mbi ɨnû rɨbɔ̀ŋ.

¹⁰Àyɨə əni ze nɨ Ə̀nùŋɨ̀sɨg bɨrɨ wɨrɨ yeʼe ə zɨ ɨghabɨ ɨchî nɨ ɨjɨ ə yeʼe. Əni ze, ɨkaŋ bɨrɨ jùʼ rɨkǎ nim. Ɨwid bɨrɨ tɔn ɨghɨjìm mbe nɨ yeʼ ɨkaŋ, mbɨ sam. Ɨwid bɨrɨ tɔn si bə̀ tɔ̀n ɨghɨjìm mbe nɨ yeʼ ɨgwɨ ə si, mbɨ nim. [1]

¹¹Ɨchî nɨ Ŋwìə̀ bɨrɨ nimnɨ ɨghɨ mbɔ̂ jìm ɨchî wɔ̂, mbə̀ kɨə wo yeʼ ɨkwɨ bə̂d mbi ə? Mbə berɨ chub ɨzeŋɨ zeŋɨ bə̀ sweŋ ə ɨnyod əmbɨ ə Ŋwiə̀

¹²ɨchî nɨ mbɨə wòm əni ze nɨ wɨ̀ bɨrɨ wɨrɨ yeʼe. Mbə̀ kywɨ ənywɨ zə ni əni ze ə zambɨ yeʼe. Ɨgwɨ əni ze, ɨwid bɨrɨ tɔn ɨkaŋ, wɨ nim. Əzuʼ rɨ ənɨ ɨwid we bə̀ ghɨ̀ ni ɨghɨ mbe nɨ yeʼ ɨkaŋ mbɨ sam.

¹³À yeʼ ɨmbə̀ʼ əwa, tɨ̀ wɨə wòm ɨkaŋ fi mbɨ si fi ze nɨ Ŋwìə̀ kaʼ ɨ na, nɨ yeʼ əsɨ ze nɨ wə̀d jìm bɨrɨ chub ɨchî nɨ kuʼnɨ.

¹⁴Əne kyɨə bɔŋgɔb nɨ mə̀ ghaʼi kwàʼ rɨŋgəʼ, ɨchî nɨ mbɨə wòm ɨnû mbɔ̂, mbə̀ kywɨ ənywɨ zə ni mbə̀ chub ɨzeŋɨ zeŋɨ ɨmbə̀ʼ tɨ Ŋwìə̀ zə i ɨgu ənû mɔʼɔ ɨgwɨ nən. Mbə̀ bə zə ni mbə̀ chub ənɨ əbɔrəbɔd mbɨ ə Ŋwiə̀.

¹⁵Mbə̀ neŋ ɨchî nɨ Ŋwìə̀ ə yimə fîŋ mbɨ nən, əne nɨŋ əze ɨghabɨ əpan nɨ wɨ̀ naʼ ɨ nən ni mbə̀ jwɨ rəŋgəʼ. Wa aŋgɔb Pɔ̂l, nɨ tɨ̀ ghaʼi kwàʼ rɨŋgəʼ, nyaʼa bə̀ ŋwàʼnɨ̀ ənû zɔ̂ ɨ nən ɨchî nɨ Ŋwìə̀ nyaʼa naʼ ɨwe ɨ bɔ ni wɨ̀ ghɨ əne.

¹⁶Ənû ze nɨ wɨ̀ ŋwaʼnɨ mbɨ ɨŋga ɨ̀ŋwàʼnɨ̀ jìm mbe nɨ wɨ̀ ŋwaʼnɨ. Ɨnû mɔʼɔ mbɨ ɨŋga ɨ̀ŋwàʼnɨ̀ mbe nɨ Pɔ̂l ŋwaʼnɨ nɨ chəi ənɨ tɨ ɨtu bə̂d zeŋ ɨmbə̀ʼ mbɨwən. Bə̂d mbe nɨ chəi mbɨ kyerɨ ɨnû, nɨ ɨbenɨ mɨ̀mə̌d kɨrɨ bɔd, bɨrɨ toʼrɨ ɨnû mbɔ̂ ɨchî cherə. Bə̂d mbɨə kwepɨ ɨnû ɨŋga ɨ̀ŋwàʼnɨ̀ mbɔ̂ àmei ɨchî nɨ mbɨə kwepɨ ɨŋga ɨ̀ŋwàʼnɨ̀ Ŋwiə̀ cherə. Ɨchî nɨ mbɨə ghɨ̀ əne, ɨ mbɨə tɔŋə ŋgəʼ ɨgwɨ mbə ɨtu.

¹⁷Əne mbə̀nə mbɨ bɔŋgɔb nɨ mə̀ ghaʼi kwàʼ rɨŋgəʼ, mbə̀ fə bè kyerɨ ə ənû zɔ̂. Mbə̀ we əwən ɨmbə̀ʼ ɨchî nɨ bə̂d mbe nɨ chəi mbɨ kyerɨ tɨkə ə kəb febrɨ əwən, njɨ mbə bɨrɨ nim ɨnə̂njɨ̀, əne feŋ rɨ əsɨ ze nɨ mbə kəʼ fə təm ɨgun kàànɨ̀.

¹⁸Àyɨə mbə wo ɨmbì kwi ɨŋga ɨ̀chɔ̀m fɔrɨ ɨŋga ənû nɨ kyerɨ a Ə̀nùŋɨ̀sɨg Yeso Kristo nɨə chɨ̀ əwa rəŋgəʼ. Bə̂d mɨ̀jìm wumnɨ məd kɔ rɨ̀nîn wò nwì koŋ! À yɨ əne.