Read Fɨso Fi 1 Jɔ̌n 1 Bible Online

1 Jɔ̌n 1 - Fɨso Fi bible

1 Jɔ̌n 1

¹Tɨ̀ wɨə ŋwàʼnɨ̀ ə̀ŋwàʼnɨ̀ zɔ̂ ɨ nən ɨmbə̀ʼ Ɨŋgam. Ɨŋgam we wɨə nyaʼa i əŋgu bɔŋ Ŋwìə̀ nyaʼa sɨə tekɨ ɨsɨg. Tɨ̀ nyaʼa zu əməd ənɨ wɨ̀ nyaʼə ghàm ɨ na. Tɨ̀ nyaʼa kàŋ zə əməd mbǎ mbǎ. Tɨ̀ nyaʼa nèŋ əməd bə̀ kàŋ bètɨ̀ əməd mbǎ mbǎ. Ɨŋgam we wɨə ghɨ̀ ni bə̂d jɨg ɨ̀tènɨ̀.

²Ɨ̀tènɨ̀ we nyaʼa chwi i ɨnyod əsaŋ. Tɨ̀ nyaʼa zə əməd, əne tɨ̀ wɨə ghà rəsìʼ ɨmbə̀ʼ əməd ɨ nən. Tɨ̀ wɨə bə̀ ghàə̀ ni məd yɨə nyaʼə ɨ̀tènɨ̀ rɨ mì we nɨ nyaʼa i mbɨ Mbǎʼ, nɨ Mbǎʼ ziə nyaʼa ghɨ̌ tɨ̀ kyerɨ.

³Ɨnû mbe nɨ tɨ̀ nyaʼa zə bə̀ zu yɨ mbɔ̂ tɨə ghà ɨ nən. Əne yɨ ɨmbə̀ʼ mbə̀ fɔtɨ mbɨ na ənɨ ɨfɔtɨ we nɨ tɨ̀ berɨ mbɨ Mbǎʼ bə̀ berɨ mbɨ Wan məd Yeso Kristo.

⁴Tɨ̀ wɨə ŋwàʼnɨ̀ ɨnû mbɔ̂ ɨ nən ɨmbə̀ʼ ɨghaʼi swi ɨŋga ta fîŋ.

⁵Ɨkə̂n we nɨ tɨ̀ nyaʼa zu rɨ əmbɨ ə Wan Ŋwìə̀, nɨ tɨə bə̀ ghà ɨ nən yɨ ni, Ŋwiə̀ yɨ ɨzeŋɨ zeŋɨ, fɔrɨ ni chəi ɨsɨ firɨ berɨ ənû ə mɔʼɔ nɨ ghɨ̀ mbɨ məd.

⁶Tɨ̀ mɨ ghà ni tɨ̀ wɨ ənɨ ɨfɔtɨ mbɨ məd, àyɨə tɨ̀ wɨə kɨrɨ ɨŋga ɨsɨ firɨ, əne yɨ ni tɨ̀ wɨə ghàə̀ mɨghab fɔrɨ ni chəi tɨə beenɨ əbɔʼ rəsìʼ.

⁷Tɨ̀ mɨ yeʼ ɨŋga ɨzeŋɨ zeŋɨ, ɨchî nɨ məd ziə bə yeʼ ɨŋga ɨzeŋɨ zeŋɨ, njɨ tɨ̀ wɨ ənɨ ɨfɔtɨ mbǎ mbǎ, əne ənəm ə Yeso, Wan məd, ə zɨə sò mba ɨnû rɨbɔ̀ŋ jìm.

⁸Tɨ̀ mɨ ghà ni chəi ənû rɨbɔ̀ŋ ə mɔʼɔ ɨŋga na, njɨ tɨ̀ wɨə tambɨ a ɨnyod, əne chəi rəsìʼ ɨŋga ɨnû mbe nɨ tɨə ghàə̀.

⁹Tɨ̀ mɨ ben mba ɨnû rɨbɔ̀ŋ, njɨ məd we nɨə ghɨ̀ ɨnû mbe nɨ wɨ̀ kaʼi bə̀ ghɨ̀ mbe nɨ kuʼnɨ, bɨrɨ waʼ mba ɨnû rɨbɔ̀ŋ bə̀ zeŋnɨ əwa rɨ ənɨ ta rɨ̀gùrɨ-ɨnû jìm.

¹⁰Tɨ̀ mɨ ghà ni chəi tɨ̀ kweʼ ghɨ̀ ənû rɨbɔ̀ŋ, əne tɨ̀ wɨə ghàə̀ ni Ŋwìə̀ yɨə wə̀d mɨghab. Chə bəi ɨŋgam məd ɨŋga ta fîŋ.