Read Fɨso Fi 1 Jɔ̌n 2 Bible Online

1 Jɔ̌n 2 - Fɨso Fi bible

1 Jɔ̌n 2

¹Mbɨ bɔn nɨ mə̀ ghaʼi kwàʼ rɨŋgəʼ, mə wɨə ŋwàʼnɨ̀ ɨnû mbɔ̂ ɨ nən ɨmbə̀ʼ tɨ mbə̀ ghɨ ə ɨnû rɨbɔ̀ŋ. Àyɨə wə̀d mɔʼɔ mɨ ghɨ̀ ənû rɨbɔ̀ŋ, tɨ̀ berɨ wə̀d mɔʼɔ nɨə buʼ ɨbɔ əmbɨ Mbǎʼ ɨgwɨ mba ɨtu. Məd yɨə Yeso Kristo we nɨə ghɨ̀ ɨnû nɨ kuʼnɨ.

²Məd yɨ əghɨ ə̀fà ze nɨ Ŋwìə̀ che ənjìm məd waʼ mba ɨnû rɨbɔ̀ŋ. Ka wɨ̀ bɨrɨ waʼ i àmei mba ɨnû rɨbɔ̀ŋ, wɨ̀ bɨrɨ bɨ waʼ mbɨ bə̂d mɨ̀jìm rɨŋga ɨsɨg.

³Tɨ̀ mɨ yeʼə nùŋə̀ rɨkə rɨ Ŋwiə̀, njɨ zɨə chwi ni tɨ̀ ə kyerɨ əməd.

⁴Wə̀d mɔʼɔ we nɨ ghà ni tə kyerɨ əməd, àyɨə chəi wɨə nùŋə̀ rɨkə məd, yɨə wə̀d mɨghab. Chəi rəsìʼ ɨŋga ɨnû mbe nɨ wɨə ghàə̀.

⁵Wə̀d mɔʼɔ mɨ yeʼə ghɨ̀ ɨnû mbe nɨ yeʼ ɨŋga ɨŋgam məd, əne yɨ ni ɨghaʼi ɨgwɨ ə Ŋwiə̀ ə kàŋ swi ɨŋga fîŋ məd. Wɔ̂ yɨ ɨnə̂njɨ̀ nɨ kyerɨ ni tɨ̀ wɨ ənɨ ɨfɔtɨ mbɨ məd.

⁶Wə̀d mɔʼɔ we nɨ ghà ni tə wɨ ənɨ ənû ə mɔʼ mbɨ ə Ŋwiə̀ berɨ beenɨ àmei əbɔʼ tɨkyerɨ-ɨwu Yeso Kristo.

⁷Mbɨ bɔŋgɔb nɨ mə̀ ghaʼi kwàʼ rɨŋgəʼ, ka ɨkə wɔ̂ nɨ mɨə ŋwàʼnɨ̀ ɨ nən yɨ i ɨkə fi. À yɨ ɨkə ənun nɨ mbə nyaʼa kyerɨ tɨ ənɨ mbə̀ nyaʼa ben ə Kristo. Ɨkə ənun we yɨ ɨŋgam we nɨ mbə̀ nyaʼa fə be zu.

⁸Àyɨə ɨkə wɔ̂ nɨ mɨə ŋwàʼnɨ̀ ɨ nən yɨə kàŋ wɨ fi. Bə̂d mbɨə zə rəsìʼ we nɨ yeʼ ɨŋga ɨkə wɔ̂ rɨ ənɨ ɨchî nɨ Kristo nyaʼə ghɨ̀ ɨnû bə̀ fɔrɨ tɨ ənɨ ɨchî nɨ mbə̀n ə bə̀ ghɨ̀ ɨnû, ɨmbə̀ʼ ɨghəm nɨ ɨsɨ firɨ fə sɨə che i, əne ɨzeŋɨ zeŋɨ rəsìʼ fə sɨə teə.

⁹Wə̀d we nɨ ghà ni tə wɨ ɨŋga ɨzeŋɨ zeŋɨ àyɨə ɨ wɨə kɨrɨ ban wi aŋgɔb, wɨə kɨrɨ i ɨŋga ɨsɨ firɨ.

¹⁰We nɨ ghaʼ wi aŋgɔb wɨ ɨŋga ɨzeŋɨ zeŋɨ, əne chəi ənû ə mɔʼɔ ɨŋga məd nɨ tɨ̀ zɨə ghɨ̀ wɨ̀ tɨ̀grə gù.

¹¹Àyɨə we nɨ ban wi aŋgɔb wɨə kɨrɨ i ɨŋga ɨsɨ firɨ. Məd wɨə yèn ɨŋga ɨsɨ firɨ, əne chəi wɨ̀ kyerɨ əsɨ ze nɨ wɨə wòə̀, ɨmbə̀ʼ ɨghəm nɨ ɨsɨ firɨ fə ghɨ̀ ni tɨ̀ wɨ̀ wɨrɨ zə i ɨsɨ.

¹²Mbɨ bɔn nɨ mə̀ ghaʼi kwàʼ rɨŋgəʼ, mə wɨə ŋwàʼnɨ̀ ɨ nən ɨmbə̀ʼ ɨghəm nɨ Ŋwìə̀ fə waʼ mbə ɨnû rɨbɔ̀ŋ ɨmbə̀ʼ ə Kristo.

¹³Mɨ̀mbǎʼ, mə wɨə ŋwàʼnɨ̀ ɨ nən ɨmbə̀ʼ ɨghəm nɨ mbə̀ kyerɨ məd we nɨ nyaʼa i əŋgu bɔŋ Ŋwìə̀ nyaʼa sɨə tekɨ ɨsɨg. Ŋgwàʼ bə̂d, mə wɨə ŋwàʼnɨ̀ ɨ nən ɨmbə̀ʼ ɨghəm nɨ mbə fə baŋ wə̀d rɨ̀bɔ̀ŋ.

¹⁴Mbɨ bɔn, mə wɨə ŋwàʼnɨ̀ ɨ nən ɨmbə̀ʼ ɨghəm nɨ mbə̀ kyerɨ ə Mbǎʼ. Mɨ̀mbǎʼ, mə wɨə ŋwàʼnɨ̀ ɨ nən ɨmbə̀ʼ ɨghəm nɨ mbə̀ kyerɨ məd we nɨ nyaʼa i əŋgu bɔŋ Ŋwìə̀ nyaʼa sɨə tekɨ ɨsɨg. Ŋgwàʼ bə̂d, mə wɨə ŋwàʼnɨ̀ ɨ nən ɨmbə̀ʼ ɨghəm nɨ mbə̀ berɨ ɨka, ɨŋgam Ŋwiə̀ wɨ ɨŋga nən, mbə̀ fə bə̀ baŋ wə̀d rɨ̀bɔ̀ŋ.

¹⁵Tɨ mbə̀ ghaʼ ə ɨsɨg kɨ̀ be ghaʼ ɨghɨ mbe nɨ yeʼ ɨŋga ɨsɨg. Wə̀d mɔʼɔ mɨ ghaʼ ɨsɨg, əne chəi wɨ̀ ghaʼ ə Mbǎʼ,

¹⁶ɨmbə̀ʼ ɨghəm nɨ kaʼ ɨghɨjìm mbe nɨ yeʼ ɨŋga ɨsɨg, əne yɨ ɨghɨ mbe nɨ nyamnyod ə feenɨə, mbe nɨ əghə ə nèŋə̀ feenɨə mbɨ mbe nɨ bə̂d ə nɔ̀ ɨnyod ɨmbə̀ʼ mbɨwən, yɨ i rɨ əmbɨ ə Mbǎʼ. Mbɨ yɨ rɨŋga ɨsɨg.

¹⁷Ɨsɨg mbɨ ɨghɨjìm mbe nɨ bə̂d ə feenɨə wɨə che i che, àyɨə wə̀d we nɨə ghɨ̀ ɨnû mbe nɨ Ŋwìə̀ kə̀bɨ bɨrɨ ten i koŋ.

¹⁸Mbɨ bɔn, nyùmə̀ we nɨ ɨsɨg ə wò nwìə̀ fə tiinɨ. Mbə nyaʼa fə zu ni wə̀d pə̀n Kristo wɨə yeʼe. Tɨ̀nîn bə̂d pə̀n Kristo nɔnɔʼ fə yeʼe. Əzɔ̂ ə fə ghɨ̀ tɨ̀ kyerɨ ni nyùmə̀ we nɨ ɨsɨg ə wò nwìə̀ fə tiinɨ.

¹⁹Bə̂d pə̀n mbɔ̂ yɨ rəkaʼ na, àyɨə chə nyaʼa i mɨ̀mə̌d ɨŋga a ɨfɔtɨ. À kɨ nɨ mbɨ nyaʼa rɨŋga a ɨfɔtɨ, njɨ mbɨ nyaʼa chubɨ mbɨ na. Àyɨə mbɨ nyaʼa jwɨ̀ ɨmbə̀ʼ zɨə zeŋ ni chə nyaʼa i mɨ̀mə̌d ɨŋga a ɨfɔtɨ.

²⁰À yeʼ ɨmbə̀ʼ əwən, Wə̀d Zeŋɨ fə zɔʼ əwən, əne mbə̀n mɨjìm fə kyerɨ rəsìʼ. [1]

²¹Chəi mɨə ŋwàʼnɨ̀ ɨ nən ɨmbə̀ʼ ɨghəm nɨ chəi mbə̀ kyerɨ rəsìʼ. Mə wɨə ŋwàʼnɨ̀ yeʼ ɨmbə̀ʼ ɨghəm nɨ mbə kyerɨ rəsìʼ bə̀ kyerɨ ni chəi mɨghab ə jwɨ̀ ənɨ rəsìʼ.

²²Wə̀d mɨghab kɨə we? Kaʼ à wa kɨ i wə̀d we nɨə ghàə̀ ni ka Yeso yɨ i wə̀d we nɨ Ŋwìə̀ zɔʼ ə? Wə̀d we nɨ ton ə Mbǎʼ bə̀ ton Wan yɨə wə̀d pə̀n Kristo.

²³Wə̀d we nɨ ton Wan fə bə̀ ton ə Mbǎʼ. We nɨ ben Wan fə bə̀ ben ə Mbǎʼ.

²⁴Ɨnû mbe nɨ mbə̀ nyaʼa zu tɨ ənɨ mbə̀ nyaʼa ben ə Kristo, mbə̀ nuŋ ɨŋga tə fîŋ. Mbə mɨ nùŋ ɨnû mbe, mbə bɨrɨ yeʼ ənɨ ɨfɔtɨ mbɨ ə Wan fɔrɨ mbɨ ə Mbǎʼ.

²⁵Ənû ze nɨ Wan fə kaʼ ni tə bɨrɨ naʼ ɨ na yɨ ɨ̀tènɨ̀ rɨ mì.

²⁶Mə wɨə ŋwàʼnɨ̀ ənû zɔ̂ ɨ nən ɨmbə̀ʼ bə̂d mbe nɨə kə̀b tambɨ əwən.

²⁷À yeʼ ɨmbə̀ʼ əwən, Əzwî ze nɨ Kristo nyaʼa cha ɨ nən ə fə ten i ɨŋga nən, əne chəi ənɨ tɨ̀ wə̀d mɔʼɔ wɨrɨ chwi ənû ɨ nən. Əzwî ə zɨə chwi ɨnû jìm ɨ nən. Ɨnû mbe nɨ zɨə chwiə yɨ ɨnû rəsìʼ, nɨ chəi mɨghab ɨŋga. Mbə̀ ghɨ ɨnû mbe əne chubɨ ənɨ ɨfɔtɨ mbɨ Kristo.

²⁸Əne tɨ̀nîn, kyɨə bɔn nɨ mə̀ ghaʼi kwàʼ rɨŋgəʼ, mbə̀ chubɨ ənɨ ɨfɔtɨ mbɨ məd, ɨmbə̀ʼ ənɨ wɨ̀ wɨrɨ yeʼe, chəi tɨ̀ bɨrɨ bɔ. Chəi tɨ̀nìd ətu bɨrɨ ghɨ ni tɨ̀ nəmbɨ rɨ bɔ.

²⁹Mbə mɨ kyerɨ ni Kristo wɨə ghɨ̀ ɨnû nɨ kuʼnɨ, njɨ mbə bɨrɨ bɨ kyerɨ ni wə̀d jìm we nɨə ghɨ̀ ɨnû nɨ kuʼnɨ yɨə wə̀d Ŋwìə̀.