Read Fɨso Fi 1 Jɔ̌n 5 Bible Online

1 Jɔ̌n 5 - Fɨso Fi bible

1 Jɔ̌n 5

¹Wə̀d we nɨ ben ni Yeso yɨə Wə̀d we nɨ Ŋwìə̀ zɔʼɔ yɨə wə̀d Ŋwìə̀. Wə̀d we nɨ ghaʼ mbǎʼ wan, ə bə̀ ghaʼ wan məd.

²Ɨchî nɨ tɨ̀ kyerɨ ni tɨ̀ ghaʼ bɔn Ŋwiə̀ yɨ ni: Tɨ̀ berɨ ghaʼ ə Ŋwiə̀ bə̀ nùŋ tɨkə rɨ məd.

³Ɨ ghaʼ ə Ŋwìə̀ ə chwiə ni tɨ̀ berɨ nuŋ tɨkə rɨ məd. Chəi tɨkə te jeŋgɨ se ɨ na nɨ nuŋ,

⁴ɨmbə̀ʼ ɨghəm nɨ wə̀d Ŋwìə̀ jìm fə baŋ ɨsɨg. Tɨ̀ we tɨ̀ rɨ̀ baŋ ɨsɨg ənjìm ɨchî nɨ tɨ̀ nuŋ fîŋ ɨgun ə Yeso.

⁵À kɨə we nɨ tɨ̀ wɨ̀ baŋ ɨsɨg ə? Àmei wə̀d we nɨ ben ni Yeso yɨə Wan Ŋwìə̀.

⁶Ənɨ Yeso Kristo nyaʼa yeʼe, wɨ̀ nyaʼa chwiə ni tə yɨə Wan Ŋwìə̀ ɨchî nɨ wɨ̀ nyaʼa nɨŋ mɨnib mbɨ ɨchî nɨ wɨ̀ nyaʼa chəmnɨ e ənəm əzed ə baʼnɨ. Chəi wɨ̀ nyaʼa nɨŋ àmei mɨnib, wɨ̀ nyaʼa nɨŋ mɨnib bə̀ chəmnɨ e ənəm. Əzwî ziə ə zɨə ghàə̀ ni ənû zɔ̂ yɨ ənû rəsìʼ, ɨmbə̀ʼ ɨghəm nɨ à yɨə Ŋwìə̀ ə nàʼ Əzwî rəsìʼ.

⁷Mɨ̀zərɨmbin mɨ̀tad mbɨə ghàə̀ ni ənû zɔ̂ yɨ ənû rəsìʼ.

⁸Mɨ̀zərɨmbin mbe yɨ Əzwî ə Ŋwìə̀, mɨnib mbɨ ənəm. Mɨ̀zərɨmbin mbɔ̂ mɨ̀tad mbɨə ghà àmei ənû ə mɔʼ.

⁹Bə̂d mɨ̀sɔŋɨchù mɨ ghà ənû ze nɨ mbɨ zə, tɨ̀ wɨə benə, àyɨə əze nɨ Ŋwìə̀ ghǎ ə chè əzɨ mɨ̀mə̌d. Ŋwìə̀ ziə fə ghà ni ənû ɨmbə̀ʼ i Wan yɨ ənû rəsìʼ.

¹⁰Wə̀d we nɨ ben Wan Ŋwìə̀ fə bə̀ ben ənû ze nɨ Ŋwìə̀ ghǎ. We nɨ chəi wɨ̀ ben ənû ze nɨ Ŋwìə̀ ghǎ ɨmbə̀ʼ i Wan wɨə ghàə̀ ni Ŋwìə̀ yɨə wə̀d mɨghab, ɨmbə̀ʼ ɨghəm nɨ chəi məd ben ənû ze nɨ Ŋwìə̀ ghǎ ɨmbə̀ʼ i Wan.

¹¹Ənû ze nɨ wɨ̀ ghǎ ɨmbə̀ʼ i Wan yɨ ni: Ŋwìə̀ nyaʼa ghɨ̀ ni tɨ̀ jɨg ɨ̀tènɨ̀ rɨ mì, əne à yɨə Wan məd ə nàʼ ɨ̀tènɨ̀ rɨ mì we ɨ na.

¹²Wə̀d we nɨ yeʼ ənɨ ənû ə mɔʼ mbɨ ə Wan bɨrɨ jɨg ɨ̀tènɨ̀ we. Kaʼ wə̀d we nɨ chəi əməd ənɨ ənû ə mɔʼ mbɨ ə Wan Ŋwìə̀ bɨrɨ jɨg i ɨ̀tènɨ̀ we.

¹³Mə wɨə ŋwàʼnɨ̀ ənû zɔ̂ ɨ nən, mbə̀n mbe nɨ ben Wan Ŋwìə̀, ɨmbə̀ʼ mbə̀ kyerɨ ni mbə bɨrɨ jɨg ɨ̀tènɨ̀ rɨ mì.

¹⁴Əton nɨ chəi tɨə bɔə ənɨ tɨə kɔŋgɨ ə Ŋwiə̀ yɨ ɨmbə̀ʼ ɨghəm nɨ tɨ̀ fə kyerɨ ni məd wɨə zu ɨnû mbe nɨ tɨə biirɨə əwù ze nɨ tɨ̀ biirɨ ɨchî nɨ wɨ̀ kəbɨ.

¹⁵Ɨchî nɨ tɨ̀ kyerɨ ni məd wɨə zu əwa ənɨ tɨə biirɨə ɨnû rɨ bɔ, əne tɨ̀ bə̀ kyerɨ ni wɨ̀ bɨrɨ naʼ ɨghɨ mbe nɨ tɨə biirɨə.

¹⁶Wə̀d mɔʼɔ mɨ zə wi aŋgɔb ənɨ wɨə ghɨ̀ ənû rɨbɔ̀ŋ ze nɨ chəi zɨə bɨrɨ ghɨ ni wɨ kwɨ, wɨ̀ kɔŋgɨ ə Ŋwìə̀ ni wɨ̀ naʼ ɨ̀tènɨ̀ ɨ bɔ. Mə wɨə ghà yeʼ mbe nɨə ghɨ̀ ɨnû rɨbɔ̀ŋ mbe nɨ chəi mbɨ bɨrɨ ghɨ ni wɨ̀ kwɨ. Ənû rɨbɔ̀ŋ ə mɔʼɔ ə zɨ əŋgu nɨə ghɨ̀ ni bə̂d kwɨ. Chəi mə̀ ghà ni wɨ̀ kɔŋgɨ ə Ŋwiə̀ ɨgwɨ ə bə̂d mbe nɨə ghɨ̀ ɨkwɨ ənû rɨbɔ̀ŋ we.

¹⁷Ɨgu ənû jìm yɨ ɨnû rɨbɔ̀ŋ, àyɨə ɨnû rɨbɔ̀ŋ mɔʼɔ mbɨ əŋgu nɨ chəi mbɨə ghɨ̀ ni wə̀d kwɨ.

¹⁸Tɨ̀ ə kyerɨ ni chəi wə̀d Ŋwìə̀ mɔʼɔ əŋgu nɨə wò ɨmbì kɨrɨ ghɨ̀ ɨnû rɨbɔ̀ŋ. Wan Ŋwìə̀ wɨə nəŋgɨ əməd, əne chəi ənɨ tɨ Satàn wɨrɨ ghɨ ənû ə mɔʼɔ ənɨ məd.

¹⁹Tɨ̀ ə kyerɨ ni tɨ yɨə bə̂d Ŋwiə̀. Tɨ̀ bə̀ kyerɨ ni ɨsɨg jìm wɨ əton ə Satàn.

²⁰Tɨ̀ bə̀ kyerɨ ni Wan Ŋwìə̀ fə yeʼe. Wɨ̀ fə ghɨ̀ ni tɨ̀ kyerɨ ɨnû, ɨmbə̀ʼ tɨ̀ kyerɨ Ŋwìə̀ we nɨ yeʼ wɨ rəsìʼ. Tɨ̀ wɨ ənɨ ɨfɔtɨ mbɨ Ŋwìə̀ we nɨ yeʼ wɨ rəsìʼ. Tɨ̀ wɨə bə̀ ənɨ ɨfɔtɨ mbɨ Wan məd Yeso Kristo. Məd yɨə Ŋwìə̀ rəsìʼ we nɨə ghɨ̀ ni bə̂d jɨg ɨ̀tènɨ̀ rɨ mì.

²¹Mbɨ bɔn nɨ mə̀ ghaʼi kwàʼ rɨŋgəʼ, tɨ mbə̀ berɨ ə ənû ə mɔʼɔ nɨ ghɨ̀ mbɨ mbɨ̀anèŋ.