Read Fɨso Fi 2 Jɔ̌n 1 Bible Online

2 Jɔ̌n 1 - Fɨso Fi bible

2 Jɔ̌n 1

¹À yɨə mɔ̌, nɨ mə̀ yeʼ wə̀d we nɨə chà ɨfetɨ bə̂d Kristo, ŋwaʼnɨ ə̀ŋwàʼnɨ̀ zɔ̂. Mə wɨə ŋwàʼnɨ̀ ɨ ne, àwɔ̀ Əyi kyeŋ we nɨ Ŋwìə̀ nyaʼa chɔʼɔ fɔrɨ əmbɨ mbe bɔn. Mə kàŋ ghaʼ əwən ənɨ rəsìʼ. Kaʼ àmei mɔ̌ ghaʼ əwən, bə̂d mɨjìm mbe nɨ kyerɨ rəsìʼ we nɨ tɨə ghàə̀ bə̀ ghaʼ əwən.

²Mə ghaʼ əwən ɨmbə̀ʼ ɨghəm nɨ tɨ̀ kyerɨ rəsìʼ, əne rəsìʼ we bɨrɨ ten i ɨŋga na koŋ.

³Ŋwìə̀ Mbǎʼ mbɨ Yeso Kristo, Wan Mbǎʼ, ghɨ ɨ̀chɔ̀m ənɨ ə nən, dììrɨ̀ əwən bə̀ nàʼ əbɔrəbɔd ɨ nən. Ɨnû mbɔ̂ bɨrɨ yeʼ mba ɨchî nɨ tɨ̀ kyerɨ rəsìʼ fɔrɨ ɨmbə̀ʼ ɨchî nɨ tɨ̀ ghaʼ əwa mbǎ mbǎ.

⁴Mə nyaʼa kàŋ ghaʼ əku nɨ zə ni mbe bɔn mɔʼɔ mbɨə beenɨ əbɔʼ rəsìʼ àmei ɨchî nɨ Mbǎʼ nyaʼa gha ɨ na.

⁵Tɨ̀nîn mə wɨə buʼ ɨbɔ ɨ ne, kyɨ àwɔ̀ Əyi Kyeŋ, ni kaʼ ɨkə wɔ̂ nɨ mɨə ŋwàʼnɨ̀ ɨ ne yɨ i ɨkə fi. À yɨ ɨkə nɨ tɨ̀ nyaʼa fə kyerɨ tɨ ənɨ tɨ̀ nyaʼa ben ə Kristo. Ɨkə rəŋgu yɨ ni tɨ̀ ghaʼ əwa mbǎ mbǎ.

⁶Ɨghaʼi wɔ̂ nɨ mɨə ghà ɨmbə̀ʼ wɨwən yɨ ni tɨ̀ nuŋ tɨkə rɨ Ŋwìə̀. Ɨkə wɔ̂, ɨchî nɨ mbə̀ nyaʼa zu rɨ ənɨ mbə̀ nyaʼa ben ə Kristo yɨ ni mbə̀ ghaʼ mbə bɔŋgɔb.

⁷Mətambɨ-bə̂d mɨ̀nɔnɔʼ fə jàŋ ɨŋga ɨsɨg. Chəi mbɨ ben ni Yeso Kristo nyaʼa yeʼe ɨŋga ɨsɨg ɨŋga nyamnyod wə̀d mɨ̀sɔŋɨchù. Ɨkwɨ wə̀d ɨghabɨ wɔ̂ yɨ ətambɨ-bə̂d fɔrɨ wə̀d pə̀n Kristo.

⁸Mbə̀ we əwən ɨmbə̀ʼ tɨ mbə̀ nim ə əghɨ ze nɨ mbə̀ fə faʼ ɨmbə̀ʼ əzɨ əwən, àyɨə mbə̀ wo ɨmbì fàʼ ɨmbə̀ʼ mbə̀ berɨ ɨchɔʼ ə̀fàʼì ɨ swi.

⁹Wə̀d we nɨ chəi wɨə ghɨ̀ ɨnû mbe nɨ Yeso nyaʼə chwi ɨ na, àyɨə ɨ wɨə wo ɨmbì ghɨ̀ə̀ yeʼ ɨnû mbe nɨ che mbe nɨ wɨ̀ chwiə, chəi məd ənɨ ənû ə mɔʼ mbɨ ə Ŋwiə̀. We nɨə ghɨ̀ ɨnû mbe nɨ Kristo nyaʼə chwiə wɨ ənɨ ənû ə mɔʼ mbɨ Mbǎʼ fɔrɨ mbɨ ə Wan.

¹⁰Wə̀d mɔʼɔ mɨ yeʼe əsɨ nən nɨ chəi wɨə chwi ɨkə wɔ̂, tɨ mbə̀ nɨŋ ə məd əkwɨ nən kɨ̀ bè chàʼrɨ̀ əməd.

¹¹Wə̀d mɔʼɔ we nɨ chaʼrɨ əməd wɨə fɔtɨə mbɨ məd ənɨ ɨnû ɨzɨg mbe nɨ wɨə ghɨ̀ə̀.

¹²Mə berɨ ɨnû nɔnɔʼ nɨ gha ɨ nən, àyɨə chəi mə bɨrɨ ŋwàʼnɨ̀ ɨŋga ə̀ŋwàʼnɨ̀. Mə kɔndɨ yeʼ ni mə bɨrɨ yeʼe zə əwən bə̀ ghàmbɨ̀ mbɨ nən mɔ̌ mɔ̌, ɨmbə̀ʼ ɨghaʼi swi ɨŋga ta fîŋ.

¹³Bɔn e njàbɨ ze nɨ Ŋwìə̀ chɔʼɔ wɨə chàʼrɨ̀ əwe.