Read Fɨso Fi 3 Jɔ̌n 1 Bible Online

3 Jɔ̌n 1 - Fɨso Fi bible

3 Jɔ̌n 1

¹À yɨə mɔ̌, nɨ mə̀ yeʼ wə̀d nɨə cha ɨfetɨ bə̂d Kristo, ŋwaʼnɨ ə̀ŋwàʼnɨ̀ zɔ̂. Mə wɨə ŋwàʼnɨ̀ ɨ ne, àwɔ̀ Gayùs nɨ mə̀ ghaʼi kwàʼ rɨŋgəʼ. Mə kaŋ ghaʼ əwe ənɨ rəsìʼ.

²Wum aŋgɔb nɨ mə̀ ghaʼi kwàʼ rɨŋgəʼ, mə wɨə kɔ̀ŋgɨ̀ ə Ŋwiə̀ ni ɨnû jìm yen mbɨ ne kwàʼ ɨchî chɔ̀m. Mə wɨə bə̀ kɔ̀ŋgɨ̀ə̀ ni e ɨnyod kaanə ɨchî nɨ e fîŋ bə̀ kàànɨ̀.

³Mə nyaʼa kàŋ ghaʼ əku ənɨ bɔŋgɔb mɔʼɔ nyaʼa yeʼe pè ghà ɨ num ɨmbə̀ʼ ɨchî nɨ àwɔ̀ ə beenɨ əbɔʼ rəsìʼ. Mə kyerɨ ni àwɔ̀ wɨə kàŋə̀ beenɨ əbɔʼ rəsìʼ we ɨghəm jìm.

⁴Chəi ɨghaʼi cherə ɨŋga mɨ fîŋ nɨ che rɨ ənɨ ɨchî nɨ mə̀ zu ni mbɨ bɔn mbɨə beenɨ əbɔʼ rəsìʼ.

⁵Wum aŋgɔb nɨ mə̀ ghaʼi kwàʼ rɨŋgəʼ, à wɨə kàŋə̀ fàʼ ənɨ e fîŋ jìm ənɨ àwɔ̀ ə ghɨ̀ ɨnû əmbɨ ə bə̂d Kristo, màànɨ̀ əmbɨ mbe nɨ yeʼ bə̂d rɨ̀sɔ̀ʼɔ̀.

⁶Mbɨ fə ghà əmbɨ ɨfetɨ wɨ rɨ əgha ɨmbə̀ʼ ɨchî nɨ àwɔ̀ ə ghaʼə bə̂d. À bɨrɨ fə kàŋ ghɨ̀ ənû ə chɔ̀m əwù ze nɨ à naʼ ɨghɨ mbe nɨ mbɨ kəbɨ ənɨ mbɨə sɨə wɨrɨə wò ə. Əze ə bɨrɨ kaŋ bɔ̀ŋ əmbɨ ə Ŋwìə̀,

⁷ɨmbə̀ʼ ɨghəm nɨ mbɨ fə jwɨ̀ ɨ wo fàʼ əmbɨ Kristo nɨ chəi mbɨ ben nɨ nɨŋ əghɨ ə mɔʼɔ rɨ əmbɨ ə bə̂d mbe nɨ chəi mbɨ kɨrɨ ben ə Kristo.

⁸Əne tɨ̀ berɨ kəŋgɨ bə̂d ɨghabɨ mbɔ̂, ɨmbə̀ʼ tɨ̀ faʼ ɨnɔ̂n mbɨ mɨ̀mə̌d ɨchî nɨ tɨə ghà rəsìʼ ɨmbə̀ʼ Kristo.

⁹Mə fə ŋwàʼnɨ̀ ənû ə mɔʼɔ əmbɨ ɨfetɨ bə̂d Kristo. Àyɨə chəi Dìotrefès, nɨə kɨə ghaʼ ənû nɨ che ɨmbì ənɨ ɨnû jìm, ben ni mə berɨ ɨka nɨ gha ənû ə mɔʼɔ.

¹⁰Ənɨ mə̀ yeʼe, mə bɨrɨ ghɨ mbə̀ kyerɨ ɨnû jìm mbe nɨ wɨ̀ fə ghɨ̌, əne yɨ ɨnû rɨbɔ̀ŋ mbe nɨ wɨə ghà ɨmbə̀ʼ əwa. Ɨghabɨ ni chəi əze ə kɨrɨ kuʼ, chəi məd ə nɨŋə bɔŋgɔb əkwɨ ni əwù ze nɨ mbɨ yeʼe. Ɨ wɨə bə̀ təmnɨə bə̂d mbe nɨə kəb nɨŋ bɔŋgɔb mbɔ̂ əkwɨ nən. Mbɨ mɨ tɔ nɨŋ, wɨ̀ chɨ̀ mɨ̀mə̌d rɨŋga ɨfetɨ bə̂d Kristo.

¹¹Wum aŋgɔb nɨ mə̀ ghaʼi kwàʼ rɨŋgəʼ, tɨrə̀ mɨ̀g e ənû rɨbɔ̀ŋ. Mɨg yeʼ ənû ə chɔ̀m. Wə̀d we nɨə ghɨ̀ ɨ̀chɔ̀m yɨə wə̀d Ŋwiə̀. Chəi wə̀d we nɨə ghɨ̀ ɨnû rɨbɔ̀ŋ kweʼ zə ə Ŋwiə̀.

¹²Wə̀d jìm wɨə ghà ɨnû chɔ̀m ɨmbə̀ʼ ə Dèmetriùs. Məd wɨə chub àmei ɨchî nɨ rəsìʼ we nɨ yeʼ ɨŋga Ə̀ŋwàʼnɨ̀ ə Ŋwiə̀ kəbɨ. Mba bə tɨ̀ bə̀ ben ni məd wɨə chub ɨchî nɨ rəsìʼ chwiə. Əne mbə̀ kyerɨ ni ənû ze nɨ tɨ̀ gha yɨ ənû rəsìʼ.

¹³Mə berɨ ɨnû nɔnɔʼ nɨ gha ɨ nən, àyɨə chəi mə kəb nɨ ŋwaʼnɨ ɨŋga ə̀ŋwàʼnɨ̀.

¹⁴Mə kɔndɨ ni mə bɨrɨ zambɨ yeʼe zə əwe. Ənɨ mə̀ yeʼe, tɨ̀ bɨrɨ ghambɨ ɨnɔ̂n.

¹⁵Ŋwìə̀ naʼ əbɔrəbɔd ɨ ne. Mbe mɨ̀sə̀ʼ mbe nɨ yeʼ əgha mbɨ chàʼrɨ̀ əwe. Bə chaʼrɨ mba mɨ̀sə̀ʼ ɨ mɔʼ mɔʼ.