Read Fɨso Fi Ɨnû əwu rənjìm 14 Bible Online

Ɨnû əwu rənjìm 14 - Fɨso Fi bible

Ɨnû əwu rənjìm 14

¹Mə nyaʼa nəŋ, əne zə Wan njɨ̀g nɨ nyaʼa təm ɨkaŋ ɨwum Zayɔ̀n. Ɨ wɨə nyaʼə mbɨ ə bə̂d chuʼ ɨkɨ fibɨ̀ mbɨ ɨwum kwè chɔ̀b rɨ̀kwè. Mbɨ nyaʼa ŋwaʼnɨ ɨkum Wan njɨ̀g bə̀ ŋwàʼnɨ̀ ɨkum Mbǎʼ məd ənɨ ɨkəŋ ɨsɨ mɨ̀mə̌d.

²Mə nyaʼa zu gɨ̂ nɨ gham rɨkaŋ ɨchî nɨ mɨgyɨ̂ nɔnɔʼ ə jùʼə̀ bə̀ fɔrɨ ɨchî nɨ mbə̀ŋ ə kùmə̀ kwàʼ rɨ̀kǎ. Gɨ̂ ze nyaʼa ghàm ɨchî nɨ mə̀buʼ mɨ̀noŋ ə buʼə mbə mɨ̀noŋ ŋgyi.

³Bə̂d mbe chuʼ ɨkɨ fibɨ̀ mbɨ ɨwum kwè chɔ̀b rɨ̀kwè nyaʼa təm ɨfě ətən ɨfɔ̀n, ɨfě ɨghɨ ɨkwè mbe nɨ yeʼ ɨkǎ fɔrɨ ɨfě bə̂d kyeŋ mbe nyaʼə kwerɨ ɨkyî fi. Chəi wə̀d mɔʼɔ nɨ tɨ̀ wɨ̀ nyaʼa kwembɨ ɨkyî we chè rɨ ənɨ ə bə̂d mbe chuʼ ɨkɨ fibɨ̀ mbɨ ɨwum kwè chɔ̀b rɨ̀kwè nɨ Ŋwìə̀ nyaʼa choʼ mɨ̀mə̌d rɨ ɨgwɨ ə si.

⁴Bə̂d mbɔ̂ yɨə mbe nɨ chəi mbɨ fiinɨ ə ɨnyod mbɨ məyi, ɨmbə̀ʼ ɨghəm nɨ chəi mbɨ nyaʼa kɨrɨ ni məyi. À yɨə bə̂d mbɔ̂ ə beenɨ əbɔʼ Wan njɨ̀g ɨsɨ jìm mbe nɨ wɨə wòə̀. Mbɨ fə choʼ mɨ̀mə̌d rəkaʼ ə̀bùʼ ə bə̂d mbe rɨ ɨgwɨ ɨsɨg əne nàʼ əmbɨ ə Ŋwiə̀ fɔrɨ əmbɨ ə Wan njɨ̀g ɨghabɨ ɨghɨ rɨtu nɨ mbɨ kwəŋɨ.

⁵Chəi mɨghab kweʼ jwɨ̀ rɨŋga ɨchû mɨ̀mə̌d. Chəi bəi ɨgu ənû ɨgwɨ mɨ̀mə̌d.

⁶Mə nyaʼa zə aŋgɨrə̀ cherə nɨə fìd əton ɨkaŋ. Aŋgɨrə̀ we nyaʼa berɨ ɨkə̂n chɔ̀m we nɨ ten i koŋ nɨ gha əmbɨ ə bə̂d mbe nɨ yeʼ ɨgwɨ ə si, nɨ gha əmbɨ bə̂d ɨŋga ɨbeŋ jìm, nɨ gha əmbɨ bə̂d ɨŋga mɨnəbɨ jìm, nɨ gha əmbɨ ə bə̂d nɨə ghàmə̀ mɨŋgam jìm bə̀ fɔrɨ nɨ gha əmbɨ ə bə̂d mɨ̀jìm ɨsɨ jìm.

⁷Wɨ̀ nyaʼa ghà ənɨ ə gɨ̂ kǎ kǎ ni, “Mbə̀ bɔ ə Ŋwiə̀ bə̀ nàʼ ɨwumnɨ ɨ bɔ, ɨmbə̀ʼ ɨghəm nɨ nyùmə̀ we nɨ məd bɨrɨ saʼ bə̂d fə kùʼ. Mbə̀ wumnɨ əməd we nɨ nyaʼa tekɨ ɨkaŋ, tekɨ si, tekɨ rɨ̀bàà bə̀ tekɨ mɨ̀jwɨ̀-əmboŋ!”

⁸Aŋgɨrə̀ nɨ pe ənɨ mbɨ mɨbe nyaʼa beenɨ əbɔʼ wɨ rɨtu we. Ɨ wɨə nyaʼə ghàə̀ ni, “Babilɔ̀n kyeŋ ə fə buʼ ə! Wɨ̀ fə buʼ ə! Wɨ̀ nyaʼa ghɨ̀ ɨbeŋ jìm nɔ mɨnoʼ kǎ kǎ [5] tɨ ənɨ ɨchî nɨ wɨ̀ nyaʼə ghɨ̀ ɨfabrɨ ɨnû.”

⁹Aŋgɨrə̀ cherə nɨ pe ənɨ mbɨ mɨtad wɨə nyaʼə beenɨ əbɔʼ mɨ̀mə̌d. Ɨ wɨə nyaʼə ghàə̀ ənɨ ə gɨ̂ kǎ kǎ ni, “Wə̀d mɔʼɔ mɨ wumnɨ nyam kyeŋ ze bə̀ wumnɨ anèŋ məd, mbɨ mɨ fə bə̀ zɨ̀ ənweenɨ ənɨ əkəŋ ɨsɨ əməd kɨ̀ ɨgun əbɔ əməd,

¹⁰Ŋwìə̀ bɨrɨ sə ɨtəm əbɔʼ məd əne chə əməd. Əne yɨ ɨghabɨ ni wɨ̀ fə zɨ̀ mɨnoʼ ɨŋga toʼ məd nɨ chəi wɨ̀ nyamɨ, əne ghɨ̀ ni wɨ̀ nɔ. Ŋwìə̀ bɨrɨ chə wə̀d wɔ̂ ɨŋga ɨwid, ɨŋga sɔlfò ɨfě mbɨ̀aŋgɨrə̀ zeŋɨ fɔrɨ ɨfě Wan njɨ̀g.

¹¹Ndiʼ tɨ ənɨ ɨwid we nɨ Ŋwìə̀ ə chəə mɨ̀mə̌d bɨrɨ mɨə kɔʼə ɨkaŋ koŋ koŋ. Chəi ə̀zwììrɨ̀ əziə kɨ̀ ɨzimɨ əmbɨ ə bə̂d mbe nɨə wumnɨ ə nyam kyeŋ ze kɨ̀ anèŋ məd. Chəi ə̀zwììrɨ̀ əmbɨ wə̀d we nɨ mbɨ zɨ ənweenɨ ze nɨ yeʼ ɨkum məd ɨgwɨ məd.”

¹²Əne yɨ ni bə̂d Ŋwiə̀ berɨ nyìʼ, mbɨ berɨ nùŋ tɨkə rɨ Ŋwiə̀ bə̀ nùŋ fîŋ ɨgun ə Yeso.

¹³Ŋwìə̀ zɨ əbɔrəbɔd ɨgun ə bə̂d mbe nɨ kwɨ ənɨ mbɨ yeʼ ənɨ ɨfɔtɨ mbɨ Ə̀nùŋɨ̀sɨg! Əzwî ə ghà ni, “Ee, à yɨə kàŋ əne. Mbɨ bɨrɨ zwiirɨ tɨ ənɨ ɨ̀fàʼì mbe nɨ mbɨə fàʼə̀, ɨmbə̀ʼ ɨghəm nɨ ɨnû mbe nɨ mbɨ fə ghɨ̌ bɨrɨ beenɨ əbɔʼ mɨ̀mə̌d!”

¹⁴Mə nyaʼa nèŋ, əne zə pàʼ rɨ̀fɨ. Wə̀d mɔʼɔ nɨ nyaʼa ɨghabɨ ə Wan Wə̀d nyaʼa chub ɨgun ə pàʼ ze. Wɨ̀ nyaʼa zɨ̀ ɨdəm ɨfɔ̀n nɨ mbɨ nyaʼa tekɨ ənɨ ə gôl. Wɨ̀ nyaʼa bə̀ yim ɨbi tɔtɔ nɨ mbɨə kwə̀ŋ ɨghɨ əngu.

¹⁵Aŋgɨrə̀ cherə nyaʼa jwɨ̀ rɨŋga mbàn Ŋwìə̀ pè kyeŋ ənɨ ə gɨ̂ kǎ kǎ əmbɨ ə wə̀d we nɨ chub ɨgun ə pàʼ ze, ghà ni, “Kwəŋ ɨghɨ rɨ ɨgwɨ ə si mbɨ ɨbi we nɨ à yimɨ, ɨmbə̀ʼ ɨghəm nɨ nyùmə̀ nɨ kwəŋ ɨghɨ fə kùʼ i. Ɨghɨ mbe nɨ mbɨ berɨ nɨ kwəŋ ɨgwɨ ə si fə tə̀nə̀.”

¹⁶Əne wə̀d we nɨ nyaʼa chub ɨgun ə pàʼ ze nyaʼa ŋwì fi ɨbi ɨgun ə si əne kwə̀ŋ ɨghɨ rɨ ɨgwɨ ə si.

¹⁷Aŋgɨrə̀ cherə nyaʼa jwɨ̀ rɨŋga mbàn Ŋwìə̀ ze nɨ yeʼ ɨkaŋ. Wɨ̀ nyaʼa bə̀ berɨ ɨbi tɔtɔ nɨ kwəŋ ɨghɨ əŋgu.

¹⁸Aŋgɨrə̀ cherə, nɨ nyaʼa berɨ ɨka ɨgwɨ ɨwid, nyaʼa jwɨ̀ rɨ ɨban ɨkwi ɨjə̀ŋ ə̀fààrɨ̀ pè kyeŋ ənɨ ə gɨ̂ kǎ kǎ əmbɨ we nɨ berɨ ɨbi tɔtɔ we ni, “Nɨŋ fe ɨbi tɔtɔ nɨ kwəŋ ɨghɨ əŋgu sopɨ ɨza vaìn tɨ ənɨ ɨzed vaìn mbe rɨ ɨgwɨ ə si, ɨmbə̀ʼ ɨghəm nɨ rɨtam vaìn te rɨ ɨgwɨ ə si fə tə̀nə̀.”

¹⁹Əne aŋgɨrə̀ we nyaʼa ŋwì fɨ ɨbi sob ɨza rɨ ənɨ ɨzed vaìn mbe rɨ ɨgwɨ ə si. Wɨ̀ nyaʼa fetɨ rɨtam te màʼ ɨŋga ɨbɨgɨ kyeŋ nɨ mbɨə mìnə̀ mɨnoʼ ɨŋga. Əzɔ̂ ə chwi ɨchî nɨ Ŋwìə̀ ə sə ɨtəm.

²⁰Mbɨ nyaʼa mìn rɨtam vaìn te ɨŋga əsɨ ze nɨ mbɨə mìnə̀ mɨ̀noʼ əsaŋ əsɨ ze. Ənəm ə nyaʼa koŋ rɨ əsɨ ze yèn ɨghabɨ mɨ̀kilometà əkɨ ətad, bə̀ sà ɨŋga ɨghabɨ ə metà mɔʼ mbɨ əkwirɨ.