Read Fɨso Fi Ɨnû əwu rənjìm 15 Bible Online

Ɨnû əwu rənjìm 15 - Fɨso Fi bible

Ɨnû əwu rənjìm 15

¹Mə nyaʼa zə ənweenɨ-ənû ə cherə ɨkaŋ. Ənweeenɨ-ənû ze ə nyaʼa chè əbɔ. Mbɨ̀aŋgɨrə̀ sambe mbɨə nyaʼə əŋgu. Mbɨ nyaʼa yim ŋgəʼ rɨ kǎ kǎ sambe, nɨ yeʼ te nɨ sɨ nwìə̀. Ŋgəʼ te mɨ fə mì i, ka Ŋwìə̀ bɨrɨ wɨrɨ sə i ɨtəm.

²Mə nyaʼa zə əghɨ ə mɔʼɔ nɨ nyaʼa ɨghabɨ ə rɨ̀bàà mɨ̀manèm nɨ mbɨ nyamɨ mbɨ ɨwid. Mə nyaʼa bə̀ zə bə̂d mbe nɨ nyaʼa baŋ nyam kyeŋ rɨtu ze, baŋ anèŋ məd bə̀ baŋ ə nombà we nɨ təm ənɨ ɨkum məd. Mbɨ nyaʼa təm ɨban rɨ̀bàà mɨ̀manèm we mbɨ mɨnoŋɨ ŋgyi nɨ Ŋwìə̀ nyaʼa naʼ əmbɨ mɨ̀mə̌d.

³Ɨ mbɨə nyaʼə kwerɨ ɨkyî we nɨ wə̀d ə̀fàʼì Ŋwìə̀ Mose nyaʼa kwerɨ. Ɨ mbɨə nyaʼə bə̀ kwerɨ we nɨ Wan njɨ̀g nyaʼa bə kwerɨ. Ɨkyî we yɨ ni, “Ə̀nùŋɨ̀sɨg Ŋwìə̀kɔʼ! Ɨnû mbe nɨ àwɔ̀ ghɨ̀ə̀ mbɨ chè əbɔ. Mbe mɨchî ə kàŋ kùʼ. À yɨə bə̀ mɨchî rəsìʼ. Àwɔ̀ yɨ ɨfɔ̀n ɨgwɨ ɨbeŋ jìm!

⁴Ə̀nùŋɨ̀sɨg, à kɨə we nɨ chəi wɨ̀ bɨrɨ bɔ əwe ə? À kɨə we nɨ chəi wɨ̀ bɨrɨ yiirɨ e ɨkum ə? Àmei àwɔ̀ rə̀zìʼ we nɨ zeŋɨ màànɨ̀. Bə̂d rɨŋga ɨbeŋ jìm bɨrɨ yeʼe wumnɨ əwe, ɨmbə̀ʼ ɨghəm nɨ wə̀d jìm fə zə ɨchî nɨ àwɔ̀ ə ghɨ̀ ɨnû nɨ kuʼnɨ.”

⁵Ənɨ ənû zɔ̂ ə nyaʼa chě, mə nyaʼa zə mbàn Ŋwìə̀ ze nɨ yeʼ ɨkaŋ əfìʼə. Mə nyaʼa bə̀ zə ɨŋwenɨ we nɨ chwiə ni Ŋwìə̀ wɨ mbɨ mbi bə̂d.

⁶Mbɨ̀aŋgɨrə̀ mbe sambe nɨ nyaʼa yim ŋgəʼ rɨ kǎ kǎ te sambe nyaʼa jwɨ̀ rɨŋga mbàn ze. Wɨ mɔʼ mɔʼ rəbɔʼ mɨ̀mə̌d nyaʼa zɨ̀ ngywɨ̌ əka ɨnun nɨ nyaʼə zeŋə bə̀ teenɨə. Mbɨ nyaʼa bə̀ neb ɨwâm nɨ mbɨ nyaʼa tekɨ ənɨ ə gôl.

⁷Əghɨ ə mɔʼ rəbɔʼ ɨghɨ ɨkwè mbe nɨ yeʼ ɨkǎ nyaʼa nàʼ ɨŋgupɨ ɨkaŋ sambe nɨ mbɨ nyaʼa tekɨ ənɨ ə gôl əmbɨ mbɨ̀aŋgɨrə̀ mbe sambe. Ɨsə ɨtəm Ŋwìə̀ we nɨ tən i koŋ koŋ nyaʼa swi ɨŋga ŋgupɨ ɨkaŋ mbe.

⁸Ndiʼ nɨ nɔʼ rɨ ənɨ ɨzeŋɨ zeŋɨ Ŋwiə̀ bə̀ fɔrɨ rɨ ənɨ ɨka məd nyaʼa swi mbàn ze. Chəi wə̀d nɨ tɨ̀ wɨ̀ nyaʼa nyɨ ɨŋga mbàn ze pè ənɨ ŋgəʼ rɨ kǎ kǎ te sambe nɨ mbɨ̀aŋgɨrə̀ mbe sambe nyaʼa yimɨ nyaʼa fə mì i.