Read Fɨso Fi Ɨnû əwu rənjìm 16 Bible Online

Ɨnû əwu rənjìm 16 - Fɨso Fi bible

Ɨnû əwu rənjìm 16

¹Mə nyaʼa zu gɨ̂ kǎ kǎ nɨ nyaʼə yeʼə rɨŋga mbàn Ŋwìə̀. Gɨ̂ ze zɨə nyaʼə ghà əmbɨ mbɨ̀aŋgɨrə̀ mbe sambe ni, “Mbə̀ nɨŋ ɨŋgupɨ ɨkaŋ mbe sambe nɨ ɨsə ɨtəm Ŋwiə̀ yeʼ ɨŋga wò sab ɨgwɨ ə si.”

²Aŋgɨrə̀ rɨtu nyaʼa wò sab ɨsə ɨtəm Ŋwiə̀ we nɨ nyaʼa ɨŋga əŋgupɨ əkaŋ əməd ɨgwɨ ə si. Ənɨ wɨ̀ nyaʼa sab əne, mɨchɔʼɔ nɨ nyaʼa bə kwàʼ rɨŋgəʼ bə̀ seə kwàʼ rɨŋgəʼ nyaʼa jwɨ̀ ɨgun ə bə̂d mbe nɨ mbɨ nyaʼa zɨ ənweenɨ ə nyam kyeŋ ze ɨgun mɨ̀mə̌d, mbɨ bə̀ wumnɨ anèŋ məd.

³Aŋgɨrə̀ we nɨ pe ənɨ mbɨ mɨbe nyaʼa sab ɨsə ɨtəm Ŋwiə̀ we nɨ nyaʼa ɨŋga əŋgupɨ əkaŋ əməd ɨŋga rɨ̀bàà. Ənɨ wɨ̀ nyaʼa sab əne, rɨ̀bàà we nyaʼa bèŋ sɨ ɨghabɨ ənəm əvɨ ə wə̀d. Ɨghɨjìm mbe nɨ nyaʼa ɨkǎ ɨŋga rɨ̀bàà nyaʼa kwɨ.

⁴Aŋgɨrə̀ we nɨ pe ənɨ mbɨ mɨtad nyaʼa sab ɨsə ɨtəm Ŋwiə̀ we nɨ nyaʼa ɨŋga əŋgupɨ əkaŋ əməd ɨŋga mɨgyɨ̂ kyeŋ fɔrɨ ɨŋga mɨ̀jwɨ̀-əmboŋ. Ənɨ wɨ̀ nyaʼa sab əne, mɨgyɨ̂ kyeŋ mbe mbɨ mɨ̀jwɨ̀-əmboŋ mbe nyaʼa bèŋ ənɨ ənəm.

⁵Mə nyaʼa zu aŋgɨrə̀ we nɨ nyaʼa berɨ ɨka ɨgwɨ mɨnib ghà ni, “Àwɔ̀ Wə̀d Zeŋɨ, àwɔ̀ we nɨ yeʼ tɨ̀nîn, nɨ nyaʼa bei əŋgu, ɨchî nɨ àwɔ̀ ə saʼə bə̂d ə kàŋ kùʼ.

⁶Bə̂d rɨbɔ̀ŋ nyaʼa chəmnɨ ənəm mbe bə̂d mbɨ əzɨ mbe bə̂d ɨ̀kə̀n. Əne à fə nàʼ ənəm əmbɨ mɨ̀mə̌d ni mbɨ nɔ. À yɨ əghɨ nɨ mbɨ kəbɨ!”

⁷Mə nyaʼa zu gɨ̂ nɨ nyaʼə kyeŋə rɨ ənɨ ɨkwi ɨjə̀ŋ ə̀fààrɨ̀. Zɨ̀ nyaʼə kyeŋə ghàə̀ ni, “Ee, Ə̀nùŋɨ̀sɨg Ŋwìə̀kɔʼ, ɨchî nɨ àwɔ̀ ə saʼə bə̂d ə kàŋ kùʼ. À yɨə bə̀ ɨchî rəsìʼ!”

⁸Aŋgɨrə̀ we nɨ pe ənɨ mbɨ mɨkwè nyaʼa sab ɨsə ɨtəm we nɨ nyaʼa ɨŋga əŋgupɨ əkaŋ əməd ɨgwɨ ə nyùmə̀. Ənɨ wɨ̀ nyaʼa sab əne, Ŋwìə̀ nyaʼa sàŋ ni nyùmə̀ we tɔn bə̂d ənɨ əzuʼ əka ka.

⁹Əzuʼ ə ka ka ze ə nyaʼa tɔ̀n bə̂d mbe, əne mbɨ nyaʼa zɔ̀m ɨkum Ŋwìə̀ we nɨ berɨ ɨka ɨgwɨ ə ŋgəʼ rɨ kǎ kǎ te, àyɨə chəi mbɨ nyaʼa beŋ tə fîŋ wumnɨ əməd.

¹⁰Aŋgɨrə̀ we nɨ pe ənɨ mbɨ mɨtân nyaʼa sab ɨsə ɨtəm we nɨ nyaʼa ɨŋga əŋgupɨ əkaŋ əməd ɨgun ətən ɨfɔ̀n ə nyam kyeŋ ze. Ənɨ wɨ̀ nyaʼa sab əne, ɨsɨ nyaʼa fin ɨŋga əsɨ ze nɨ nyam kyeŋ ze nyaʼə tùmbɨ̀ə̀. Bə̂d mbɨə nyaʼə kud ə əsɔŋ ɨmbə̀ʼ ɨchî nɨ mbɨ nyaʼə zəə ŋgəʼ.

¹¹Əne mbɨ nyaʼa zɔ̀m ə Ŋwiə̀ we nɨ yeʼ ɨkaŋ ɨmbə̀ʼ ɨchî nɨ mbɨ nyaʼə zəə ŋgəʼ bə̀ fɔrɨ ɨmbə̀ʼ mɨchɔʼɔ mbe nɨ nyaʼa ɨgun mɨ̀mə̌d. Àyɨə chəi mbɨ nyaʼa beŋ tə fîŋ tɨ ənɨ ɨnû rɨbɔ̀ŋ mbe nɨ mbɨ nyaʼə ghɨ̀ə̀.

¹²Aŋgɨrə̀ we nɨ pe ənɨ mbɨ rɨ̀fuə nyaʼa sab ɨsə ɨtəm we nɨ nyaʼa ɨŋga əŋgupɨ əkaŋ əməd ɨgwɨ ɨgyɨ̂ kyeŋ we nɨ mbɨə tɔŋ ənɨ ə Yufretìs. Ənɨ wɨ̀ nyaʼa sab əne, ɨgyɨ̀ kyeŋ we nyaʼa zom. Wɨ̀ nyaʼa zom ɨmbə̀ʼ tekɨ ɨnə̂njɨ̀ əmbɨ mɨfɔ̀n mbe rɨ əbà ze nɨ nyùmə̀ ə jwɨ̀ə̀.

¹³Mə nyaʼa zə ɨzwî tad nɨ chəi mbɨ nyaʼa zeŋɨ. Ɨ mbɨə nyaʼa ɨghabɨ ɨsɔn. Ɨ mbɨə nyaʼə jwɨ̀ rɨŋga ɨchû rɨ̀sɔ̀ʼɔ̀ jɔ ze, rɨŋga ɨchû nyam kyeŋ ze bə̀ fɔrɨ rɨŋga ɨchû wə̀d ɨ̀kə̀n mɨghab we. [6]

¹⁴Ɨzwî mbɔ̂ yɨ ɨzwî rɨbɔ̀ŋ mbe nɨə ghɨ̀ ɨnû yiirɨ. Mbɨ nyaʼa jwɨ̀ wò əsɨ mɨfɔ̀n mɨjìm rɨŋga ɨsɨg, ɨmbə̀ʼ fɔtɨ mɨ̀mə̌d ni mbɨ maʼ bid əni ə kyeŋ ze nɨ Ŋwìə̀kɔʼ bɨrɨ saʼ ɨsɨg.

¹⁵Ə̀nùŋɨ̀sɨg Yeso ə ghà ni, “Mbə̀ zə, mə bɨrɨ yeʼe ɨghabɨ ɨjɨ! Ŋwìə̀ zɨ əbɔrəbɔd ɨgun ə wə̀d we nɨ chub ɨkyèʼe bə̀ tekɨ ti ngywɨ̌ nùŋ ɨmbə̀ʼ tɨ wɨ̀ yen i tɨ̀sɔ̀ʼ ɨkyerɨ, ətu əməd ə bə̀ nìd ɨmbə̀ʼ ɨchî nɨ bə̂d ə nèŋ əməd!”

¹⁶Ɨzwî mbe nyaʼa fɔtɨ mɨfɔ̂n mbe əsɨ ze nɨ mbɨə tɔŋ ənɨ ɨŋgam Hibrù ni Amagedɔ̀n.

¹⁷Aŋgɨrə̀ we nɨ pe ənɨ mbɨ sambe nyaʼa sab ɨsə ɨtəm we nɨ nyaʼa ɨŋga əŋgupɨ əkaŋ əməd ɨŋga ɨfə. Ənɨ wɨ̀ nyaʼa sab əne, gɨ̂ kǎ kǎ nyaʼa jwɨ̀ rɨ ənɨ ətən ɨfɔ̂n ze nɨ nyaʼa ɨŋga mbàn Ŋwìə̀. Zɨ̀ nyaʼə ghàə̀ ni, “Ɨnû jìm fə mì i!”

¹⁸Ɨbi mbə̀ŋ wɨə nyaʼə ŋwàŋə̀, gɨ̂ rɨ ghàmə̀, mbə̀ŋ kùmə̀, si wùd kwàʼ rɨkǎ ɨchî nɨ chəi zɨ̀ kweʼ wùd ənɨ bə̂d nyaʼa kɔ chub ɨgwɨ ə si. Si nyaʼa wùd chè ɨchî ni zɨ̀ nyaʼa kweʼ bè wùd.

¹⁹Əsɨ ə kyeŋ ze ə nyaʼa sandɨ ɨba tad. Ɨsɨ kyeŋ jìm rɨŋga ɨsɨg nyaʼa buʼ ə. Ŋwìə̀ nyaʼa kɔndɨ ə Babilɔ̀n kyeŋ we, əne nàʼ toʼ mɨ̀nòʼ ɨ bɔ. Mɨnôʼ mbe ə chwiə ni məd wɨə sə ɨtəm kwàʼ rɨŋgəʼ.

²⁰Ɨkəm ɨsɨ si jìm mbe nɨ mɨnib karɨ nyaʼa nim. Tɨwum rɨjìm nyaʼa bə̀ nim.

²¹Əwəŋ ə kyeŋ nɨ wɨ mɔʼ rəbɔʼ nyaʼə nìrə̀ ɨghabɨ mɨkirə̀ ɨwum tân nyaʼa nɔ̀ʼ rɨkaŋ feŋgɨ ɨgun ə bə̂d. Ənɨ əwəŋ ze ə nyaʼa feŋgɨ əne, mbɨ nyaʼa zɔ̀m ə Ŋwiə̀ ɨmbə̀ʼ ŋgəʼ ze nɨ əwəŋ ze ə nyaʼa zɨ ɨgun ə bə̂d, ɨmbə̀ʼ ɨghəm nɨ ŋgəʼ ze nyaʼa chè əbɔ.