Read Fɨso Fi Ɨnû əwu rənjìm 17 Bible Online

Ɨnû əwu rənjìm 17 - Fɨso Fi bible

Ɨnû əwu rənjìm 17

¹Aŋgɨrə̀ fibɨ̀ rəbɔʼ mbɨ̀aŋgɨrə̀ mbe sambe nɨ nyaʼa yim ɨŋgupɨ ɨkaŋ mbe sambe nyaʼa yeʼe pè ghà ɨ num ni, “Yeʼe, mə bɨrɨ chwi ɨchî nɨ mbɨ bɨrɨ chə ə̀kùnɨ̀ ə ka ze nɨ chub ɨgun mɨgyɨ̂ kyeŋ nɔnɔʼ ɨ ne.

²Mɨfɔ̂n rɨ ɨgwɨ ə si fə niirɨ əməd əbəŋ əbəŋ. Bə̂d rɨŋga ɨsɨg fə nɔ mɨnoʼ mbe nɨ wɨ̀ naʼ əmbɨ mɨ̀mə̌d be, əne mbɨ fə niirɨ əməd əbəŋ əbəŋ.”

³Əzwî ə nyaʼa nyɨ ɨŋga num, əne aŋgɨrə̀ we nyaʼa nɨŋ əmɨ tɨ̀ wò ɨŋga ɨbad rɨkwàʼi. Ənɨ mə nyaʼa pè əŋgu, mə nyaʼa zə əyi nɨ chub ɨgun ə nyam kyeŋ nɨə bàŋə̀ buù. Tɨkum nɨə baʼrɨə ə Ŋwiə̀ mbɨə nyaʼa ɨgun ɨnyod məd jìm. Zɨ̀ nyaʼa bə̀ berɨ ɨtu sambe mbɨ ə ndɔŋ wum.

⁴Əyi we nyaʼa zɨ̀ ngywɨ̌ tɨ mɨfɔ̀n. Wɨ̀ nyaʼa yèʼ i ɨnyod ənɨ ə ndəŋ te nɨ mbɨ tekɨ ənɨ ə gôl, ənɨ əti ɨka ɨnun bə̀ fɔrɨ ənɨ ə pə̂l! Wɨ̀ nyaʼa yim toʼ nɨ mbɨ tekɨ ənɨ ə gôl. Ɨnû rɨbɔ̀ŋ yiirɨ yiirɨ mbɨ rɨfiŋ tɨ ənɨ ɨchî nɨ wɨ̀ nyaʼə niirɨə mbaŋə̀ əbəŋ əbəŋ nyaʼa swi ɨŋga toʼ ze.

⁵Mbɨ nyaʼa ŋwàʼnɨ̀ ɨkum ənɨ əkəŋ ɨsɨ əməd nɨ əton ənɨ ɨkum we yeʼ ənə̀mə. Ɨkum we yɨ ni, “Babilɔ̀n kyeŋ, ɨŋgɔb ɨ̀kùnɨ̀ jìm mbɨ ɨŋgɔb ɨnû rɨbɔ̀ŋ yiirɨ mbe nɨ yeʼ ɨgwɨ ə si.”

⁶Mə nyaʼa zə ni əyi we nyaʼa fə nɔ ənəm ə bə̂d Ŋwiə̀ bə̀ nɔ ənəm ə bə̂d mbe nɨ nyaʼa ghà ɨnû ɨmbə̀ʼ ə Yeso. Wɨ̀ nyaʼa nɔ əne be. Ənɨ mə̀ nyaʼa zə əməd, mə nyaʼa yiirɨ kwàʼ rɨŋgəʼ.

⁷Aŋgɨrə̀ we nyaʼa biirɨ ɨ num ni, “À kɨə yiirɨ ɨmbə̀ʼ ə yè ə? Mə bɨrɨ gha ənû ze nɨ yeʼ ənə̀mə ɨmbə̀ʼ əyi wɔ̂ ɨ ne. Mə bɨrɨ bɨ ghà ənû ɨmbə̀ʼ nyam kyeŋ ze nɨ wɨ̀ kɔʼɔ, nɨ berɨ ɨtu sambe mbɨ ə ndɔŋ wum.

⁸Nyam kyeŋ ze nɨ à nyaʼa zə nyaʼa kweʼ yeʼ ɨkǎ, àyɨə rɨ̀nîn zɨ̀ fə kwɨ. Zɨ̀ bɨrɨ kɔʼ jwɨ̀ rɨŋga ɨbɨgɨ we nɨ chəi ɨnwǐ, sɨ wò əsɨ ze nɨ mbɨ bɨrɨ nimnɨ əməd. Bə̂d mbe rɨ ɨgwɨ ə si nɨ chəi mbɨ ŋwaʼnɨ tɨkum tɨ mɨ̀mə̌d ɨŋga ə̀ŋwàʼnɨ̀ ze nɨ bɔŋ ə Ŋwìə̀ nyaʼa sɨə tekɨ ɨsɨg, mbɨ nyaʼa fə ŋwaʼnɨ rɨkum bə̂d mbe nɨ bɨrɨ jɨg ɨ̀tènɨ̀, bɨrɨ yiirɨ. Mbɨ bɨrɨ yiirɨ ɨmbə̀ʼ ɨghəm nɨ nyam ze nyaʼa kweʼ yeʼ ɨkǎ, tɨ̀nîn zɨ̀ fə kwɨ i, àyɨə zɨ̀ bɨrɨ wɨrɨ jwɨ̀.

⁹“Ənû zɔ̂ ə kə̀b wə̀d nɨ berɨ ɨwe. Ɨtu mbe sambe yɨ rɨwum sambe nɨ əyi we chub ɨgun. Ɨtu mbe yɨə bə mɨfɔ̂n sambe.

¹⁰Mɨfɔ̂n mɨ̀tân rəbɔʼ mɨfɔ̀n mbe fə kwɨ. Wɨ̀ fibɨ̀ wɨə kɨrɨ i ɨkǎ. Chəi wɨ cherə kɨrɨ yeʼe. Ənɨ wɨ̀ yeʼe, wɨ̀ bɨrɨ chub àmei ənɨ ɨkə nyumə̀.

¹¹Nyam kyeŋ ze nɨ nyaʼa kweʼ ɨkǎ, àyɨə zɨ̀ fə kwɨ, yɨ ɨfɔ̂n we nɨ pe ənɨ mbɨ famɨ. Məd yɨ wɨ mɔʼɔ rəbɔʼ mɨfɔ̀n mbe sambe. Zɨ̀ bɨrɨ wo əsɨ ze nɨ mbɨ bɨrɨ nimnɨ əməd.

¹²“Ndɔŋ te wum nɨ à nyaʼa zə yɨ mɨfɔ̂n wum nɨ chəi mbɨ kɨrɨ naʼ ɨka əmbɨ mɨ̀mə̌d. Àyɨə mbɨ bɨrɨ naʼ ɨka nɨ tumbɨ bə̂d əmbɨ mɨ̀mə̌d bə̀ nàʼ əmbɨ ə nyam kyeŋ rɨtu ze ni mbɨ tumbɨ bə̂d ənɨ ə awà fibɨ̀.

¹³Mbɨ bɨrɨ zɨ mbə ɨtu ənɨ mbɨ mɔʼ, əne nàʼ ɨka əmbɨ mɨ̀mə̌d bə̀ nàʼ ɨka nɨ tumbɨ bə̂d əmbɨ ə nyam kyeŋ rɨtu ze.

¹⁴Mbɨ bɨrɨ maʼ bid mbɨ ə Wan njɨ̀g, àyɨə Wan njɨ̀g mbɨ ə bə̂d mbe nɨ wɨ̀ tɔŋə bə̀ chɔʼ fɔrɨ mbe nɨə nùŋə̀ fîŋ ɨgwɨ məd bɨrɨ baŋ mɨ̀mə̌d. Mbɨ bɨrɨ baŋ ɨmbə̀ʼ ɨghəm nɨ məd yɨ Ə̀nùŋɨ̀sɨg ɨgwɨ mɨ̀-ə̀nùŋɨ̀sɨg fɔrɨ Ɨfɔ̂n ɨgwɨ mɨfɔ̀n.”

¹⁵Aŋgɨrə̀ we nyaʼa bə̀ ghà ɨ num ni, “Mɨgyɨ̂ mbe nɨ à kəʼ zə nɨ ə̀kùnɨ̀ ze kəʼ chub ɨgun yɨə bə̂d ɨsɨ jìm, bə̂d mɨnɔ̂n kyeŋ, bə̂d rɨŋga ɨbeŋ jìm mbɨ ə bə̂d rɨŋga mɨŋgam jìm.

¹⁶Ndɔŋ te wum nɨ à kəʼ zə mbɨ ə nyam kyeŋ ze bɨrɨ ban ə̀kùnɨ̀ ze. Mbɨ bɨrɨ nɨŋ ɨghɨjìm rɨ bɔ, saŋ əməd tɨ̀sɔ̀ʼ ɨkyerɨ. Mbɨ bɨrɨ kud nyamnyod məd bə̀ tɔ̀n əməd ənɨ ɨwid.

¹⁷Mbɨ bɨrɨ ghɨ əne ɨmbə̀ʼ ɨghəm nɨ Ŋwìə̀ fə zɨ̀ ɨŋga fîŋ tɨ mɨ̀mə̌d ni mbɨ ghɨ ənû ze nɨ wɨ̀ nyaʼa fə taŋɨ. Mbɨ bɨrɨ zɨ̀ mbə ɨtu ənɨ mbɨ mɔʼ, nàʼ ɨka nɨ tumbɨ bə̂d əmbɨ ə nyam kyeŋ rɨtu ze pè ənɨ ɨŋgam Ŋwiə̀ jwɨ ənɨ rəsìʼ.

¹⁸Əyi we nɨ à kəʼ zə yɨ əsɨ ə kyeŋ ze nɨ ɨfɔ̀n məd ə tùmbɨ̀ mɨfɔ̀n mɨ̀jìm ɨgwɨ ə si.”