Read Fɨso Fi Ɨnû əwu rənjìm 18 Bible Online

Ɨnû əwu rənjìm 18 - Fɨso Fi bible

Ɨnû əwu rənjìm 18

¹Mə nyaʼa zə aŋgɨrə̀ cherə nɨ nyaʼə swiʼə rɨkaŋ. Wɨ̀ nyaʼa kàŋ berɨ ɨka. Ɨzeŋɨ zeŋɨ we nɨ nyaʼə teə rɨ ənɨ məd nyaʼa ghɨ̀ ni ɨsɨ jìm ɨgwɨ ə si zeŋ.

²Wɨ̀ nyaʼa kyeŋ ənɨ ə gɨ̂ kǎ kǎ ghà ni, “Babilɔ̀n kyeŋ fə buʼ ə! Wɨ̀ fə buʼ ə! Wɨ̀ fə bèŋ ənɨ əsɨ nɨ ɨzwî rɨbɔ̀ŋ ə chub əŋgu, ənɨ əsɨ nɨ ɨzwî mbe nɨ chəi mbɨ zeŋɨ ə nə̀mbɨ̀ əŋgu, ənɨ əsɨ nɨ tɨnən te nɨ chəi tɨ zeŋɨ mbɨ te nɨ bə̂d ban ə nə̀mbɨ̀ əŋgu.

³Bə̂d rɨŋga ɨbeŋ jìm fə nɔ mɨnoʼ kǎ kǎ tɨ ənɨ ɨchî nɨ wɨə ghɨ̀ ɨfabrɨ ɨnû. Mɨfɔ̂n rɨ ɨgwɨ ə si fə niirɨ əməd əbəŋ əbəŋ. Bə̂d ɨwin mɨjìm ɨgwɨ ə si fə berɨ ɨkab tɨ ənɨ ɨchî nɨ məd ə tad ɨnyod ɨŋga mbɔ̂n.”

⁴Mə nyaʼa zu gɨ̂ cherə nɨ nyaʼə ghàmə̀ rɨkaŋ ghàə̀ ni, “Mbɨ bə̂d, mbə̀ jwɨ ə rɨŋga məd, ɨmbə̀ʼ tɨ mbə̀ ghɨ ə ɨnû rɨbɔ̀ŋ mbe nɨ wɨ̀ nyaʼə ghɨ̀ə̀, ɨmbə̀ʼ tɨ ŋgəʼ kǎ kǎ te nɨ nyɨ ɨgwɨ məd bɨ nyɨ i ɨgwɨ nən.

⁵Ɨnû rɨbɔ̀ŋ məd fə dum wò pè ɨkaŋ, əne Ŋwìə̀ fə kɔndɨ ɨnû rɨbɔ̀ŋ mbe nɨ wɨ̀ nyaʼə ghɨ̀ə̀.

⁶Mbə̀ ghɨ ənɨ məd ɨchî nɨ wɨ̀ nyaʼa ghɨ̌ ənɨ bə̂d cherə. Ɨnû mbe nɨ wɨ̀ nyaʼa ghɨ̌ ənɨ ə nən, mbə̀ wi ɨ bɔ ɨghəm be. Mbə̀ nyam mɨnoʼ mbɨ ka ɨghəm be nàʼ ɨ bɔ. Mbə̀ naʼ àmei ɨŋga toʼ ze nɨ wɨ̀ nyaʼa bə̀ nàʼ ɨ nən.

⁷Ɨ wɨə nyaʼə tərə i bə̀ tad i ɨnyod ɨŋga mbɔ̂n əne mbə̀ jeŋgɨ chə əməd bə̀ ghɨ̀ ni wɨ̀ kənə. Ɨ wɨə ghà ɨŋga i fîŋ ni 'Mə yɨ ɨfɔ̂n əyi! Kaʼ mə yɨ əmɨ ɨku əyi, əne chəi mə bɨrɨ nɔ dì!'

⁸Ɨchî nɨ wɨə ghà əne, ŋgəʼ rɨ kǎ kǎ bɨrɨ nyɨ ɨgwɨ məd əni ə fibɨ̀. Ŋgəʼ te yɨ ɨwɔn, yɨ ə̀kə̀nɨ̀ mbɨ ə njì kǎ kǎ. Mbɨ bɨrɨ tɔn əməd ənɨ ɨwid, ɨmbə̀ʼ ɨghəm nɨ Ə̀nùŋɨ̀sɨg Ŋwìə̀ we nɨə saʼ əməd ə berɨ ɨka.”

⁹Mɨfɔ̂n mbe rɨ ɨgwɨ ə si, nɨ nyaʼə niirɨ əməd əbəŋ əbəŋ bə̀ tad ɨnyod ɨŋga mbɔ̂n mbɨ məd, bɨrɨ chweŋ mɨsɨ bə̀ dì əməd ənɨ mbɨ zə ndiʼ rɨ ənɨ ɨwid we nɨə tɔ̀n əməd.

¹⁰Ɨchî nɨ mbɨə bɔə ni mbɨ bɨrɨ zə ŋgəʼ ɨghabɨ əməd, mbɨ bɨrɨ təm əsa əgha ghà ni, “Ŋgəʼ bɨrɨ nyɨ ɨgwɨ ne! Ŋgəʼ bɨrɨ nyɨ ɨgwɨ ne, àwɔ̀ əsɨ ə kyeŋ, àwɔ̀ Babilɔ̀n nɨ yeʼ əbeŋ nɨ berɨ ɨka! Ŋwìə̀ fə nɨŋ àmei awà fìbɨ̀ chə əwe!”

¹¹Bə̂d ɨwin mɨjìm bɨrɨ chweŋ mɨsɨ bə̀ dì əməd, ɨmbə̀ʼ ɨghəm nɨ chəi wə̀d nɨə zon ɨghɨ mbe nɨ mbɨə fènə̀.

¹²Chəi wə̀d nɨə zon ɨghɨ mbe nɨ mbɨ tekɨ ənɨ ə gôl, ənɨ ə sɨrɨvà, ənɨ əti ɨka ɨnun bə̀ fɔrɨ ənɨ mɨ̀pə̂l. Chəi wə̀d nɨə zonə ngywɨ̌ rɨ əka ɨnun: əne yɨə ngywɨ̌ nɨ mbɨ baʼ ənɨ ə linen, ngywɨ̌ rɨ bagɨ, ngywɨ̌ silk mbɨ ə ngywɨ̌ tɨ mɨfɔ̀n. Chəi wə̀d nɨə zonə tɨkwɨrɨ ɨzed jìm te nɨ nyùʼrɨ ɨfɔ chɔ̀m. Chəi wə̀d nɨə zonə tɨkwɨrɨ ɨghɨjìm mbe nɨ bə̂d ɨbɔ ɨ̀fàʼì ə tekɨ ənɨ əsɔŋ sen, ənɨ ɨzed əka ɨnun jìm, ənɨ ə brɔnz, ənɨ ə ayòn fɔrɨ ənɨ ə mabɨ̀l.

¹³Chəi wə̀d nɨə zonə tɨkwɨrɨ ɨghɨ te nɨə nyùʼrɨ ɨfɔ chɔ̀m: əne yɨə sinamòn, tɨtiirɨ, ɨneŋ, myrrh fɔrɨ ə frankɨnsèns. Chəi wə̀d nɨə zonə mɨnoʼ, zonə mɨwud, zonə əburɨ ə ŋgə̀ŋ, zonə kywɨ̀, zonə mbɨ̀rɨkun, zonə njɨ̀g, zonə ngyi, zonə tɨkarɨ te nɨ ngyi tɨə sùŋə̀ bə̀ zonə ka àbei bə̂d mɨ̀sɔŋɨchù mbe nɨ yeʼ ɨ̀bòʼò.

¹⁴Bə̂d ɨwin mbe bɨrɨ gha ɨ bɔ ni, “Ɨghɨ chɔ̀m jìm mbe nɨ à nyaʼa kə̀b berɨ, fə nòd i tɨ ənɨ ə ne. E mbɔ̂n mbɨ mbe ɨghɨjìm mbe nɨə teenɨə, fə nim. Chəi à bɨrɨ nɔ wɨrɨ zə ɨghɨ mbɔ̂!”

¹⁵Bə̂d ɨwin mbe nɨ nyaʼə fèndɨ̀ ɨghɨ mbɔ̂ bə̀ berɨ mbɔ̂n tɨ ənɨ ɨchî nɨ mbɨ nyaʼə ghɨ̀ ɨwin mbɨ məd bɨrɨ təm əsa əgha, ɨchî nɨ mbɨə bɔə ni mbɨ bɨrɨ zə ŋgəʼ ɨghabɨ ə məd, chweŋ mɨsɨ bə̀ dì rɨ̀kǎ ghàə̀ ni,

¹⁶“Ŋgəʼ bɨrɨ nyɨ ɨgwɨ ne! Ŋgəʼ bɨrɨ nyɨ ɨgwɨ ne, àwɔ̀ əsɨ ə kyeŋ nɨ mbe bə̂d nyaʼə zɨ̀ə̀ ngywɨ̌ nɨ mbɨ baʼ ənɨ ə linen, zɨ̀ə̀ ngywɨ̌ tɨ mɨfɔ̀n, bə̀ yèʼ ɨnyod ənɨ ə ndəŋ te nɨ mbɨ tekɨ ənɨ ə gôl, ənɨ əti əka ɨnun bə̀ fɔrɨ ənɨ mɨ̀pə̂l!

¹⁷Ənɨ ə awà fibɨ̀, mbɔ̂n ze jìm fə nim i.” Ɨtu ɨgwɨ ə bə̂d nɨə tin əbaŋ ɨgyɨ̀, mbe nɨə yèn ɨŋga əbaŋ ɨgyɨ̀, mbe nɨə tin əbaŋ ɨgyɨ̀ mbɨ ə bə̂d mɨjìm mbe nɨə fàʼ ɨŋga ɨgyɨ̀, bɨrɨ təm əsa əgha

¹⁸kyeŋ rɨkǎ ənɨ mbɨ zə ndiʼ rɨ ənɨ ɨwid we nɨə tɔ̀n əməd. Mbɨ bɨrɨ zə əne ghà ni, “À kɨ əsɨ zi nɨ nyaʼa ɨghabɨ əsɨ ə kyeŋ zɔ̂ ə?”

¹⁹Ɨ mbɨə nyaʼə sab əgywɨ ɨgwɨ mbə ɨtu ɨchî nɨ mbɨ nyaʼə chweŋə mɨsɨ bə̀ dìə̀. Ɨ mbɨə nyaʼə ghɨ̀ə̀ əne ghàə̀ rɨ̀kǎ ni, “Ŋgəʼ bɨrɨ nyɨ ɨgwɨ ne! Ŋgəʼ bɨrɨ nyɨ ɨgwɨ ne, àwɔ̀ əsɨ ə kyeŋ nɨ bə̂d mɨ̀jìm mbe nɨ nyaʼa berɨ ɨbaŋ ɨgyɨ̀ nyaʼa fuʼ əwən tɨ ənɨ mbɔ̂n ze nɨ à nyaʼa berɨ! Àmei ənɨ ə awà fibɨ̀, mbɔ̂n ze jìm fə nim i.

²⁰Bə̂d mɨ̀jìm mbe nɨ yeʼ ɨkaŋ, mbə̀ ghaʼrɨ əwən ɨmbə̀ʼ ɨghəm nɨ Ŋwìə̀ fə nimnɨ əməd! Bə̂d Ŋwiə̀, bə̂d tom mbɨ ə bə̂d ɨ̀kə̀n, mbə̀ ghaʼrɨ əwən ɨmbə̀ʼ ɨghəm nɨ Ŋwìə̀ fə zɨ̀ ɨsaʼi ɨgwɨ məd ɨmbə̀ʼ ɨnû mbe nɨ wɨ̀ nyaʼa ghɨ̌ ənɨ ə nən!”

²¹Aŋgɨrə̀ nɨ berɨ ɨka nyaʼa bèʼ ɨti nɨ nyaʼa ɨghabɨ ɨti ŋgə̀ŋ kyeŋ màʼ ɨŋga rɨ̀bàà. Wɨ̀ nyaʼə màʼ əne ghàə̀ ni, “À yɨ ɨchî nɨ mbɨ bɨrɨ maʼ ə Babilɔ̀n ə si ənɨ ɨka. Chəi bə̂d bɨrɨ nɔ wɨrɨ zə əməd.

²²Chəi bə̂d bɨrɨ nɔ wɨrɨ buʼ ɨnoŋɨ ŋgyi kɨ̀ nɔ kwerɨ mɨkyî ɨŋga ne. Chəi bə̂d bɨrɨ nɔ wɨrɨ fə ɨmbarɨ bə̀ fə tàŋ ɨŋga ne. Chəi wə̀d əbɔ ə̀fàʼì bɨrɨ nɔ wɨrɨ tekɨ ɨghɨ ɨŋga ne. Chəi bə̂d bɨrɨ nɔ wɨrɨ wɔʼ ɨghɨ ɨŋga ne.

²³Chəi ənam ə bɨrɨ nɔ wɨrɨ te ɨŋga ne. Chəi mɨnom ɨgən mbɨ mɨgən bɨrɨ nɔ wɨrɨ ghɨ ɨnamɨ ɨŋga ne. Mbe bə̂d ɨwin yɨə nyaʼə bə̂d nɨ dabə ɨgwɨ ə si. À wɨə nyaʼə tambɨə bə̂d rɨŋga ɨbeŋ jìm ənɨ mɨ̀sà.

²⁴Ənəm ə bə̂d ɨ̀kə̀n, ənəm ə bə̂d Ŋwiə̀ mbɨ ənəm ə bə̂d mɨjìm mbe nɨ mbɨ nyaʼa zwiirɨ ɨgwɨ ə si fə tàb əwe.”