Read Fɨso Fi Ɨnû əwu rənjìm 22 Bible Online

Ɨnû əwu rənjìm 22 - Fɨso Fi bible

Ɨnû əwu rənjìm 22

¹Aŋgɨrə̀ we nyaʼa chwi ɨgyɨ̂ kyeŋ we nɨ mɨnib məd ə nàʼ ɨ̀tènɨ̀. Ɨgyɨ̂ we wɨə nyaʼə zeŋ ɨghabɨ ə kristal. Ɨ wɨə nyaʼə jwɨ̀ rɨ əton ətən ɨfɔ̀n ə Ŋwìə̀ mbɨ Wan njɨ̀g.

²Ɨ wɨə nyaʼə koŋ ɨŋga mɨgharə̀ ɨnə̂njɨ̀ kyeŋ we rɨŋga əsɨ ze. Əzed ze nɨə nàʼ ɨ̀tènɨ̀ zɨə nyaʼə əŋgo ɨgyɨ̂ kyeŋ we ɨba jìm. Əzed ze zɨə nyaʼə kɔə rɨtam ɨghəm wum chɔ̀b rɨ̀be ɨŋga əghəm əwu. Əne yɨ ɨghəm mɔʼ ɨŋga ɨmɨg. Tɨfuʼ rɨ əzed te tɨə nyaʼə vɨ̀ə̀ bə̂d rɨŋga ɨbeŋ jìm.

³Chəi əghɨ ə mɔʼɔ ze nɨ Ŋwìə̀ zɨ ndɔ̀n ɨgun bɨrɨ yeʼ ɨŋga əsɨ ze. Ətən ɨfɔ̀n ə Ŋwiə̀ mbɨ Wan njɨ̀g bɨrɨ yeʼ ɨŋga əsɨ ze, əne bə̂d ə̀fàʼì məd bɨrɨ wumnɨ əməd.

⁴Mɨ̀mə̌d bɨrɨ zə ɨfě Ŋwiə̀. Mbɨ bɨrɨ bɨ ŋwaʼnɨ ɨkum Ŋwiə̀ ənɨ ɨkəŋ ɨsɨ mɨ̀mə̌d.

⁵Chə wɨrɨ i ɨzimɨ. Chəi mbɨ bɨrɨ kəb ɨzeŋɨ zeŋɨ rɨ ənɨ ənam kɨ̀ rɨ ənɨ ə nyùmə̀, ɨmbə̀ʼ ɨghəm nɨ Ə̀nùŋɨ̀sɨg Ŋwiə̀ bɨrɨ yeʼ ɨzeŋɨ zeŋɨ mɨ̀mə̌d. Mbɨ bɨrɨ tumbɨ ɨsɨg koŋ koŋ.

⁶Aŋgɨrə̀ we nyaʼa ghà ɨ num ni, “Ŋwìə̀ wɨə ghà rəsìʼ. Ɨ wɨə bə̀ ghɨ̀ ɨnû mbe nɨ wɨ̀ ghǎ. Əne Ə̀nùŋɨ̀sɨg Ŋwìə̀, nɨə nàʼ e Əzwî əmbɨ ə bə̂d ɨ̀kə̀n ɨməd, fə tom wi aŋgɨrə̀ nɨ wɨ̀ chwi ɨnû mbe nɨ bɨrɨ zambɨ ghɨ̀ əmbɨ mbi bə̂d ə̀fàʼì.”

⁷Yeso ə ghà ni, “Mbə̀ zə, mə bɨrɨ zambɨ yeʼe! Ŋwìə̀ zɨ əbɔrəbɔd ɨgun ə wə̀d we nɨə ghɨ̀ ɨnû mbe nɨ mbɨ ŋwaʼnɨ ɨŋga ə̀ŋwàʼnɨ̀ zɔ̂ ɨmbə̀ʼ ɨnû mbe nɨ bɨrɨ nɨ ghɨ̀.”

⁸Mɔ̌, Jɔ̌n, yɨə wə̀d we nɨ nyaʼa zu bə̀ zə ɨnû mbɔ̂. Ənɨ mə nyaʼa zu bə̀ zə, mə nyaʼa gundɨ ə si ɨban ɨwu aŋgɨrə̀ we nɨ nyaʼa chwi ɨnû mbɔ̂ ɨ num. Mə nyaʼa gundɨ ɨmbə̀ʼ wumnɨ əməd.

⁹Àyɨə wɨ̀ nyaʼa ghà ɨ num ni, “Tɨrə̀ ghɨ e əne! Mɔ̌ yɨə wə̀d ə̀fàʼì ɨghabɨ àwɔ̀. Mə yɨə bə ɨghabɨ mbe bɔŋgɔb mbe nɨ yeʼ bə̂d ɨ̀kə̀n Ŋwiə̀ bə̀ fɔrɨ ɨghabɨ mbe nɨə ghɨ̀ ɨnû mbe nɨ yeʼ ɨŋga ə̀ŋwàʼnɨ̀ zɔ̂. Wumnɨ ə Ŋwiə̀!”

¹⁰Wɨ̀ nyaʼa ghà ɨ num ni, “Tɨrə̀ tɔ nə̀m e mɨŋgam mbɔ̂ nɨ mbɨ ŋwaʼnɨ ɨmbə̀ʼ ɨnû mbe nɨ bɨrɨ ghɨ̀, ɨmbə̀ʼ ɨghəm nɨ nyùmə̀ we nɨ ɨnû mbɔ̂ bɨrɨ zambɨ ghɨ̀ fə tiinə.

¹¹Wə̀d we nɨə ghɨ̀ ɨnû rɨbɔ̀ŋ wo ɨmbì ghɨ̀ ɨnû rɨbɔ̀ŋ. We nɨə nyɔɔnɨə wo ɨmbì nyɔɔnɨ. We nɨə ghɨ̀ ɨnû nɨ kuʼnɨ wo ɨmbì ghɨ̀ ɨnû nɨ kuʼnɨ. We nɨ zeŋɨ wo ɨmbì ghɨ̀ ɨnû zeŋɨ zeŋɨ.”

¹²Yeso ə ghà ni, “Mbə̀ zə, mə bɨrɨ zambɨ yeʼe! Mə bɨrɨ yeʼe mbɨ ɨchwɨ we nɨ mə bɨrɨ nàʼ əmbɨ wə̀d mɔʼ mɔʼ ɨgwɨ ɨnû mbe nɨ wɨ̀ ghɨ̌.

¹³Mɔ̌ yɨə Alfà mbɨ ə Omegà. Mɔ̌ yɨ wɨ rɨtu bə̀ yeʼ we nɨ sɨ nwìə̀. Mɔ̌ yɨ ɨkɔ bə̀ yeʼ ɨnwǐ.”

¹⁴Ŋwìə̀ zɨ əbɔrəbɔd ɨgun ə bə̂d mbe nɨ fə so tə ngywɨ tɨ zeŋ, ɨmbə̀ʼ ɨ mbe tɨ mbɨ chè ənɨ mɨchû ɨkam nyɨ ɨŋga əsɨ ze, əne jɨg rɨtam tɨ ənɨ əzed ze nɨə nàʼ ɨ̀tènɨ̀.

¹⁵Bə̂d mbe nɨ yeʼ ɨsɨg yɨə mbe nɨ chəi mɨnə̂njɨ̀ mɨ̀mə̌d kuʼnɨ. Mbɨ yɨ mbe nɨə ghɨ̀ mɨ̀sà, mbe nɨə niirɨə mbaŋə̀ kɨ̀ məyi əbəŋ əbəŋ, mbe nɨə zwiirɨ mbɨ cherə, mbe nɨə wumnɨ mbɨ̀anèŋ mbɨ wə̀d jìm we nɨə ghaʼə mɨghab bə̀ ghɨ̀ ɨnû mɨghab mɨghab.

¹⁶“Mɔ̌, Yeso, fə tom wum aŋgɨrə̀ nɨ wɨ̀ gha ɨnû mbɔ̂ əmbɨ mbə̀n mbe nɨ yeʼ ɨŋga tɨfetɨ bə̂d Kristo. Mɔ̌ yɨə wan tɨ ənɨ əghaŋ ə Dèvîd. Mɔ̌ yɨə bə̀ ə wan məd. Mɔ̌ yɨə təbid we nɨə njandə ənjɨtuʼ.”

¹⁷Əzwî mbɨ Ɨgən ghà ni, “Yeʼe!” Wə̀d jìm we nɨ zu gha ni, “Yeʼe!” Wə̀d jìm we nɨ ədɔʼ ə ne əməd yeʼe. We nɨə kəb mɨnib, yeʼe nɔ mɨnib mbe nɨə nàʼ ɨ̀tènɨ̀, nɨ chəi wɨ̀ bɨrɨ naʼ ɨkab.

¹⁸Mə wɨə patɨə wə̀d jìm we nɨ zu mɨŋgam mbɔ̂ nɨ mbɨ ə̀ŋwàʼnɨ̀ ɨmbə̀ʼ ɨnû mbe nɨ bɨrɨ ghɨ̀. Wə̀d mɔʼɔ mɨ yì ɨnû əbɔʼ mbɔ̂, Ŋwìə̀ bɨrɨ yi ŋgəʼ kǎ kǎ te nɨ mbɨ mə̌ ɨŋga ə̀ŋwàʼnɨ̀ zɔ̂ ɨgwɨ məd.

¹⁹Wə̀d mɔʼɔ mɨ chɨ ənû ə mɔʼɔ rəbɔʼ mɨŋgam mbɔ̂ nɨ mbɨ ŋwaʼnɨ ɨmbə̀ʼ ɨnû mbe nɨ bɨrɨ ghɨ̀, chəi Ŋwìə̀ bɨrɨ ben ni wɨ̀ nyɨ ɨŋga əsɨ ə zeŋɨ ze, kɨ̀ ni wɨ̀ jɨg rɨtam tɨ ənɨ əzed ze nɨə nàʼ ɨ̀tènɨ̀, nɨ mbɨ mə̌ ɨŋga ə̀ŋwàʼnɨ̀ zɔ̂.

²⁰Wə̀d we nɨ gha ɨnû mbɔ̂ jìm ə ghà ni, “À yɨ rəsìʼ, mə bɨrɨ zambɨ yeʼe.” À yɨ əne, Ə̀nùŋɨ̀sɨg Yeso, yeʼe!

²¹Ə̀nùŋɨ̀sɨg Yeso ghɨ ɨ̀chɔ̀m ənɨ ə bə̂d Ŋwiə̀ mɨ̀jìm. À yɨ əne.