Read Fɨso Fi Ɨnû əwu rənjìm 6 Bible Online

Ɨnû əwu rənjìm 6 - Fɨso Fi bible

Ɨnû əwu rənjìm 6

¹Mə nyaʼa zə ənɨ Wan njɨ̀g we nyaʼa kyeʼrɨ ɨneŋ rɨtu rəbɔʼ mɨneŋ mbe sambe. Mə nyaʼa bə̀ zu gɨ̂ əghɨ ə mɔʼ rəbɔʼ ɨghɨ mbe ɨkwè nɨ yeʼ ɨkǎ ɨchî nɨ zɨ̀ nyaʼa gham ɨghabɨ ɨchî nɨ mbə̀ŋ ə kùmə̀. Zɨ̀ nyaʼa ghà ni, “Yeʼe!”

²Mə nyaʼa nèŋ əne zə ngyǐ rɨ̀fɨ. Wə̀d we nɨ nyaʼa kɔʼ ngyǐ ze nyaʼa yimɨ kyed. Mbɨ nyaʼa nàʼ ɨdəm ɨfɔ̀n ɨ bɔ, əne wɨ̀ nyaʼa jwɨ̀ ɨghabɨ ə wə̀d nɨ baŋ ɨbid ɨmbə̀ʼ wò baŋ mbi bə̂d pə̀n.

³Ənɨ Wan njɨ̀g we nyaʼa kyeʼrɨ ɨneŋ we nɨ pe ənɨ wɨ be, mə nyaʼa zu əghɨ ze nɨ pe ənɨ mbɨ be rəbɔʼ ɨghɨ mbe ɨkwè nɨ yeʼ ɨkǎ nɨ nyaʼa ghà ni, “Yeʼe!”

⁴Ngyǐ cherə nyaʼa jwɨ̀ yeʼe. Ɨ zɨə nyaʼə bàŋə̀ buù. Mbɨ nyaʼa nàʼ ɨka əmbɨ wə̀d we nɨ nyaʼa kɔʼ ngyǐ ze ni wɨ̀ nɨŋ əbɔrəbɔd rɨ ɨgwɨ ə si ɨmbə̀ʼ bə̂d zwiirɨ mbə bɔŋgɔb. Mbɨ nyaʼa nàʼ ɨbi bid kyeŋ ɨ bɔ.

⁵Ənɨ Wan njɨ̀g nyaʼa kyeʼrɨ ɨneŋ we nɨ pe wɨ tad, mə nyaʼa zu gɨ̂ əghɨ ze nɨ pe ənɨ mbɨ tad rəbɔʼ ɨghɨ mbe ɨkwè nɨ yeʼ ɨkǎ nɨ nyaʼa gha ni, “Yeʼe!” Mə nyaʼa neŋ əne zə ngyǐ firɨ. Wə̀d we nɨ nyaʼa kɔʼ ngyǐ ze nyaʼa yim əghɨ ze nɨ mbɨə mɨ̀g ɨghɨ ɨgun.

⁶Mə nyaʼa zu əghɨ ə mɔʼɔ ɨghabɨ ə gɨ̂ wə̀d əkaʼ ɨghɨ mbe ɨkwè nɨ yeʼ ɨkǎ nɨ gha ni, “Mbɨ bɨrɨ zon ə kirə əburɨ ə kywɨ-kɔ̀ʼ ənɨ ɨkab ə̀fàʼì əni ə fibɨ̀, bə̀ zon ə mɨkirə̀ əburɨ ə kywɨ ɨtad ənɨ ɨkab ə̀fàʼì əni ə fibɨ̀. Tɨrə̀ chəkɨ e mɨwud mbɨ mɨnoʼ!”

⁷Ənɨ Wan njɨ̀g we nyaʼa kyeʼrɨ ɨneŋ we nɨ pe ənɨ wɨ kwè, mə nyaʼa zu gɨ̂ əghɨ ze nɨ pe ənɨ mbɨ ɨkwè rəbɔʼ ɨghɨ mbe kwè nɨ yeʼ ɨkǎ nɨ nyaʼa gha ni, “Yeʼe!”

⁸Mə nyaʼa neŋ, əne zə ngyǐ nɨ nyaʼa əfuʼnɨ əfuʼnɨ̀. Ɨkum wə̀d we nɨ nyaʼa kɔʼ ngyǐ ze yɨ Ɨvɨ. Əbeŋ ɨvɨ bə̂d zɨə nyaʼə beenɨ əbɔʼ məd. Mbɨ nyaʼa naʼ ɨka əmbɨ mɨ̀mə̌d ni mbɨ zwiirɨ bə̂d rɨŋga əbà ə fibɨ̀ tɨ ənɨ mbɨ kwè ɨgwɨ ə si ənɨ ə bid, ənɨ ə njì kǎ kǎ, ənɨ ɨwɔn bə̀ fɔrɨ ənɨ ə nyam tɔ̂ tɔ̂ te rɨ ɨgwɨ ə si.

⁹Ənɨ Wan njɨ̀g we nyaʼa kyeʼrɨ ɨneŋ we nɨ pe ənɨ wɨ tân, mə nyaʼa nèŋ əton ɨkwi ɨjə̀ŋ ə̀fààrɨ̀, əne zə ɨzwî bə̂d mbe nɨ mbɨ nyaʼa zwiirɨ ɨmbə̀ʼ ɨchî nɨ mbɨ nyaʼə ghà ɨŋgam Ŋwiə̀ fɔrɨ ɨmbə̀ʼ ɨchî nɨ mbɨ nyaʼa yim ɨŋgam Ŋwiə̀ wɨ kàànɨ̀.

¹⁰Mbɨ nyaʼa kyeŋ ənɨ ə gɨ̂ nɨ kǎ ni, “Ə̀tùmbɨ̀ ɨsɨg nɨ zeŋɨ màànɨ̀, nɨə ghɨ̀ ɨnû mbe nɨ wɨ̀ ghǎ, əgha ə kɨə wo sa rɨ ye bɔŋ à sob ɨsaʼi bə̂d mbe nɨ yeʼ ɨgwɨ ə si əne wì ɨchî nɨ mbɨ nyaʼa zwiirɨ əwa ə?”

¹¹Ŋwìə̀ nyaʼa nàʼ ngywɨ̌ rɨ̀fɨ əmbɨ əzwî ə mɔʼ mɔʼ rəbɔʼ ɨzwî mbe, ghà əmbɨ mɨ̀mə̌d ni mbɨ zwiirɨ ənɨ akə nyùmə̀ pè ənɨ ɨnun bə̂d mbe nɨə fàʼ əmbɨ Kristo mbɨ ɨnun bɔŋgɔb mbe nɨ mbɨ bɨrɨ zwiirɨ ɨchî nɨ mbɨ nyaʼa zwiirɨ mɨ̀mə̌d fə kuʼu.

¹²Ənɨ Wan njɨ̀g we nyaʼa kyeʼrɨ ɨneŋ we nɨ pe ənɨ wɨ rɨ̀fuə, mə nyaʼa neŋ, əne zə ni si nyaʼa wùd kwàʼ rɨ̀kǎ. Nyùmə̀ nyaʼa fin ɨghabɨ tɨkurɨ ɨdì firɨ, ɨmɨg bə̀ bàŋ ɨghabɨ ənəm.

¹³Tɨtəmɨ te rɨ əton ɨkaŋ nyaʼa feŋgɨ ə si ɨchî nɨ əfim ə chiʼ əzed tɨtam rɨ bɔd feŋgɨə.

¹⁴Ɨkaŋ nyaʼa kad ɨghabɨ ə̀ŋwàʼnɨ̀ nɨ mbɨ karɨ. Wɨ nyaʼa kad əne nim. Tɨwum rɨjìm mbɨ ɨkəm ɨsɨ si nɨ mɨnib karɨ nyaʼa nɔʼ rɨ ənɨ ɨsɨ mbe nɨ mbɨ nyaʼa əŋgu.

¹⁵Əne mɨfɔ̂n mbe rɨ ɨgwɨ ə si, bə̂d kyeŋ kyeŋ, ɨtu ɨgwɨ mɨ̀sɔgyɨ̀, bə̂d mbɔ̂n, bə̂d ɨka ka, wə̀d jìm, ɨ̀bòʼò mbɨ ə bə̂d nɨ yeʼ ənɨ ə ɨghəm nyaʼa nə̀mbɨ̀ ɨŋga mɨ̀sùm bə̀ nə̀mbɨ̀ əkaʼ rɨwɔ̌ te ɨkaŋ rɨwum.

¹⁶Mbɨ nyaʼa kyeŋ ghà əmbɨ rɨwum te bə̀ ghà əmbɨ rɨwɔ̌ te ni, “Mbə̀ su ɨgwɨ na, nə̀m əwa rɨ əmbɨ ə məd we nɨ chub ɨgun ətən ɨfɔ̀n, bə̀ nə̀m əwa rɨ ənɨ ɨchə we nɨ Wan njɨ̀g bɨrɨ chə əwa,

¹⁷ɨmbə̀ʼ ɨghəm nɨ əni ə kyeŋ ze nɨ Ŋwìə̀ mbɨ ə Wan njɨ̀g bɨrɨ chə bə̂d ə fə yeʼe. À kɨə we nɨ tɨ̀ wɨ̀ chubɨ ɨkǎ ənɨ mbɨ chə əməd ə?”