Read Fɨso Fi Ɨnû əwu rənjìm 8 Bible Online

Ɨnû əwu rənjìm 8 - Fɨso Fi bible

Ɨnû əwu rənjìm 8

¹Ənɨ Wan njɨ̀g nyaʼa kyeʼrɨ ɨneŋ we nɨ pe ənɨ wɨ sambe, ɨsɨ mbe nɨ yeʼ ɨkaŋ nyaʼa zwɨ̀ rɨ nyɔ̀ɔ̀m. Mbɨ nyaʼa zwɨ̀ ənɨ əkwirɨ ə awà.

²Mə nyaʼa zə mbɨ̀aŋgɨrə̀ mbe sambe nɨə təm ɨfě Ŋwiə̀. Mbɨ nyaʼa nàʼ tàŋ sambe əmbɨ mɨ̀mə̌d.

³Aŋgɨrə̀ cherə, nɨ nyaʼa yim əkaŋ nɨ mbɨ tekɨ ənɨ ə gôl, nyaʼa yeʼe təm ɨban ɨkwi ɨjə̀ŋ ə̀fààrɨ̀. Mbɨ nyaʼa nàʼ ɨneŋ nɔnɔʼ ɨ bɔ ni wɨ̀ nyam əbɔʼ ɨ̀kɔ̀ŋgɨ̀ bə̂d Ŋwiə̀ mɨ̀jìm əne tɔ̀n ɨgun ɨkwi ɨjə̀ŋ we nɨ mbɨ nyaʼa tekɨ ənɨ ə gôl, nɨ nyaʼa ɨfě ətən ɨfɔ̀n ə Ŋwiə̀.

⁴Ndiʼ ze nɨ nyaʼə jwɨ̀ rɨ ənɨ ɨneŋ we nyaʼa fɔtɨ əbɔʼ ɨ̀kɔ̀ŋgɨ̀ bə̂d Ŋwiə̀, əne nɔ̀ʼ rɨ ɨkye əbɔ aŋgɨrə̀ we wò ɨfě Ŋwiə̀.

⁵Aŋgɨrə̀ we nyaʼa nɨŋ əkaŋ ze, swe ənɨ mbɨ̀akyiwid nɨə ghə̀ʼə̀, maʼ ɨgwɨ ə si. Wɨ̀ nyaʼa chɨ̀ mbɨ̀akyiwid mbe rɨ ənɨ ɨkwi ɨjə̀ŋ ə̀fààrɨ̀ we. Ənɨ wɨ̀ nyaʼa ghɨ̀ əne mbə̀ŋ nyaʼa kùm, gɨ̂ rɨ mɔʼɔ ghàm, ɨbi mbə̀ŋ ŋwàŋ, si bə̀ wùd.

⁶Mbɨ̀aŋgɨrə̀ mbe sambe nɨ nyaʼa yim tàŋ te sambe nyaʼa tekɨ ə ɨnyod nɨ fə.

⁷Aŋgɨrə̀ rɨtu nyaʼa fə i taŋ, əne əwəŋ mbɨ ɨwid, nɨ nyaʼa nyamɨ mbɨ ənəm, nyaʼa feŋgɨ ɨgwɨ ə si. Əba ə fibɨ̀ ənɨ mbɨ ghapɨ si ɨba tad nyaʼa fɨə. Əba ə fibɨ̀ ənɨ mbɨ ghapɨ ɨzed ɨba tad nyaʼa fɨə. Ɨfu zwɨ̂ jìm nyaʼa bə̀ fɨə.

⁸Aŋgɨrə̀ we nɨ pe ənɨ mbɨ mɨbe nyaʼa fə i taŋ, əne mbɨ nyaʼa màʼ əghɨ ə mɔʼɔ nɨ nyaʼa ɨghabɨ ɨwum kyeŋ nɨə fɨə ɨŋga rɨ̀bàà. Əba ə fibɨ̀ ənɨ mbɨ ghapɨ rɨ̀bàà ɨba tad nyaʼa bèŋ ənɨ ənəm.

⁹Əba ə fibɨ̀ ənɨ mbɨ ghapɨ ɨghɨ mbe nɨə chub ɨŋga rɨ̀bàà ɨba tad nyaʼa kwɨ. Mbɨ nyaʼa chəkɨ əba ə fibɨ̀ ənɨ mbɨ ghapɨ ɨbaŋ ɨgyɨ̀ ɨba tad.

¹⁰Aŋgɨrə̀ we nɨ pe ənɨ mbɨ mɨtad nyaʼa fə i taŋ, əne fɨtəmɨ kyeŋ nɨ nyaʼə te ɨghabɨ ɨkaʼi nyaʼa nɔʼ rɨkaŋ feŋ ɨgun əba ə fibɨ̀ ənɨ mbɨ ghapɨ mɨgyɨ̂ ɨba tad bə̀ feŋ ɨgun mɨ̀jwɨ̀-əmboŋ.

¹¹Ɨkum fɨtəmɨ fe yɨə Ənywɨ̀-ənywɨ̀. Əba ə fibɨ̀ ənɨ mbɨ ghapɨ mɨnib ɨba tad nyaʼa bèŋ sɨə nywɨ̀ə̀. Bə̂d mɨ̀nɔnɔʼ nɨ nyaʼa nɔ mɨnib mbe nyaʼa kwɨ ɨmbə̀ʼ ɨghəm nɨ mɨnib mbe mbɨə nyaʼə nywɨ̀ə̀.

¹²Aŋgɨrə̀ we nɨ pe ənɨ mbɨ mɨkwè nyaʼa fə i taŋ, əne əghɨ ə mɔʼɔ ə nyaʼa nun əbà ə fibɨ̀ ənɨ mbɨ ghapɨ nyùmə̀ ɨba tad, ənɨ mbɨ ghapɨ ɨmɨg ɨba tad, bə̀ fɔrɨ ənɨ mbɨ ghapɨ rɨtəmɨ ɨba tad. Əba ə fibɨ̀ ənɨ mbɨ tad ənɨ ɨzeŋɨ zeŋɨ mɨ̀mə̌d nyaʼa fin. Chəi nyùmə̀ nyaʼa te ənɨ əba ə fibɨ̀ ənɨ mbɨ ghapɨ əni ɨba tad. Chəi ɨmɨg mbɨ rɨtəmɨ nyaʼa te ənɨ əbà ə fibɨ̀ ənɨ mbɨ ghapɨ ɨzimɨ ɨba tad.

¹³Mə nyaʼa nèŋ, əne zə ɨzam nɨ nyaʼə fid əton ɨkaŋ. Ɨ wɨə nyaʼə ghàmə̀ rɨ̀kǎ ghàə̀ ni, “Ŋgəʼ bɨrɨ nyɨ, ŋgəʼ bɨrɨ nyɨ, ŋgəʼ bɨrɨ nyɨ ɨgun ə bə̂d mbe nɨ yeʼ ɨgwɨ ə si ənɨ ə nyùmə̀ we nɨ mbɨ̀aŋgɨrə̀ cherə tad fə tə tàŋ!”