Read Mewari मत्ती 14 Bible Online

मत्ती 14 - Mewari bible

मत्ती 14

¹वी टेम गलील का राजा हेरोदेस ईसू का बारा में हामळयो।

²वणी आपणाँ नोकराऊँ क्यो, “ओ वोईस बतिस्मा देबावालो यहुन्नो हे! ज्यो मरिया तका मेंऊँ पाछो जी उट्यो हे, ईं वाते वींमूँ अचम्बा का काम परगट वेवे हे।”

³काँके पेल्याँ हेरोदेस आपणो भई फिलिपुस जद्याँ जीवतो हो तद्याँ वींकी लुगई हेरोदियासऊँ ब्याव कर नाक्यो हो, जणी वजेऊँ यहुन्ने हेरोदेस ने ओळमो दिदो हो के, थने थाँरे भई की लुगई ने राकणी नेमा हस्याबूँ सई ने हे, तो हेरोदियास के केबाऊँ हेरोदेस वींने जेल में नकवा दिदो हो।

⁵अन वो वींने मारणो छातो हो, पण मनकाऊँ दरपतो हो काँके मनक वींने परमेसर का आड़ीऊँ बोलबावाळो मानता हा।

⁶पण जद्याँ राजा हेरोदेस को जनम को दन आयो, तो हेरोदियास की छोरी मेमाना का हामे नाच बतान राजा हेरोदेस ने घणो राजी किदो।

⁷ईंपे वणी होगन खान बचन दिदो, “मांग ज्यो थूँ मांगी, वो मूँ थने देऊँ।”

⁸वाँ आपणी बई का हिकावा में आन बोली, “बतिस्मा देबावाळा यहुन्ना को मातो कटवान थाळी में मेलन देदो।”

⁹राजो घणी दकी व्यो, पण आपणाँ होगनऊँ अन मेमाना का मस हुकम दिदो के, मातो दे दिदो जावे।

¹⁰अन वाँकाणी जेळ में कुई लोग ने खन्दान यहुन्ना को मातो कटवा नाक्यो।

¹¹अन वींको मातो थाळी में सजान लायो ग्यो अन वी छोरी ने दे दिदो अन वाँ वींने आपणी बई का नके लेगी।

¹²तद्याँ यहुन्ना का चेला आया वींका मरिया तका डील ने लेग्या अन वींने एक कबर में गाड़ दिदो। अन पछे जान यो हमच्यार ईसू ने दिदो।

¹³जद्याँ ईसू ओ हुण्यो, तो वो नाव पे चड़न वटूँ कणी हून्नी जगाँ में परोग्यो। लोगाँ ओ हुणन समन्द का कनारे-कनारे वाँका पाच्छे वेग्या।

¹⁴जद्याँ ईसू नावऊँ बारणे आया तो वणा एक मोटी भीड़ देकी तो वाँने वाँका पे दया आगी अन माँदा मनकाँ ने हव किदा।

¹⁵जद्याँ हाँज पड़गी, तद्याँ वाँका चेला वाँका नके आया अन क्यो, “अटे हून्नी जगाँ हे अन मोड़ो वेरियो हे लोगाँ ने परी हिक दो, ताँके वीं गाम में खाणो मोल ले सके अन खावे।”

¹⁶पण ईसू वाँऊँ क्यो, “वाँके जाबा की कई जरूत कोयने! थाँईस अणाने खाबा का वाते दो।”

¹⁷चेला वाँने क्यो, “माकाँ नके पाँच रोट्याँ अन दो माछळ्याँ ने छोड़न ओरी कई ने हे।”

¹⁸ईसू क्यो, “वाँने मारे नके लावो।”

¹⁹तद्याँ वणा मनकाँ ने क्यो के, रेटे बेट जावो अन वणा पाँच रोट्याँ अन दो माछळ्याँ लिदी अन हरग का आड़ी देकन धन्नेवाद दिदो अन रोट्याँ का कवा करन चेला ने दिदी चेला वाँने मनकाँ में बांट दिदी।

²⁰तद्याँ हाराई खान धापग्या, तो चेला बंची तकी रोट्याँ का बारा ठोपळा भरिया।

²¹अन वटे खाणो खाबा वाला में लुगायाँ अन छोरा-छोरी ने छोड़न, पाँच हजार मनक मनकईस हा।

²²तद्याँ वाँकाणी आपणाँ चेला ने नाव पे चड़ाया ताँके वीं वाँकाऊँ पेल्याँ पेली परा जावे, जतरे मूँ लोगाँ ने हिक देन अऊँ।

²³वो लोगाँ ने खन्दान परातना करबा ने एक मंगरा पे पराग्यो अन हाँज हुदी वो एकलो हो।

²⁴वी दाण नाव समन्द का वच्छा-वच्छ लेराऊँ हिळोळा लेरी ही, काँके हवा हामेंऊँ चालरी ही।

²⁵ईसू रात के चोती पोर में लगे-भगे भाग फाट्या समन्द पे चालतो तको वाँका नके आयो।

²⁶चेला वाँने पाणी पे चालता तको देकन दरपग्या अन केबा लागा, “ओ भूत हे!” अन दरपऊँ हाका-भार मेलबा लागा।

²⁷तद्याँ ईसू तरत वाँकाऊँ क्यो, “हिम्मत राको! मूँ हूँ, दरपो मती!”

²⁸पतरस वाँने क्यो, “ओ परबू यद्याँ थूँ हे, तो मने आपणाँ नके पाणी पे चाळन आबा को हुकम दे।”

²⁹ईसू क्यो, “आव!” तद्याँ पतरस नाव पूँ उतरन ईसू का नके जाबा ने पाणी पे चाळबा लागो।

³⁰पण वो डूँज ने देकन दरपग्यो, अन जद्याँ डुबवा लागो तो हाका-भार मेलन क्यो, “हो परबू, मने बचा!”

³¹ईसू तरत हात लाम्बो करन वींने पकड़ लिदो अन वींकाऊँ क्यो, “ये कम विस्वास करबावाळा, थाँ काँ भेंम किदो?”

³²तद्याँ वीं नाव में चड़ग्या, तो वइरो ढबग्यो।

³³ईंपे वाँकाणी ज्यो नाव में हाँ, वीके धोग लगान क्यो, “हाँचाई, थूँ परमेसर को पूत हे।”

³⁴जद्याँ वीं समन्द पार करन पेली पाल्ड़े गन्नेसरत नगर का नके पूग्या।

³⁵वटा का मनकाँ ईसू ने ओळक लिदा अन अड़े-भड़े का हाराई देस में हमच्यार खन्दायो अन वीं हाराई माँदा मनकाँ ने वाँका नके लाया,

³⁶अन वाँकाऊँ परातना करबा लागा के, वो वाँने आपणाँ गाबा का पल्‍ला की कोर के अड़बा दो अन जतरा भी अड्या, वीं हाराई हव वेग्या।