Read Mewari मत्ती 15 Bible Online

मत्ती 15 - Mewari bible

मत्ती 15

¹तद्याँ यरूसलेमऊँ कुई फरीसी अन नेमा ने हिकाबावाळा ईसू का नके आन केबा लागा,

²“थाँरा चेला बड़ाबा की रिति-रिवाज ने काँ ने माँने हे? वीं बना हात धोयाई रोटी काँ खावे हे?”

³ईसू वाँने क्यो, “थाँ भी आपणाँ बड़ाबा का रिति-रिवाज मानन परमेसर का आदेसा ने टाळ देवो हो।

⁴काँके परमेसर क्यो, ‘आपणाँ बई-बापू को मान राकज्ये’, अन ‘ज्यो कुई बाप कन बई ने बुरो केवे, वीं मोत का घाट ऊतारिया जावे।’

⁵पण थाँ लोगाँ ने हिकावो हे के, यद्याँ थाँका बई-बापू थाँकाऊँ कई मांगे तो थाँ वाँकाऊँ केज्यो के, ‘वा तो में परमेसर के चड़ा दिदी हे।’

⁶ईं बात की वजेऊँ वणी मनक ने आपणाँ बई-बापू की सेवा करबा की जरुरत ने हे। अस्यान करन थाँ आपणाँ रिति-रिवाजऊँ परमेसर की आग्या ने टाळ देवो हो।

⁷हो कपटी मनकाँ, परमेसर का आड़ीऊँ बोलबावाळा थाँका वाते सइस क्यो हे के,

⁸“‘ईं लोग होटऊँ तो मारो मान राके हे, पण अणाको मन माराऊँ घणो छेटी हे।

⁹अन ईं बेकार में मने माँने हे, काँके ईं मनकाँ का रिति-रिवाज ने मारा उपदेस बणान हिकावे हे।’”

¹⁰तद्याँ ईसू लोग-बागाँ ने आपणाँ नके बलान वाँकाऊँ क्यो, “हुणो अन हमज्यो।

¹¹ज्यो मुण्डा में जावे हे, वो मनकाँ ने असुद ने करे, पण ज्यो मुण्डाऊँ निकळबावाळा बुरा सबदइस वींने वटाळ देवे हे।”

¹²तद्याँ चेला आन वाँकाऊँ क्यो, “कई थूँ जाणे हे के, फरीसियाँ ने थाँकी आ बात घणी बुरी लागी हे?”

¹³तद्याँ ईसू क्यो, “जणी रूँकड़ा ने मारा हरग का बापू परमेसर ने लगायो, वो उकाड़्यो जाई।

¹⁴वाँने जाबा दो, वीं तो आंदा का आंदा नेता हे अन आंदो यद्याँ आंदा ने गेलो बतावे, तो दुई खाड़ा में पड़ जई।”

¹⁵ओ हुणन पतरस वाँकाऊँ क्यो, “वणी असुद बात को अरत माने हमजा दो।”

¹⁶ईसू क्यो, “कई थाँ भी आलतरे ने हमज्या हो?

¹⁷कई थें ने जाणो हो? मुण्डाऊँ खई तकी चिजाँ मन में ने जावे, पेट में जावे अन पछे पेटऊँ बारणे निकळ जावे हे।

¹⁸पण ज्यो कुई मुण्डाऊँ निकळे हे, वो मनऊँ निकळे हे अन वोईस मनक ने असुद करे हे।

¹⁹काँके मनऊँ खराब बच्यार, हत्या, पराई लगाई का हाते हूँगला काम, कुकरम, चोरी, जूटी गवई अन परमेसर की बुरई निकळे हे।

²⁰ईंस बाताँ हे, ज्यो मनक ने वटाळ देवे हे। पण हात धोया बना खाणो जीमणो मन ने असुद ने करे हे।”

²¹ईसू ऊठेऊँ निकळन, सूर अन सेदा का परदेस का आड़ी पराग्या।

²²वीं परदेसऊँ एक लुगई अई ज्या कनानी जात की ही अन वाँ कल्ड़ो हाका-भार मेलन केबा लागी, “हो परबू जी! दाऊद का पूत, मारा पे दया कर! मारी बेटी ने हुगली आत्मा घणी सता री हे।”

²³पण ईसू वींने कई जवाब ने दिदो। तद्याँ वाँका चेला आन वींऊँ अरज करबा लागा, “ईंने जाबा का वाते किदो, काँके वाँ आपणाँ पाच्छे हाका-भार मेलती तकी आरी हे।”

²⁴वाँकाणी जवाब दिदो, “इजराएल का परवार का गमाणा तका गारा ने छोड़न मूँ किंका नके ने खन्दायो ग्यो हूँ।”

²⁵पण वाँ अई, अन ईसू के पगाँ पड़न केबा लागी, “ओ परबू जी, मारी मदत करो।”

²⁶ईसू जवाब दिदो, “छोरा-छोरी की रोट्याँ गण्डकड़ा का मुण्डागे फेंक देणी हव बात कोयने।”

²⁷वाँकाणी क्यो, “हाँची वाते हे परबू जी, पण गण्डकड़ा भी चुर चार अन हेटाड़ो खावे हे। ज्यो वाँका मालिक का टेबुलऊँ हेठे पड़े हे।”

²⁸ईंपे ईसू वींने जवाब दिदो, “हे नारी, थाँरो विस्वास मोटो हे। जस्यान थूँ छावे हे, थाँरा वाते वस्यानीस वेवे।” अन वींकी छोरी वणीस दाण हव वेगी।

²⁹ईसू वटेऊँ गलील समन्द का नके आयो, अन मंगरा पे चड़न बेटग्यो।

³⁰तद्याँ लोगाँ का टोळा का टोळा वाँका नके आया। वीं आपणाँ हण्डे लुला, लंगड़ा, आंदा, बोबड़ा अन नरई दूजाँ घणा माँदा मनकाँ ने वाँका नके लाया, अन वाँका पगाँ में नाक दिदा, अन वाँकाणी वींने हव किदा।

³¹जद्याँ लोग-बागाँ ओ देक्यो के, बोबड़ा बोले हे, लुला हव वेरिया हे, लंगड़ा चाले हे, अन आंदा देके हे तो अचम्बो करन इजराएल का परमेसर की मेमा किदी।

³²ईसू आपणाँ चेला ने बलाया अन क्यो, “मने अणा लोगाँ पे बाळ आवे हे, काँके वीं तीन दनाऊँ आपणाँ हाते हे अन वाँका नके कई खाबा को कोयने हे। मूँ वाँने भूका जाबा देणो ने छावूँ हूँ, कटे अस्यान ने वेजा के, वीं गेला मेंईस थाकन रेटे पड़ जावे।”

³³चेला वींने क्यो, “माँने ईं हुन्ना कांकड़ में कटूँऊँ अतरी रोट्याँ मली के, माँ अतरी मनकाँ ने धपावा?”

³⁴ईसू वाँकाऊँ पूँछ्यो, “थाँका नके कतरी रोट्याँ हे?” वाँकाणी क्यो, “हात, अन थोड़ीक फोरी माछळ्याँ हे।”

³⁵अन वाँकाणी लोगाँ ने जमीं पे पंगतऊँ बेटबा को हुकम दिदो।

³⁶अन ईं हात रोट्याँ अन माछळ्याँ लिदी, अन धन्नेवाद करन तोड़ी अन आपणाँ चेला ने देतो ग्यो, चेला लोग-बागाँ ने देता रिया।

³⁷ईं तरिया हाराई मनक खाणो खान धापग्याँ अन पछे बंची तकी रोट्याँ ने भेळी करन हात ठोपला भरिया।

³⁸खाबावाळी लुगायाँ अन छोरा-छोरी ने छोड़न च्यार हजार मनक हा।

³⁹तद्याँ वो लोगाँ की टोळी ने हिक देन नाव में चड़ग्या अन मगदन देस की हीमा में आयो।