Read Mewari मत्ती 2 Bible Online

मत्ती 2 - Mewari bible

मत्ती 2

¹हेरोदेस राजा का राज करबा की टेम में जद्याँ यहूदियाँ परदेस का बेतलेम नगर में ईसू को जनम व्यो, तो उगमणी दसाऊँ नरई ज्योतिसी माराज यरूसलेम में आन यो पूँछबा लागा के,

²“यहूदियाँ को राजा, ज्यो जनम्यो हे वो कटे हे? काँके माँकाणी उगमणी दसा में वींको तारो देक्यो अन वींने नमस्कार करबा ने आया हा।”

³यो हुणन राजा हेरोदेस अन वाँकी लारे यरूसलेम का नरई मनक घबराग्या।

⁴तद्याँ वणी राजा हारई मोटा याजकाँ अन मूसा का नेमा ने हिकाबावाळा ने बलाया अन वाँकाऊँ पूँछ्यो, “मसी को जनम कटे वेणो छावे?”

⁵वणा क्यो, “यहूदियाँ परदेस का बेतलेम नगर में, काँके परमेसर का आड़ीऊँ बोलबावाळा अस्यान लिक्यो हे के,

⁶“‘हो यहुदया के बेतलेम नगर का मनकाँ, थाँको नगर दूँजा नगराऊँ कम ने हे, काँके अटाऊँ एक मनक राजा बणी। जो इजराएल में रेबावाळा मारा मनकाँ की आगेवाणी करी।’”

⁷तो हेरोदेस छानेऊँ ज्योतिसी माराजा ने बलान पूँछ्यो के, तारो कणीक दाण दिक्यो हो?

⁸वणी वाँने यो केन बेतलेम खन्दाया के, “जावो, वीं बाळक का बारा में सई-सई पतो करो। अन जद्याँ वो लाद जावे तो मने हमच्यार करज्यो, ताँके मूँ भी आन वींने नमस्कार करूँ।”

⁹वीं राजा की बात हुणन पराग्या अन ज्यो तारो वाँने उगमणी दिसा में दिक्यो, वो भी वाँकी लारे-लारे चालबा लागो अन जटे बाळक हो, वटे पोछन ढबग्यो।

¹⁰वीं तारा ने देकन घणा राजी व्या।

¹¹वीं वणी घरे ग्या, जटे बाळक ने वींकी बई मरियम की लारे देक्यो अन गोडा टेकन वींको नमस्कार किदो। आपणी — आपणी जोळ्या खोलन वींने होना, लोबान अन अंतर भेंट किदा।

¹²परमेसर वाँने हपना में हेंचेत किदा के, हेरोदेस के नके पाच्छा मत जाज्यो, तो वे दूजाँ गेलाऊँ आपणे देस पराग्या।

¹³वणा जोतिसी माराज के पाच्छा जाबा केड़े, परबू को एक हरग-दुत युसुप ने हपना में दिक्यो अन वींने क्यो, “उठ, बाळक अन वींकी माँ ने लेन मिसर नाम का देस में परोजा अन जतरे मूँ थने ने कूँ, वतरे वटेई रिज्ये। काँके हेरोदेस ईं बाळक ने होदरियो हे के, वींने मरबा नाके।”

¹⁴तद्याँ वो रात नेई उटन बाळक अन वींकी माँ ने लेन मिसर देस के वाते निकळ्ग्यो।

¹⁵अन जतरे हेरोदेस ने मरियो वतरे वटेईस रियो, ईं वाते के, वो बचन ज्यो परमेसर का आड़ीऊँ बोलबावाळा क्यो हो वो पूरा वेवे के, “में आपणाँ पूत ने मिसरऊँ बारणे बलायो।”

¹⁶जद्याँ हेरोदेस यो देक्यो के, ज्योतिसी माराज वींकी लारे धोको किदो हे, तो वो रीस में आग्यो अन आदेस देन मनकाँ ने खन्दान, ज्योतिसी माराज क्यो वीं टेम के, लगे-भगे का जनम्याँ बेतलेम अन वींकी अड़े-भड़े का गामड़ा का हाराई दो वर तईं का बाळकाँ ने मरबा नाक्या।

¹⁷तद्याँ ज्यो बचन यरमिया नाम का परमेसर का आड़ीऊँ बोलबावाळे क्यो हो वो पूरा व्यो के,

¹⁸“रामाह नगर में एक दुक भरी अवाज हुणई गी, अवाज रोणो-धोणो अन हाका-भार की ही, राएल आपणाँ बाळकाँ का वाते रोरी ही, अन छानी भी ने रेणी छारी ही, काँके वींका हाराई बाळक अबे ने रिया हा।”

¹⁹हेरोदेस के मरिया केड़े परबू के हरग-दुत मिसर में युसुप के हपना में आन क्यो, “उठ, अन बाळक अन वींकी माँ ने लेन इजराएल देस में परोजा, काँके ज्यो बाळक ने मारणो छातो हो, वो तो मरग्यो हे।”

²¹तो पछे युसुप उट्यो अन बाळक अन वींकी माँ ने लेन इजराएल देस में आग्यो।

²²पण, युसुप यो हुणन के अरखिलाउस आपणाँ बाप हेरोदेस की जगाँ राज कररियो हे, तो वो वटे जाबाऊँ दरपग्यो, पछे पाच्छी हपना में परमेसर की आग्या हुणन गलील परदेस में परोग्यो।

²³अन नासरत नाम का नगर में घर बणान रेवा लागग्यो, अस्यान वो बचन पूरो व्यो, ज्यो नरई परमेसर का आड़ीऊँ बोलबावाळा क्यो हो, “वो नासरी नामऊँ जाण्यो जई।”