Read Mewari मत्ती 28 Bible Online

मत्ती 28 - Mewari bible

मत्ती 28

¹आराम का दन का केड़े हपता का पेले दन दितवार ने भाग-फाट्याँ मरियम मगदलीनी अन दूजी मरियम कबर में ईसू ने देकबा अई।

²अन वटे अणाचेत को एक मोटो भूकम आयो, काँके परबू को एक दूत हरगऊँ आयो अन वाँका नके आन वो भाटो तोकन हरका दिदो, अन वींपे बेटग्यो।

³वींको रूप विजळी का जस्यान अन वाँका गाबा बरप का जस्यान धोळा-फट हा।

⁴वींकी दरपऊँ कबर की रुकाळी करबावाळा धुंज ग्या अन मरिया तका के जस्यान वेग्या।

⁵तद्याँ हरग-दुत वणा लुगायाऊँ क्यो, “दरपो मती, मूँ जाणूँ हूँ के, थाँ ईसू ने ज्यो हूळी पे चड़ायो ग्यो हो वींने होदो हो।

⁶वो अटे ने हे, पण आपणाँ बचना का बताया जस्यान जी उट्यो हे। आवो, वा जगाँ देको, जटे वींकी लास राकी ही।

⁷अन जट जावो अन वींका चेलाऊँ केवो के, ‘वो मरिया तका मूँ जी उट्यो हे, अन वो थाँका हाराऊँ पेल्या गलील जावे हे, वटे वींको दरसण पावो!’ देको, में थाँकाऊँ के दिदो, वींने आद राकज्यो।”

⁸वीं लुगायाँ दरपी तकी अन आणन्द का हाते कबर पूँ वाँका चेला ने हव हमच्यार देबा का वाते दोड़न गी।

⁹तद्याँ अणाचेत का ईसू वाँने मल्यो अन क्यो, “थाँने सान्ती मले।” वीं वाँका नके आन वाँके पगा पड़गी अन वाँकी मेमा करबा लागी।

¹⁰तद्याँ ईसू वाँने क्यो, “दरपो मती। मारा भायाँ ने जान केवो के, वीं गलील परा जावे, वीं मने वटेईस देकी।”

¹¹वीं लुगायाँ गेला मेंईस ही अन रुकाळी करबावाळा मूँ कुई नगर में आन हारई हाल मुक्य याजकाँ ने बता दिदो।

¹²तद्याँ वाँकाणी दाना यहूदी नेता का हाते भेळा वेन सला किदी अन रुकाळी करबावाळा ने नरई रिप्या देन,

¹³वाँने क्यो के, “वीं मनकाँ ने केवे के, ‘जद्याँ माँ राते हूरिया हाँ, तो वाँका चेला आन वींकी लास चुरा लेग्या।’

¹⁴अन यद्याँ आ बात हाकम का नके जई, तो माँ वींने हमजा देवा अन थाँने अणी आपतऊँ बंचा लेवा।”

¹⁵ईं वाते, वणा रिप्या लेन जस्यान हिकायो हो, वस्यानीस किदो। आ बात आज तईं यहूदी लोगाँ अणीस तरियाँ फेली तकी हे।

¹⁶पछे ईसू का ग्याराई चेला गलील में वीं मंगरा पे ग्या, जटे जाबा का वाते ईसू वाँने क्यो हो।

¹⁷वणा वटे ईसू को दरसण पान हाता-जोड़ी किदी, पण कणी कणी ने तो मन में भेंम व्यो।

¹⁸पछे ईसू वाँका नके आन क्यो, “हरग अन धरती को हारोई अदिकार मने दिदो तको हे।

¹⁹ईं वाते जावो, अन हाराई देसा का लोगाँ ने चेला बणावो अन बापू, पूत अन पुवितर आत्मा का नामऊँ बतिस्मो दो,

²⁰अन वाँने हारी बाताँ ज्यो में थाँने क्यो हो, वाँने मानबा हिकावो। आद राकज्यो, मूँ दनियाँ का अंत तईं हमेस्यान थाँका हाते हूँ।”