Read Mewari मत्ती 3 Bible Online

मत्ती 3 - Mewari bible

मत्ती 3

¹वाँ दनाँ में बतिस्मा देबावालो यहुन्नो यहूदियाँ परदेस का हुन्ना काँकड़ में आयो,

²अन परच्यार करबा लागो, “पापऊँ मन फेरो, काँके हरग को राज[3] आबावाळो हे।”

³यो यहुन्नो वोईस हो जिंका वाते परमेसर का आड़ीऊँ बोलबावाळे यसाया बताते तके क्यो हो के, “हुन्ना काँकड़ में एक बोलबावाळा को हाको हुणारियो हो के, ‘परबू को गेलो त्यार करो अन वींकी हड़क हुदी करो।’”

⁴यहुन्नो का गाबा ऊँट की ऊन का बण्या तका हा अन वणी कमर में खालड़ा को कमरपट्यो बांद मेल्यो हो। टिड़्या अन हुन्ना काकड़ को हेंत वींको खाणो हो।

⁵तद्याँ यरूसलेम अन हाराई यहूदियाँ का मनक अन यरदन नंदी का अड़े-भड़े का मनक वींका नके आन अगेटा व्या।

⁶वाँकाणी आपणाँ पापाँ ने मान्याँ अन यरदन नंदी में यहुन्ने आपणाँ हाताऊँ वाँने बतिस्मो दिदो।

⁷जद्याँ यहुन्ने यो देक्यो के, नरई फरीसी अन सदुकी[4] वाँका नके बतिस्मो लेबा ने आरिया हे तो वणी वाँकाऊँ क्यो, “ओ, हाँप का बच्या। थाँने कणी हेंचेत कर दिदा हे के, थाँ परमेसर की आबावाळी रीसऊँ बंच निकळो?

⁸थाँने ईं बात को परमाण देणो पड़ी के, हाचेई थाँका मन बदल्या हे के कोयने।

⁹अन आपणाँ-आपणाँ मन में यो ने होचो के, ‘आपीं अबराम का बंसज हा’ काँके, मूँ थाँकाणी केवूँ हूँ के, परमेसर अबराम का वाते अणा भाटाऊँ भी बाळक पेदा कर सके हे।

¹⁰अबे रूँकड़ा की जड़ा में कराड़ो मेल दिदो ग्यो हे अन ज्यो हव फल ने देवे हे वाँने काट दिदा जाई।

¹¹मूँ तो थाँने मन फेरबा का वाते पाणीऊँ बतिस्मो दूँ हूँ पण वीं ज्यो मारा केड़े आबावाळो हे, वो माराऊँ भी हेलो मोटो हे। मूँ तो वाँका पगरख्याँ का कसणा खोलबा के जोगो भी ने हूँ। वो थाँने पुवितर आत्मा अन वादीऊँ बतिस्मो देई।

¹²वींका हाताँ में वींको हुपड़ो हे जणीऊँ वो धानऊँ हुंकला ने अलग करी अन आपणाँ खेत मेंऊँ होजा किदो तका गव भेळा करन, कोठा में भरी अन हुंकला ने वीं वादी में बाळी, ज्याँ कदी ने बजे हे।”

¹³वीं टेम ईसू गलीलऊँ चालन यरदन नंदी का कनारे यहुन्ना का नके बतिस्मो लेबा ने आया।

¹⁴पण यहुन्ने ईसू ने रोकता तके क्यो के, “मने तो खुद थाँराऊँ बतिस्मो लेबा की जरूत हे, तो पछे थूँ मारा नके काँ आयो हे?”

¹⁵ईसू वींने क्यो, “अबाणू तो अस्यानीस वेबा दे। माने ज्यो परमेसर छावे हे वींने पूरो करबा का वाते योईस करणो हे।” तद्याँ यहुन्ने वींकी बात मान लिदी।

¹⁶अन तद्याँ ईसू बतिस्मो लिदो अन जस्यानी वो पाणीऊँ बारणे आयो तो आकास खुलग्यो अन वणी परमेसर की आत्माने एक परेवड़ा का जस्यान रेटे उतरती अन आपणाँ माता पे आती देकी।

¹⁷तद्याँ आ आकासवाणी वी के, “यो मारो लाड़लो पूत हे, जणीऊँ मूँ घणो राजी हूँ।”