Read Mewari मत्ती 4 Bible Online

मत्ती 4 - Mewari bible

मत्ती 4

¹ईंका केड़े पुवितर आत्मा ईसू ने हुन्ना कांकड़ में लेगी, ताँके सेतान का हाताऊँ वींकी जाँच-परक किदी जा सके।

²चाळीस रात-दन भुको रिया केड़े ईसू ने जोरकी भूक लागी।

³तो वींकी परक करबावाळो वींका भड़े आयो अन क्यो, “यद्याँ थूँ परमेसर को पूत हे तो अणा भाटा ने के, ईं रोट्याँ बण जावे।”

⁴ईसू क्यो, “सास्तर में ओ लिक्यो हे के, “‘मनक बेस रोट्याऊँईस ने जीवे हे पण हरेक बचनऊँ जीं परमेसर का मुण्डाऊँ निकळे हे, जीवतो रेई।’”

⁵पछे सेतान वींने पुवितर नगर यरूसलेम में लेग्यो। वटे मन्दर का हाराऊँ ऊँचा गुम्बद पे ऊबो किदो।

⁶पछे सेतान वणीऊँ क्यो, “यद्याँ थूँ परमेसर को पूत हे तो अटेऊँ रेटे कुद जा, काँके सास्तर में ओ लिक्यो हे, “‘वीं थारी हार-हमाळ का वाते हरग-दुताँ ने खन्दाई अन वीं थने हातु-हात तोक लेई ताँके थाँरा पगाँ के भाटा की ने लाग जावे।’”

⁷ईसू वींने क्यो, “पण सास्तर यो भी केवे हे के, “‘थूँ आपणाँ परबू परमेसर की परक मती कर।’”

⁸ईंका केड़े सेतान ईसू ने हाराऊँ ऊँचा मंगरा पे लेग्यो अन वाँने दनियाँ का हाराई राज अन मानता बताई।

⁹सेतान वींने क्यो, “ईं हारई चिजाँ थने दी देवूँ यद्याँ थूँ मारा पगा में पड़न मने माने।”

¹⁰पछे ईसू वींने क्यो, “हे सेतान, छेटी वेजा। सास्तर यो केवे हे, “‘थूँ आपणाँ परबू परमेसर ने मान अन बेस वाँकीईस सेवा-चाकरी कर।’”

¹¹पछे सेतान ईसू ने छोड़न भागग्यो अन हरग-दुत आन वाँकी सेवा-चाकरी करबा लागा।

¹²जद्याँ ईसू हुण्यो के, यहुन्नो पकड़ाग्यो हे, तो वो गलील में परदेस परोग्यो।

¹³पण वो नासरत नगर में ने रियो अन जान कफरनूम नगर में, ज्यो जबलुन अन नप्ताली हाकम का देस में गलील समन्द का अड़े-भड़े हो, वटे रेवा लागो।

¹⁴यो ईं वाते व्यो, ताँके परमेसर का आड़ीऊँ बोलबावाळा यसाया ज्यो क्यो हो वो पूरो वेवे के,

¹⁵“जबलुन अन नप्ताली का देस समन्द का गेला पे, यरदन नंदी का आतमणी दसा में, ज्यो यहूदी ने हे वाँका देस गलील में।

¹⁶ज्यो लोग अंदारा में जीरिया हा वाँकाणी एक मोटो ऊजासो देक्यो अन ज्यो मोत की दरप में जीरिया हा, वाँका पे भाग फाट्या को उजितो चमके।”

¹⁷वीं टेमऊँ ईसू हव हमच्यार की सरुआत कर दिदी के, “पापऊँ मन फेरो, काँके हरग को राज आबावाळो हे।”

¹⁸जद्याँ ईसू गलील का समन्द का नके वेन जारियो हा। वटे वणा दो हगा भई समोन ज्यो पतरस केवातो हो अन वींका भई अन्दरियास ने समन्द में आपणाँ जाळ नाकता तका देक्या। काँके वीं माछळी पकड़बावाला हा।

¹⁹ईसू वाँने क्यो, “मारा पाच्छे आवो, मूँ थाँने हिकाऊँ के, लोगाँ का वाते माछळी पकड़बा के वजे मनकाँने परमेसर का राज में कस्यान लावे हे।”

²⁰वीं तरत आपणाँ जाळ वटेई छोड़न ईसू का लारे वेग्या।

²¹पछे वी वटेऊँ आगे चाल पड़्या अन वणा देक्यो के, जबदी को छोरो याकूब अन वींको भई यहुन्नो आपणाँ बाप जबदी का हाते नाव में बेट्यो तको आपणी जाळाँ ने हळजारिया हा। ईसू वाँने भी बलाया।

²²अन वीं तरत नाव अन आपणाँ बापू जब्दी ने वटेई छोड़न वींका पाच्छे वेग्यो।

²³ईसू हाराई गलील देस में यहुदया का परातना घर में हरग का राज को हव हमच्यार को उपदेस देतो अन तरे-तरे का रोगा ने हव करतो तको फरबा लागो।

²⁴हाराई सिरिया देस में वाँको हव हमच्यार फेलग्यो। ईं वाते लोग अस्या हाराई मनकाँ ने ज्यो तरे-तरे की मांदकीऊँ माँदा हा, जणामें हुगळी-आत्मा, जाँने मरगी का जोला आता हा, अन जीं लकवा का माँदा हाँ, वाँने ईसू का नके लाया अन ईसू वाँने हव किदा।

²⁵ईं वाते गलील देस, दस नगराँ को गामाँ की जगाँ जिंने दिकापुलिस केता हा, यरूसलेम, यहूदियाँ अन यरदन नंदी की पेले पाल्डे का मनकाँ की मोटी-मोटी टोळी वाँका नके आबा लागी।