Read Mewari मरकुस 1 Bible Online

मरकुस 1 - Mewari bible

मरकुस 1

¹परमेसर का पूत ईसू मसी[1] का हव हमच्यार की सरुआत।

²जस्यान यसाया परमेसर का आड़ीऊँ बोलबावाळे लिक्यो हे, “देक, मूँ आपणाँ दूत ने थाँरा आगे खन्दाऊँ, ज्यो थाँरा वाते गेलो हुदो करी

³हुन्ना काँकड़ में एक बोलबावाळा को हाको हुणारियो हो के, ‘परबू को गेलो त्यार करो अन वींकी हड़क हुदी करो।’”

⁴यहुन्नो हुन्ना काँकड़ में बतिस्मा देतो अन परच्यार करतो तको आयो अन केतो हो के, “पापऊँ मन फेरो अन बतिस्मो लो, जणीऊँ परमेसर थाँका पाप माप करी।”

⁵यहूदी परदेस अन यरूसलेम नगर का नरई मनक वींका नके उपदेस हुणबा वाते ग्या। जणा आपणाँ पाप ने मान लिदा वाँने वणी यरदन नंदी में बतिस्मो दिदो।

⁶यहुन्नो ऊँट की ऊन का बण्या तका गाबा पेरतो अन कमर पे खालड़ा को पट्टो बंद्‍यो राकतो हो। वो हुन्ना काँकड़ में टिड़्या अन माक्याँ को हेंत खातो हो।

⁷वो ईं बात को परच्यार करतो के, “मारा पाच्छे एक मनक आबावाळो हे, ज्यो माराऊँ भी घणो मोटो हे, मूँ वींके अतरो भी लायक कोयने के, वींकी पगरख्याँ खोल सकूँ।

⁸मूँ थाँने पाणीऊँ बतिस्मो देऊँ, पण वो थाँने पुवितर आत्माऊँ बतिस्मो देई।”

⁹वाँ दनाँ अस्यी बात वी के, ईसू गलील का नासरत नगरऊँ आया अन वणा यरदन नंदी में यहुन्ना नकूँ बतिस्मो लिदो।

¹⁰जस्यानी पाणीऊँ बारणे निकळ्या तो, वणा देक्यो के, आकास खुल्यो तको अन परमेसर की आत्मा परेवड़ा की जस्यान वींका ऊपरे उतरी।

¹¹पछे हरगऊँ अवाज अई के, “थूँ मारो लाड़लो बेटो हे अन मूँ थाँराऊँ घणो राजी हूँ।”

¹²पछे तरत परमेसर की आत्मा वींने हुन्ना काँकड़ में खन्दा दिदो,

¹³जटे चाळी दनाँ तईं सेतान वींकी जाँच-परक करतो रियो। वटे वीं हुन्ना काँकड़ का जनावराँ का लारे हा अन हरग-दुत वाँकी सेवा-चाकरी करता हाँ।

¹⁴ईंका केड़े जद्याँ यहुन्ना ने जेळ में बन्द कर नाक्यो हो, पछे ईसू गलील में आया अन वटे परमेसर का हव हमच्यार को परच्यार करबा लागा।

¹⁵वाँकाणी क्यो, “अबे टेम पुरी वेगी हे अन परमेसर को राज आरियो हे। थाँ मन बदलो अन परमेसर का हव हमच्यार पे विस्वास करो।”

¹⁶जद्याँ ईसू गलील समन्द के नके वेन निकळरया हाँ, तो वाँ समोन अन वींका भई अन्दरियास ने समन्द में आपणी जाळ बिछाता तका देक्या, काँके वीं दुई माछळ्याँ पकड़बावाळा हाँ।

¹⁷तो ईसू वाँने क्यो, “थाँ मारी लारे आवो, मूँ थाँने परमेसर का राज में मनकाँ ने लाबावाळा बणा देऊँ।”

¹⁸तो पगईं वीं दुई जणा आपणो जाळ छोड़न ईसू का लारे वेग्या।

¹⁹पछे थोड़ाक आगे जान ईसू जब्दी का छोरा याकूब ने अन वींका भई यहुन्ना ने देक्यो। वीं दुई आपणी नाव में जाळाँ ने हळजारिया हा।

²⁰वाँकाणी तरत वाँने बलाया, तो वीं दुई आपणाँ बापू जब्दी ने दानक्याँ का हाते नाव मेंईस छोड़न ईसू का लारे ग्या।

²¹अन वे हंगळा कफरनूम नगर में ग्या, पछे आगले आराम[2] के दन ईसू यहूदियाँ का परातना घर में पूग्या अन मनकाँ ने उपदेस हुणाबा लागा।

²²वाँका उपदेस हुणन लोग-बाग घणा अचम्बा में पड़ग्या, काँके वे मूसा का नेमा ने हिकाबावाळा के जस्यान ने, पण हकऊँ उपदेस देरिया हा।

²³वटे वीं यहूदी परातना घर में एक अस्यो मनक भी हो, जिंमें हुगली आत्मा धस्यी तकी ही, तो वो जोरऊँ हाको करन बोल्यो,

²⁴“हे, नासरत का ईसू, थूँ मारा नकूँ कई छावे हे? कई, थूँ मारो नास करबा ने आयो हे? मूँ थाँने जाणूँ हूँ के, थूँ कूण हे, थूँ परमेसर को पुवितर मनक हे।”

²⁵तो ईसू वींने तापड़न क्यो, “छानी रे अन ईंमूँ बारणे निकळजा।”

²⁶पछे वा हुगली आत्मा वीं मनक ने धधूणियो अन जोरको हाको करन बारणे निकळगी।

²⁷हारई जणा अचम्बा में पड़ग्या अन अतरो अचम्बो व्यो के, वे एक-दूँजा ने पूँछबा लागा, “यो कई हे? यो कई नुवो उपदेस हे? वो हकऊँ हुगली आत्माने आदेस देवे अन वा आत्मा वींने भी माने हे।”

²⁸अणीऊँ गलील अन वींका अड़े-भड़े की हारी जगाँ में ईसू को नाम तरत फेलग्यो।

²⁹पछे ईसू अन वींका चेला परातना घरऊँ निकळन याकूब अन यहुन्ना की लारे समोन अन अन्दरियास का घरे ग्या।

³⁰समोन का हवजी हुता हा, काँके वाँने ताव आरियो हो। जद्याँ ईसू वटे आया तो वाँने वाँका बारा में बतायो ग्यो।

³¹तो ईसू वाँका नके ग्या अन हात पकड़न वाँने बेटा किदा, तो तरत वाँको ताव उतरग्यो अन वीं वाँकी सेवा-चाकरी करबा लागग्या।

³²दन आत्याँ केड़े, जद्याँ हाँज पड़गी, तो वटा का मनक हंगळा हुगली आत्माऊँ दकी अन मान्दा मनकाँ ने वाँका नके लाया।

³³गाम का हारई मनक वाँका घर का बारणे आग्या।

³⁴वाँ घणा जणा ने नरी मांदकीऊँ हव किदा अन नरई जणा मूँ हुगली आत्माने बारणे काड़ी। ईसू वणा आत्माने कई ने केबा दिदो, काँके वी वाँने जाणती ही।

³⁵भाग-फाट्याँईं जद्याँ अन्दारो हो, ईसू उटन घरऊँ हून्नी जगाँ में पराग्या, जटे वणा परातना किदी।

³⁶पण, समोन अन वींकी लारे का हण्डाळ्याँ वींने हमाळबा निकळ्या

³⁷अन वाँने हमाळन क्यो, “हंगळा जणा थाँने होदरिया हे।”

³⁸पण ईसू वाँने क्यो, “आपाँने अड़े-भड़े का गामाँ में भी जाणो छावे, अन वटे भी परच्यार करा, काँके मूँ ईं काम वातेईस आयो हूँ।”

³⁹तो अस्यान वीं गलील में हंगळी जगाँ यहूदियाँ का परातना घर में परच्यार करता अन मनकाँऊँ हुगली आत्माने बारणे निकाळता रिया।

⁴⁰पछे एक कोड़यो[3] मनक ईसू नके आयो। वो वाँका हामे धोग देन क्यो, “यद्याँ थाँ छावो, तो मने हव कर सको हो।”

⁴¹वींने वींका पे दया अई अन वणा आपणो हात लाम्बो करन वींके अड़ायो अन क्यो, “मूँ छावूँ के, थूँ हव वेजा।”

⁴²अन वींने तरत कोड़ऊँ छुटकारो मलग्यो अन वो पुरी तरियाऊँ हव वेग्यो।

⁴³ईसू वींने कड़ी चेतावणी देन क्यो, “देक, ईं बात का बारा में थूँ दूजाँ ने मत बताज्ये, पण याजक का नके जा अन आपणे आप ने बतान मूसा का नेमाऊँ आपणे सुद वेबा की भेंट चड़ाज्ये, ताँके दूजाँ ने भी थारे हव वेबा को सबूत मल सके।” पछे ईसू वींने पगईं खन्दा दिदो।

⁴⁴

⁴⁵पण, वो बारणे जान चोड़े-धाड़े ईं बात को परच्यार करबा लागो। ईं वाते ईसू कदी नगर में चोड़े-धाड़े ने जा सक्या, पण वीं हून्नी जगाँ में रेरिया हा अन मनक हर कटूँई वाँका नके आता रिया।