Read Mewari मरकुस 15 Bible Online

मरकुस 15 - Mewari bible

मरकुस 15

¹जस्यानी भाग-फाट्याँ वणा मुक्य याजकाँ, मूसा का नेमा ने हिकाबावाळा, दाना यहूदी नेता अन हारी यहूदी महासबा एक सला किदी। वे ईसू ने बाँदन लेग्या अन वींने पिलातुस ने हूँप दिदो।

²पिलातुस वींने पूँछ्यो, “कई, थूँ यहूदियाँ को राजा हे?” ईसू जबाव दिदो, “अस्यान थूँ केरियो हे।”

³पछे मुक्य याजकाँ वींपे नरई दोस लगाया।

⁴पिलातुस वींने दूजी दाण पूँछ्यो, “कई, थने जबाव ने देणो हे? देक, वे कतरी बाताँ को थाँरा पे दोस लगारिया हे।”

⁵पण, ईसू अबे भी कई जबाव ने दिदो। ईं बात पे पिलातुस ने घणो अचम्बो व्यो।

⁶हारई फसे का तेवार पे कस्याई बन्दी ने छोड़बा की एक रीत ही, जिंने लोग छाता हाँ, वाँका वाते पिलातुस वींने छोड़ देतो हो।

⁷वीं टेम बरब्बा नाम को एक बन्दी, वो दंगो करबावाळा का हाते जेळ में हो, जणी लड़ई में लोगाँ की हत्या किदी ही।

⁸लोग आया अन पिलातुसऊँ पूँछबा लागा के, पिलातुस वाँका वाते वस्यानीस करे जस्यान वो वाँका वाते करतो आयो हे।

⁹पिलातुस वाँने पूँछ्यो, “कई, थें छावो हो के, मूँ थाँका वाते यहूदियाँ का राजा ने छोड़ दूँ?”

¹⁰पिलातुस ईं वाते क्यो हो, काँके वो जाणतो हो के, मुक्य याजकाँ ईसू ने रिस्याँ बळता तका वींने हूँपवा वाते पकड़ायो हे।

¹¹पण, मुक्य याजकाँ भीड़ ने ऊँसी दिदी, वीं ईसू की जगाँ वाँका वाते बरब्बा ने छोड़े दे।

¹²पण, पिलातुस लोगाऊँ पाछो पूँछ्यो, “जिंने थें यहूदियाँ को राजा केवो, वींको मूँ कई करूँ बतावो?”

¹³वणा जबाव में हाका करन क्यो, “वींने हूळी पे चड़ा दो।”

¹⁴जदी पिलातुस वाँने पूँछ्यो, “काँ, वे अस्यो कई अपराद किदो?” पण, वाँ मनकाँ ओरुँ कल्ड़ो हाको करन क्यो, “वींने हूळी पे चड़ा दो।”

¹⁵पिलातुस भीड़ ने राजी करणो छातो हो, ईं वाते वे वाँका वाते बरब्बा ने छोड़ दिदो अन ईसू के कोड़ा लगाया अन हूळी पे चढाबा का वाते ने सपायाँ ने हूँप दिदो।

¹⁶पछे सपायाँ वींने रोम का राजपाल के मेल की गवाड़ी में लेग्या। अन लारे का सपायाँ की पुरी फोज बला लिदी।

¹⁷पछे वाँ ईसू ने दरबारी गाबा पेराया अन काँटा को एक मुकट बणान वींका माता पे मेल दिदो।

¹⁸पछे वींकी रोळ करबा के वाते नमस्कार करन केबा लागा, “यहूदियाँ का राजा की जे हो।”

¹⁹वे वींका माता पे लाटी ठोकरिया हा। वे वींपे थूँकरिया अन आगे गोडा टेकन धोग देरिया हा।

²⁰अस्यान जदी वाँकी रोळ करन, वींका दरबारी गाबा उतार्या अन वींने आपणाँ खुद का गाबा पेरा दिदा अन पछे वींने हूळी पे चड़ाबा ने लेग्या।

²¹वाँने कुरेन[15] को रेबावाळो सिमोन नाम को एक मनक गेला में मल्यो, वो गाममूँ नगर में आरियो हो। वो सिकन्दर अन रूपूस को बाप हो। सपायाँ वींने दरपान क्यो के, वो ईसू की हूळी तोकन चाले।

²²पछे वे ईसू ने गलगता नाम की जगाँ पे लेग्या। जिंको मतलब “कपाळ की जगाँ।”

²³जदी वाँ वींने मीर नाम की ओगद मलायो तको खाटा अंगूरा को रस पिबा ने दिदो। पण, वाँकाणी वींने ने पिदो।

²⁴पछे वींने हूळी पे चड़ा दिदो अन वाँका गाबा कूणी लेई, वींका वाते गोट्याँ नाकी।

²⁵हवेर पेल्याँ नो बजी ही, जदी वाँकाणी वींने हूळी पे चड़ा दिदो हो।

²⁶अन वाँको दोसपतर लिकन वाँका ऊपरे लगा दिदो, “यहूदियाँ को राजा।”

²⁷वींकी लारे दो डाकू ने हूळ्याँ पे चड़ाया, एक वींका जीमणा पाल्ड़े अन दूज्यो डावा पाल्ड़े।

²⁸अणीऊँ परमेसर को ओ बचन पूरो व्यो के, वो अपरादिया की लारे गण्यो जाई।[16]

²⁹वींका भड़े निकळता तका लोग-बाग आपणो मातो ठणकान, वींकी नन्दयाँ करन केरिया हा, “हा, हा! थूँईस हे, ज्यो तीन दनाँ में मन्दर ने हल्डान पाछो बणाबावाळो।

³⁰अबे हूळीऊँ रेटे उतर आ अन खुद ने तो बंचा ले।”

³¹अस्यानीस मुक्य याजकाँ अन मूसा का नेमा ने हिकाबावाळा भी ईसू की रोळ किदी अन वीं एक-दूँजा ने केबा लागा, “ओ दूजाँ ने बंचातो हो, पण खुद आपणाँ ने बंचा ने सक्यो।

³²अबे यो मसी ज्यो इजराएल को राजा हे, हूळीऊँ रेटे उतर आवे, तो माँकाणी ओ देकन विस्वास कर सका।” अन वाँ दुयाँ, ज्यो वाँकी लारे हूळ्याँ पे चड़ाया हा, वीं वींकी नन्दया कररिया हा।

³³पछे हारई दनियाँ में दपराँ की बारा बज्याऊँ लेन तीन बज्या तईं अन्दारो रियो।

³⁴दन की तीन बज्या कल्ड़ो हाको करन ईसू क्यो, “इलोई, इलोई, लमा सबकतानी?” ईंको मतलब हे, “हे मारा परमेसर, हे मारा परमेसर, मने थें काँ छोड़ दिदो?”

³⁵ज्यो वाँका भड़े हो, वाँ जदी ओ हुण्यो। तो वे बोल्या, “हुणो, ओ एलिया ने बलारियो हे।”

³⁶जदी एक मनक दोड़न खाटा अंगूरा का रस में डूब्यो तको रुँई को फुम्बो एक कामड़ी में टाँकन लायो अन ईसू ने सूँकवा का वाते दिदो अन क्यो, “रुको, देकाँ ईंने रेटे उतारबा ने एलियो आवे कन ने आवे।”

³⁷पछे ईसू ज्योरऊँ हाको किदो अन जीव छोड़ दिदो।

³⁸तद्याँईस मन्दर को परदो ऊपरेऊँ रेटे तक फाटन दो टुका वेग्यो।

³⁹हो सपायाँ का हाकम, ज्यो ईसू का हामे ऊबो हो, वींने बोलतो तको हुण्यो अन देक्यो के, वींको जीव कस्यान निकळयो। वणी क्यो, “ओ मनक हाँची में परमेसर को पूत हो।”

⁴⁰घणी लुगायाँ छेटीऊँ देकरी ही, जिंमें मरियम मगदलीनी, फोरा याकूब अन योसेस की माँ मरियम अन सलोमी ही।

⁴¹जदी ईसू गलील में हो। तो लुगायाँ वींने मानती अन वींकी सेवा-चाकरी करती, ओरी घणी लुगायाँ ही, ज्यो वींकी लारे यरूसलेम तईं अई ही।

⁴²हाँज पड़गी अन आराम[17] का दन का पेल्याँ को दन त्यारी करबा को दन हो।

⁴³ईं वाते अरमतिया को यूसप आयो। वो यहूदी मासबा को मान्यो तको नेतो हो अन परमेसर का राज के आबा की बाट ज्योतो हो। वो हिम्मत करन पिलातुस का भड़े ग्यो अन ईसू की लास माँगी।

⁴⁴पिलातुस ने घणो अचम्बो व्यो के, वो अतरो वेगो कस्यान मरग्यो। वे सपायाँ का हाकम ने बलायो अन वींने पूँछ्यो, “कई, वींने मरिया ने नरी देर वेगी?”

⁴⁵जदी वे सपायाँ का हाकमऊँ ईसू की मोत का बारा में हुण लिदो, तो यूसप ने ईसू की लास देबा को हुकम दिदो।

⁴⁶पछे यूसप हण का बणया तका गाबा मोल लिदा अन ईसू की लास ने हूळीऊँ रेटे उतारी, वींकी लास ने वी गाबा में पलेट लिदी अन वींने एक कबर में मेल दिदी। वाँ कबर मंगरा ने काटन बणई तकी ही अन पछे कबर का मुण्डा पे एक भाटो हरका दिदो।

⁴⁷मरियम मगदलीनी अन योसेस की माँ मरियम देकरी ही के, ईसू की लास कटे मेली हे।