Read Mewari मरकुस 2 Bible Online

मरकुस 2 - Mewari bible

मरकुस 2

¹थोड़ाक दनाँ पछे ईसू कफरनूम आया, अन वटे आ बात फेलगी के, वो घरे हे।

²पछे वटे अतरा मनक भेळा वेग्या हाँ के, घर का बारणा में पग मेलबा जतरीक जगाँ भी ने री। ईसू वाँने परमेसर को हमच्यार हुणारिया हा।

³वीं टेम में लकवा का माँदा मनक ने च्यार जणा तोकन वटे लाया।

⁴पण, वीं भीड़-भाड़ऊँ वींने ईसू के नके ने लेजा सक्या हा, ईं वाते जटे ईसू बेटा हा, वाँका ऊपरेऊँ केलू-डाडा ने छेटी लेन, हेरा मूँ माचा पे हूँवाणन मनक ने रेटे उतार दिदो।

⁵वाँका ईं विस्वास ने देकन ईसू लकवा का माँदा मनक ने क्यो, “ए मारा बेटा, थाँरा पाप माप वेग्या।”

⁶वीं दाण कुई मूसा का नेमा ने हिकाबावाळा वटे बेटा हा। वे आपणाँ मनईंमन में होचबा लागा के,

⁷“यो मनक अस्यी बाताँ काँ करे हे? यो तो परमेसर की नन्दयाँ करे हे। परमेसर ने छोड़न दूजो कूण पापाँ ने माप कर सके?”

⁸फटाकऊँ ईसू मन में आ बात जाणग्या के, वे लोग मन में कई होचरया हे अन वाँकाणी वाँने क्यो, “थाँ मन में अस्यी बाताँ काँ होचरया हो?

⁹कई लकवा का माँदा ने यो केणो हेल हे के, ‘थाँरा पाप माप वेग्या’, कन अस्यान केणो के ‘उठ, आपणो माचो तोक अन परोजा?’

¹⁰पण, मूँ थाँने ईं बात को सबूत दे सकूँ हूँ के, ईं धरती पे मनक का पूत(ईसू) ने यो पूरो हक हे के, वो पापाँ ने माप कर सके।” पछे ईसू वीं लकवा का माँदा मनक ने क्यो,

¹¹“मूँ थने केवूँ, ऊबो वे, आपणो माचो तोक अन घरे परोजा।”

¹²वो ऊबो व्यो, तरत आपणो माचो तोक्यो अन वाँ हंगळा ने देकतईं देकता वो बारणे परोग्यो। यो देकन हारई जणा अचम्बा में पड़ग्या, अन वाँकाणी परमेसर की बड़ई किदी अन बोल्या, “माँकाणी अस्यी बात कटेई ने देकी।”

¹³पछे ईसू पाच्छा गलील समन्द का कनारे ग्या, अन हंगळी भीड़ वाँका नके आरी ही अन ईसू वाँने उपदेस देबा लागा।

¹⁴चालता तका वणा हलफई का छोरा लेवी ने चुंगी नाका पे बेटो तको देक्यो अन वींने क्यो, “मारा पाच्छे आ” अन लेवी ऊबो व्यो अन वाँका पाच्छे चाल पड़्यो।

¹⁵ईंका केड़े जद्याँ ईसू अन वाँका चेला लेवी का घरे खाणो खारिया हा, तद्याँ नरई चुंगी लेबावाळा अन पापी भी वाँकी लारे खाणो खारिया हा अन वे हंगळा वाँका पाछे-पाछे आया हा।

¹⁶जद्याँ मूसा का नेमा ने हिकाबावाळा ज्यो फरीसी हा वणा देक्यो के, ईसू चुंगी लेबावाळा अन पापी लोगाँ के लारे खाणो खारिया हे, तो वाँका चेलाऊँ क्यो, “ईसू चुंगी लेबावाळा अन पापी लोगाँ की लारे खाणो काँ खावे हे?”

¹⁷ईसू यो हुणन वाँने क्यो, “हव मनक के वाते एलाज करबावाळा की जरूत ने वे, पण माँदा मनक के वाते जरूत वेवे हे। मूँ धरमियाँ ने कोयने, पण पाप्याँ ने बंचाबा आयो हूँ।”

¹⁸जद्याँ यहुन्ना का चेला अन फरीसी एकाणा राकता हा, तो थोड़ाक मनक ईसू का नके आया अन पूँछबा लागा, “यहुन्ना अन फरीसियाँ का चेला काँ एकाणो राके हे अन थाँका चेला एकाणो काँ ने राके?”

¹⁹तो ईं बात पे ईसू क्यो, “जतरे बींदराजा जान्या की लारे हे, वाँने एकाणो राकबा की जरूत हे कई? जतरे बींद वाँकी लारे हे, वीं एकाणो ने राकी

²⁰पण, वीं दन आई, जद्याँ बींद वाँकाऊँ अलग वे जाई, तो वीं एकाणो राकी।

²¹“कुई भी मनक जूना गाबा के, नुवा गाबा की कारी ने लगावे अन जदी लगा भी दे, तो नुवा गाबा की कारी भेळी वेन जूना गाबा ने फाड़ दे अन वो फाट्यो गाबो ओरी हेलो फाट जाई।

²²अन अस्यानीस कुई जूनी मसक में नुवा अंगूरा को रस ने भरे अन जद्याँ कुई यो काम करे, तो नुवा अंगूरा को रस फेलन जूनी मसक ने फाड़ देई अन मसक की लारे अंगूरा को रस भी खराब वे जाई, पण नुवा अंगूरा को रस नुवी मसका मेंईस भरियो जावे हे।”

²³अस्यान व्यो के, आराम के दन ईसू खेता में वेन जारिया हा, अन जाता-जाता वाँका चेला खेताँऊँ गव की ऊम्याँ तोड़बा लागा।

²⁴ईं बात पे फरीसी मनकाँ ईसू ने क्यो, “देको, थाँका चेला आराम के दन अस्यान काँ करे हे? आ बात तो आराम का दन का खिलाप हे।”

²⁵ईंपे ईसू वाँकाऊँ क्यो, “थाँ ने भण्यो के, जद्याँ दाऊद अन वींकी लारे का मनकाँ ने भूक लागी अन खाबा ने कई ने हो, तो वणा कई किदो?

²⁶जद्याँ अबियातार मोटो याजक हो, तद्याँ वो परमेसर का मन्दर में ग्यो अन परमेसर के चड़ई तकी रोट्याँ खादी अन वींकी लारे का मनकाँ ने भी दिदी, ज्यो खाणो रिति-रिवाजऊँ मोटा याजक ने छोड़न दूजाँ ने खा सकता हा।”

²⁷ईसू वाँने यो भी क्यो, “आराम को दन मनकाँ का वाते बणायो ग्यो हे, ने के, मनक आराम का दन का वाते।

²⁸ईं वाते मनक को पूत[4](ईसू) आराम का दन को भी परबू हे।”