Read Mewari मरकुस 6 Bible Online

मरकुस 6 - Mewari bible

मरकुस 6

¹पछे ईसू वीं जगाँ ने छोड़न आपणाँ नगर में पराग्या। वींका चेला भी वींके हाते हा।

²जद्याँ आराम को दन आयो, तो वणा यहूदियाँ का परातना घर में उपदेस देणो सरू कर दिदो। वटे घणा मनक हा, ज्यो वाँकी बाताँ हुणन अचम्बा में पड़ग्या। तद्याँ वीं बोल्या, “ईंने ईं बाताँ कटूँ मली हे? आ कस्यी अकल हे, ज्यो ईंने मली हे? यो अस्या अचम्बावाळा काम कस्यान करे हे?

³कई, यो वो हुतार तो ने हे, ज्यो मरियम को छोरो हे अन कई याकूब, योसेस, यहूदा अन समोन को भई तो ने हे? कई, ईंकी बेना आपणाँ अटे तो ने हे?” ईं वाते वाँ लोगाँ वींने नकार दिदो।

⁴तद्याँ ईसू वाँने क्यो, “कस्या भी परमेसर का आड़ीऊँ बोलबावाळा ने वींको देस हगा-होई अन परवार ने छोड़न, दूजाँ कुई वींको मान ने गटावे हे।”

⁵वटे ईसू कस्याई अचम्बावाळा काम ने कर सक्या, बेस माँदा मनकाँ पे हात राकन हव किदा।

⁶लोगाँ ने विस्वास ने करता देकन ईसू ने घणो अचम्बो व्यो। पछे ईसू गामाँ में ग्यो अन च्यारूँमेर उपदेस देतो रियो।

⁷वणा आपणाँ बाराई चेला ने बलाया अन दो-दो जणा ने बारवास में खन्दाया। वणी वाँने हुगली आत्माने निकालबा को हक दिदो।

⁸अन यो आदेस भी दिदो, “थाँ आपणी लाटी के अलावा ओरी कई मत लिज्यो, ने रोटी, ने जोळी, ने बटवा में रिप्या-कोड़ी।

⁹थें पगरख्याँ तो पेरज्यो, पण दो-दो कुरता हाते मती लेज्यो।”

¹⁰अन अस्यान भी क्यो, “जीं घर में थाँने मान मले वटे अतरीक देर तईं रको, जतरी देर तईं वाँ जगाँ ने छोड़ो।

¹¹जद्याँ कसी जगाँ का मनक थाँने ने माने अन थाँकी बात ने हुणे, तो थाँ वा जगाँ छोड़ दिज्यो अन आपणाँ पगाँ को धूळो वटेई जाटक दिज्यो, तद्याँ या बात वाँका वाते चेतावणी रेई के, वाँका नास को कारण वीं खुदईस हे।”

¹²पछे चेला वटूँ पराग्या अन वणा परच्यार किदो के, “पापऊँ मन फेरो।”

¹³वाँकाणी नरी हुगली आत्माने बारणे निकाळी, नरई माँदा मनकाँ के जेतुन को तेल लगान हव किदा।

¹⁴राजा हेरोदेस ने आ बात को पतो लागग्यो काँके, ईसू को नाम हंगळी जगाँ फेलग्यो हे। कुई मनक तो केरिया हा, “बतिस्मा देबावाळो यहुन्नो मरिया तका मूँ पाछो जीवतो वेग्यो हे। ईं वाते वींमें ईं सगत्याँ चमत्कार कररी हे।”

¹⁵दूजाँ मनक केरिया हा, “वो एलियो हे।” पण, कुई ओरी दूजाँ जणा केरिया हा, “यो पेलाँ का जमाना का परमेसर का आड़ीऊँ बोलबावाळा मूँ कुई एक हे।”

¹⁶जद्याँ हेरोदेस ईं बाताँ हूणी, तद्याँ वो बोल्यो, “यहुन्नो, जिंको मातो में कटवायो, वो पाछो जीवतो वेग्यो हे।”

¹⁷काँके हेरोदेस खुदईस यहुन्ना ने बन्दी बणाबा अन जेळ में नाकबा को आदेस दिदो हो। वणी आपणाँ भई फिलिपुस की लुगई हेरोदियासऊँ ब्याव कर लिदो हो, ईं वाते वणी अस्यो किदो।

¹⁸काँके यहुन्नो हेरोदेस ने केतो हो के, थाँरो आपणाँ भई की लुगईऊँ ब्याव करणो हव बात कोयने हे।

¹⁹ईं बात पे हेरोदियास वींऊँ दसमणी राकबा लागी अन वाँ यो छाती ही के, वींने मरवा नाकूँ। पण, वाँ हेरोदेस का मस अस्यो ने कर सकी।

²⁰हेरोदेस यहुन्नाऊँ दरपतो हो, काँके हेरोदेस जाणतो हो के, यहुन्नो एक खरो अन भलो मनक हो, ईं वाते वो ईंको बचाव करतो हो। हेरोदेस ने यहुन्ना की बाताँ हुणन घबरावणी वेती ही, पण वीं बाताँ वींने घणी भाती भी ही।

²¹आकरी में हेरोदियास ने अस्यो एक मोको मलग्यो, जद्याँ हेरोदेस आपणाँ जनम दन पे मोटा अदिकारी, सेनापत्याँ अन गलील का मोटा-मोटा मनकाँ के वाते एक जीमणो राक्यो।

²²तद्याँ हेरोदियास की छोरी मयने जान असी नाची के वटे जीमण में आया तका हंगळा मेमाना अन हेरोदेस ने घणा राजी किदा। ईं बात पे राजा हेरोदेस वीं छोरी ने क्यो, “थूँ माँग, ज्यो भी चीज थारे छावे, मूँ थने देऊँ।”

²³पछे राजा वींऊँ होगन खान क्यो, “मूँ थने कई भी देबाने त्यार हूँ, अटा तईं के, मारो आदो राज-पाट।”

²⁴ईं बात पे वा बारणे निकळी अन आपणी माँ नके गी अन वींने पूँछ्यो, “मने कई चीज माँगणी छावे?” पछे वींकी माँ बतायो, “बतिस्मा देबावाळा यहुन्ना को मातो।”

²⁵तद्याँ वा तरत दोड़ी अन मयने राजा का भड़े अई अन क्यो, “मूँ छावूँ हूँ के, थाँ मने अबाणूइस बतिस्मा देबावाळा यहुन्ना को मातो कटवान थाळी में मेलन दिदो।”

²⁶ईं बात पे राजा ने घणो दुक व्यो। पण, वो आपणाँ होगन अन जीमणा में आया मेमाना का मस वीं छोरी ने नटणो ने छावतो हो।

²⁷ईं वाते राजा तरत एक जल्‍लाद ने वींको मातो काट लाबा को आदेस दिदो। पछे वो जल्‍लाद, जेळ में जान यहुन्ना को मातो काट्यो।

²⁸अन थाळी में मेलन वीं छोरी ने दिदो अन वा छोरी वींने लेजान आपणी बई ने दिदो।

²⁹जद्याँ यहुन्ना का चेला आ बात हुणन, वींका मरिया तका डील ने लेग्या अन वींने एक कबर में गाड़ दिदो।

³⁰पछे थरप्या तका ईसू के नके पाच्छा आन हंगळी बात वींने बतायी ही, ज्यो वाँ किदी अन हिकई।

³¹वटे घणा मनक आरिया जारिया हा, ईं वाते वाँने खाणो खाबा को टेम भी ने मल पारियो हो। ईं वाते ईसू वाँने क्यो, “चालो, आपाँ हून्नी जगाँ पे चाला अन थोड़ोक रईम्बो ला।”

³²ईं वाते वे नाव में बेटन एक हून्नी जगाँ पे पराग्या।

³³घणा जणा वाँने जाता तका देक्या अन वाँने ओळक लिदा के, वे कूण हे? ईं वाँते वे हंगळा नगरा का लोग दोड़-दोड़न ईसू अन चेलाऊँ भी पेल्याँ वटे जा पूग्या।

³⁴जद्याँ ईसू नावऊँ बारणे निकळ्या, तो वाँ घणी भीड़ देकी, तद्याँ वाँका पे घणी दया अई। काँके वे हंगळा गारा का जस्यान हा, ज्याँको कुई गवाळ्यो ने हो। तो ईसू वाँने नरी बाताँ हिकाबा लागा।

³⁵जद्याँ हाँज पड़गी, तद्याँ वाँका चेला वाँका नके आया अन बोल्या, “आ एक काकड़ की जगाँ हे अन अन्दारो भी घणो वेग्यो हे।

³⁶मनकाँ ने अड़े-भड़े का गामाँ अन वस्तायाँ में जाबा दो, ताँके वे आपणाँ वाते खाबा ने कई चीज मोल ले सके।”

³⁷पण, ईसू चेलाऊँ क्यो, “वाँने खाबा का वाते थाँ कई दो।” तद्याँ वाँ वींने क्यो, “कई थें छावो के, माँ जावाँ? अन दोस्ये चान्दी का रिप्या[5] की रोट्याँ मोल लेन आवा अन वाँने खाबा ने देवाँ।”

³⁸ईसू वाँने क्यो, “जावो अन देको, थाँका नके कतरी रोट्याँ हे?” वणा पतो करन वाँकाऊँ क्यो, “आपणाँ नके पाँच रोट्याँ अन दो माछळ्याँ हे।”

³⁹पछे वणा चेला ने आग्या दिदी, “लिली-लिली चुंटी पे अणा हंगळा ने पंगताँ में बेठाण दो।”

⁴⁰तद्याँ वे हंगळा हो-हो अन पचा-पचा की पंगताँ में बेटग्या।

⁴¹अन ईसू पाँच रोट्याँ अन दो माछळ्याँ उठान हरग के दयने देकन परमेसर ने धन्नेवाद दिदो अन रोट्याँ तोड़-तोड़न आपणाँ चेला ने परोसबा ने दिदी अन वणा वीं दो माछळ्याँ भी वाँ मनकाँ में बाँट दिदी।

⁴²हंगळा जणा खान धापग्या।

⁴³अन पछे वाँ चेला, बंची तकी रोट्याँ अन माछळ्याँ ने बारा ठोपल्याँ भरन तोकी।

⁴⁴ज्याँ लोगाँ रोट्याँ खादी ही, वाँका में मनक मनकईस लगे-भगे पाँच हजार हाँ।

⁴⁵पछे, जट ईसू आपणाँ चेला ने नाव पे चड़ाया, ताँके जतरे ईसू वीं भीड़ ने विदा करे, वतरे वीं वाऊँ पेल्याँ पेला पाल्ड़े बेतसेदा परा जावे।

⁴⁶वीं वाँने विदा करन परातना करबा वाते मंगरा पे चड़ग्या।

⁴⁷अन जद्याँ हाँज वीं, तद्याँ नाव समन्द का गाबे ही अन ईसू एकला जमीं पे हा।

⁴⁸वे देक्यो के, चेलाऊँ नाव ने आगे डगाणो घणो भारी पड़रियो हे, काँके वइरो वाँके हामे चालरियो हो। तो भाग-फाट्याँ के लगे-भगे वो समन्द पे चालतो तको वाँका नके आयो अन वाँकाऊँ आगे निकलणो छातो हो,

⁴⁹तो वाँ चेला ईसू ने पाणी पे चालता देकन होच्यो के, यो कुई भूत हे। तो वाँ हंगळाईं हाको कर दिदो।

⁵⁰काँके वाँ हंगळा जणा वींने देकन दरपग्या हा, तो जट ईसू वाँने बतळान क्यो, “हिम्मत राको, दरपो मती, यो तो मूँ हूँ।”

⁵¹पछे वो नाव में चड़न वाँकी लारे वेग्यो अन वइरो ढबग्यो। ईं बात पे वाँने घणो अचम्बो व्यो।

⁵²काँके वे पाँच हजार लोगाँ ने खाणो खुवाबा को मतलब ने हमज्या हाँ, काँके वाँकी अकल काम ने कररी ही।

⁵³समन्द पार करबा केड़े, वीं गन्नेसरत नगर में पूग्या अन वटे नाव ने बांद दिदी।

⁵⁴जद्याँ वे नावऊँ उतरन बारणे आया, तद्याँ लोग-बाग ईसू ने तरत ओळक लिदा हाँ।

⁵⁵पछे वे लोग च्यारूँमेर दोड़न ग्या अन हंगळा जणा ने यो बतायो के, ईसू वटे हे, तो मनक माँदा मनकाँ ने माचा पे हूँवाणन वटे लेग्या।

⁵⁶वो गाम, सेर अन वस्ती में कटे भी जातो हो, तो लोग-बाग आपणाँ माँदा मनकाँ ने बजार का चोगान में राक देता अन वींऊँ परातना करता तका केता के, वो आपणाँ गाबा को एक कोर भी वाँके अड़ाबा दे। तो ज्यो भी वीं कोर के अड़ता, वे हंगळा हव वे जाता।