Read Mewari लूका 1 Bible Online

लूका 1 - Mewari bible

लूका 1

¹हुकम थियोपलुस, ज्यो बाताँ आपणाँ बसमें वीं ही वणा बाताँ ने वसन का दास खुद सरुआतऊँ देकी अन आपाँने बतई। वणा बाताँ ने सई तरियाऊँ लिकबा का वाते नरई मनकाँ कोसीस किदी ही। में अणा हारी बाताँ की सरुआतऊँ सई तरियाऊँ परक कर लिदी ही, ईं वाते मने ओ हव लाग्यो के, मूँ भी अणा हारी बाताँ ने थाँका वाते सई तरियाऊँ एक का पसे एक लिकूँ,

⁴ताँके थाँ ओ पुरी तरियाऊँ जाण सको के, जीं भी बाताँ थाँने हिकई गी हे, वीं हाँची अन अटल हे।

⁵यहूदियाँ के राजा हेरोदेस की टेम में मन्दर में सेवा-चाकरी करबावाळा समाज को अबिया पीड़ी मेंऊँ एक जकरय्या नाम को एक सेवा करबावाळो याजक हो अन वींकी लुगई को नाम एलीसिबा हो, वाँ हारून का बंस की ही।

⁶वीं दुई परमेसर की देकणी में घणा धरमी हा। अन परमेसर की आग्या को अन वींका नेमाँ को वीं पुरी तरियाऊँ पालण करता हा।

⁷वाँके कई ओलाद ने ही। काँके एलीसिबा बाँज ही अन वीं डोकरा-डोकरी हा।

⁸जद्याँ जकरय्या का दल को ओसरो हो अन वो याजक का रूप में परमेसर की सेवा-चाकरी कररियो हो।

⁹तद्याँ परमेसर की सेवा करबावाळा की रिति-रिवाज के जस्यान मन्दर में धुप-ध्यान करबा का वाते परच्याँ नाकी अन परची जकरय्या का नाम की निकळी। अन वो परबू का मन्दर में ग्यो हो।

¹⁰धुप-ध्यान करती टेम लोग-बागाँ की हारी भीड़ बारणे परातना कररी ही।

¹¹वीं टेम में जकरय्या का हामे परबू परमेसर को एक हरग-दुत परगट व्यो। वो धुप-ध्यान करबा की वेदी का जीमणा पाल्ड़े ऊबो तको वींने दिक्यो।

¹²अन जकरियो वींने देकन दरपन घबराग्यो। अन वींका में कल्ड़ी दरप भरईगी।

¹³पण, हरग-दुत वींने क्यो, “जकरय्या दरपे मती। काँके, थारी परातना परमेसर हूँण लिदी हे। ईं वाते थाँरी घरवाळी एलीसिबा एक बेटा ने जणी। वींको नाम यहुन्नो राकज्ये।

¹⁴जणीऊँ थूँ राजी अन खुस वेई अन नरई लोग-बाग वींका जनमऊँ आणन्द मनाई।

¹⁵काँके वो परबू परमेसर की देकणी में मोटो वेई। वो दाकरस अन दारू कदी ने पीई। वो आपणी माँ की कोख मेंईस पुवितर आत्माऊँ भर जाई।

¹⁶वो इजराएल का घणा लोगाँ ने परबू परमेसर का आड़ी फेरी।

¹⁷वो एलिया के जस्यान की आत्मा अन तागत में वेन परबू का आगे-आगे चाली। मनकाँ को मन वाँके छोरा-छोरी का आड़ी फेर देई, अन परमेसर की आग्या ने ने मानबावाळा ने धारमिकता की अकल का आड़ी लेजाई। अन मनकाँ ने परबू का वाते त्यार करी।”

¹⁸तद्याँ जकरये परमेसर का हरग-दुतऊँ क्यो के, “मूँ ईंपे कस्यान विस्वास करूँ? काँके मूँ तो एक डोकरो हूँ अन मारी घरवाळी भी डोकरी हे।”

¹⁹हरग-दुत वींने क्यो के, “मूँ जिबराईल हूँ। अन हमेस्यान परमेसर का हामे हाजीर रूँ हूँ। अन वणा मने थाँराऊँ बात करबा का वाते अन ओ हव हमच्यार केबा के वाते खन्दायो हे।

²⁰में ज्यो क्यो हो, वो तो आपणाँ टेम में पूरो वे जाई, पण थें तो ईंपे विस्वास ने किदो। ईं वाते जद्याँ तईं ओ पूरो ने वेई तद्याँ तईं थूँ बोबड़ो रेई।”

²¹अन बारणे लोग जकरय्या की वाट नाळन अचम्बो करबा लागा के, वींने मन्दर में अतरी टेम कस्यान लागी?

²²जद्याँ वो बारणे आयो, तो वो बोल ने सक्यो तो वे हमजग्या के, वणी मन्दर में किंकाई दरसण किदा हे। वो हातऊँ हानी करतो रियो अन बोबड़ो वेग्यो।

²³जद्याँ वींकी सेवा-चाकरी का दन पूरा व्या, तो वो आपणाँ घरे परोग्यो।

²⁴थोड़ाक दनाँ केड़े एलीसिबा गरबवती वीं अन पाँच मिना तईं वणी ईं बात ने हपई राकी।

²⁵वणी क्यो, “अबे आकरी में परबू मारा पे दया किदी अन लोगाँ का हामेंऊँ मारी बेजती छेटी किदी हे।”

²⁶जकरय्या की लुगई एलीसिबा के जद्याँ छटो मीनो चालरियो हो, तद्याँ परमेसर का आड़ीऊँ जिबराईल नाम को हरग-दुत गलील का नासरत नगर में एक कूँवारी के नके खन्दायो ग्यो।

²⁷जिंकी हगई युसुप नाम का एक मनकऊँ वीं ही, ज्यो दाऊद का बंस को हो। वीं कूँवारी को नाम मरियम हो।

²⁸अन हरग-दुत वींका नके परगट वेन क्यो, “राजी वे, परबू की दया थाँरा पे वीं हे अन वीं थाँरा लारे हे।”

²⁹ओ हामळन वा घबरागी अन होचबा लागी के, “ईंको मतलब कई हे?”

³⁰तद्याँ हरग-दुत वींने क्यो, “मरियम दरपे मती, परबू परमेसर की दया थाँरा पे हे।

³¹अन देक, थूँ गरबवती वेई अन थारे एक छोरो वेई। थूँ वींको नाम ईसू राकज्ये।

³²वो मोटो मान्यो जाई अन परम परदान परमेसर को पूत केवाई अन परबू परमेसर वींका बड़ाबा दाऊद की गाद्दी वींने हूँपी।

³³वो याकूब का बंसा पे अमर राज केरी अन वींको राज कदी ने मटी।”

³⁴मरियम हरग-दुतऊँ क्यो, “ओ कस्यान वेई? मूँ तो आलतरे कूँवारी हूँ।”

³⁵हरग-दुत वींने क्यो के, “पुवितर आत्मा थाँरा डिले आई अन परम परदान की तागत थाँरा ऊपरे वेई। ईं वाते जनम लेबावाळो पुवितर बाळक परमपिता परमेसर को पूत वाजी।

³⁶अन देक, थाँरा परवार की एलीसिबा के भी भुढापा में बेटो जनम लेबावाळो हे। ज्या बाँजड़ी वाजती ही, अबाणू वींके छटो मीनो हे।

³⁷काँके परमेसर के वाते कस्यो भी काम अबको कोयने हे।”

³⁸पछे मरियम हरग-दुतऊँ क्यो, “देको, मूँ परबू की दासी हूँ। जस्यान थाँ क्यो, वस्योईस मारा वाते वेवे।” अन वो हरग-दुत वींका नकूँ परोग्यो।

³⁹थोड़ाक दन केड़े तरत त्यार वेन मरियम मंगरा में बस्या तका यहूदा परदेस का एक नगर में गी।

⁴⁰अन वाँ जकरय्या का घरे जान एलीसिबाऊँ नमस्कार किदो।

⁴¹जस्यानी एलीसिबा मरियम का नमस्कार ने हामळयो, तो वींका पेट में बाळक फदकबा लागो अन एलीसिबा पुवितर आत्माऊँ भरगी।

⁴²अन वणी हाको करन क्यो, “थूँ हंगळी लुगायाँ में धन्न हे अन थाँरा पेट को फळ धन्न हे।

⁴³अन आ दया मारा ऊपरे कटू वीं काँके मारा परबू की बई मारा नके अई।

⁴⁴अन देक, जस्यानीस थारो नमस्कार मारा कान्दड़ा में पड़्यो, तो वस्यानीस बाळक मारा पेट में आणन्दऊँ फदक्यो।

⁴⁵ज्यो बाताँ परबू थने की हे, वींने थें मानी के, वीं पुरी वेई। ईं वाते थूँ धन्न हे।”

⁴⁶तद्याँ मरियम क्यो, “मारो जीव परबू की बड़ई करे।

⁴⁷अन मारी आत्मा मने बंचाबावाळा परमेसरऊँ राजी हे।

⁴⁸काँके, वीं आपणी दासी की नरमई पे ध्यान दिदो हे। ईं वाते देकज्यो, आजऊँ हंगळा जुग-जुग का लोग मने धन्न केई।

⁴⁹काँके, वीं सामरतवान परमेसर मारा वाते मोटा-मोटा काम किदा हे अन वाँको नाम पुवितर हे।

⁵⁰वाँको मान करबावाळा पे वाँकी दया पिड़ीऊँ पीड़ी रेवे हे।

⁵¹वणा आपणाँ ज्योरावर हाताऊँ मोटा-मोटा काम किदा, अन ज्यो मन में घमण्ड करता हा, वाँने बखेर दिदा।

⁵²वणी दरबाराँ ने गादीऊँ उतार दिदा। पण, ज्यो उदास हा, वाँने ऊपरे उटाया।

⁵³वणी भूका ने हव चिजाँऊँ भर दिदा अन रिप्यावाळा ने खाली हाताई काड़ दिदा।

⁵⁴वणी आपणाँ दास इजराएल को हमाळ किदो। वाँने वो वादो आद रियो जिंने वणा आपणाँ बड़ाबाऊँ किदो हो के, ‘मूँ अबराम अन वींकी पीड़ी पे हमेस्यान दया करतो रेऊँ।’ वणा ईं वादाऊँ इजराएल ने आद राकन वींकी मदत किदी।”

⁵⁵

⁵⁶मरियम लगे-भगे तीन मिना तईं एलीसिबा की लारे री अन पसे वाँ आपणाँ घरे अईगी।

⁵⁷एलीसिबा का मिना पूरा व्या अन वणी एक बेटो जण्यो।

⁵⁸वींके आस-पड़ोस वाळा अन हगा-होई ओ हामळन के, वींका पे परबू परमेसर दया किदी हे। वाँका हाते आणन्द मनायो।

⁵⁹ईंका केड़े जद्याँ बाळक आट दन को व्यो तो मनक बाळक को खतनो करबा ने आया अन वीं वींको नाम वींका बाप का नाम का जस्यानीस जकरयो राकणो छारिया हा।

⁶⁰पण, वींकी माँ ऊपड़ताई बोली, “ने ने, वींको नाम यहुन्नो राक्यो जावे।”

⁶¹तद्याँ मनकाँ वींकाऊँ क्यो, “थाँरा परवार में ओ नाम तो किंको भी ने हे।”

⁶²तद्याँ वणा वींका बाप का आड़ी हानी करन क्यो के, “वीं ईंको नाम कई देणो छावे हे?”

⁶³पसे जकरये एक पाटी मगई अन वींपे लिक्यो के, “ईंको नाम यहुन्नो हे।” ओ देकन हाराई लोग-बाग अचम्बा में पड़ग्या।

⁶⁴अस्यान वेताई जकरय्या की बोली खलगी अन वो परबू परमेसर की बड़ई करबा लागो।

⁶⁵वींका अड़े-भड़े रेबावाळा हाराई दरपग्या अन ईं हंगळी बाताँ मंगरा में बस्या तका यहूदा परदेस में च्यारूँमेर फेलगी।

⁶⁶हंगळा हूँणबा वाळा आपणाँ मना मेंईस बच्यार करन क्यो, “ओ बाळक कस्यो वेई?” काँके परबू को हात ईंका पे हे।

⁶⁷वींको बाप जकरियो पुवितर आत्माऊँ भरग्यो अन परमेसर का आड़ीऊँ ओ बताबा लागो,

⁶⁸“इजराएल का परमेसर की जे हो। काँके, वणा आपणाँ लोगाँ पे करपा किदी हे अन वाँने छुड़ाया हे।

⁶⁹वणा आपणाँ दास दाऊद का पिड़ीऊँ माकाँ वाते जोरावर मुगतीदाता ने पेदा किदो हे।

⁷⁰नरी पेल्याँ परमेसर आपणाँ आड़ीऊँ बोलबावाळा पुवितर मनकाऊँ वादो किदो हो।

⁷¹वो माँने माकाँ दसमणाऊँ अन माकाँ हंगळा विरोदी का हाताऊँ छुड़ाई।

⁷²वणा क्यो, वीं आपणो पुवितर करार आद करन आपणाँ बड़ाबा पे दया करी।

⁷³वणा आ होगन आपणाँ बड़ाबा अबरामऊँ खादा हा

⁷⁴के, वाँ आपाँने आपणाँ दसमणा का हाताऊँ छुड़ाई। अन आपाँ बना दरप्याँ परबू की सेवा करा।

⁷⁵अन आपीं आपणी हारी जीवन में वाँका हामे पुवितर अन धरमी बण्या तका रेवा।

⁷⁶हे मारा बेटा, थूँ, परम परदान परमेसर का आड़ीऊँ बोलबावाळो केवाई। थूँ परबू को गेलो त्यार करबा के वाते वाँके आगे-आगे चाली।

⁷⁷अन मनकाँ ने हिकाई के, थाँका पापाँ की मापी वेबाऊँ थाँ बंचाया जावो।

⁷⁸आपणाँ परमेसर की दयाऊँ आपणाँ पे मुगतीदातो एक उगता तका सुरज का उजितो का जस्यान हरगऊँ आपणाँ ऊपरे वेई,

⁷⁹अंदारा अन मोत की छाया में जीवबावाळा पे पुवितर उजितो चमकी, अन आपाँने खरई अन सान्ती का गेला पे लेजाई।”

⁸⁰अन वो बाळक डिल-डोलऊँ अन आत्माऊँ बड़तो तको ज्योरावर वेतो ग्यो। वो इजराएल के हामे परच्यार करबा का दनाँ तईं हुन्ना काँकड़ में रेई।