Read Mewari लूका 21 Bible Online

लूका 21 - Mewari bible

लूका 21

¹जद्याँ ईसू मन्दर में हा, तो वणा रिप्या-कोड़ी वाळा मनकाँ ने आपणो आपणो दान दान-पेटी में नाकता तका देक्या।

²अन वणा एक गरीब विदवा लुगई ने भी वणी में दो फोरा ताँबा का सिक्का नाकती तकी देकी।

³तद्याँ ईसू क्यो, “मूँ थाँकाऊँ हाचेई केवूँ हूँ के, सबाका का दानऊँ वाँ लुगई जिंको धणी सान्त वेग्यो, वींको दान हेलो हे,

⁴काँके हारई आपणाँ रिप्या की बड़ोतरीऊँ नाक्या। पण, अणी लुगई आपणी घटतीऊँ हारी पूँजी दान दे दिदी हे।”

⁵कुई लोग-बाग मन्दर का वाते केरिया हा के, वो कस्या रूपाळा भाटा अन परमेसर के दान किदी तकी चिजाँऊँ सजायो ग्यो हे,

⁶तो ईसू क्यो, “वीं दन आई जद्याँ ज्यो कई थाँ देको हो। वींकामूँ अटे कस्याई भाटा पे भाटो भी ने मली। यो हारोई हल्डा दिदो जाई।”

⁷वणा ईसुऊँ पूँछ्यो, “ओ गरुजी, ओ हारोई कदी वेई? ईं बाताँ जद्याँ पुरी वेबा लागी, तो वणी टेम को कई हेन्याण वेई?”

⁸ईसू क्यो, “हेंचेत रिज्यो, ताँके थाँ भरमाया ने जावो काँके, घणा मारा नामऊँ आई अन केई के, ‘मूँ वोईस हूँ’ अन ‘ओ अन्त टेम आग्यो हे।’ थाँ वाँका पाच्छे परा मत जाज्यो।

⁹अन जद्याँ थाँ युद अन लड़ई की बाताँ हुणो, तो दरपज्यो मती। काँके ईं बाताँ को पेल्या वेणी जरूरी हे। पण, वणी टेम तरत अन्त ने वेई।”

¹⁰तद्याँ ईसू वाँने ओरी क्यो के, “एक देस दूजाँ देस पे अन एक राज का दूजाँ राज पे चड़ई केरी।

¹¹अन मोटा-मोटा भूकम आई अन जगाँ जगाँ काळ अन तरे-तरे की बीमारियाँ वेई अन बादळाऊँ गजब-गजब की बाताँ वेई अन मोटा-मोटा दरप का हेन्याण दिकी।

¹²पण, अणा हारी बाताँऊँ पेल्याँ वीं मारा नाम का पाच्छे चालबा की वजेऊँ थाँने पकड़ी अन हताई अन यहूदियाँ का परातना घर में हूँपी अन जेल में नाक देई अन राजपाल अन अदिकारियाँ का हामें ऊबा करी।

¹³पण, ओ थाँके मारा बारा में गवई देबा की टेम वेई।

¹⁴ईं वाते ईं बाताँ वेबा के पेल्याई आपणाँ-आपणाँ मन ने त्यार करलो। थाँने थाँका बचाव में कई केणो हे, ईंकी थाँ चन्ता मत करज्यो।

¹⁵मूँ थाँने अस्या बोल अन अकल देवूँ के, थाँका हाराई दसमण थाँको सामनो ने कर सकी अन थाँने रोक ने पाई।

¹⁶अन थाँका बई-बापू, भई-बन्द अन परवार का हण्डाळ्याँ भी थाँने धोकाऊँ पकड़वाई। अटा तईं के थाँकामूँ नरई ने मरवा नाकी।

¹⁷अन मारा नाम का पाच्छे चालबा की वजेऊँ घणा लोग-बाग थाँकाऊँ दसमणी राकी।

¹⁸पण, थाँका माता को एक बाल भी वाँको ने वेई।

¹⁹विस्वास में गाटा रेवा की वजेऊँ थाँ अनंत जीवन पाँ लेवो।

²⁰“जद्याँ थाँ यरूसलेम ने सपायाऊँ भरियो तको देको। तो हमज लिज्यो के, वींके उजाड़ वेबा की टेम आगी हे।

²¹जद्याँ जी यहूदियाँ देस में वेई। वाँने मंगरा ऊपरे चढ़ जाणो छावे अन जी यरूसलेम नगर में हे वाँने नगर छोड़ देणो छावे अन जीं बारणे गामाँ में वेई, वाँने नगर में ने जाणो छावे।

²²ईं दन अस्या वेगा ज्यामें दण्ड की वीं बाताँ जीं पेल्याऊँ पुवितर सास्तर में लिकी गी वीं पुरी वेई।

²³वणा दनाँ वे लुगायाँ जी गरबवती वेई अन ज्याँके दूद पीता बाळक वेई, वाँके वाते घणो अबको टेम वेई, काँके अणीऊँ बचन दोड़ ने सकी। काँके वीं टेम में धरती पे मोटा-मोटा कळेस अन अणा लोग-बागाँ का ऊपरे परमेसर को कोप वेई।

²⁴मनक तरवाराऊँ काट्या जाई अन दूजाँ ने बंदी बणान दूजाँ देस में पूगा दिदा जाई अन यरूसलेम जी यहूदी ने हे वाँका पगाँ का रेटे गुद्‍या जाई तद्याँ तईं वाँको टेम पूरो ने वे जावे।

²⁵“चाँद-सूरज अन तारा में हेन्याण दिकई दिदा जाई अन धरती में हाराई देसा का लोग-बागाँ पे कळेस आई। काँके वीं समन्द की गाजबाऊँ अन लेराऊँ घबरा जाई।

²⁶दरपणीऊँ अन दनियाँ ऊपरे आबावाळा टेम की बाट देकता देकता लोग-बागाँ का जीव में जीव ने रेई। आकास की हारी सगत्याँ हाल जाई।

²⁷ईंका केड़े लोग मूँ मनक का पूत ने आपणी तागत का हाते अन मोटी मेमा का हाते वादळा पे आता तका देकी।

²⁸जद्याँ ईं बाताँ वेती देकी, तो थाँ हूँदा ऊबा वेन आपणाँ माता ने ऊपरे करज्यो, काँके वीं टेम थाँको छुटकारो नकेईस वेई।”

²⁹ईसू वाँने एक केणी भी क्यो के, “अंजीर का रूँकड़ा ने अन हाराई रूँकड़ा ने देको।

³⁰जस्यानी वाँकी कूँपळा फूटे, तो थाँ देकन खुदई जाण लो के, उनाळो आबावाळो हे।

³¹अस्यानीस थें वे हारी बाताँ वेती देको, तो जाण जाज्यो के, परमेसर को राज को दन नके हे।

³²मूँ थाँने हाँची केरियो हूँ के, ईं पिड़ीयाँ का मनकाँ के मरबा के पेल्याँई हारी बाताँ वे जाई।

³³धरती अन आकास टळ जाई, पण मारो बचन कदी ने टळी।

³⁴“ईं वाते थाँ हेंचेत रो, अस्यो ने वे के, थाँ खाबा-पिबा में अन दनियाँ की चन्ता-फिकर में ने पड़ जावे अन वी दन फंदा का जस्यान थाँका ऊपरे अणाचेत आ जावे।

³⁵काँके वीं दन धरती का हाराई रेबावाळा लोग-बाग का ऊपरे ईं तरियाऊँ आई।

³⁶ईं वाते जागता रो अन हरेक टेम परातना करता रेवो, ताँके थाँ अणा हारी आबावाळी आपतीऊँ बचन अन मूँ मनक का पूत का हामें ऊबा रेवा के जोगा बण सको।”

³⁷ईसू वणा दनाँ में मन्दर में उपदेस करतो हो अन रात ने बारणे जान जेतुन नाम का मंगरा ऊपरे रिया करतो हो।

³⁸अन रोज हवेर पेल्याँ वेगा नरई लोग-बाग वींका उपदेस हूँणबा का वाते मन्दर में वींका नके आया करता हा।