Read Mewari लूका 23 Bible Online

लूका 23 - Mewari bible

लूका 23

¹तद्याँ हारी सबा ऊबी वेगी अन वींने राजपाल पिलातुस का नके लेग्या।

²अन मनक यो केन वींपे दोस लगाबा लागा के, “माँ ईंने लोग-बागाँ ने भटकातो तको पकड़्यो हे। यो राजा केसर ने हाँसल जमा करबा का वाते नटे हे अन यो आपणाँ खुद ने राजा मसी केवे हे।”

³पिलातुस ईसुऊँ पूँछ्यो, “कई, थूँ यहूदियाँ को राजा हे?” ईसू वींने जबाव दिदो, “थूँ खुदई हाँच केरियो हे, मूँ वोईस हूँ।”

⁴तद्याँ पिलातुस मुक्य याजकाँऊँ अन लोग-बागाऊँ क्यो, “मने अणी मनक में कई दोस ने मलरियो हे।”

⁵पण, वी यो केता तका वींपे ज्योर देबा लागा के, “अणी पूरा यहूदियाँ में लोग-बागाँ ने आपणाँ उपदेसाऊँ भरमाया हे। अणी गलीलऊँ सरू किदो अन अबे हारोई गेलो पार करन अटे आ पूग्यो हे।”

⁶ओ हुणन पिलातुस पूँछ्यो, “कई ओ मनक गलीली हे?”

⁷अन ओ जाणन के, ईसू हेरोदेस का राज का हे, तो वाँने हेरोदेस का नके खन्दा दिदो। वणा दनाँ में हेरोदेस भी यरूसलेम में हो।

⁸जद्याँ हेरोदेस ईसू ने देक्या तो, वो घणो राजी व्यो, काँके नरी टेमऊँ वींने देकणो छारियो हो अन वो वींका बारा में पेल्या हूँण चुक्यो हो, वो ईसू का हाताऊँ परच्यो देकबा की मरजी राकतो हो।

⁹वो ईसुऊँ घणा सवाल पूछतो रियो पण, ईसू कई भी जबाव ने दिदो।

¹⁰मुक्य याजकाँ अन नेमा ने हिकाबावाळा वटे ऊबा तका हा अन वी वींका पे दोस लगारिया हा।

¹¹तद्याँ दरबार हेरोदेस आपणाँ सपायाँ का हाते मलन बुरा वेवार करन वींकी रोळ किदी अन वींने जामूणिया रंग का गाबा पेरान वींने पिलातुस का नके पाछो खन्दा दिदो।

¹²वणी दनऊँ पिलातुस अन हेरोदेस का वसमें राजिपो वेग्यो अणीऊँ पेल्या वी एक-दूँजा का दसमण हा।

¹³पसे पिलातुस मुक्य याजकाँ, यहूदी नेता अन लोग-बागाँ ने एक हाते बलान वाँकाऊँ क्यो,

¹⁴“थाँ अणी मनक ने लोग-बागाँ ने भरमावो वाळो हमजन मारे नके लाया हो अन देको, में थाँका हामे वींकी परक किदी हे। पण, थाँ जणा बाताँ को ईंपे दोस लगावो हो, वणा बाताँ मेंऊँ ईंपे कई दोस ने पायो हे।

¹⁵अन नेई हेरोदेस पायो, काँके वणी ईंने आपणाँ नके पाछो खन्दा दिदो हे अन देको, अणी अस्यो कई भी ने किदो के, यो मोत की सजा को भुगते।

¹⁶ईं वाते मूँ ईंके कोड़ा मारन छोड़ देवूँ हूँ।”

¹⁷पिलातुस फसे का तेवार पे हर साल लोग-बागाँ का वाते कस्या भी एक बन्दी ने छोड़तो हो।[3]

¹⁸तद्याँ हाराई मनक हाको करबा लागा के, “ईंने मोत की सजा दो अन माकाँ वाते बरब्बा ने छोड़ दो।”

¹⁹बरब्बा ने नगर में लड़ई-जगड़ो अन हत्या का करबा का मस जेळ में बन्द कर मेल्यो हो।

²⁰पिलातुस ईसू ने छोड़णो छारियो हो ईं वाते वणी एक दाण ओरी मनकाँ ने हमजाया।

²¹पण वीं ज्योरऊँ हाको करन केबा लागा, “ईंने हूळी पे चढा दो, ईंने हूळी पे चढा दो।”

²²पिलातुस मनकाँऊँ तीजी दाण पूँछ्यो, “अणी कई गलत किदो हे? में तो ईंमें कई दोस ने पायो हे, जणीऊँ यो मोत को दण्ड भुगते। ईं वाते मूँ ईंके कोड़ा लगवान छोड़ देऊँ।”

²³पण वी हाराई मनक एक दाण पाछो हाको करन बोल्या, “ईंने हूळी पे चढा दो।” अन वाँके हाका-भार करबा वाँकी बात बणगी।

²⁴ईं वाते पिलातुस हुकम दिदो के, जस्यान मनक केरिया हे वस्यान किदो जावे।

²⁵अन वणी वीं मनक ने छोड़ दिदो, जणी लड़ई-जगड़ो अन हत्या किदी ही। यो मनक वोईस हो जिंका बारा में लोगाँ मांग किदी ही। ईसू ने मनकाँ का हाताँ में हूँप दिदो ताँके जस्यान वी छावे वस्यान कर सके।

²⁶जद्याँ वीं मनक ईसू ने लेन जारिया हा, तो वणा समोन नाम को एक कुरेनी ने गामऊँ आवतो तको देक्यो। वणा वींने पकड़न वींका खाँदा ऊपरे हूळी मेल दिदी, ताँके वो ईसू का पाछे-पाछे चाले।

²⁷अन लोग-बागाँ की मोटी भीड़ वींका पाच्छे चालरी ही अन वाँका में नरी लुगायाँ भी ही, जी ईसू का वाते रोरी ही अन छाती कुटरी ही।

²⁸ईसू वाँका आड़ी देकन क्यो, “ओ यरूसलेम की बेट्या, मारा वाते मती रोवो पण, आपणाँ अन आपणाँ बाळकाँ का वाते रोवो।

²⁹काँके देको अस्या दन आरिया हे, जद्याँ मनक केई, ‘घणी भाग्यवाळी हे वी लुगायाँ जी बना छोरा-छोरी की हे अन घणी भाग्यवाळी हे वा कोख जणी कदी बाळक ने जण्यो हे अन घणा भाग्यवाळी हे वी लुगायाँ जणा कदी आपणाँ छोरा-छोरी ने दूद ने पायो।’

³⁰पछे वीं मनक मंगराऊँ केई के, ‘थाँ माकाँ ऊपरे पड़ जावो’ अन मंगरियाँऊँ केई के, ‘माने ढाकी दो।’

³¹काँके जद्याँ मनक हरा रूँकड़ा का हाते अस्यो करे हे, तो वीं हूका रूँकड़ा का हाते कई-कई ने करी?”

³²अन वाँका हाते दो मनकाँ ने भी, ज्यो गुनेगार हा, वाँने भी मोत की सजा देबा का वाते ले जारिया हा।

³³जद्याँ वीं वणी जगाँ आया, जिंको नाम “खोपड़ी” हो। तो वणा गुनेगार मनकाँ ने भी ईसू का एक जीमणा पाल्डे अन दूजाँ ने डावा पाल्डे हूळी पे चड़ा दिदा।

³⁴जद्याँ ईसू बोल्या, “ओ बापू, अणाने माप कर दो, काँके ईं लोग ने जाणे हे के, ईं कई कररिया हे।” पसे सपायाँ कागद की गोट्याँ नाकन वाँका गाबा बाँट लिदा।

³⁵लोग-बाग देकरिया हा अन यहूदी नेता वींकी रोळ करन केरिया हा के, “थें दूजाँ ने तो बंचाया हे, अबे यद्याँ थूँ परमेसर को हाँचो चुण्यो तको मसी वेवे तो खुद ने भी बचई ले।”

³⁶सपई भी वाँका नके आन खाटा अंगूरा का रस में डुबायो तको फूंबो पिबा का वाते दिदो अन रोळ करन क्यो,

³⁷“यद्याँ थूँ यहूदी लोगाँ को राजा हे, तो खुद ने बंचा ले।”

³⁸वींका माता ऊपरे एक कागद लिकन लटका दिदो के, “यो यहूदियाँ को राजा हे।”

³⁹वटे लटकाया तका दो गुनेगाराँ मेंऊँ एक मनक भी ईसू की रोळ करते तके क्यो, “कई थूँ मसी कोयने हे? थूँ खुद ने अन माँने भी बंचा ले।”

⁴⁰पण, दूजे वीं पेल्यावाळा ने तापड़न क्यो, “कई थूँ परमेसरऊँ ने दरपे हे? थने भी तो याईस सजा मलीरी हे।

⁴¹अन आपाँ तो न्यावऊँ सजा पई, काँके आपाँ तो आपणाँ काम को फळ पारिया हा, पण अणी तो कई बुरो ने किदो हे।”

⁴²पसे वणी क्यो, “ओ ईसू, जद्याँ थाँ आपणाँ राज में आवो, तो मने आद राकज्यो।”

⁴³ईसू वींने क्यो, “मूँ थाँराऊँ हाचेई में केवूँ हूँ के, आजइस थूँ मारी लारे हरग में वेई।”

⁴⁴वीं दाण दन की बारा बजी री ही, तद्याँ बारा बज्याऊँ तीन बज्या तईं आकी धरती अंदारो रियो,

⁴⁵काँके सुरज भी ने चमकरियो हो अन मन्दर को परदो फाटन दो टुकड़ा वेग्यो।

⁴⁶पसे ईसू ज्योरऊँ हाको करन क्यो, “ओ बापू, मूँ मारी आत्माने थाँका हाताँ में हूँपूँ हूँ।” यो केन ईसू आपणाँ जीव छोड़ दिदो।

⁴⁷वटे ज्यो कई व्यो हो वींने देकन सपायाँ को हाकम ओ केन परमेसर की बड़ई किदी के, “हाँची में ओ मनक धरमी हो।”

⁴⁸वटे देकबा आया मनक ज्यो कई व्यो हो वींने देकन छाती-मातो कूटन आपणाँ-आपणाँ घरे पराग्या।

⁴⁹पण ईसू की जाण-पेचाणवाळा अन जीं लुगायाँ गलीलऊँ वींकी लारे अई ही, वीं हाराई छेटी ऊबी रेन ओ हारोई देकरी ही।

⁵⁰वटे युसुप नाम को एक मनक हो। ज्यो यहूदियाँ का मोटी सबा में मंतरी हो, वो एक घणो धरमी मनक हो। वो वाँकी ईसू ने मारबा की राय में अन वाँका अणी कामाँऊँ राजी कोयने हो अन वो यहूदियाँ का देस में अरमतिया नाम की जगाँ को रेबावाळो हो अन परमेसर की राज बाट नाळवावाळो हो।

⁵¹

⁵²वो युसुप पिलातुस का नके ग्यो अन वणीऊँ परातना किदी के, “ईसू की लास मने दिदे।”

⁵³वो लास ने हूळीऊँ उतारन एक हव धोळा चादरा में पळेटी अन मंगरा में छाट पे खोदी तकी एक कबर में मेल दिदी। वीं कबर में पेल्याँ किंने भी ने गाड़्यो ग्यो हो।

⁵⁴वो दन हकरवार हो अन सबत को दन सरू वेबा में हो।

⁵⁵गलील परदेसऊँ अई तकी लुगायाँ भी वींका हाते वटे अई। वणा भी ईं कबर ने देकी अन ओ देक्यो के, लास ने वटे कस्यान मेली ही।

⁵⁶अन वणा पाच्छी आन ईसू की लास पे लगाबा का वाते हव बानावाली चिजाँ अन अंतर त्यार किदो। नेमा का रिती जस्यान वणा आराम का दन आराम किदो।