Read Mewari यहुन्ना 11 Bible Online

यहुन्ना 11 - Mewari bible

यहुन्ना 11

¹बेतनियाँ नगर में एक लाजर नाम को मांदो मनक आपणी बेना मरियम अन मारता का हाते रेतो हो।

²यो लाजर नाम को मांदो मनक वणीस मरियम को भई हो, जणी परबू का पगा पे अंतर नाकन आपणाँ बालऊँ पूँछ्या हा।

³तद्याँ वींकी बेना ईसू का नके हमच्यार खन्दायो के, “हो परबू, देको थाँका पाको दोस्त लाजर मांदो हे।”

⁴ओ हुणन ईसू क्यो, “या मांदकी लाजर के मरबा की ने, पण परमेसर की मेमा का वाते हे, काँके वणीऊँ परमेसर का बेटा की मेमा वेई।”

⁵ईसू मारता अन वींकी बेन अन लाजरऊँ परेम राकता हा।

⁶पछे भी जद्याँ वणी हुण्यो के, वो मांदो हे। तद्याँ भी वो जटे हो, वटे दो दनाँ तईं ओरी रक्यो।

⁷ईंका केड़े ईसू चेलाऊँ क्यो, “आवो, आपाँ पाच्छा यहुदया परदेस परा चाला।”

⁸चेला वाँकाऊँ क्यो, “हो गरुजी, थोड़ाक दन पेल्याँ तो वटे यहूदी मनक थाँका पे भाटा फेकणा छारिया हा, तद्याँ भी थाँ पाच्छा वटे काँ जाणा छारिया हो?”

⁹ईसू वाँने क्यो, “एक दन में बारा घण्टा उजितो रेवे हे। यद्याँ कुई दन का उजिता में चाले तो ठोकर ने खाई, काँके जग का उजिता में हारोई सई वींने दिके हे।

¹⁰पण यद्याँ कुई रात में चाले तो वो ठोकर खावे हे, काँके रात में उजितो ने वेवे हे।”

¹¹ईसू ईं बाताँ किदी अन वाँकाऊँ केबा लागो, “आपणो दोस्त लाजर हूँरियो हे, पण मूँ वींने जगाबा का वाते जारियो हूँ।”

¹²तद्याँ चेला वींने क्यो, “हो परबू, यद्याँ वो हूँग्यो हे, तो हव वे जाई।”

¹³ईसू तो वींकी मोत का वाते क्यो हो, पण वीं हमज्या हाँ के, वणी नींदऊँ हूँ जाबा का वाते क्यो हो।

¹⁴तो ईसू वाँकाऊँ हुदोई के दिदो, “लाजर मरग्यो हे।

¹⁵अन मूँ थाँका वाते खुस हूँ के, मूँ वटे ने हो, काँके अबे थाँ मारा पे विस्वास कर सको। आवो अबे आपीं वींका नके चाला।”

¹⁶तद्याँ थोमो जिंने जोड़ला भी केता हा, वणी दूजाँ चेलाऊँ क्यो, “आवो, आपाँ भी गरुजी का हाते चाला, ताँके अणाका हाते मर सका।”

¹⁷वटे बेतनियाँ पूग्या केड़े ईसू ने नंगे पड़ी के, लाजर की लास ने छाट में खोदी तकी कबर में मेल्या ने च्यार दन वेग्या हे।

¹⁸बेतनियाँ नगर यरूसलेमऊँ एक कोस छेटी हो।

¹⁹नरई यहूदी मारता अन मरियम का नके वाँका भई की मोत पे वाँने संतोक देबाने आया हा।

²⁰जद्याँ मारता ईसू का आबा को हमच्यार हुण्यो, तो वाँ वाँकाऊँ मलबा ने गी, पण मरियम घर में बेटी री।

²¹मारता ईसुऊँ क्यो, “हो परबू, यद्याँ थाँ अटे वेता, तो मारो भई ने मरतो।

²²अन मूँ अबाणू भी मूँ जाणूँ हूँ के, ज्यो कई थाँ परमेसरऊँ मांगो, परमेसर थाँने वो दी देई।”

²³ईसू वींने क्यो, “थारो भई पाछो जीवतो वे जाई।”

²⁴मारता वींकाऊँ क्यो, “मूँ जाणूँ हूँ के, आकरी का दन में पाछो जीवतो वे जाई।”

²⁵ईसू वींने क्यो, “जीवन मारा में हे अन मरिया केड़े पाछो जीवतो वेणो मारा में हे। ज्यो कुई मारा पे विस्वास करी, वीं यद्याँ मर भी जाई तद्याँ भी पाच्छा जी उटी।

²⁶अन ज्यो कुई जीवतो हे अन मारा पे विस्वास करे हे, वो कदी ने मरी। कई थूँ मारा पे विस्वास करे हे?”

²⁷वणी ईसुऊँ क्यो, “हाँ, परबू, मूँ विस्वास करूँ हूँ के, थाँईस मसी हो, अन ज्यो परमेसर को बेटो जगत में आबावाळो हो, वो थूँईस हे।”

²⁸अस्यान केन मारता पाच्छी परीगी अन आपणी बेन मरियम ने बलान छानेकूँ क्यो, “गरुजी अटेईस हे अन थने बलारिया हे।”

²⁹ओ हुणन मरियम वटे वाँका नके तरत अई।

³⁰ईसू अबाणू भी गाम में ने पूग्यो हा पण वीं वटेईस हा, जटे मारता वाँकाऊँ मली ही।

³¹तद्याँ ज्यो वींके हाते घर में हाँ अन दिलासो देरिया हाँ, ओ देकन के मरियम आगतऊँ बारणे गी ओ हमज्या के, वाँ कबर पे रोबा ने जावे हे, ईं वाते वाँका पाच्छे चालबा लागा।

³²जद्याँ मरियम वटे पोंछी जटे ईसू हाँ, तो वाँने देकताई वाँका पगाँ में पड़गी अन क्यो, “हो परबू, यद्याँ थाँ अटे वेता तो मारो भई ने मरतो।”

³³जद्याँ ईसू वींने अन यहूदी लोग-बागाँ ने ज्यो वींका लारे आया हाँ, वाँने रोता देकन, वो हरदा में घणो दकी व्यो अन आत्मा में घणो उदास वेग्यो,

³⁴अन क्यो, “थाँकाणी वींने कटे मेल्यो हे?” वाँकाणी वींने क्यो, “हो परबू, चालन देको।”

³⁵ईसू की आक्याँ में आसूँ आग्या।

³⁶तद्याँ यो देकन यहूदी केबा लागा, “देको, यो वणीऊँ, कतरो परेम राके हे।”

³⁷पण वाँका मूँ कुई केबा लागा, “अणी आंदा की आक्याँ खोली, तो कई यो लाजर ने मरबाऊँ ने बंचा सकतो?”

³⁸ईसू आत्मा में घणो दकी वेन कबर के पे आया। वटे एक गुफा ही अन एक मोटो भाटो वींका मुण्डा ने ढाक मेल्यो हो।

³⁹पसे ईसू क्यो, “भाटो छेटी करो।” वीं मरिया तका लाजर की बेन मारता वाँने केबा लागी, “हो परबू, अबे तो वींमें वाना आरी वेई, काँके वींने गाड़्या ने च्यार दन वेग्या हे।”

⁴⁰ईसू वींने क्यो, “कई में थने ने क्यो हो के, यद्याँ थूँ विस्वास करी, तो परमेसर की मेमा ने देकी?”

⁴¹तद्याँ वाँकाणी वीं भाटा ने छेटी किदो। पसे ईसू ऊपरे देकन क्यो, “हो बापू परमेसर, मूँ थाँको धन्नेवाद करूँ हूँ, काँके थाँ मारी हूणी हे।

⁴²मूँ जाणूँ हूँ के, थाँ हरदाण मारी हुणो हो, पण ज्या भीड़ च्यारूँमेर ऊबी हे, वाँका वाते में यो क्यो, जणीऊँ ईं मनक विस्वास करे के, थाँ मने खन्दायो हे।”

⁴³यो केन वणी जोरऊँ हाको करन क्यो, “हे लाजर, बारणे आ।”

⁴⁴तद्याँ ज्यो मरग्यो हो, वो कपनऊँ पळेट्यो तकोई बारणे आग्यो, अन वींका मुण्डा पे भी गाबा पळेट्या तका हा। ईसू क्यो, “ईंने खोल दो अन जाबा दो।”

⁴⁵तद्याँ ज्यो यहूदी मनक मरियम के हाते आया हाँ, वणा ईसू को यो काम देकन वींकामूँ नरई वींपे विस्वास किदो।

⁴⁶पण वणा मूँ कुई फरीसियाँ का नके जान ईसू का ईं काम को हमच्यार दिदो।

⁴⁷ईंपे मुक्य याजकाँ अन फरीसियाँ मोटी सबा बलान क्यो, “आपणाँ ने कई करणो छावे? यो मनक घणा परच्या बतारियो हे।

⁴⁸यद्याँ आपाँ वींने अस्यानीस करबा देवा तो हाराई मनक वींका पे विस्वास करबा लागी, अन रोमी अदिकारी अटे आन आपणाँ मन्दर को अन आपणाँ देस को नास कर देई।”

⁴⁹तद्याँ वाँका मूँ केफा नाम को एक मनक ज्यो वीं टेम को मोटो याजक हो, वीं हाराऊँ क्यो, “थाँ कई भी ने जाणो हो।

⁵⁰अन नेई ईं बात ने हमजो हो के, हाराई मनकाँ के मरबा बजे एक मनक को मरणो हव हे,” जणीऊँ हारोई देस नास वेबाऊँ बंच जावे।

⁵¹या बात वणी आपणाँ मनऊँ ने किदी, पण वो वीं टेम को मोटो याजक हो अन वणी आगेवाणी किदी के, ईसू यहूदी लोगाँ का वाते मरबा ने जारियो हे।

⁵²वो बेस यहूदी मनकाँ का वातेईस ने मरी, पण परमेसर का हाराई वकरिया तका लोगाँ ने एक हाते करबा का वाते भी मरी।

⁵³वीं दनऊँ वीं हाराई यहूदी अदिकारी वींने मारबा की ओजणा बणाबा लागा।

⁵⁴ईंका केड़े ईसू वणा यहूदी मनकाँ में खुला में ने फर सक्यो, पण वटाऊँ ईप्राईम नगर का नके हुन्ना काकड़ का भड़े की ढाणी में परोग्यो अन आपणाँ चेला की लारे वटे रेवा लागो।

⁵⁵यहूदी लोगाँ को फसे को तेवार आबावाळो हो अन हाराई देसऊँ मनक यरूसलेम देस में ग्या, ताँके तेवारऊँ पेल्याँ पुवितर वेबा का रिवाज ने पुरी करे।

⁵⁶ईं वाते वाँकाणी ईसू ने होदबा लागा अन मन्दर की चोकी में ऊबा वेन एक-दूजाऊँ केबा लागा, “थाँ कई बच्यार कररिया हो? कई वो हाँची में अणी तेवार में आई?”

⁵⁷पछे मुक्य याजकाँ अन फरीसियाँ यो आदेस काड़्यो के, यद्याँ किंने याँ खबर पड़े के, ईसू कटे हे तो वो बतावे, ताँके वींने पकड़ सका।