Read Mewari यहुन्ना 12 Bible Online

यहुन्ना 12 - Mewari bible

यहुन्ना 12

¹ईसू फसे का तेवार का छे दनाँ पेल्याँ बेतनियाँ नगर में आया जटे लाजर हो, जिंने ईसू मरिया तकाऊँ जिवायो हो।

²वणा वाँका वाते जीमणो त्यार किदो। अन मारता खाणो परोसरी ही अन लाजर वींकामूँ एक हो, ज्यो वाँका लारे खाणो खाबा ने बेट्यो हो।

³जदी मरियम जटामांसी को खरो अन मेंगो अंतर ठामड़ा लेन लई अन ईसू का पगा पे उन्दायो अन आपणाँ बालाऊँ पगा ने पूँछ्याँ। अन अंतर की बानाऊँ घर में खुसबु आबा लागी।

⁴पण वाँका चेला मूँ यहूदो इसकरियोती नाम को एक चेलो ज्यो वाँने धोकाऊँ पकड़ाबावाळो हो वणी क्यो,

⁵“यो अंतर तीन सो चाँदी का सिक्का में बेचन गरीबा ने काँ ने दिदो ग्यो?”

⁶वाँकाणी या बात ईं वाते ने की के, वींने गरीबा की चन्ता ही। पण ईं वाते क्यो, काँके वो चोर हो। वाँका नके वाँके रिप्या की नोळी ही अन वो वींमेंऊँ रिप्या काड़ लेतो हो।

⁷ईसू क्यो, “वींने रोको मती, वणी यो हाराई मारे गाड़ जाबा की त्यारी में किदो हे।

⁸काँके गरीब तो थाँका लारे हरदाण रेई, पण मूँ थाँका हाते हमेस्या तईं ने रेऊँ।”

⁹फसे का तेवार में आया तका यहूदी मनकाँ जद्याँ यो हुण्यो के, ईसू बेतनियाँ में हे, तो वीं बेस ईसू नेईस ने, पण लाजर ने भी देकबा ने आया जिंने ईसू मरिया तकाऊँ जिवायो हो।

¹⁰तद्याँ मोटा याजकाँ लाजर ने भी मार नाकबा की ओजणा बणई।

¹¹काँके लाजर की वजेऊँ नरई यहूदी मनक वाँने छोड़न दिदा अन ईसू ने मानबा लागा हा।

¹²दूजाँ दन नरई लोगाँ ज्यो तेवार में आया हाँ, वणा यो हुण्यो के, ईसू यरूसलेम आरिया हे।

¹³ईं वाते वीं खजुर की डाळ्याँ लिदी अन वाँकाऊँ मलबा ने निकल्या, अन केबा लागा, “परमेसर की मेमा वेवे, परबू का नामऊँ आबावाळा ने परमेसर आसीस देवे। इजराएल का राजा ने परमेसर आसीस देवे।”

¹⁴तद्याँ ईसू ने गदेड़ी को बच्यो मल्यो, तो वो वींपे बेटग्यो। जस्यान पुवितर सास्तर में लिक्यो तको हे के,

¹⁵“हो यरूसलेम का मनकाँ, दरपो मती। देको, थाँको राजा गदेड़ी का बच्याँ पे बेटन आरियो हे।”

¹⁶वाँका चेला ने वीं टेम ईं बाताँ नंगे ने पड़ी ही, पण जद्याँ ईसू मेमा परगट वीं, तद्याँ वाँने हमज में आयो के, ईं बाताँ वींके बारा मेंईस सास्तर में लिकी गी ही के, मनक वाँकाऊँ ईं तरियाँ को वेवार किदो हो।

¹⁷तद्याँ भीड़ मेंऊँ मनकाँ गवई दिदी, ज्यो वीं टेम वाँका हाते हाँ, जद्याँ ईसू लाजर ने कबरऊँ मोतऊँ जिवायो। ईं बारा में दूँजा मनकाँ ने बतायो।

¹⁸लोग-बाग वाँकाऊँ मलबा ईंवातेइस आया हा, काँके वणा हुण्यो हो के, वणी ओ परच्यो बतायो हे।

¹⁹तद्याँ फरीसी एक-दूजाऊँ केबा लागा, “आपाँ कई ने कर सक्या हा। देको, हारी दनियाँ वाँका पाच्छे चालबा लागी हे।”

²⁰ज्यो लोग-बाग वीं तेवार की टेम यरूसलेम में आरादना करबा ने आया हा, वाँका में कुई युनानी मनक भी हा।

²¹वणा लोगाँ गलील का बेतसेदा का रेबावाळा फिलीप्पुस का नके आन वणीऊँ अरज किदी, “हुकम, माँ ईसुऊँ मलणा छारिया हाँ।”

²²तो पछे फिलीप्पुस जान अन्दरियासऊँ क्यो, तद्याँ अन्दरियास अन फिलीप्पुस दुई जान ईसुऊँ क्यो।

²³ईं बात पे ईसू वाँने क्यो, “वाँ टेम आगी हे के, मनक का पूत की मेमा वेवे।

²⁴मूँ थाँकाऊँ हाँची केवूँ हूँ के, जद्याँ तईं गऊँ को दाणो जमीं में ने पड़ जावे, वो एकलो रेवे हे, पण जद्याँ मर जावे हे, तो हेला दाणा लावे हे।

²⁵ज्यो खुद का जीवऊँ परेम राके हे, वो वींने खोई अन ज्यो अणी दनियाँ में आपणाँ जीवऊँ परेम ने राकी, वो अनंत जीवन का वाते वींने ने खोई।

²⁶यद्याँ कुई मारी सेवा करणो छावे, तो वींने मारे पाच्छे चालणोइस पेड़ी, जणीऊँ जटे मूँ हूँ, वटे वो भी वेवे। यद्याँ कुई मारी सेवा-चाकरी करी, तो मारा बापू परमेसर भी वाँको आदर-मान करी।

²⁷“अबे मारो जीव दकी हे। ईं वाते कई मूँ यो कूँ के, ‘हो बापू, मने अणी घड़ीऊँ बंचा’? ने, पण मूँ तो अणी घड़ी का दुक नेईस भोगबा आयो हूँ।

²⁸हो बापू, थाँका नाम की मेमा बतावो।” तद्याँ हरग या अवाज अई, “में मारी मेमा बतई हे अन ओरू भी बताऊँ।”

²⁹तद्याँ ज्यो मनक ऊबा तका हुणरिया हा, वणा क्यो के, “बादळो गाज्यो हे।” कणी दूजाँ यो क्यो, “कूण हरग-दुत वाँकाऊँ बात किदी हे।”

³⁰अणी पे ईसू क्यो, “आ अवाज मारा वाते ने हे, पण थाँका नफा की हे।

³¹अबे ईं दनियाँ को न्याव वेबा में हे, अबे अणी दनियाँ का हाकम ज्यो सेतान हे, वींने निकाळ दिदो जाई।

³²पण, जद्याँ मूँ ऊसो उटायो जाऊँ, तो हाराई ने मारी आड़ी खेंचू।”

³³अस्यान केन वणी परगट कर दिदो हो, वो कस्यी मोतऊँ मरी।

³⁴ईंपे लोग-बाग क्यो, “माँ सास्तर की या बात हूणी हे के, मसी हमेस्या का वाते जीवतो रेई, पछे थूँ का केवे हे के, मनक का पूत ने [4]ऊसो उटायो जाणो जरूरी हे? यो मनक को पूत कूण हे?”

³⁵ईसू वाँने क्यो, “उजितो अबाणू थोड़ीक देर ओरी थाँका बचमें रेई। जद्याँ तईं उजितो थाँका लारे हे तद्याँ तईं चालता रेवो। अस्यान ने वे के, अंदारो थाँका ऊपरे वे जावे। ज्यो अंदारा में चाले हे वो ने जाणे के, वो कटने जारियो हे।

³⁶जद्याँ तईं उजितो थाँका लारे हे, उजिता में विस्वास करो। अणीऊँ थाँ उजिता का मनक बणो।” ईं बाताँ केन ईसू पराग्या अन खुद वाँकाऊँ हपन रिया।

³⁷ईसू यहूदी का मनकाँ का हामे अतरा परच्या बताया, तो भी वाँकाणी वाँपे विस्वास ने किदो।

³⁸ताँके यसाया परमेसर का आड़ीऊँ बोलबावाळा को यो बचन पूरो वे, ज्यो वणी क्यो, “हो परबू, मारा हमच्यार को कणी विस्वास किदो हे? अन परबू की मेमा किंके ऊपरे परगट वीं हे?”

³⁹ईं वाते वीं विस्वास ने कर सक्या। काँके यसाया यो भी क्यो हे के,

⁴⁰“परमेसर वाँकी आक्याँ ने आंदी अन वाँका मन कल्डा कर दिदा हे, ताँके वीं आक्याँऊँ ने देक सके अन मनऊँ ने हमजे सके, कदी अस्यान ने वे के, वी मारा आड़ी फरे अन मूँ वाँने हव करूँ।”

⁴¹यसाया ईं बाताँ ईं वाते किदी के, वणी ईसू की मेमा देकी अन वींका बारा में बाताँ भी किदी।

⁴²ईंपे नरई यहूदी अदिकारियाँ मेंऊँ भी नरई वींपे विस्वास किदो, पण फरीसियाँ की वजेऊँ वीं ईं बात खुला में ने मानता हा, कटे अस्यान ने वे के, वाँने परातना घरऊँ बारणे काड़्या जावे,

⁴³काँके मनकाँ की बड़ई वाँने परमेसर की बड़ईऊँ घणी वाली लागती ही।

⁴⁴ईसू जोरऊँ क्यो, “ज्यो मारा पे विस्वास करे हे, वो मारा पेईस ने पण मने खन्दाबावाळा पे भी विस्वास करे हे।

⁴⁵अन ज्यो कुई मने देके हे वो मने खन्दाबावाळा ने भी देके हे।

⁴⁶मूँ दनियाँ में उजिता का जस्यान आयो हूँ, ईं वाते ज्यो कुई मारा पे विस्वास करी, वो अंदारा में ने रेई।

⁴⁷यद्याँ कुई मारी बाताँ हुणन ने माने, तो मूँ वाँने दोसी ने केवूँ, काँके मूँ दनियाँ ने दोसी ठेराबा के वाते ने, पण दनियाँ ने बंचाबा का वाते आयो हूँ।

⁴⁸ज्यो मने नकारे हे अन मारा बचनाँने ने माने हे वाँने दोसी ठेराबावाळो तो एकीस हे, ईंको मतलब जीं बचन में बताया, वींइस आकरी दन में वाँने दोसी बणाई।

⁴⁹काँके में आपणी आड़ीऊँ बाताँ ने किदी। पण बापू जणा मने खन्दायो हे वणी मने आग्या दिदी हे के, मने कई केणो अन कस्यान केणो हे।

⁵⁰अन मूँ जाणूँ हूँ के, वाँकी आग्या अनंत जीवन का आड़ी ले जावे हे। ईं वाते मूँ ज्यो कई केवूँ हूँ, वो जस्यान बापू माराऊँ क्यो, वस्यान मूँ केवूँ हूँ।”