Read Mewari यहुन्ना 14 Bible Online

यहुन्ना 14 - Mewari bible

यहुन्ना 14

¹ईसू आपणाँ चेलाऊँ क्यो, “थाँ दकी मती वेवो, पण परमेसर पे विस्वास राको अन मारा पे भी विस्वास राको।

²मारा परमेसर का घर में नरी रेवा की जगाँ हे, यद्याँ ने वेती तो मूँ थाँकाऊँ के देतो। काँके मूँ परमेसर का घर में थाँका वाते जगाँ त्यार करबा ने जावूँ हूँ।

³जगाँ बणाया केड़े मूँ पाछो थाँने लेबा ने आऊँ अन पछे आपाँ हातेईस रेवा।

⁴जटे मूँ जवूँ हूँ वटा को गेलो थाँ जाणो हो।”

⁵तो थोमा वाँकाऊँ क्यो, “हो परबू, माँ ने जाणा हाँ के, थूँ कटे जारियो हे। तो गेलो कस्यान जाणा?”

⁶ईसू वींने क्यो, “हाँच, जीवन अन गेलो मूँईस हूँ। मारा बना कुई परमेसर का नके ने जा सकी।

⁷जद्याँ थाँ मने ओळक लेता, तो मारा बाप ने भी जाणा जाता। पण अबे थाँ परमेसर ने जाणो हो अन देक्यो हे।”

⁸फिलिपुस वाँकाऊँ क्यो, “हो परबू, बापू का माने दरसण करई दे, यो माकाँ वाते घणो हे।”

⁹ईसू वींने क्यो, “हे फिलिपुस, मूँ अतरा दनाऊँ थाँरा हाते हूँ, अन कई थूँ मने ने ओळके हे? जणी मने देक्यो हे वणी बापू ने देक्या हे। तो थूँ काँ केवे हे के, ‘माने बापू का दरसण करई दे’?

¹⁰कई थूँ विस्वास ने करे के, मूँ बापू में हूँ अन बापू मारा में हे? ईं बाताँ मूँ आपणाँ आड़ीऊँ ने केवूँ हूँ, पण बापू मारा में रेन काम करे हे।”

¹¹मारो विस्वास करो के, मूँ बाप में हूँ अन बाप मारा में हे, ने तो मारा कामाँ ने देकन मारा पे विस्वास तो करो।

¹²“मूँ थाँकाऊँ सई-सई केवूँ हूँ के, ज्यो मारा पे विस्वास करे हे, वो ज्यो काम मूँ करूँ हूँ वो भी करी। पण अणीऊँ भी मोटा काम करी, काँके मूँ परमेसर के नके जारियो हूँ।

¹³ज्यो कई थाँ मारा नामऊँ मांगो, वो मूँ करूँ, ताँके पूत की वजेऊँ परमेसर की बड़ई वेवे।

¹⁴यद्याँ थाँ माराऊँ मारा नामऊँ कई मांगो, तो मूँ वो करूँ।”

¹⁵ईसू आपणाँ चेलाऊँ क्यो, “यद्याँ थाँकाणी माराऊँ परेम राको तो, तो मारी आग्या भी मानो।

¹⁶मूँ बापऊँ परातना करूँ, अन वीं थाँने एक ओरू हण्डाळ्यो देवे, ताँके वो हमेस्या थाकी लारे रेई।

¹⁷वाँ पुवितर आत्मा हे। ज्या दनियाने ने मल सके हे, काँके दनियाँ वींने ने देक सके हे अन ने ओळके हे। पण थाँ वींने ओळको हो, काँके वाँ थाँका लारी रेई अन वाँ थाँकामें वास करी।”

¹⁸“मूँ थाँने एकला ने छोड़ूँ। मूँ थाँका नके आऊँ।

¹⁹अन थोड़ीक टेम रेग्यो हे पछे ईं दनियाँ में कुई मने ने देकी पण थाँ मने देको। काँके मूँ जीवूँ हूँ अन थाँ भी जीवो।

²⁰वीं दन थाँ जाणो के, मूँ आपणाँ बाप में हूँ अन थाँ मारा में अन मूँ थाँकामें हूँ।

²¹जीं मारी आग्या माने हे। वींइस माराऊँ परेम करे हे अन ज्यो माराऊँ परेम राके हे, वाँकाऊँ मारा परमेसर परेम राकी, अन मूँ वाँकाऊँ परेम राकूँ अन आपणाँ खुद ने वाँका पे परगट करूँ।”

²²दूजो यहूदो ज्यो इसकरियोती ने हो वणी क्यो, “हो परबू, यो कस्यान वेवे के, थूँ आपणाँ खुद ने माकाँ पे परगट करणो छावो हे पण दनियाँ पे ने?”

²³ईसू वींने क्यो, “यद्याँ कुई माराऊँ परेम राकी, तो वो मारा बचनाने मानी, अन मारा बापू वाँकाऊँ परेम करी अन माँ वाँका नके आवा अन वाँका हाते रेवा।

²⁴ज्यो कुई माराऊँ परेम ने करे वो मारा बचना ने ने माने हे। ज्यो बचन थाँ हुणो हो वो मारो ने हे पण मारा बापू परमेसर को हे, जणा मने खन्दायो हे।”

²⁵“ईं बाताँ में थाँका लारे रेता तका किदी हे।

²⁶पण हण्डाळी को मतलब पुवितर आत्मा जिंने परमेसर मारा नामऊँ खन्दाई, वाँ थाँने हारी बाताँ हिकाई अन ज्यो कई में थाँकाऊँ क्यो हे, वो हारोई थाँने आद अवाड़ी।

²⁷“मूँ थाँने सान्ती देन जारियो हूँ, आपणी खुद की सान्ती थाँने देवूँ हूँ। दनियाँ देवे हे वस्यान मूँ थाँने ने देवूँ हूँ। थाँको मन दकी ने वेवे अन ने थाँ दरपे।

²⁸थाँ हुण्यो हे के में थाँकाऊँ क्यो, ‘मूँ जारियो हूँ पण थाँका नके पाछो आऊँ।’ यद्याँ थाँ माराऊँ परेम राकता तो थाँ राजी वेता के, मूँ बापू परमेसर का नके जारियो हूँ। काँके बापू परमेसर माराऊँ मोटा हे।

²⁹यो हारोई वेबा के पेल्याँई में थाँने हारोई के दिदो, ताँके यो वे जदी थाँ हाराई विस्वास करो।

³⁰“मूँ अबे थाँकाऊँ ओरी बाताँ ने कर सकूँ हूँ, काँके अणी दनियाँ का हाकम सेतान आवे हे। ईंको मारा पे कई हक ने हे।

³¹पण यो ईं वाते वेवे हे के, दनियाँ हमजे के, मूँ बापू परमेसरऊँ परेम राकूँ हूँ अन जस्यान बाप मने आग्या दिदो हे वस्यानीस करूँ हूँ। “अबे उटो अटाऊँ चाला परा।”