Read Mewari यहुन्ना 16 Bible Online

यहुन्ना 16 - Mewari bible

यहुन्ना 16

¹“ईं बाताँ में थाँकाऊँ ईं वाते क्यो हो, ताँके थाँ पाप ने पड़ो।

²वीं थाँने परातना घरऊँ बारणे काड़ देई, पण वा टेम आई जद्याँ कुई थाँने मार नाकी, अन अस्यान करन वी हमजी के, ‘आपाँ परमेसर की सेवा कररिया हे।’

³वीं यो ईं वाते करी काँके, वीं बापू परमेसर ने ने जाणे अन ने मने जाणे हे।

⁴पण में ईं बाताँ ईं वाते थाँने क्यो के, जद्याँ अणाको टेम आई तो थाँने आद आ जई के, में थाँने पेल्याई के दिदो हो। “में सरू में थाँने ईं बाताँ ईं वाते ने किदी, काँके मूँ थाँका हाते हो।

⁵अबे मारी टेम आगी हे के, मूँ मने खन्दाबावाळा का नके जाऊँ हूँ अन थाकामूँ कई माराऊँ ने पुच्छे के, ‘थूँ कटे जारियो हे?’

⁶पण में ईं बाताँ थाँकाऊँ किदी हे, ईं वाते थाँका मन दकऊँ भरग्या हे।

⁷तो भी मूँ थाँकाऊँ सई केवूँ हूँ के, मारो जाणो थाँका वाते हव हे, काँके यद्याँ मूँ ने जाऊँ तो वो हण्डाळी थाँका नके ने आई। पण यद्याँ मूँ जाऊँ, तो वींने थाँका नके खन्दा देऊँ।

⁸जद्याँ वो आई तो वो साबत करी के, पाप, धारमिकता अन परमेसर का न्याव का बारा में दनियाँ का लोगाँ की होच गलत हे।

⁹वो पाप का बारा में ईं वाते बताई, काँके दनियाँ का मनकाँ को मारा पे विस्वास ने करणो पाप हे।

¹⁰वो धारमिकता की बात ईं वाते बताई, काँके मूँ बापू का नके जारियो हूँ अन थाँ अबे ओरी मने ने देक पावो।

¹¹अन न्याव की बात ईं वाते बताई, काँके परमेसर पेल्याईं ते कर मेल्यो हो के, ईं दनियाँ का हाकम ज्यो सेतान हे, वो दोसी ठेरायो ग्यो।

¹²“मने थाँकाऊँ दूजी ओरी नरी बाताँ केणी हे, पण अबाणू थाँ वाँने सेण ने कर सको।

¹³पण जद्याँ हाँच की आत्मा आई, तो थाँने हारई हाँच को गेलो बता देई, काँके वाँ खुद का आड़ीऊँ ने केई पण ज्यो कई हूणी वो केई अन आबावाळी बाताँ थाँने बताई।

¹⁴वाँ मारी मेमा करी, काँके वाँ मारी बाताँ मूँ लेन थाँने बताई।

¹⁵ज्यो कई परमेसर को हे, वो हारोई मारो हे। ईं वाते में क्यो के, वाँ पुवितर आत्मा मारी बाताँ मूँ लेन थाँने बताई।

¹⁶“थोड़ाक टेम केड़े थाँ मने ने देको अन पछे थोड़ीक टेम केड़े मने देको।”

¹⁷तद्याँ वाँका कुई चेला एक-दूजाऊँ क्यो, “यो कई हे ज्यो यो आपाऊँ केवे हे, ‘थोड़ीक टेम केड़े मने थाँ ने देको अन पछे थोड़ीक टेम केड़े थाँ मने देको,’ अन ‘यो ईं वाते के, मूँ बापू का नके जाऊँ हूँ’?

¹⁸अन या ‘थोड़ीक टेम केड़े’ ज्यो यो केवे हे, या कई बात हे? माँके हमज में ने आरियो हे के, यो कई केवे हे।”

¹⁹ईसू यो हमजन के, “वीं माराऊँ कई पूँछणा छारिया हे।” ईं वाते वणा क्यो, “कई थाँ एक-दूजाऊँ मारी ईं बाताँ का बारा पूँछरिया हो के, ‘थोड़ीक टेम केड़े थाँ मने ने देको अन पछे थोड़ीक टेम में मने देको’?

²⁰मूँ थाँने सई-सई केवूँ हूँ के, थाँ रोवो अन होक करो, पण आकी दनियाँ राजी वेई। थाँने दुक वेई, पण थाँको दुक सक में बदल जाई।

²¹बाळक जणवा की टेम लुगई ने पिड़ा वेवे हे, काँके वाँके दुक की घड़ी हे। पण जद्याँ वाँ बाळक ने जनम दे देवे, तो वाँ अणी खुसीऊँ के, दनियाँ में एक बाळक जनम्यो हे, वीं दुक की घड़ी ने पाच्छी आद ने राके हे।

²²ईं वाते थाँने भी अबाणू दुक हे, पण मूँ थाँकाऊँ पाछो मलूँ अन थाँको जीवड़ो खुसीऊँ भर जाई अन थाँकी खुसी थाँकाऊँ कुई ने कोस सकी।

²³“वीं दन थाँ माराऊँ कई ने पूछो। मूँ थाँने सई-सई केवूँ हूँ यद्याँ मारा बापूऊँ कई मांगो तो वो मारा नामऊँ थाँने दी देई।

²⁴अबाणू तईं थाँ मारा नामऊँ कई ने माग्यो, मांगो तो पावो अणीऊँ थाकी खुसी पुरी वे जाई।

²⁵“में ईं बाताँ थाँकाऊँ केण्याँ में किदी हे। पण वाँ टेम आरी हे के, मूँ थाँकाऊँ पाच्छी केण्याँ में बाताँ ने करूँ। पण खुलन थाँने बाप का बारा में बताऊँ।

²⁶वीं दन थाँ खुद मारा नामऊँ मांग सको अन मने या जरूत ने पड़ी के, मूँ थाँका वाते बापऊँ मांगू।

²⁷मारा बापू तो खुदई थाँकाऊँ परेम करे हे, काँके थाँ माराऊँ परेम किदो अन यो भी विस्वास किदो हे के, मूँ परमेसर का आड़ीऊँ आयो हूँ।

²⁸हा, मूँ परमेसर का आड़ीऊँ ईं दनियाँ में आयो अन अबे ईं दनियाँ ने छोड़न बापू का नके जारियो हूँ।”

²⁹वाँका चेला क्यो, “देको, अबाणू थाँ खुलन बाताँ केरिया हो अन कुई केणी ने केरिया हो।

³⁰अबे माँ जाणग्या के, थूँ हारोई जाणे हे अन ईंमें थाँकी मरजी कोयने हे के, कुई थाँकाऊँ कई पूछे। अणीऊँ माँ विस्वास करा हाँ के, थूँ परमेसर की आड़ीऊँ खन्दायो तको हे।”

³¹यो हुणन ईसू वाँने क्यो, “कई आकरी में थाँने विस्वास वेग्यो हे?

³²देको, वा टेम आरी हे पण आगी हे के, थाँ हाराई अटने-वटने वेन आपणो आपणो गेलो नापो, अन मने एकलो छोड़ देवो। पण मूँ एकलो कोयने काँके बापू मारे लारे हे।

³³में थाकाँऊँ ईं बाताँ ईं वाते किदी के, थाँने माराऊँ सान्ती मले, दनियाँ में तो थाँने दुक मल्यो हे पण हिम्मत राको, में दनियाँ ने जीत लिदी हे।”