Read Mewari यहुन्ना 17 Bible Online

यहुन्ना 17 - Mewari bible

यहुन्ना 17

¹ईसू ईं बाताँ किदी अन आपणी मुण्डो हरग आड़ी करन क्यो, “ओ मारा बापू, वाँ टेम आगी हे, आपणाँ पूत की मेमा करो, ताँके पूत भी थाकी मेमा करे।

²काँके थाँ वींने हाराई मनकाँ का ऊपरे अदिकार दिदो के, ज्याँने थाँ वींने दिदा हे वणा हाराई ने वो अनंत जीवन देवे।

³अन अनंत जीवन यो हे के, वीं एकाएक हाँचा परमेसर ने अन ईसू मसी ने, जिंने थाँ खन्दायो हे, ओळके।

⁴ज्यो काम थाँ मने करबा ने दिदो हो, वींने पूरो करन में धरती पे थाँकी मेमा परगट किदी हे।

⁵अन अबे हो बापू, थूँ आपणाँ हाते मारी मेमा वीं मेमाऊँ करज्यो दनियाँ का बणावाऊँ पेल्याई आपणाँ हाते ही।

⁶“में थाँका मेमावान नाम ने वणा मनकाँ ने परगट किदा हे, ज्याँने थाँ दनियाऊँ मने दिदा। वीं हाराई थाँका हा अन थाँ वणा हाराई ने मने दिदा अन वाँकाणी थाँका बचना ने मान लिदा हे।

⁷अबे वीं हमजग्या हे के, ज्यो कई थाँ मने दिदो, वो हारोई थाँका आड़ीऊँ हे।

⁸काँके ज्यो बचन थाँ मने दिदो, में वाँने वोईस बचन दिदो। अन वणा वींको विस्वास किदो। अन वीं ईं हाँच ने जाण लिदो हे के, मूँ थाकी आड़ीऊँ आयो हूँ, अन विस्वास कर लिदो हे के, थाँईस मने खन्दायो हे।

⁹“मूँ वाँका वाते परातना करूँ हूँ, मूँ दनियाँ का वाते परातना ने करूँ हूँ। पण वाँका वाते ज्याँने थाँ मने दिदा, काँके वी हाराई थाँका हे।

¹⁰अन ज्यो कुई मारा हे वीं हाराई थाँका हे, अन ज्यो कुई थाँको हे वो मारो हे अन अणाऊँ मारी मेमा वीं हे।

¹¹मूँ अबे दनियाँ में ने रेऊँ, पण ईं हाराई दनियाँ में रेई, अन मूँ थाँका नके आवूँ हूँ। हो पवितर बापू आपणाँ वीं नाम की तागतऊँ ज्यो थाँ मने दिदो हे, वाँकी रुकाळी करो, ताँके वीं हाराई आपणे जस्यान एक वे सके।

¹²जद्याँ मूँ वाँका लारे हो, तो में थाँका नाम की तागतऊँ ज्यो थाँ मने दिदो हे, वाँकी रुकाळी किदी। में वाँने हमाळ राक्या अन बेस वीं मनक छोड़न ज्यो नास का आड़ी लेजाबावाळा गेले चाल पड़्यो, ओर किंकोई नास ने व्यो, ईं वाते के पवितर सास्तर में ज्यो बतायो ग्यो वो पूरो वेवे।

¹³“अबाणू मूँ थाँका नके आवूँ हूँ, पण ईं हारी बाताँ दनियाँ ने बताऊँ हूँ, ताँके वीं मारा आणन्दऊँ भर जावे।

¹⁴में थाँको बचन वाँने दिदो, अन दनियाँ वाँकाऊँ दसमणी किदी, काँके जस्यान मूँ दनियाँ को ने, वस्यान वीं भी दनियाँ का कोयने हे।

¹⁵मूँ या परातना ने करूँ के, थूँ वाँने दनियाऊँ उठा ले, पण या के, थूँ वाँने बुरईऊँ बंचान राक।

¹⁶जस्यान मूँ दनियाँ को ने हूँ, वस्यानीस वीं भी दनियाँ का ने हे।

¹⁷हाँचऊँ वाँने पुवितर करन थाँरी सेवा का वाते त्यार कर। थाँका बचन हाँचा हे।

¹⁸जस्यान थाँ मने दनियाँ में खन्दायो, वस्यानीस में भी वाँने दनियाँ में अलग अलग जगाँ में खन्दाया हे।

¹⁹मूँ वाँका वाते खुद ने पुवितर करन थाँरी सेवा करबा का वाते देवूँ हूँ। जणीऊँ वीं भी हाँचऊँ पुवितर वेन थाँरी सेवा का वाते खुद ने दिदे।

²⁰“मूँ बेस अणाका वातेईस परातना ने करूँ हूँ, पण वाँका वाते भी जीं अणाका बचना ने हुणन मारे पे विस्वास करी।

²¹हो बापू, मारी या अरज हे के, वीं हाराई एक वेवे, जस्यान मूँ थाँकामें हूँ अन थाँ मारा में हो, वस्यानीस वीं भी आपाँ में एक वेवे, जणीऊँ दनियाँ विस्वास करे के, थाँ मने खन्दायो हे।

²²वाँ मेमा ज्या थाँ मने दिदी में वाँने दिदी हे, ताँके वीं वस्यानीस एक वेवे जस्यान आपाँ एक हाँ।

²³मूँ वाँका में अन थाँ मारा में वेवो, जणीऊँ वीं पुरी तरियाऊँ आपाँ में एक वे जावे। अन दनियाँ जाणे के, थाँ मने खन्दायो हे, अन जस्यान थाँ माराऊँ परेम किदो वस्यानीस वाँकाऊँ भी परेम करो हो।

²⁴“हो बापू, मूँ छावूँ हूँ के, ज्याँने थाँ मने दिदा हे, वीं जटे मूँ हूँ वटे वीं भी मारा लारे वेवे। ताँके वीं मारी वणी मेमा ने देके ज्यो थाँ मने दिदी, काँके थाँ दनियाँ का बणावाऊँ पेल्याऊँ माराऊँ परेम किदो।

²⁵हो धरमी बापू, दनियाँ थाँने ने ओळक्यो, पण मूँ थने ओळकूँ हूँ, अन मारा विस्वासी भी जाणे के, थाँईस मने खन्दायो हे।

²⁶में थाँको मेमावान नाम ने वाँने बतायो अन बतातो रेऊँ, जणीऊँ ज्यो परेम थाँने माराऊँ हो वाँका में भी रेवे, अन मूँ वाँका में रेवूँ।”