Read Mewari यहुन्ना 19 Bible Online

यहुन्ना 19 - Mewari bible

यहुन्ना 19

¹तद्याँ पिलातुस ईसू ने पकड़वान कोड़ा लगवाया।

²पछे सपायाँ काँटा की डाळ्याँ को मुकट गूँतन ईसू का माता पे मेल दिदो। अन वींने दरबारी गाबा पेरायाँ।

³अन वींका नके आन क्यो, “यहूदियाँ का राजा अमर रेवे!” अन वींके रेपटाँ मेली।

⁴तद्याँ पिलातुस पाछो बारणे आन लोगाऊँ क्यो, “देको, मूँ वींने थाँका नके पाछो बारणे लावूँ हूँ। ईं वाते थाँ हमजो के, मूँ वींमें कई भी दोस ने पावूँ हूँ।”

⁵तद्याँ ईसू काँटा को मुकट अन दरबारी गाबा पेरिया तका बारणे निकळ्यो अन पिलातुस मनकाँऊँ क्यो, “देको, ओ रियो वो मनक।”

⁶जद्याँ मोटा याजकाँ अन मन्दर का चोकीदाराँ वींने देक्यो, तो हाको करन क्यो, “ईंने हूळी पे चड़ई दो, ईंने हूळी पे चड़ई दो।” पिलातुस वाँकाऊँ क्यो, “थाँईस ईंने हूळी पे चड़ावो, काँके में ईंमें कई दोस ने पायो हे।”

⁷यहूदी मनकाँ वींने क्यो, “आपणो भी नेम हे अन वीं नेमा का हस्याबूऊँ वो मोत के घाट उतारबा के लायक हे। काँके अणी खुद ने परमेसर को पूत बतायो हे।”

⁸जद्याँ पिलातुस आ बात हूणी, तो वो भी घणो दरपग्यो।

⁹अन पछे दरबार का मयने जान ईसुऊँ क्यो, “थूँ कटा को हे?” पण, ईसू वींने कई जबाव ने दिदो।

¹⁰ईंपे पिलातुस ईसुऊँ क्यो, “थूँ माराऊँ काँ ने बोलरियो हे? कई थूँ ने जाणे के, थने छोड़बा को हक मारा नके हे अन थने हूळी पे चड़ाबा को भी मने हक हे?”

¹¹ईसू जवाब दिदो, “यद्याँ परमेसर थाँने मारा पे यो हक ने देता, तो थाँ कई ने कर सकता। तो थारो मारा पे कई हक ने वेतो। ईं वाते जणा मने थाँरा हाताँ में हूँप्यो हे, वीं थाँराऊँ भी हेला पापी हे।”

¹²ईंपे पिलातुस वींने छोड़ देणो छायो हो। पण, यहूदी मनकाँ ज्योर की हाको करन क्यो, “यद्याँ थूँ ईंने छोड़ हे, तो थूँ रोम राजा का हण्डाळ्यो ने हे। ज्यो कुई खुद ने राजा बणावे हे। वो रोमी सरकार को विरोदी हे।”

¹³ईं बाताँ हुणन पिलातुस ईसू ने बारणे लायो अन वटे न्याव की गाद्दी पे बेटग्यो, वीं जगाँ ने भाटो को चबुतरो भी केता हो। जिंने इबरानी भासा में “गब्बता” भी केता हा।

¹⁴यो फसे का तेवार की त्यारी को दन हो अन दपराँ की बारा बज्याँ के लगे-भगे टेम हो। तद्याँ पिलातुस यहूदियाँऊँ क्यो, “देको, ओ रियो थाँको राजा।”

¹⁵पण, वीं ओरी ज्योरऊँ हाको करन क्यो, “ईंने मारी नाको, ईंने मारी नाको, ईंने हूळी पे चड़ई दो।” पिलातुस वाँने क्यो, “कई थाँ छावो हो के, मूँ थाँका राजा ने हूळी पे चड़ई दूँ?” मुक्य याजकाँ जबाव दिदो, “रोमी राजा ने छोड़न माँको कुई दूज्यो राजा कोयने हे।”

¹⁶तद्याँ पिलातुस ईसुने वाँका हाताँ में हूँप दिदो, ताँके वींने हूळी पे चड़ायो जावे। तद्याँ रोमी सपायाँ ईसू ने पकड़न लेग्या।

¹⁷अन ईसू आपणी हूळी उठातो तको वीं जगाँ पे ग्यो ज्या “कपाळ की जगाँ” केवाती ही अन इबरानी भासा में “गलगता” केवाती ही।

¹⁸वटे वणा वींने अन वींकी लारे का दो जणा ने भी हूळ्याँ पे चड़ाया। एक ने अटने अन एक ने वटने अन दोयाँ के बचमें ईसू ने।

¹⁹पिलातुस एक दोसपतर लिकन हूळी पे टाँक दिदो अन वींमें ओ लिक्यो हो, “नासरत का ईसू, यहूदियाँ को राजा।”

²⁰ओ दोसपतर नरई यहूदियाँ भण्यो, काँके वीं जगाँ जटे ईसू हूळी पे चड़ायो ग्यो हो, ज्याँ नगर का भड़े ही अन वो पतर इबरानी, लतीनी अन युनानी भासा में लिक्यो तको हो।

²¹तद्याँ मोटा याजकाँ पिलातुस नके जान क्यो, “थें ज्यो पतर पे ‘यहूदियाँ को राजा’ लिकवायो हे, वींने बदलवान अस्यान लिका के, ‘वणी क्यो के, मूँ यहूदियाँ को राजा हूँ।’”

²²पिलातुस क्यो, “में ज्यो लिकवा दिदो हे, बेस वो लिकवा दिदो हे।”

²³जद्याँ सपायाँ ईसू ने हूळी पे चढा दिदो हो। तो वाँका गाबा लेन च्यार भाग किदा। हाराई सपायाँ का वाते एक-एक भाग ले लिदो अन कुरतो भी ले लिदो। पण, कुरतो बनाई हींम्यो तको ऊपरेऊँ नीचे तईं हाताऊँ बणायो तको हो।

²⁴ईं वाते वाँकाणी एक-दूजाऊँ क्यो, “आपाँ ईंने ने फाड़ा पण, ईंका वाते गोट्याँ नाका के, ओ किंको वेई।” ओ ईं वाते व्यो के, पवितर सास्तर में ज्यो लिक्यो हे, वो पूरो वे, “वाँकाणी मारा गाबा एक-दूँजा में बाँट लिदा, अन मारा कुरता का वाते कागद की गोटी नाकी।” ईं वाते सपायाँ अस्यानीस किदो।

²⁵ईसू की हूळी का भड़े वींकी बई, वींकी मासी, क्लोपास की घरवाळी मरियम अन मरियम मगदलीनी ऊबी ही।

²⁶जद्याँ ईसू आपणी बई अन वो चेला ज्यो लाड़लो केवातो हो, भड़े ऊबा देक्या तो आपणी बईऊँ क्यो, “ओ मास्या, ओ थारो बेटो हे।”

²⁷तद्याँ वणा आपणाँ चेलाऊँ क्यो, “आ थारी बई हे।” अन वीं टेमऊँ वो चेलो वींने आपणाँ घरे लेग्यो।

²⁸ईंका केड़े ईसू ओ जाणन के, अबे हारोई पूरो वेग्यो हे। तो वणी पवितर सास्तर में ज्यो बतायो ग्यो हो वो पूरो वेवा वाते क्यो, “मूँ तरियो हूँ।”

²⁹वटे एक खाटा अंगूरा को रसऊँ भरियो तको ठामड़ो वटे मेली मेल्यो हो। ईं वाते वाँकाणी खाटा अंगूरा का रस में नाक्यो तको फूंबो एक रूँकड़ा की कामड़ी पे मेलन वींका मुण्डा के अड़ायो।

³⁰अन पसे ईसू अंगूरा का रस चाक्या केड़े बोल्यो, “पूरो व्यो।” अन मातो नमान जीव छोड़ दिदो।

³¹ओ सबत की त्यारी को दन हो, सबत के दन वाँकी लासा हूळी पे ने टाँगी रेवे, ईं वाते यहूदी अदिकारियाँ पिलातुसऊँ अरज करन क्यो, वाँका पंगा ने तोड़न वाँकी लासा ने हूळीऊँ उतारन वटेऊँ छेटी कर दा काँके वो सबद को दन घणो खास दन हो। वो ईं वजेऊँ खास हो, काँके ओ फसे का तेवार की टेम में आरियो हो।

³²ईं वाते सपायाँ आन वाँ दुई मनकाँ का पगाँ ने तोड़ नाक्या, ज्याँने ईसू का हाते हूळी पे चड़ाया ग्या हा।

³³पण, जद्याँ ईसू का नके आन देक्यो के, वो मरग्यो हे, तो वाँकी टांगा ने तोड़ी।

³⁴अन वणा सपायाँ मेंऊँ एक जणे वाँकी पाळी में भालो घुसा दिदो अन जणीऊँ तरत लुई अन पाणी निकळ्यो।

³⁵यो बताबावाळो वो हे जणी यो देक्यो जणीऊँ थाँ भी विस्वास करो। अन वो जाणे के, वो हाँच बोले हे।

³⁶ईं बाताँ ईं वाते वींके, पवितर सास्तर में ज्यो बतायो ग्यो हो वो पूरो वेवे के, “वींको एक भी हाड़क्यो ने तोड़्यो जाई।”

³⁷पछे एक ओरी दूजी जगाँ ओ लिक्यो हे के, “जणी वींके भालो घुसायो हे, वींने वीं देकी।”

³⁸अणा बाताँ केड़े अरमतिया को रेबावाळे युसुप ज्यो ईसू ने मानबावाळो हो। पण यहूदी अदिकारियाँ की दरपऊँ आ बात छाने राकतो हो, वणी पिलातुसऊँ अरज किदी के, कई वो ईसू की लास लेजा सके हे। पिलातुस वींकी अरज हूणी अन वो आन ईसू की लास लेग्यो।

³⁹निकेदुमस, ज्यो हाराऊँ पेल्या ईसू का नके रात ने ग्यो हो। वो वटे एलवो अन गंधरस मलई तकी चीज लेन आयो ज्या लगभग तीस किलो ही।

⁴⁰पछे वीं ईसू की लास लेग्यो। अन यहूदी मनकाँ के लास ने गाड़बा की रीत की तरियाऊँ हव बाना का तेल की लारे कापळा में वींने लपेट्यो।

⁴¹वीं जगाँ पे जटे ईसू हूळी पे चडाया ग्या हा। वींका नकेईस एक बाग हो अन वीं बाग में एक भाटा में खोदी तकी नुवी कबर ही। जिंमें कदी भी कणी लास ने राकी ही।

⁴²काँके सबद को दन सरू वेबावाळो हो, अन वाँ कबर भी नकेईस ही, तो वणा ईसू की लास वींमें मेल दिदी।