Read Mewari यहुन्ना 2 Bible Online

यहुन्ना 2 - Mewari bible

यहुन्ना 2

¹पछे तीजे दन गलील परदेस का काना नगर में किंको ब्याव हो अन ईसू की माँ भी वटे ब्याव में ही।

²ईसू अन वींका चेला ने भी वीं ब्याव में नुत्या ग्या हा।

³वटे जद्याँ अंगूरा को रस खतम वेग्यो, तो ईसू की माँ ईसुऊँ क्यो, “अटे अबे अंगूरा को रस खतम वेग्यो हे।”

⁴ईसू क्यो, “ओ मास्या, मने कई करबा का वाते मती केवो। अबाणू मारी टेम ने अई हे।”

⁵ईसू की माँ नोकर-चाकरऊँ क्यो, “वो ज्यो कई थाँकाऊँ केवे, थाँ वो करज्यो।”

⁶विदी-विदान का जस्यान यहूदी मनकाँ के हापड़बा-धुपड़बा की रीत ही। ईं वाते वटे पाणी भरबा का भाटा का छे कळा पड़्या तका हाँ, वणा हरेक कळा में लगभग हो लीटर तईं पाणी भरियो जा सकतो हो।

⁷ईसू वणा नोकर-चाकरऊँ क्यो, “अणा कळा ने पाणीऊँ भर दो।” तो नोकराँ वाँने लबा-लब भर दिदा।

⁸पछे पाछो वणा नोकर-चाकरऊँ क्यो, “ईंमूँ थोड़ोक पाणी लो अन ईंने जीमणा का मुक्या का नके ले जावो।” अन वीं लेग्या।

⁹जद्याँ मुक्ये ओ पाणी चाक्यो, ज्यो अंगूरा को रस बणग्यो हो, वो ने जाणतो हो के, ओ कटाऊँ आयो, पण जणा नोकर-चाकर पाणी काड्यो हो, वीं जाणता हाँ। तो वणी मुक्ये बींद ने बलायो,

¹⁰अन वणीऊँ क्यो, “हाराई तो पेल्याँ हव अंगूरा को रस परुसे हे अन जद्याँ पावणा घणा पीन धाप जावे हे। तो वाँने, हलको अंगूरा को रस देवे हे, पण थाँ हव रस अबाणू तईं राक मेल्यो हे।”

¹¹ईसू गलील का काना नगर में आपणो ओ पेलो परच्यो देन आपणी मेमा परगट किदी अन वाँका चेला वाँके ऊपरे विस्वास किदो।

¹²ईंका केड़े ईसू अन वाँकी माँ अन वाँका भई अन वाँका चेला कफरनूम नगर में ग्या अन वीं वटे थोड़ाक दन तईं रिया।

¹³यहूदियाँ को फसे को तेवार लगतो हो, ईं वाते ईसू यरूसलेम ग्या।

¹⁴ईसू मन्दर का चोक में आया तो वणा ढान्ढा-ढोर, गारा अन परेवड़ा ने बेचबावाळा अन रिप्या-कोड़ी को लेण-देण करबावाळा ने बेट्या तका देक्या।

¹⁵ईं वाते ईसू हण को कोड़ो बणान हाराई ढान्ढा-ढोर अन गारा ने मन्दर का चोकऊँ बारणे काड़ दिदा, अन लेण-देण करबावाळा का रिप्या-कोड़ी बखेर दिदा, अन वाँका तकता उळट-पुळट कर दिदा।

¹⁶अन परेवड़ा ने बेचबावाळा ने तापड़ता तका क्यो, “अणाने अटूँ ले जावो। मारा बाप का घर ने वोपार को घर मती बणावो।”

¹⁷तद्याँ वाँका चेला ने आ बात फटाकऊँ आद अई के, सास्तर में लिक्यो हे, “थाँका घर का वाते मारो परेम मने खारियो हे।”

¹⁸ईं बात पे यहूदी अदिकारी ईसुऊँ क्यो, “थूँ माने अस्यो कई परच्यो बता सके हे जणीऊँ माँने यो पतो लागे के, थूँ ज्यो कररियो हे, वो करबा को थने हक हे?”

¹⁹ईसू वाँने जवाब दिदो, “ईं मन्दर ने धड़ा दो, मूँ ईंने तीन दनाँ में पाछो बणा देऊँ।”

²⁰ईंपे यहूदी मनकाँ क्यो, “ईं मन्दर ने बणावा में छियाळी वर लागा, अन कई थूँ ईंने तीन दनाँ में पाछो बणा देई?”

²¹पण ईसू आपणी बात में आपणाँ देह का मन्दर का वाते क्यो हो।

²²आगे जान जद्याँ वो मरिया तकाऊँ पाछो जी उठयो तो वाँका चेला ने यो आद आयो हो के, वाँकाणी ओ क्यो हो। अन वणा पवितर सास्तर अन वो बचन ने ज्यो ईसू क्यो, वींपे विस्वास किदो।

²³जद्याँ ईसू यरूसलेम में फसे का तेवार की टेम में हो, तद्याँ नरई लोग-बाग वाँका परच्या पे अन ज्यो वीं करता हा, वाँने देकन वींपे विस्वास किदो।

²⁴पण ईसू आपणाँ खुद ने वाँका भरोस्ये ने हुप्यो, काँके वीं हाराई ने जाणता हा।

²⁵अन ईसू ने ईं बात की कई जरुरत ने हे के, कुई वाँने आन लोगाँ का बारा में बतावे, काँके लोगाँ का मना में कई चालरियो हे, वींने वो हव तरियाऊँ जाणतो हो।